Tulengayi mitshima ne dimanya kutuisha

BANTU bavule batu bangata muaku “dituisha” ne meji mabi. Udi mua kupesha muntu lungenyi lua musumbishi wa bintu musuishanganyi anyi dimanyisha dienza bua kupetela makasa pambidi pa musumbi. Nansha mu Bible, lungenyi lua dituisha lutu imue misangu ne mumvuija adi kaayi mimpe, luleja dinyanga anyi dipambuisha. Tshilejilu, Paulo, mupostolo muena nkristo wakafundila bena Galatia ne: ‘Nuenu nuakadi nuenza malu bimpe! Udi munulekeshe bua kutumikila bualu bulelela nnganyi? Bualu [“dituisha dia mushindu’eu,” NW] kadiakadi difuma kudi [“Nzambi,” NW] udi unubikila nansha.’ (Bena Ngalata 5:7, 8, MMM) Paulo wakadimuija kabidi bena Kolosai bua kabalekedi muntu nansha umue ‘ubadinga ne bijadikilu bidi bituisha.’ (Kolosai 2:4, NW) Dituisha dia mushindu’eu ndishindamene pa bijadikilu bia budimu biashila pa bishimikidi bia dishima.

Kadi, mu mukanda wende muibidi mutumina Timote, mupostolo Paulo wakatumika ne lungenyi lua dituisha mu ngumvuilu mushilangane. Wakafunda ne: “Utungunuke mu malu awakalonga ne akakutuishabu bua kuitaba, mumanye bantu bakakulongeshawu.” (2 Timote 3:14, NW) Mu dikala ‘mutuishibue bua kuitaba,’ Timote kavua munyunguluja ne budimu kudi mamuende ne kakuende mukaji, bantu bavua bamulongeshe malelela a mu Mifundu.​—2 Timote 1:5.a

Pavuaye musombele mu Roma kuende kadi muikale mulama, Paulo wakafila bumanyishi buondoke kudi bantu ba bungi, ‘ubitabijija [“ubatuisha bua,” NW] Yezu, ne ku Mikenji ya Mose ne ku mêyi a baprofete, dinda too ne ku dilolo.’ (Bienzedi 28:23) Paulo uvua ushima bateleji bende anyi? Nansha kakese! Nenku kakuyi mpata, dituisha kaditu dibi misangu yonso.

Padiwu mutumika nawu mu ngumvuilu mulenga, muaku wa ntaku wa tshiena-Greke mukudimuna ne: “kutuisha” udi umvuija kuitabijija, kushintuluisha lungenyi ku diambuluisha dia tubingila tua meji. Nenku mulongeshi udi mua kutumika ne tshishimikidi tshia mu Mifundu, wenza mudimu ne dituisha bua kukuna munda mua bakuabu dishindika dia bulelela bua mu Bible. (2 Timote 2:15) Bushuwa, etshi tshivua tshimanyinu tshia mudimu wa Paulo. Nansha nsenda wa biamu Demetelio, eu uvua wangata malongesha a bena nkristo bu a dishima, wakamba ne: “ki ng’anu mu Efeso, kadi pabuipi ne mu distrike dionso dia Azi Paulo eu mmutuishe musumba muvumvuke ne mmubatangije ku mmuenenu mukuabu, wamba ne: aba badi benza ku bianza kabena banzambi.”​—Bienzedi 19:26, NW.

Tutumike ne dituisha mu mudimu wetu

Yezu Kristo wakashidimuna balondi bende ne: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia [“spiritu munsantu,” NW]; nubayishe mua kuenza malu onso angakanuambila; ne monayi, ndi nenu matuku onso too ne ku nshikidilu kua tshikondo.’ (Matayo 28:19, 20) Mu matunga mapite pa 230, Bantemu ba Yehowa badi batumikila dîyi-dituma edi. Ngondo yonso mu tshidimu tshiabu tshia mudimu tshia 1997, bavua balombole muayene wa malonga a Bible a kumbelu 4 552 589 pa buloba bujima.

Biwikala ne diakalenga dia kulombola dilonga dia Bible dia kumbelu, udi mua kudianjila kuela meji bua ntatu yalomba ditumika ne dimanya kutuisha. Tshilejilu, fuanyikija ne: mu dilonga dienu didi dilonda, lukonko ludi lutangila Busatu Bunsantu ludi ne bua kujuka. Newenze tshinyi biwikala mumanye ne: mulongi webe udi witabuja dilongesha edi? Udi mua kumupesha mukanda udi ukonkonona tshiena-bualu atshi. Kunyima kua yeye mumane kuubala, udi mua kumona se: mmutuishibue bua se: Nzambi ne Yezu ki mba muomumue. Kadi bikala imue nkonko mitshikaleku, mmunyi muudi mua kuenza?

Teleja ne ntema yonso. Ebi nebikuambuluishe bua kujadika tshikadi mulongi webe muitabe pa tshiena-bualu kampanda. Tshilejilu, biamba mulongi webe ne: “Ndi ngitabuja Busatu Bunsantu,” ne lukasa luonso udi mua kutuadija diyuki dishindamene mu Mifundu bua kuleja bubi bua dilongesha edi. Kadi kudi mitabuja kabukabu pa Busatu Bunsantu. Mulongi webe udi mua kuikala witabuja tshintu kampanda tshishilangane bikole ne tshiudi mua kumvuija bu Busatu Bunsantu. Tudi mua kuamba bia muomumue bua mitabuja makuabu, bu mudi dibuela mu mubidi mukuabu, dibenga kufua dia anyima ne lupandu. Nenku teleja ne ntema yonso kumpala kua kuakula. Kufuikakaji malu adi mulongi witabuja.​—Nsumuinu 18:13.

Ela nkonko. Munkatshi muayi mudi mua kuikala eyi: ‘Utu muitabuje Busatu Bunsantu kuonso eku anyi? Ukadiku muenze dikonkonona diondoke dia tshidi Bible wamba pa tshiena-bualu etshi anyi? Bikala Nzambi udi mu busatu kampanda, Bible, Dîyi diende, kavuaku ne bua kutuambila mu mushindu mutoke ne wa buludiludi anyi?’ Mu dilongesha mulongi, ku musangu ne ku mukuabu wimane bua kuela nkonko bu mudi eyi: ‘Bionso bitukadi bakonkonone udi ubiumvua bia meji anyi?’ ‘Udi witaba diumvuija edi anyi?’ Mu ditumika diebe dia budimu ne nkonko ne mbabi yonso, udi ubueja mulongi mu dilonga. Kêna ne bua kuikala uteleja patupu muudi umvuija tshiena-bualu.

Tumika ne dielangana meji dimpe. Tshilejilu, mu dikonkonona dilongesha dia Busatu Bunsantu, udi mua kuambila mulongi webe ne: ‘Pakatambula Yezu, dîyi diakafuma mu diulu, diamba ne: “Wewe udi Muana wanyi munanga.” Bulelela bikala Nzambi uvua muikale utambushibua pa buloba, uvua mua kutuma dîyi diende mu diulu ne kudipingaja bua miaku eyi kumvuikayi pa buloba anyi? Abi kabivua mua kuikala dishima anyi? Nzambi, “udi ka[y]i mua kudinga,” uvua mua kuenza bualu bua mafi bua mushindu’eu anyi?’​—Luka 3:21, 22; Tito 1:1, 2.

Dielangana meji dimpe dienza mu mushindu wa budimu ditu misangu mivule dipatula bipeta bimpe. Tangila tshilejilu tshia mukaji utudi tubikila ne: Barbara. Matuku ende onso a muoyo, uvua witaba ne: Yezu uvua Nzambi ne muikale mu busatu kampanda muvua spiritu munsantu usanganyibua. Kadi pashishe munga Ntemu wa Yehowa wakamuambila ne: Nzambi ne Yezu mbantu babidi bashilangane, ne wakamuleja mifundu bua kushindika mêyi ende.b Barbara kavua mua kutonkola Bible. Ne uvua muedibue mâyi ku makasa. Tuamba eku tuela eku, uvua munange bikole dilongesha dia Busatu Bunsantu.

Ne lutulu luonso Ntemu au wakelangana meji ne Barbara. Wakamuebeja ne: “Bu wewe ukeba bua kundongesha ne: bantu babidi badi muomumue, mmalanda kayi a mu dîku audi mua kutumika nawu bua kumvuija muanda au?” Wakela meji katupa ne pashishe kuandamunaye ne: “Ndi mua kutumika ne bana ba muntu babidi.” “Menemene,” ke muakandamuna Ntemu au. “Pamu’apa nansha mapasa mafuanangane. Kadi mu ditulongesha bua kuangata Nzambi bu Tatu ne yeye nkayende bu Muana, mmukenji kayi uvua Yezu usua kuleja?” Barbara kuandamunaye ne mêsu matonona ne: “Ngamonyi. Udi umvuija umue bu mukulumpe ne muikale ne bukokeshi buvule.”

Ntemu eu kuandamunaye ne: “Eyowa, ne bateleji ba Yezu bena Yuda, bavua basombele mu nsangilu mukokesha kudi bantu balume, bavua nangananga mua kuikala bafike ku nkomenu au.” Bua kuzangika lungenyi luende, Ntemu eu wakakoma ne: “Bituikala bafike ku difila mufuanu muakanyine bu eu bua kulongesha dikala muomumue​—dia bana ba muntu babidi anyi dia mapasa mafuanangane—​bushuwa Yezu, Mulongeshi Munene, uvua mua kuikala muenze pende nunku. Pamutu pa nanku, wakenza mudimu ne miaku ‘tatu’ ne ‘muana’ bua kumvuija malanda adi pankatshi pende yeye ne Nzambi.”

Ndekelu wa bionso Barbara wakumvua lungenyi alu, ne wakaluitaba. Bakalenga mutshima wende ne dimanya kutuisha.

Mua kupita ne mpampakenu

Mitabuja mele miji bikole a malu a Nzambi atu pa tshibidilu mabuelakane mu mpampakenu. Tangila bualu bua Edna, muena Katolike mudifile. Bankana bende batantamane bakamuleja ne tshijadiki tshitoke tshia mu Mifundu bua se: Nzambi ne Yezu ki mmuntu umue nansha. Edna wakitaba tshivuaye mumvue. Nansha nanku, wakamba ne bulenga buonso kadi ne bukole ne: “Ndi ngitabuja Busatu Bunsantu.”

Pamu’apa ukadi mupete bualu bua muomumue. Bantu ba bungi badi bangata malongesha a bitendelelu biabu menze bu se: malongesha aa adi tshitupa tshia bumuntu buabu. Bua kutuisha balongi ba Bible ba mushindu’eu, bidi bikengela malu a bungi kupita dielangana meji kadiyi ne nyanji anyi mene mulongolongo wa mvese bidi bijadika mudi mmuenenu wa muntu muikale mubi. Tudi mua kujandula bimpe nsombelu ya mushindu’eu pa kutshintshija dimanya kutuisha ne luse. (Fuanyikija ne Lomo 12:15; Kolosai 3:12.) Bushuwa, mulongeshi muimpe udi ne bua kuikala ne mitabuja makole. Tshilejilu, Paulo wakatumika ne biambilu bu mudi: “Ndi mujadike,” ne “Ndi mumanye, kabidi [“mutuishibue,” NW] mu dina dia Mfumu Yezu.” (Bena Roma 8:38; 14:14, Mukenji Mulenga) Kadi, mu dileja mitabuja etu, katuena ne bua kuangata ngakuilu wa bakamikianganyi, badiangatshi bu bakane, peshi katuena ne bua kuikala basendekianganyi anyi bapuekeshanganyi ba milongo mu dileja malelela a mu Bible. Bushuwa katuena basue bua kubungamija anyi mene kupenda mulongi.​—Nsumuinu 12:18.

Kunemeka mitabuja a mulongi ne kuitaba bukenji buende bua kuikala nawu kutu kutamba kupatula bipeta bimpe. Budipuekeshi ke nsapi. Mulongeshi udi ne bupuekele bua mu lungenyi kêna udiumvua ne: mmubandile kupita mulongi wende. (Luka 18:9-14; Filipoi 2:3, 4) Bushuwa, dituisha dia buena Nzambi didi diumvuija budipuekeshi budi buamba ne: ‘Ne luse luonso Yehowa mmungambuluishe bua kumanya bualu ebu. Anyisha nkulejabu.’

Kudi bena nkristo nende ba mu Kolinto, Paulo wakafunda ne: ‘Bintu bietu bia mvita kabiena bia mubidi, kadi bidi bikole ku mêsu kua Nzambi bia kushimbula nabi ngumbu ya mvita; bidi bishimbula meji onso ne tshintu tshionso tshidi tshilepa muulu tshidi tshibandishibua bua kupumbisha natshi lungenyi lua Nzambi, bidi bivuija meji onso mu bupika bua kutumikilawu Kristo.’ (2 Kolinto 10:4, 5) Lelu’eu, Bantemu ba Yehowa badi batumika ne Dîyi dia Nzambi bua kutonkola malongesha a dishima mele miji bikole pamue ne bilele ne ngikadilu bilamata bikole bidi kabiyi bisankisha Nzambi. (1 Kolinto 6:9-11) Mu dienza nunku, Bantemu badi bavuluka se: ne dinanga dionso Yehowa udi nabu lutulu. Badi bushuwa ne disanka dia kuikala ne Bible, Dîyi diende, ne bua kutumika ne tshia-mudimu etshi tshikole bua kushimbula malongesha a dishima ne kulenga mitshima ne dimanya kutuisha!

[Mêyi adi kuinshi]

[Kazubu mu dibeji 23]

Lenga mutshima wa mulongi webe

◻ Lomba buludiki bua Yehowa mu dilenga mutshima wa mulongi wa Bible.​—Nehemiya 2:4, 5; Yeshaya 50:4.

◻ Jingulula tshidi mulongi witabuja ne bua tshinyi udi mua kumona ditabuja dia dishima dikale dimusankisha.​—Bienzedi 17:22, 23.

◻ Mu mushindu mulenga ne wa lutulu, leja bijadikilu bia meji bia mu Mifundu eku mulame dipetangana ku mêyi.​—Bienzedi 17:24-34.

◻ Pikalaku mushindu, shindika malelela a mu Bible ku diambuluisha dia mifuanu miakanyine.​—Mâko 4:33, 34.

◻ Leja mulongi buimpe bua kuitaba dimanya dijalame dia mu Bible.​—1 Timote 2:3, 4; 2 Timote 3:14, 15.