Ntshinyi tshiwambila muena Yuda?
1 Mu bidimu lukama bia kumpala, “bana ba Isalele” ba bungi bakandamuna ne dianyisha dionso ku diyisha dia Yezu ne bapostolo bende. (Bien. 10:36) Anu bu muvuabi tshikondo atshi, bena Yuda ba muoyo muimpe badi lelu’eu bitaba bulelela ne muoyo mujima—ki ng’anu mu Isalele nkayamu to, kadi ne mu Russie, mu États-Unis ne mu matunga makuabu kabidi. Udi ujinga kupatula bipeta bimpe menemene mu diyisha bena Yuda anyi? Ngenyi idi ilonda eyi neyikuambuluishe bua kuyisha ne bukalanga bena Yuda, aba badi balamate Buena-Yuda ne badi kabayi babulamate.
2 Mua kuyisha aba badi balamate Buena-Yuda: Tudi ne bua kuikala bamanye ne: bena Yuda batu batamba kudifila mu dinemeka dia bilele bia ba-rabbi pamutu pa kukeba mua kumvua malongesha masunguluke. Bushuwa, batu pa tshibidilu bangata bilele biabu bu bidi ne bukokeshi bua mumue ne Mifundu. Ke bua tshinyi, kabatu batamba kuanyisha diyukila pa biena-bualu binene bia mu Bible to. Batu kabidi bateta kuela meji ne: Bible mmukanda wa bena Kristo. Bua bualu ebu, mbitambe buimpe kutela miaku eyi: “Mifundu ya tshiena-Ebelu,” “Torah” anyi “Mifundu” patudi tuakula bua Bible. Broshire mutambe bulenga mupatuila nangananga bena Yuda ng’eu wa: Connaîtrons-nous un jour un monde sans guerre?
3 Mbiena-bualu kayi bidi mua kusankisha badi balamate Buena-Yuda? Batu bitaba ne: kudi Nzambi umue, udi utabalela bantu bikole. Batu kabidi bitaba ne: Nzambi utu ne buenzeji mu malu a bantu. Udi mua kudiambuluisha ne malu aa bua kukeba mua nuenu kupetangana ku mêyi. Kabidi, bena Yuda ba bungi mbavuluke bimpe muakakengeshabu bana babu mu Mvita Mibidi ya Buloba bujima. Badi badiebeja bua tshinyi Nzambi wakalekela kansungasunga ka nanku ne ntshikondo kayi tshiajika bubi. Tudi bakaja bimpe bua kuandamuna ku nkonko ya nunku, tshilejilu pa kulonda bualu bua dikenga diakamona bana betu pakabutulabu bena Yuda.
4 Bushuwa, bua kubenga kunyanga muoyo wa mukuyukidishi, mbimpe bua wewe kuepuka dijula tshilumbu tshia disunguluja muntu uvua ne bua kuikala Masiya ku ntuadijilu kua diyuki dienu. Pamutu pa nanku, nudi mua kuyikila pa mudimu uvua nawu Mose mu Isalele wa kale ne kuebeja mukuyukidishi bikalaye witaba ne: malongesha a Mose adi ne mushinga lelu’eu. Padibi bimueneka biakanyine bua kuyikila bua Masiya, udi mua kuanji kubala Dutelonome 18:15, udi wamba ne: ‘Yehowa, Nzambi wenu, neanubishile muprofete munkatshi mua bana benu bu meme, nenumvue dîyi diende.’ Umuebeje ne: Mose uvua mutume meji kudi nganyi pakakulaye bua muprofete bu yeye. Pashishe utangile amue malu mu broshire wa Monde sans guerre, dibeji dia 14, tshikoso tshia 7 ne tshia 18.
5 Bena Yuda badi kabayi mu ntendelelu eu badi ne mmuenenu mukuabu wa malu: Ki mmuntu yonso udi udiamba mudiye muena Yuda udi witaba malongesha a Buena-Yuda nansha. Bena Yuda ba bungi batu ne meji a bena panu mu mmuenenu wabu. Tshidi tshitamba kubasankisha ndiditapulula kudi bakuabu bu bena Yuda badi ne wabu nshidimukilu, biabu bilele ne wabu nkoleshilu, kupita dilamata ntendelelu wa bena Yuda. Bamue bena Yuda badi kabayi mu Buena-Yuda mbelakanyi pa dikalaku dia Nzambi—bakese ba kudibu badi mene bavila dikalaku dia Nzambi. Ku mbangilu, bakese badi mua kutuishibua pa kubabadila mvese ya bungi ya mu Mifundu ya tshiena-Ebelu. Nebikale ne diambuluisha dia bungi wewe mua kutuadija diyuki mushindu uudi mua kuyikila ne muntu udi kayi muena nzambi. Tshilejilu, udi mua kumvuija mushindu udi Bible muikale ne dikuatshisha diakanyine bua tshikondo tshietu etshi. Bikala mukuyukidishi kayi witaba ne: Bible mmukanda mufunda ku spiritu, broshire wa Monde sans guerre udi mua kukuambuluisha ne amue malu, nangananga adi mu dibeji 3 mu tshiena-bualu etshi: “La Bible: inspirée par Dieu?”
6 Paudi uyisha muena Yuda, udi mua kuamba ne:
▪ “Tudi ba bungi bakadi bapetangane ne bualu budi bubungamija bua difuisha muntu utuvua banange. Udi wela meji ne: ntshinyi tshidi tshitufikila patudi tufua?” Lekela muntu andamune. Pashishe uleje mukuyukidishi kazubu kadi mu dibeji dia 22 mu broshire wa Monde sans guerre, kadi kamba ne: “Que sont la mort et l’âme?” Kazubu aka kadi kafuanyikija tshidi Bible wamba pa muoyo kunyima kua lufu ne tshidi ba-rabbi balongesha. Pashishe uye mu dibeji dia 23 mu tshikoso tshia 17, ne uleje ne: bilondeshile Mifundu, bafue nebabike ku lufu bua kuikala ne muoyo pa buloba bukudimuna mparadizu. Fila broshire. Paudi udilongolola bua dikumbulula, udi mua kuamba ne: nkambua Yobo uvua ne ditekemena dia dibiishibua ku lufu. Utangile mvese mitela ku ndekelu kua tshikoso tshia 17, ne numvuangane bua wewe kupingana bua nuenu kuyikila pa mvese eyi.
7 Mikanda eyi: Matayo, Mâko, Luka, Yone ne Bienzedi idi ilonda malu a bena Yuda bakateleja bulelela ne kubutumikila mu nsombelu wabu. Yehowa utshiena anu mulekele njila udi ufikisha ku muoyo wa kashidi buashi. Bena Yuda ba muoyo muakane badi mua kulonga malu a Nzambi mulelela, Yehowa, bua buobu pabu bikale mua kupeta muoyo wa kashidi mu bukua-panu bupiabupia bua Nzambi.—Mika 4:1-4.