Yehowa udi upesha udi mupungile bukole
“Aba badi batekemena kudi Yehowa nebapete kabidi bukole. Nebabande muulu ne mapuapua bu mikanku.”—YESHAYA 40:31, NW.
1, 2. Ntshinyi tshidi Yehowa upesha aba badi bamueyemena, ne ntshinyi tshituakonkonona mpindieu?
MIKANKU idi munkatshi mua nyunyu idi ne bukole butambe bunene muulu. Idi mua kubuuka mitantshi mile kayiyi nansha ikupa mapuapua ayi. Ne mapuapua adi mua kupita metre abidi padiwu mabulula, “Mukalenge wa bukua-nyunyu,” mukanku [wa ku Nord], udi “mukanku udi utamba kukemesha ku mikanku yonso; pa kubanda ku mitu ya mikuna mikese ne mpata, [udi] ubemba mêba mavule pa mulongo wa mikuna, pashishe ubanda pa kuenza njingu too ne padiye ushala amu bu katoba kafike muulu.”—The Audubon Society Encyclopedia of North American Birds.
2 Ne makokeshi a dibuuka a mukanku mu tshieledi tshia meji, Yeshaya wakafunda ne: “[Yehowa, NW] udi upesha badi bapungile bukole, badi kabayi ne dikanda udi ubapeshadio. Bansongalume badi bapungila, bateketa; bana badi batekankana; kadi badi batekemena kudi [Yehowa, NW] badi bapeta dikanda dipiadipia, basa mapuapua bu nyunyu wa mukanku, banyema kabayi bapungila, benda kabayi bateketa.” (Yeshaya 40:29-31, MMM) Mmunyipu mudibi bisanguluja pa kumanya se: Yehowa udi upesha badi bamueyemena bukole bua kutungunuka, bienza anu bu udi ubapetesha mapuapua akena apungila a mukanku udi ubemba! Mpindieu, tangila amue a ku malongolola adiye muenze bua kupesha udi mupungile bukole.
Bukole bua masambila
3, 4. (a) Yezu wakabela bayidi bende bua kuenza tshinyi? (b) Ntshinyi tshitudi mua kutekemena kudi Yehowa mu diandamuna ku masambila etu?
3 Yezu wakabela bayidi bende bua “kusambila diba dionso kabayi balekela.” (Lukase 18:1, MMM) Kunzuluila Yehowa mutshima wetu kudi bushuwa mua kutuambuluisha bua kupetulula bukole ne kuepuka dilekela padi bifimpakaji bia mu nsombelu bimueneka bu bitupite dikanda anyi? Eyowa, kadi kudi amue malu atudi ne bua kulama mu tshieledi tshia lungenyi.
4 Tudi ne bua kuikala ne butshintshikidi mu bitudi tutekemena kudi Yehowa mu diandamuna ku masambila etu. Muena nkristo kampanda wakapona mu tunyinganyinga tukole wakumvuija pashishe ne: “Anu bu mudibi bua masama makuabu, Yehowa kêna wenza bishima mu tshikondo etshi. Kadi udi utuambuluisha bua kuakama ne kusanguluka mu bualabale butudi mua kusanguluka mu ndongoluelu eu.” Pa kumvuija bua tshinyi masambila ende avua ne mushinga mukole, wakasakidila ne: “Mvua mfika ku dipeta spiritu munsantu wa Yehowa dîba dionso ne dituku dionso.” Nunku’eu, Yehowa kêna utuepula ku bifimpakaji bia mu nsombelu bidi mua kutupungija, kadi udi “[upesha] aba badi bamulomba spiritu munsantu!” (Luka 11:13, NW; Musambu wa 88:1-3) Spiritu’au udi mua kutukolesha bua kuakama diteta kayi dionso anyi tshifimpakaji bitudi mua kupetangana nabi. (1 Kolinto 10:13) Pikalabi bikengela, udi mua kutupongoluela “bukole budi bupite bua pa tshibidilu” bua kutantamana too ne padi Bukalenge bua Nzambi bulua kumbusha ntatu yonso miledi ya tunyinganyinga tukole mu bulongolodi bupiabupia bukadi pabuipi menemene.—2 Kolinto 4:7, NW.
5. (a) Bua masambila etu kupatulawu bipeta, mmalu kayi abidi adi ne mushinga mukole? (b) Mmushindu kayi utudi ne bua kusambila bituikala tuluisha butekete kampanda bua mubidi? (c) Ntshinyi tshialeja masambila etu a dinanukila ne masunguluke kudi Yehowa?
5 Kadi, bua masambila etu kupatulawu bipeta, tudi ne bua kunanukila, ne tudi ne bua kujadika bitudi tulomba. (Lomo 12:12) Tshilejilu, paudi upungila imue misangu bualu udi uluisha butekete kampanda bua mubidi, ku ntuadijilu wa dituku dionso, lomba Yehowa bua akuambuluishe bua kuepuka dipona ku butekete abu busunguluke bua dituku edi. Usambile bia muomumue mu kupita kua dituku ne butuku buonso kumpala kua kulala. Biwalenduka kabidi, ulombe Yehowa luse, kadi umuambile kabidi tshidi tshikufikishe ku dilenduka edi ne tshiudi ne bua kuenza bua kuepuka nsombelu ayi mu matuku atshilualua. Masambila a dinanukila ne masunguluke a mushindu’eu nealeje kudi “Muteleji wa masambila” dijinga diebe ne muoyo mujima bua kutshimuna diluangana edi.—Musambu wa 65:2, NW; Luka 11:5-13.
6. Bua tshinyi tudi mua kuikala ne kabingila bua kutekemena se: Yehowa neateleje masambila etu nansha patudi pamu’apa tudiumvua katuyi bakanyine bua kusambila?
6 Kadi, imue misangu, aba badi bapungile badi mua kudiumvua kabayi bakanyine bua kusambila. Mukaji muena nkristo kampanda wakadiumvua mushindu’au wakumvuija pashishe ne: “Abi ndiela meji dia njiwu menemene bualu bidi biumvuija ne: tudi badiambike bukokeshi bua kudilumbuluisha, kadi pabi ki mbukokeshi buetu nansha.” Bushuwa, “Nzambi muine udi mulumbuluishi.” (Musambu wa 50:6) Bible udi utujadikila ne: nansha mudi ‘mitshima yetu itupiisha, Nzambi udi upita mitshima yetu bunene, ne udi mumanye malu wonso.’ (1 Yone 3:20) Ndikoleshapu kayi ku muoyo pa kumanya se: patudi pamu’apa tudiangata tuetu bine bu badi kabayi bakanyine bua kusambila, Yehowa kêna pamu’apa umvua mushindu’au bualu buetu! Yeye “udi mumanye malu wonso” adi atutangila, pa kukonga ne nsombelu ya mu muoyo wetu idi mua kuikala mitufikishe ku didiumvua katuyi bakanyine nansha kakese. (Musambu wa 103:10-14) Luse luende ne buondoke bua ngumvuilu wende bidi bimusaka ku diteleja masambila adi afumina mu “mutshima mubungame ne musunsuke.” (Musambu wa 51:17, NW) Mmunyi mudiye mua kubenga kuteleja miadi yetu bua kupeta diambuluisha padi yeye muine upiisha eu ‘udi ujibika matshi ende bua kaumvu muadi wa mupele’?—Nsumuinu 21:13.
Luya lua buena muntu
7. (a) Ndilongolola kayi dikuabu didi Yehowa muenze bua kutuambuluisha bua kupeta kabidi bukole? (b) Mpa kumanya tshinyi pa bidi bitangila buena muntu buetu patudi mua kukoleshibua ku muoyo?
7 Dilongolola dikuabu didi Yehowa muenze bua kutuambuluisha bua kupeta kabidi bukole mbuena muntu buetu bua bena nkristo. Mmuabi kayipu wa mushinga mukole wa kuikala muena mu dîku dia pa buloba bujima dia bana betu ba balume ne ba bakaji! (1 Petelo 2:17) Padi bifimpakaji bia mu nsombelu bitupungija, luya lua buena muntu buetu ludi mua kutuambuluisha bua kupetulula bukole. Mmushindu kayi au? Dimanya ne: katuena amu nkayetu mu diakama ntatu mileleshi ya tunyinganyinga tukole didi diodi dine mua kutupetesha dikanda. Munkatshi mua bana betu, mudi bamue badi kabiyi mpata bakame bifimpakaji anyi ntatu ya mumue ne yetu ne badi bumvue nyanji anu bu itudi bapete. (1 Petelo 5:9) Bidi bikolesha ku muoyo pa kumanya ne: bitudi tuluangana nabi ki mbipangike kumanyibua kudi bakuabu ne se: nyanji yetu kayena anu kutudi tuetu nkayetu.
8. (a) Mbilejilu kayi bidi bileja mushindu utudi mua kupeta dikuatshisha ne disambibua bivule bitudi tukengela mu buena muntu buetu? (b) Mmu mushindu kayi ûdi wewe muine mukuatshishibue anyi musambibue kudi “mulunda mulelela”?
8 Mu luya lua buena muntu tudi mua kupeta ‘balunda balelela’ badi mua kutupetesha dikuatshisha dinene ne disambibua, patudi mu dikenga. (Nsumuinu 17:17) Misangu mivule, bitu amu bilomba amue mêyi malenga anyi bienzedi bia ditabalelangana. Muena nkristo kampanda uvua uluangana ne nyanji ya dipanga kudiangata ne mushinga udi uvuluija ne: “Kuvua balunda bavua bangambila malu mimpe avua antangila meme muine bua kungambuluisha bua kutshimuna ngenyi mibi imvua nayi.” (Nsumuinu 15:23) Kunyima kua lufu lua muanende wa bakaji mutekete, ku ntuadijilu biakakolela muanetu kampanda wa bakaji bua kuimba misambu ya Bukalenge mu bisangilu bia tshisumbu, nangananga eyi ivua itela dibiishibua ku lufu. “Dimue edi,” ke mudiye uvuluija, “muanetu kampanda wa bakaji uvua musombe ku luseke lukuabu [mu tshisangilu] wakammona ndila muadi. Wakumbuka kuvuaye, kunjingila diboko diende, ne kuimba nanyi tshitupa tshia musambu tshivua tshishale. Ngakadiumvua mûjibue tente ne dinanga bua bana betu ba balume ne ba bakaji ne musangale mushindu utuvua mu bisangilu, pa kujingulula se: ke ku muaba udi diambuluisha dietu, ku Nzubu wa Bukalenge.”
9, 10. (a) Mmunyi mutudi mua kuenza tshietu tshitupa mu difila luya lua buena muntu buetu? (b) Mbanganyi badi nangananga bakengela didisangisha dimpe? (c) Ntshinyi tshitudi mua kuenza bua kuambuluisha aba badi bakengela dikankamijibua?
9 Bushuwa, yonso wa kutudi udi ne bujitu bua kuenza tshiende tshitupa mu difila luya lua buena muntu bua bena nkristo. Nunku, mitshima yetu idi ne bua ‘kudiundishibua’ bua kukongayi bana betu buonso. (2 Kolinto 6:13) Mmunyipu muikalabi bia dibungama bua aba badi bapungile pa kumvua ne: dinanga dia buena muntu ndituye buabu buobu! Pabi, bamue bena nkristo badi bamanyisha mudibu badiumvue nkayabu ne kabidi babalekele. Muanetu kampanda wa bakaji muena bayende udi uluisha bulelela wakafunda ne: “Nnganyi udi kayi ujinga ne ukengela malanda a bulunda adi ibaka, dikankamijibua, ne didisangisha dia dinanga? Bu wewe mua kusua vuluija bana betu ne: tudi nabu dijinga!” Eyowa, nangananga aba badi batekeshibue kudi nsombelu ya mu muoyo wabu—aba badi ne bena dibaka nabu bakena bena kuitabuja, mukaji anyi mulume udi ukolesha bana nkayende, aba badi ne masama adi kâyi ajika, bakulakaje, ne bakuabu—badi bakengela didisangisha dimpe. Bamue ba kutudi badi bakengela bua kubavuluijabu bualu ebu anyi?
10 Ntshinyi tshitudi mua kuenza bua kuambuluisha? Tudiunde mu dilejangana dinanga dietu. Patudi tuleja diakidila benyi, katupu muoyo aba badi bakengela dikankamijibua. (Luka 14:12-14; Ebelu 13:2) Pamutu pa kudianjila kuela meji ne: nsombelu yabu idi ibakandika bua kuanyisha, bua tshinyi kubenga kuanji amu kubabikila ku metu? Pashishe ubalekele bangate dipangadika. Nansha pikalabu kabayi mua kuitaba, nebadiumvue kabiyi mpata bakankamijibue pa kumanya se: bakuabu mbabavuluke. Pamu’apa ke tshionso tshidibu bakengela bua kupetulula bukole.
11. Aba badi batekeshibue badi mua kukengela dikuatshisha mu mishindu kayi?
11 Aba badi batekeshibue badi mua kukengela dikuatshisha mu mishindu mikuabu. Tshilejilu, mamu udi ukolesha bana nkayende udi mua kukengela muanetu kampanda wa balume mupie bua atabalele muanende wa balume ukena tatu. (Yakobo 1:27) Muanetu udi ne kusama kukole udi mua kukengela diambuluisha kampanda bua dimusumbila bintu anyi bua midimu ya kumbelu. Mukulakaje kampanda udi mua kuikala ujinga dishala nende pamue anyi ukengela dikuatshisha kampanda bua kupatuka mu mudimu wa budimi. Padiku nsombelu kampanda udi ulomba diambuluisha ditungunuke dia mushindu’eu, mbualu bulelela budi mua kuambuluisha bua ‘kujadika bushuwa bua dinanga dietu.’ (2 Kolinto 8:8) Pamutu pa kuepuka aba badi mu dikengela bua dîba ne madikolela bidibi bilomba, tudi mua kutshimuna diteta dia dinanga dia buena nkristo pa kuikala basunguluji ne bandamunyi ba ku majinga a bakuabu.
Bukole bua Dîyi dia Nzambi
12. Mmunyi mudi Dîyi dia Nzambi dituambuluisha bua kupetulula bukole?
12 Muntu udi ulekela didia kêna unenga ne kujimija dikanda diende, anyi bukole. Bia muomumue, mushindu mukuabu udi Yehowa utupesha bukole bua kutungunuka mpa kutabalela bua se: tudiishibue bimpe mu nyuma. (Yeshaya 65:13, 14) Mbiakudia kayi bia mu nyuma bidiye mutulongoluele? Ku mutu kua bionso, tudi ne Dîyi diende, Bible. (Matayo 4:4; fuanyikija ne Ebelu 4:12.) Mmunyi mudidi mua kutuambuluisha bua kupetulula bukole? Padi bifimpakaji ne ntatu bitudi tuakama bituadija kujikija dikanda dietu, tudi mua kupetela dikanda ku dibala malu adi atangila nyanji ne diluangana dilelela bia mu nsombelu ya balume ne bakaji ba lulamatu ba mu bikondo bifundilebu Bible. Nansha mudibu bitembelu bia pa buabi bia muoyo mutoke, bavua bantu “[ba] mutshima muomumue n’etu.” (Yakobo 5:17; Bienzedi 14:15) Bakakama matetshibua ne bifimpakaji bia muomumue ne bietu. Anjibi kutangila bimue bitembelu.
13. Mbilejilu kayi bia mu Mifundu bidi bileja ne: balume ne bakaji ba lulamatu ba mu bikondo bifundilebu Bible bavua ne nyanji ne malu mafuanangane bikole ne etu?
13 Nkambua Abrahama wakadila bikole bua lufu lua mukajende nansha muvuaye ne ditabuja mu dibiishibua ku lufu. (Genese 23:2; fuanyikija ne Ebelu 11:8-10, 17-19.) Davidi muena kunyingalala wakumvua ne: mpekatu yende yakamuvuija kayi muakanyine bua kusadila Yehowa. (Musambu wa 51:11) Mozese kavua udiumvua mukumbanyine. (Ekesode 4:10) Epafrodite wakapeta tunyinganyinga tukole pakaluabi kumanyibua ne: disama dinene divua dielela mudimu wende mikalu mu “mudimu wa Mukalenge.” (Filipoi 2:25-30, NW) Paulo uvua ne bua kuluisha mubidi muena butekete. (Lomo 7:21-25) Mbimueneke ne: Ewodia ne Suntuke, bana betu ba bakaji babidi bela manyi ba mu tshisumbu tshia ku Filipoi, bavua ne imue ntatu mu malanda abu. (Filipoi 1:1; 4:2, 3) Mmunyipu mudibi bikankamija pa kumanya ne: bantu bena lulamatu aba bavua ne nyanji ne malu a mumue ne etu, kadi kabavua balekele! Nansha Yehowa pende kakabalekela.
14. (a) Ntshiamu tshia mudimu kayi tshidi Yehowa mutumike natshi bua kutuambuluisha bua kupetela dikanda ku Dîyi diende? (b) Bua tshinyi bibejibeji bia Tshibumba tshia Nsentedi ne Réveillez-vous! mbipatule biena-bualu pa malu a nsombelu wa bantu, dîku, ne ntatu ya mu lungenyi?
14 Bua kutuambuluisha bua kupetela dikanda ku Dîyi diende, Yehowa udi utumika ne kasumbu ka mupika wa lulamatu ne wa budimu bua kutupetesha bungi bupite bua “biakudia pa tshikondo tshiakane.” (Matayo 24:45, NW) Mupika wa lulamatu mmutumike mutantshi mule ne bibejibeji bia Tshibumba tshia Nsentedi ne Réveillez-vous! bua kubingisha bulelela bua mu Bible ne kumanyisha Bukalenge bua Nzambi bu ditekemena dimuepele bua bantu. Nangananga mu makumi a bidimu bikese bishale ebi, bibejibeji ebi mbiakule pa biena-bualu biashila pa Mifundu mu tshikondo tshiakane pa malu a nsombelu wa bantu, dîku, ne ntatu ya mu lungenyi idi nansha bamue bena mu tshisamba tshia Nzambi bapetangana nayi. Mamanyisha a mushindu’eu mmapatula ne tshipatshila kayi? Mbua kuambuluisha bushuwa aba badi bapetangana ne ntatu eyi bua kupetela dikanda ne dikankamijibua ku Dîyi dia Nzambi. Kadi biena-bualu bia mushindu’eu bidi kabidi bituambuluisha tuetu buonso bua kupeta ngumvuilu mutambe kutokesha wa malu adi bamue ba ku bana betu mua kuluangana nawu. Nunku’eu tudi bakumbajibue bimpe bua kulonda mêyi a Paulo aa: ‘Nukoleshe badi ne mitshima yamba kupanga, nukuatshishe badi batekete, nuikale ne lutulu kudi bantu bonso.’—1 Tesalonike 5:14.
Bakulu badi bu “muaba wa kupengama diba dia tshipepele”
15. Ntshinyi tshiakadianjila kumanyisha Yeshaya pa bidi bitangila disadila bu bakulu, ne mbujitu kayi budi bualu ebu bubambike?
15 Yehowa mmutupeteshe tshintu tshikuabu bua kutuambuluisha patudi tupungila—bakulu ba tshisumbu. Pa bidi bibatangila muprofete Yeshaya wakafunda ne: “Muntu yonso neikale bu muaba wa kupengama diba dia tshipepele; bu muaba wa kusokomena diba dia mvula wa tshipupu, bu tusulu tua mayi tupueka mu buloba buume, bu dileji dia dibue dinene mu ditunga didi ne tshipela.” (Yeshaya 32:1, 2, MMM) Nunku bakulu badi ne bujitu bua kukumbaja menemene tshivua Yehowa mudianjile kuamba pa bidi bibatangila. Badi ne bua ‘kuikala bu’ mpokolo ya disambibua ne dipolesha ku muoyo bua bakuabu ne kuanyisha ku budisuile bua “kutungunuka ne kuambuishangana majitu [anyi, “bintu bidi bitatshisha”; ku muaku ku muaku, “bintu bia bujitu”] bamue ne bakuabu.” (Galatia 6:2, NW, note kuinshi kua dibeji) Mmunyi mudibu mua kuenza nunku?
16. Bakulu badi mua kuenza tshinyi bua kuambuluisha muntu udi udiumvua kayi muakanyine bua kusambila?
16 Anu bu mutuabimonu kuulu eku, imue misangu muntu udi mupungile udi mua kudiumvua kayi muakanyine bua kusambila. Ntshinyi tshidi bakulu mua kuenza? Badi mua kusambila pamue nende ne bua muntu’eu. (Yakobo 5:14) Pa kulomba Yehowa patupu, eku mupungile muikala uteleja, bua kuambuluisha muntu’eu bua umvue mushindu udiye munangibue bikole kudi Yehowa ne kudi bakuabu nebipeteshe bushuwa disambibua. Kumvua disambila dienza ne disuminyina, didi dilenga ku mutshima dienza kudi mukulu kampanda kudi mua kuambuluisha bua kukolesha dieyemena dia muntu udi ne dibungama. Udi mua kuambuluishibua bua kuela meji ne: pikala bakulu ne dieyemena dia se: Yehowa neandamune ku masambila menza buende, nunku udi mua kupeta pende dieyemena edi.
17. Bua tshinyi bakulu badi ne bua kuikala bateleji bumvuidianganyi?
17 “Muntu yonso udi ne bua kuikala uteleja ne lukasa, ne lujoko ku diakula,” ke mudi Yakobo 1:19 (NW), wamba. Bua kuambuluisha badi bapungile bua bapete kabidi bukole, bakulu badi kabidi ne bua kuikala bateleji bumvuidianganyi. Mu imue nsombelu bena mu tshisumbu badi mua kuikala baluangana ne ntatu anyi bifimpakaji bidi kabiyi mua kujikijibua mu ndongoluelu eu wa malu. Nunku, tshidibu mua kuikala bakengela ki ndijandula kampanda bua “kujikija” lutatu luabu kadi kuyukila patupu ne muteleji muimpe—muntu wikala kayi mua kubambila mushindu udibu mua kuikala badiumvua kadi eu wikala mua kuteleja kayi muikale ne mmuenenu wa dilumbuluishangana.—Luka 6:37; Lomo 14:13.
18, 19. (a) Mmunyi mudi dikala ne lukasa bua kuteleja mua kuambuluisha mukulu kampanda bua kuepuka dinemesha kabidi bujitu bua udi mupungile? (b) Mbipeta kayi bidiku padi bakulu baleja ‘disambangana’?
18 Bakulu, dikala ne lukasa bua kuteleja didi mua kunuambuluisha bua kuepuka dinemesha kabidi kupanga kumanya bujitu bua eu udi mupungile. Tshilejilu, pikala muanetu kampanda mupumbishe mu bimue bisangilu anyi mulue kukepesha [bungi bua mêba] mu mudimu wa budimi, udi bushuwa ukengela mibelu bua yeye kuenza bipitshidile mu mudimu eu peshi bua kuluaye pa tshibidilu mu bisangilu anyi? Pamu’apa. Kadi udi mujingulule nsombelu yonso mujima anyi? Kudi masama adi enda avula anyi? Majitu a mu dîku mmashintuluke matuku mashale aa anyi? Kudiku nsombelu mikuabu anyi bifimpakaji bidi bimutekesha anyi? Vuluka se: muntu’eu udi mua kuikala mumane kudiumvua mupiile pa kupanga kukumbana bua kuenza bipitshidile.
19 Nunku, mmunyi mûdi mua kuambuluisha muanetu eu? Kumpala kua kukomesha ne kufila mibelu, teleja! (Nsumuinu 18:13) Ne nkonko ya busunguluji ‘upatule’ nyanji ya mu mutshima wende. (Nsumuinu 20:5) Kulenguludi nyanji eyi—uyisunguluje. Udi mutekeshibue udi mua kukengela kukoleshibua ku muoyo se: Yehowa udi uditatshisha bualu buetu ne udi umvua ne: imue misangu nsombelu yetu idi mua kutuelela mikalu. (1 Petelo 5:7) Padi bakulu baleja ‘disambangana’ dia mushindu’eu, badi bapungile ‘nebapete dikankamijibua bua anyima yabu.’ (1 Petelo 3:8; Matayo 11:28-30, NW) Padibu bapeta dikankamijibua dia mushindu’eu, kabakukengela kabidi bua kubambilabu bua kuenza bipitshidile; mitshima yabu neibasake bua kuenza bionso bidibu mua kuenza ne butshintshikidi buonso mu disadila Yehowa.—Fuanyikija ne 2 Kolinto 8:12; 9:7.
20. Ne nshikidilu wa tshipungu etshi tshibi pabuipi nunku, ntshinyi tshitudi bapangadike bua kuenza?
20 Bushuwa tudi mu tshikondo tshitambe bukole mu miyuki yonso ya bantu. Bifimpakaji bia nsombelu mu bulongolodi ebu bua Satana bidi amu bienda bivula patudi tuenda tusemena bikole mu bikondo bia ku nshikidilu. Vuluka se: anu bu ntambue udi wenda wipata nyama, Diabolo mmuindile bua tuetu kupungila ne kulekela bua yeye kutukokesha pa kutukuata bu tshia kupawula tshitekete. Ndianyisha kayipu ditudi mua kuikala nadi bu mudi Yehowa upesha udi mupungile bukole! Tubabidilayi menemene malongolola adiye muenze bua kutupesha bukole bua kutungunuka, bienza amu bu udi mutupeteshe mapuapua makole a mukanku udi ubemba. Ne nshikidilu wa tshipungu etshi tshibi pabuipi nunku, mpindieu ki ndîba dia kulekela dinyema lubilu luetu bua difutu—muoyo wa kashidi.—Ebelu 12:1.
Diandamuna diebe didi tshinyi?
◻ Ntshinyi tshitudi mua kutekemena kudi Yehowa mu diandamuna ku masambila etu?
◻ Mmu mishindu kayi mutudi mua kupetela dikanda ku buena muntu buetu bua bena nkristo?
◻ Mmunyi mudi Dîyi dia Nzambi dituambuluisha bua kupetulula bukole?
◻ Ntshinyi tshidi bakulu mua kuenza bua kuambuluisha badi bapungile bua kupetulula bukole?
[Tshimfuanyi mu dibeji 17]
Patudi tuleja diakidila benyi, katupu aba badi bakengela dikankamijibua muoyo
[Tshimfuanyi mu dibeji 18]
Bakulu badi mua kulomba Yehowa bua ambuluishe badi bapungile bua bumvue mushindu udibu banangibue bikole