Mushindu wa kupeta disanka mu dienza bayidi

DIMUE dia ku masanka muondoke adi muntu mua kupeta ng’edi dia kuikala muenzejanganyi wa mudimu ne Nzambi. Lelu’eu, mudimu wa Nzambi udi ukonga diunguija banangi ba buakane mu tshisumbu tshia Buena-nkristo ne kubalongesha bua kuikalabu ne nsombelu bu bena nkristo ne kabidi bua dibuela mu bulongolodi bupiabupia.​—Mika 4:1-4; Matayo 28:19, 20; 2 Petelo 3:13.

Bidi mpokolo wa disanka dinene bua Bantemu ba Yehowa mu Amerike Latine pa kumona muliyo wa bantu balua bayidi ba Yezu Kristo bituadijile ku 1980. Mu budimi ebu budi bukuama mamuma mavule, mùdì bavule banemeka ne bitabuja Bible, bamue ba-ministre ba ku dîba ne ku dîba mbakumbane mua kuambuluisha makumi a bantu bua kulambula mioyo yabu kudi Yehowa. Bu mudibu ne dimonamona divule nunku, pamu’apa badi mua kutulondela tshintu kampanda pa bidi bitangila disanka dia dienza bayidi. Imue ya ku mibelu yabu idi mua kukuambuluisha bua kupeta disanka mu dienza bayidi muaba uudi musombele.

Disunguluja badi mua kulua “mikoko”

“Panuafika mu musoko munene anyi mu musoko mukese, kebayi udi mudilongolole mua kunuakidila,” ke muakamba Yezu pakatumaye bapostolo bende bua kuyisha. (Matayo 10:11, Muanda Mulenga Lelu) Paudi uya kukumbula bantu, mmunyi muudi mua kusunguluja aba badi mua kuambuluishibua mu nyuma? Edward, ministre wa ku dîba ne ku dîba munkatshi mua bidimu bipite pa 50, udi wamba ne: “Badi baleja ngikadilu eu ku nkonko yabu ya nsongo ne disankishibua diabu padi mandamuna mashila pa Mifundu afidibua.” Carol udi usakidila ne: “Biankuatshila muntu bualu buende nkayende anyi diditatshisha diende, bushuwa alu ndubila bua diambuluisha. Ndi nteta bua kupeta mamanyisha makuatshishi mu mikanda ya Société Watch Tower. Ditabalela dia mushindu eu dia muntu pa nkayende ditu pa tshibidilu difikisha ku dilonga dia Bible.” Kadi, kabitu misangu yonso bipepele bua kusunguluja bena mutshima mudiakaje to. Luis udi ulonda ne: “Bamue bàkamuènekà bu bavua ne disankidila divule bua bulelela bakadisokolola muvuabu kabayi babusankidila nansha kakese, kadi bakuabu bavua bamueneka bu bavua babenga ku ntuadijilu bakashintuluka pakumvuabu tshidi Bible wamba mu bulelela buonso.” Bu mudi bena Amerike Latine bavule banemeka Bible, ùdi usakidila ne: “Ndi nsunguluja aba badi mua kuambuluishibua mu nyuma padibu banyisha lukasa tshidi Bible ulongesha kunyima kua meme mumane kubalejatshi.” Kuambuluisha ‘badi badilongolole mua kutuakidila’ aba bua kulubuluka mu nyuma kudi kutuala disanka dilelela ne disankishibua. Mmunyi muudi mua kuenza nunku?

Dituadija malonga a Bible

Ditumika ne biumvuiji bia Bible bipatula kudi “mupika wa lulamatu ne wa budimu” ditu pa tshibidilu mushindu mutambe buimpe bua kuambuluisha bantu bua kumvua bulelela bua mu Bible. (Matayo 24:45, NW) Mmunyi muudi mua kuibaka dianyisha bua mushinga wa biumvuiji ebi bia Bible? Edward udi wamba ne: “Bu mudi nsombelu, bumuntu, ne mmuenenu bia bantu bikale bishilangane bikole, ndi nteta bua kuikala mujoboke mu dituadija malonga.” Kuena mua kutumika ne ngenzelu wa muomumue bua muntu kayi yonso.

Bua bamue, mayukidilangana mavule a ku mpukapuka pa Mifundu adi mua kukengedibua kumpala kua kuleja mukanda kampanda wa dilonga nawu Bible. Kadi, bena dibaka babidi ba-misionere badi balonda ne: “Tutu pa tshibidilu tulomba bua kulonga Bible mu dikumbula dia kumpala.” Mu mushindu wa muomumue, Ntemu kampanda údí muambuluishe bantu 55 pa kubafikisha too ne ku diditshipa udi wamba ne: “Ngenzelu wanyi munene wa dituadija malonga a Bible udi wa kubuela buludiludi mu mukanda wa Udi mua kuikala ne muoyo wa kashidi pa buloba bukudimuna mparadizu.” Nansha mudi bamue kabayi basue lungenyi lua kulonga tshintu kayi tshionso, bakuabu badi bazukila bua kulonga tshintu kayi tshionso tshidibu bitabuja ne: netshibambuluishe mu nsombelu. Dilomba bua kuenza malonga a Bible ku nzubu kakuyi difuta mfranga ditu pa tshibidilu dibalengelela. Bamue ba-misionere badi bumvuija dilomba edi ne pashishe bamba ne: “Ndi musue bua kukuleja mushindu wa kubienza. Biwasua, udi mua kutungunuka. Biwabenga, mbukutangile anu wewe.” Padibi biumvuija mushindu au, bantu kabena bumvua buôwa bua kuitaba.

Ntemu mukuabu, údí muambuluishe bapele ne bena dimanya-mukanda dikese ba bungi, udi wamba ne: “Ndi mumone se: trakte idi mu mushindu wa pa buawu ne dikuatshisha mu dituadija malonga a Bible.” Nansha buobu batumika ne mukanda kayi, balongeshi ba ku dîba ne ku dîba badi bateta bua kuzangika Bible. Carola udi wamba ne: “Mu dilonga dia kumpala, ndi ntumika anu ne bimfuanyi ne mvese bu itanu, bua se: ngenyi minene ikale mitokesha ne Bible kavu kumueneka bu mukole.”

Dilama disankidila dia luya

Bantu badi basankishibua kudi nyanji ya dilubuluka, ke bua tshinyi Jennifer udi ubela ne: “Vuija dilonga dia luya. Enza bua dilonga diye kumpala.” Kulombola dilonga pa tshibidilu kakuyi dipumbisha mbingu kudi kabidi kubambuluisha bua kumvua ne: badi benza dilubuluka. Mpanda-njila kampanda wa pa buende uvua mukolele ku misoko udi umvuija mushinga wa dipepeja mumvuija ne dishindamena pa ngenyi minene, bua se: nansha aba badi ne dimanya-mukanda dikese bakumbane mua kulubuluka. Udi wamba ne: “Mu musoko wanyi, tuvua ne bua kumiamina buloba mâyi kunyima kua dikuna mamiinu. Patuvua tuela mâyi a bungi mu madimi, buloba buvua buenza tshitatu tshikole tshivua mamiinu avua atoloka kâyi mua kupanda, ne avua afua. Bia muomumue, biuuja basankididi ba bulelela bapiabapia ngenyi mivule, bidi mua kumueneka bu bikole bitambe ne badi balekela.” Nansha bantu badi ne lungenyi lutue badi ne bua kushindamena pa tshiena-bualu tshimuepele ku musangu biasuabu kulubuluka mu dijingulula dia malu. Yezu wakambila bapostolo bende ne: “Ntshidi ne malu makuabo a bungi a kunuambila, kadi nuenu kanuena mua kuatuala katataka.”​—Yone 16:12.

Mushindu mukuabu wa kulama luya lua disankidila dia bulelela nkukankamija aba baudi ukumbula bua kutungunuka ne kueleela meji pa Dîyi dia Nzambi kunyima kua diya diebe. Yolanda udi ubela ne: “Ulekele lukonko kampanda kaluyi luandamuna. Ubapeshe mudimu kampanda wa kuenza, bu mudi dibala dia tshitupa kampanda tshia Bible anyi dikebulula pa tshiena-bualu kansanga tshidi tshibatangila.”

Didima dinanga bua Yehowa

Disanka diebe nedivule paudi wambuluisha balongi bebe bua kuvua “benji ba dîyi, ki ng’anu bateleji patupu.” (Yakobo 1:22, NW) Mmunyi muudi mua kuenza nunku? Bena nkristo balelela mbasonsola kudi dinanga bua Yehowa. Pedro, muena Mexique, udi umvuija ne: “Bantu kabena mua kunanga muntu udibu kabayi bamanye, nunku biangatshile ku ntuadijilu menemene wa dilonga, ndi mbalongesha dîna dia Nzambi mu Bible, ne ndi mbabidila mishindu ya kuzangika ngikadilu ya Yehowa.” Mu diyukidilangana, udi mua kuibaka dianyisha bua Yehowa pa kuleja nyanji yebe buende yeye. Elizabeth udi wamba ne: “Ntu misangu yonso nteta bua kutela bulenga bua Yehowa. Munkatshi mua malonga anyi, bingamona tshilongo tshilengele, nyunyu muimpe, anyi kana ka mpusu kanaya, ntu misangu yonso ngamba ne: mmudimu wa Yehowa.” “Akula bua bulongolodi bupiabupia bulaya bua Nzambi bu bulelela buudi mujadike,” ke mudi Jennifer ubela. “Ebeja tshiasuabu kuenza mu bulongolodi ebu bupiabupia.”

Padi muntu weleela meji ne dianyisha pa tshidiye ulonga pa bidi bitangila Yehowa, tshidi tshidiina mu buondoke bua mutshima wende ne tshimusaka ku dienza. Kadi kêna mua kueleela meji bikalaye kayi muvuluke. Diambulula dîpi dia malu a nshindamenu asatu anyi anayi panyima pa dilonga dionso ntshiambuluishi tshia tshivulukilu. Balongeshi bavule ba Bible badi bafikisha bapiabapia bua kufunda mvese ya nshindamenu pamue ne note panyima pa Bible wabu. Misionere kampanda muena Angleterre udi umvuija bulenga bukuabu bua ku diambulula ne: “Ndi ngebeja mudibu bababidile mamanyisha aa. Ebi bidi bibafikisha ku dieleela meji ne dianyisha pa njila ne mikenji bia Yehowa.”

Ntemu kampanda muena lulamatu wakapeta dipolome dia kalasa kisatu ka Galaad udi wamba ne: “Tudi ne bua kuikala ne musangelu. Balongi betu badi ne bua kufika ku dijingulula ne: tudi tuitabuja tshitudi tulongesha.” Ditabuja dìdì dikuvuije “muenji wa mudimu” muena disanka didi mua kuikala dia tshiâmbu biwadileja.​—Yakobo 1:25, NW.

“Ndi mumone se: bantu batu batamba kudiumvua pabuipi ne Nzambi pantumbambuluisha bua kusunguluja mandamuna ku masambila abu,” ke mudi Ntemu kampanda udi muambuluishe bavule bua kutendelela Yehowa wamba. “Ndi mbapa bilejilu ku malu mamona anyi nkayanyi, bu mudi budi bulonda ebu: Patuakafika meme ne muenzejanganyi nanyi wa mudimu ku muaba mupiamupia wa mudimu bu bampanda-njila, tuvua anu ne ndambu wa bisekiseki, kabuki ka manteka, kakuyi mfranga. Tuakajikija biakudia bia dilolo ne kuamba ne: ‘Mpindieu katutshiena kabidi ne tshintu bua makelela.’ Tuakasambila pa bualu ebu, ne kulala. Patshiatshia dinda diakalonda Ntemu kampanda wa muaba au wakalua ne kudimanyisha, pa kuamba ne: ‘Mvua musambile bua Yehowa atume bampanda-njila. Mpindieu ndi mua kupatuka nenu bua tshitupa tshile tshia dituku, kadi bu mundi tshiyi musombele mu musoko eu, nengikale ne bua kudia nenu biakudia, nunku ndi mutuale biakudia ebi buetu tuetu buonso.’ Bivua munyinyi wa ngombe ne bisekiseki bivule. Ntu misangu yonso ngambila balongi banyi se: Yehowa katu nansha kakese utulekela bituakeba diambedi Bukalenge buende.”​—Matayo 6:33.

Fila diambuluisha dikuatshishi

Bivule mbilombibue mu dienza bayidi ba Kristo kupita ne kule dilombola dilonga dia Bible. Misionere kampanda úvuá musadile munkatshi mua bidimu bivule bu mutangidi muena-ngendu udi wamba ne: “Pitshisha nabu dîba. Kulayi mulongi ne lukasa diakamue panyima pa dijika dia dilonga. Bikalabi biakanyine, shala ne yukidilangana nende bua mutantshi kampanda.” Elizabeth udi wamba ne: “Ntu mbatabalela bualu muoyo wabu udi mu njiwu. Misangu mivule ntu nditatshisha bualu buabu bienza anu bu bikale bana banyi.” Bantemu bakuabu bakafila mibelu eyi: “Ubakumbule padibu ne bubedi.” “Paudi pabuipi ne ku mabu, tshilejilu mu mudimu wa budimi, ubakumbule bua tshitupa tshîpi bua kubamanyisha Bantemu bakuabu.” Eva udi wamba ne: “Teleja ne ntema bua kujingulula malu a kale ne nsombelu bia muntu. Ebi bidi ne buenzeji pa mushindu udi bantu bandamuna ku bulelela ne bidi mua kuimanyika dilubuluka diabu. Wikale mulunda wabu, bua bapete dikima dia kuakula pa bidi bitangila ntatu yabu.” Carol udi usakidila ne: “Ditabalela muntu dilelela didi ne mushinga padi mashintuluka alua kutuala bulelela mu nsombelu wende afikisha ku dijimija dîku ne balunda. Mu bualabale bunene, mbimpe bikala balongi bamanye muaba utudi basombele ne bikale ne dikima bua kulua kutudi dîba kayi dionso.” Umuambuluishe bua kumona tshisumbu bu dîku diende dipiadipia.​—Matayo 10:35; Mâko 10:29, 30.

“Wikale mudiakaje bua kufila diambuluisha dikuatshishi. Somba nabu pamue mu bisangilu, ne ubambuluishe ne bana babu,” ke mudi Yolanda wamba. Dileja bapiabapia mushindu wa kukolesha bana babu, kulengeja mêyi-makulu abu a bupeluke, kulongolola mandamuna bua bisangilu, ne kuenza miyuki mu Kalasa ka Mudimu wa Teokrasi bidi bienza bionso tshitupa tshia mudimu wa dienza bayidi. Muanetu mukuabu wa bakaji udi usakidila ne: “Bidi bia mushinga bua kuibidija bapiabapia bua mudimu. Padi tshitupa etshi tshia dibidijibua tshilenguludibua, bamue badi bashala ne buôwa bua mudimu wa buambi, bajimija disanka diabu mu disadila Yehowa, ne bapangila bua kunanukila.” Nunku petesha dibidijibua dienza ne ntema mu mudimu wa ku nzubu ne ku nzubu, mu dienza makumbulula, ne mu dituadija malonga a Bible. Disanka diebe nedikale dinene pa kumona mulongi webe ulubuluka ku diambuluisha ne buludiki biebe.

Ubakoleshe bua kutantamanabu

“Kudi dinyikibua dia kulengulula dilonga panyima pa ditambuishibua dia mulongi,” ke mudi muenji kampanda wa bayidi mumonamone malu udimuija. Mulongeshi ne mulongi badi buonso buabu ne bua kuvuluka ne: muena nkristo utshidi ufuma ku ditambuishibua udi kule ne dikala mubobe mu nyuma. Udi ne bua kuenza dilubuluka dinene mu ditabuja diende, mu dianyisha diende bua mikenji ya Nzambi, ne mu dinanga diende bua Yehowa. Bidi bia mushinga bua kumukankamija bua kudima bibidilu bimpe bia dilonga dia muntu pa nkayende bua akumbane mua kutungunuka ne dilubuluka.​—1 Timote 4:15.

Mupiamupia udi mua kukengela diambuluisha bua kulubuluka ne kulua muakididi wa benyi muena mu nsangilu wa bana betu. Udi mua kukengela buludiki mu diakama mapanga bupuangane a bana betu padiye utamba kusemena pabuipi nabu. (Matayo 18:15-35) Udi mua kukengela diambuluisha bua kulua mulongeshi mupiluke, mukumbane mua kuenza makebulula ende nkayende. Misionere kampanda udi ulonda ne: “Mulongi kansanga panyima pa batismo wende wakasua bua kuakaja ndongeshilu wende, nanku wakangambila ne: ‘Ndi ne bua kulombola dilonga dipiadipia lumingu ludi lulonda, kadi ndi nkengela kuibidija tshivulukilu tshianyi pa nshapita ya kumpala imvua mulonge. Udiku mua kulonga nanyi tshiakabidi nshapita eyi, umue ku umue, bua mmone mua kuangata note ya mumvuija a mvese ne bimfuanyi, ne nunku nkumbane mua kutumika nabi pandi nya ku dilonga dianyi anyi?’ Mmulue mulongeshi mupiluke, ne banayi ba ku balongi bende ba Bible bavua batambuishibue mu mpuilu umue.”

Bua tshinyi dienza bayidi ndiakanyine madikolela

“Dienza bayidi didi diumvuija dienza basamunyi bavule ba Yehowa. Didi diumvuija muoyo bua aba badi banyisha bulelela,” ke mudi Pamela wamba. “Ndi munange bikole kulongesha bulelela kudi bakuabu​—mbimpe be! Udi umona balongi balubuluka ku kakese ku kakese, pa kuenza mashintuluka mu nsombelu yabu ne kutshimuna bipumbishi bivua bimueneka bu bikena kutshimuna bu kabiyi ku spiritu wa Yehowa. Bavule ba ku badi bafike ku dinanga Yehowa mbalue balunda banyi ba pa muoyo.”

“Pandi mmona aba bandi muambuluishe bua kulua bayidi,” ke mudi misionere kampanda muena Allemagne ulonda, “ndi mmona bamue bantu bena lumamamama menemene benza dilubuluka dia bungi bu ba-ministre ba Nzambi mu mushindu undi tshiyi mua kumvua. Ndi mmona bantu bàdì batshimuna bipumbishi bikuate buôwa, kakuyi mpata ku diambuluisha dia Yehowa. Ndi mmona mêku avua ku kale matapulukangane kadi adi mpindieu mu buobumue​—bana bena disanka ne baledi badiakaje bua kuambula bujitu buabu. Ndi mmona bantu balabula nsombelu ya tshipatshila, pa kusamuna Yehowa. Ke disanka dia dienza bayidi.”

Eyowa, kuikala muenzejanganyi wa mudimu ne Yehowa Nzambi mu mudimu wa dienza bayidi mmpokolo wa disanka dikena kufuanyikija. Malu mamonamona kudi ba-misionere ne bampanda-njila mmajadike muanda eu. Udi mua kupeta disanka ne disankishibua bia muomumue biwatumikila mibelu eyi ne biwayilonda ne anyima mujima. Ne dibenesha dia Yehowa, disanka diebe nedikale dijima.​—Nsumuinu 10:22; 1 Kolinto 15:58.