Ntendelelu mulelela udi wenda udiunda ku Mputu wa ku Est
1 Bena Kristo ba mu siekele wa kumpala bavua bayishi ba Bukalenge ba lukunukunu. Bakasanka pavua bisumbu ‘bivulangana ku dituku ku dituku.’ (Bien. 16:5) Diyisha diabu dia dikima diakatuala ntendelelu mulelela mu Asia, Afrike ne ku Mputu, kufikishabi ku dipeta bena kuitabuja bavule.
2 Ntendelelu mulelela mmutungunuke ne kudiunda mu tshikondo etshi tshia ku nshikidilu mu matunga a ku Mputu wa ku Est. Tudi tumona mpindieu didiunda dia pa buadi mu matunga muvua mbulamatadi mukandike midimu yetu too ne mu bidimu bia 1990. Mukanda wa Annuaire 1999 udi umanyisha ne: ditunga dia Russie ne dia Ukraine, avua mafile luapolo lua bamanyishi bapite pa 100 000 bavua badifile mu mudimu wetu wa patoke. Mu bitupa 15 bia Union Soviétique wa kale, kutuadijila mu 1991 bantu bapite pa 220 000 mbadilambule kudi Yehowa ne batambule! Didiunda dia lubilu edi ndilele dijinga dia kuasa Nzubu ya Bukalenge mipiamipia ya bungi ne Nzubu ya Mpuilu ne dia kudiundisha imue nzubu ya filiale.
3 Anu bu muvuabu bamanyishe mu Mudimu wetu wa Bukalenge wa Kabitende 1997, badi mpindieu bakuata mudimu ne tshitupa tshia Mfranga bua Nzubu ya Bukalenge ya Société bua kusombesha bisumbu bidi mu matunga mudi dijinga dia lukasa menemene dia kuvudija Nzubu ya Bukalenge kadi bantu kabayi ne mushindu ne muikale ntatu mikole mu malu a makuta. Pankatshi pa Luabanya 1996 ne Kasuamansense 1998, Société uvua muanyishe dilomba dia mabanza bua Nzubu ya Bukalenge 359 dienza kudi biro bia filiale idi itangila matunga 11 a ku Mputu wa ku Est. Makuta mafila bu mapa mmenza nawu mudimu bua kusumba mpangu ne bintu bua kuasa Nzubu ya Bukalenge mipiamipia ne kuambuluisha bisumbu bua kulongoluesha nzubu ikadiku. Bimfuanyi ebi bidi bitumvuija mushindu udi mapa a Mfranga bua Nzubu ya Bukalenge ya Société mu États-Unis ne mu matunga makuabu mambuluishe bana betu ba ku Mputu wa ku Est.
4 Mu 1998, kuvua didiunda dia bia pa lukama 12 mu ditunga dia Bulgarie, ne bana betu bakasanka bikole pakabanjijabu Nzubu wabu wa Bukalenge wa kumpala mu Tshisanga 1998. Mu Croatie muvua didiunda dia bia pa lukama 4, ne bana betu badi mpindieu basa Nzubu ya Bukalenge ya bungi bua kuyisha ntendelelu mulelela kumpala. Mu Hongrie bisumbu 144 bidi bibuela mu Nzubu ya Bukalenge mitue ku 80. Bidi biumvuija ne: pa bisumbu 235 bia mu ditunga adi, bisumbu 61 pa lukama bidi ne wabi muaba wa kutendelela. Ku diambuluisha dia ndongamu wa luibaku lua Nzubu ya Bukalenge mu Macédoine bakadi bajikije kuasa Nzubu ya Bukalenge mipiamipia ibidi, ne batshidi mu diasa mikuabu. Mu muvu wa luya mu 1999 emu, mbajikije kuasa Nzubu wa Bukalenge munene kupita mikuabu misangu ibidi mu Skopje, tshimamuende wa Bukalenge. Nzubu eu mmukumbane bua kuakidila bisumbu bipite pa bisambombo.
5 Tshidimu tshishale, muayene wa bantu bapite pa 260 bavua batambula lumingu luonso mu Russie! Filiale wa Russie mmulongolole mpindieu Komite ya luibaku ya rejon 12 mu teritware wende munene pa kulonda ngenzelu wa mudimu wa matunga makuabu, bua kukuatshisha malongolola adi kumpala a luibaku lua Nzubu ya Bukalenge. Mu tshitupa tshia ku Nord tshia ku St. Petersburg, badi basa Nzubu wa Mpuilu wa kumpala bua ditunga adi ne wikala ne miaba ya kusomba 1 600. Nekuikale kabidi Nzubu ya Bukalenge itanu ya miaba ya kusomba 200 pa yonso wa kudiyi. Bua kuambuluisha ku majinga a mu nyuma a bana betu ne bantu ba bungi badi basankidila bulelela ba mu Ukraine, Nzubu ya Bukalenge 84 ikadi mijike ne badi benda basa mikuabu 80.
6 Didiunda edi dia ku Mputu wa ku Est kadienaku disankisha mitshima yetu anyi? Nansha tuetu basombele muaba kayi, didiunda dia ntendelelu mulelela didi dituvuluija ne: Nzambi kêna ne kansungasunga to, ne kabidi lutulu luende neluikale bua lupandu lua “tshisumbu tshinene.” (Buak. 7:9; 2 Pet. 3:9) Ndisanka kayipu ditudi nadi dia kuambuluisha petu bua dikola dia mu nyuma dia bulongolodi! Nsumuinu 28:27 udi utujadikila ne: ‘Udi upa bapele bintu kêna ukengela tshintu.’ Muoyo wetu muimpe wa kuambuluisha bua kukumbaja pa mfranga ya luibaku udi ‘ukelemeja majitu’ a bintu, upesha bonso mushindu wa kuikala ne disanka didi difumina ku difila ne ku dimona ntendelelu mulelela utangalaka pa buloba bujima.—2 Kol. 8:14, 15; Bien. 20:35.
[Tshimfuanyi mu dibeji 3]
Săcele, Roumanie
[Tshimfuanyi mu dibeji 3]
Maardu, Estonie
[Tshimfuanyi mu dibeji 3]
Sevnica, Slovénie
[Tshimfuanyi mu dibeji 3]
Tiszavasvári, Hongrie
[Bimfuanyi mu dibeji 4]
Jūrmala, Lettonie
[Bimfuanyi mu dibeji 4]
Tallinn, Estonie
[Tshimfuanyi mu mabeji 4, 5]
Taurage, Lituanie
[Bimfuanyi mu mabeji 4, 5]
Belgrade, Yougoslavie
[Bimfuanyi mu dibeji 5]
Prievidza, Slovaquie
[Tshimfuanyi mu dibeji 5]
Mátészalka, Hongrie
[Bimfuanyi mu dibeji 6]
Vranov nad Topl’ou, Slovaquie
[Tshimfuanyi mu dibeji 6]
Ruma, Yougoslavie
[Bimfuanyi mu dibeji 6]
Tornakalns, Lettonie