Mudi bena dîku bambuluishangana menemene​—Mu dilonga dia Bible

¹ Bulelela budi buvuija nsombelu wa dîku mulenga ne wa disanka, kadi dilubuluka mu disadila Yehowa kadiena didivuila nkayadi nansha. Bidi bikengela dîba ne madikolela bua kuibaka dîku dikole mu nyuma. Bushuwa bidi bikengela bua bena dîku bakuate mudimu mukole pamue ne kipatshila aka. Tshitupa etshi tshia kumpala tshia tshiena-bualu tshiapatuka mu bitupa bisatu netshishindamene pa mushindu udi bena dîku mua kuambuluishangana bua kuikala ne tshibidilu tshimpe tshia dilonga.

² Pa kubala Bible dituku dionso: Nsumuinu 24:5 udi wamba ne: “muntu wa dimanya udi mua kuvudija bukole buende.” (MMM) Dimanya dipetela ku dibala dia Dîyi dia Nzambi pa tshibidilu didi dipesha muntu bukole bua munda budiye ukengela bua kukandamena Satana udi uluisha makanda ende a mu nyuma. (Mus. 1:1, 2) Nutu nubala Bible pamue dituku dionso mu dîku anyi? Ndongamu wa Kalasa ka Mudimu wa Teokrasi udi ufila “Ndongamu Musakidila wa Dibala dia Bible” bua lumingu luonso lua mu tshidimu. Dilonda ndongamu eu didi dilomba dîku bua kuangata anu minute dikumi patupu ku dituku. Nusungule dîba diakanyine, bu mudi pa didia dia mu dinda, kunyima kua didia dia dilolo, anyi kumpala kua kulala, bua kubala Bible ne kukonkonona mvese wa dituku mu Tukonkononayi Mifundu. Bualu ebu buikale tshitupa tshia malu a mu dîku a buatshiabuatshia.

³ Pa kulonga bonso pamue lumingu luonso: Dilonga dia Bible mu dîku didi ne bua kuikala bualu bua mushinga mukole bua ku lumingu luonso bua bena dîku. Muena dîku yonso udi ne bua kufila diende dikuatshisha ku dilonga edi pa kudifilamu ne muoyo mujima. Mfumu wa dîku neakonkonone majinga a dîku padiye usungula malu a kulonga, dituku, dîba ne bule bua dilonga. Nuteke dilonga dia mu dîku pa muaba wa kumpala mu ndongamu wa ku lumingu. Kanulekedi malu a mushinga mukese alua kunupumbisha to.​—Filip. 1:10, 11.

⁴ Tatu kampanda uvuabu bela nshinga misangu mivule kumbelu bua malu a bungenda uvua utula telefone dîba dia dilonga dia mu dîku. Pavua basumbi ba bintu balua kumbelu, uvua ubalomba bua kubuela mu dilonga anyi bua kuindila too ne pavuadi dijika. Tatu eu uvua mupangadije bua tshintu nansha tshimue katshipangishi dilonga dia mu dîku. Kuenza nenku kuvua ne buenzeji bukole kudi bana bende. Mudimu wende wa bungenda wakaya pawu kumpala.

⁵ Mmunyipu mudibi bisankisha padi bena mu dîku bambuluishangana mu midimu ya mu nyuma! Netupete dibenesha dia Yehowa bituenza madikolela ne lulamatu bua kudifila tshishiki mu dilonga dia Bible mu dîku.​—Mus. 1:3.