Didiabakena dionso ndibi anyi?

Mmikodi kayi idi itamba kunyingalaja kupita itudi katuyi mua kuabakena?​—Marquis De Custine, 1790-1857.

MUNDA mua bidimu bibidi uvua mutantamene ditatshishibua kudi muena mudimu nende bua kuenda masandi. Dibenga diende diakafikisha ku ngakuilu mubi ne ku dimuela nyima. Dibungama diende didiatakaja divua dienda dinyanga makanda ende a mubidi, kadi ntshinyi tshivuaye mua kuenza? Bia muomumue, mulongi kampanda uvua wa kumpala mu kalasa kende bakamuipata bualu kuondo kende ka muoyo kakavua kamuanyishile bua kubuela mu manaya a dibidija mubidi bua kuluangana malomba kudi tshilongelu. Bonso babidi bakumvua ne: bavua babenzele bibi, kadi bavua ne bua kudiabakena anyi? Bu buobu benze nanku, bavua mua kutekemena disulakana anyi peshi bivua anu mua kubipisha malu bikole?

Midiabakenu bu eyi ne mikuabu kabidi mmitangalake lelu’eu bualu tudi munkatshi mua bantu bapange bupuangane, mu bulongolodi bunyanguke. Kudiabakena kudi kumvuija mulongo mujima udi utuadija ne malu adi aleja dinyengabala, dibungama, kanyinganyinga anyi njiya bua nsombelu kampanda too ne ku mêyi mamba patoke bua kubipisha muntu kansanga. Bantu bavule batu basue kuepuka didiabakena ne dipangakana; kadi, misangu yonso muntu udi ne bua kushala mupuwe anyi? Mmuenenu wa Bible udi tshinyi?

Bipeta bibi kudi muntu nkayende ne kudi bakuabu

Kakuena mpata bua se: lungenyi lua didiabakena dia munanunanu ludi lunyanga, ne Bible udi ulubenga. Mudiabakenyi neadikebele lutatu lua ku mubidi ne lua mu nyuma, ne lunsuya bua aba badiye wabakena. Mu diakula bua mukaji mudiabakenyi, lusumuinu lua mu Bible ludi luamba ne: “Musaka mutubuke udi wipata muntu dituku dia mvula wa mudimbi ne mukaji muena matandu bidi mumue.” (Nsumuinu 27:15, NW) Didiabakena ditangija kudi Yehowa anyi kudi umue wa ku ndongoluelu yende mbualu bubi menemene. Pakadiabakena tshisamba tshia Izalele bua mana a tshishima mabapesha mu tshikondo tshia luendu luabu lua bidimu 40 mu tshipela, baabikila ne: “bidia ebi bia tshianana,” Yehowa wakatuma nyoka ya lulengu bua kunyoka badiabakenyi aba babule kanemu, ne bavule bakafua.​—Nomba 21:5, 6.

Kabidi, Yezu wakabela balondi bende bua kubenga kuabakena “kasosa” ka bilema bitudi tumona kudi bantu netu, kadi wakabela bua tuikale bamanye bimpe “mutshi munene” wa mapanga atudi tuetu bine nawu. (Matayo 7:1-5) Mu luidi lumue alu, Paulo wakabipisha dilumbuluisha (mushindu wa didiabakena) muntu mukuabu wamba ne: “kuena ne pa kubingila . . . bualu udi wenza bia muomumue ne muntu awu, wewe mulumbuluishanganyi.” Madimuija aa bua didiabakena adi ne bua kutusaka bua kuepuka dikala bena bijanu ba patupu ne kuepuka dilubuluja lungenyi lua didiabakena.​—Bena Roma 2:1, MMM.

Didiabakena dionso ndibengibue anyi?

Nanku tudi ne bua kukoma ne: mishindu yonso ya midiabakenu idi ne bua kubengibua anyi? Tòo, katuena ne bua kuamba nanku. Bible udi uleja ne: kudi kansungasunga ka bungi mu bulongolodi ebu bunyanguke mutudi basombele kadi mu buakane buonso kalomba dilongolola. Mu mufuanu kampanda, Yezu wakakula bua nzuji mubi uvua muenzele mukaji mukamba buakane ku tshimfula-muoyo bua se: “kikadi uvua kumpungija misangu ne misangu.” (Lukase 18:1-8, MMM) Mu imue nsombelu, tuetu petu tudi pamu’apa ne bua kunanukila mu midiabakenu yetu too ne palongololabu bilema.

Mu ditukankamija bua kusambila bua Bukalenge bua Nzambi bulue, Yezu kavuaku mutubele bua kujingulula dinyanguka dia bulongolodi bua lelu ebu ne bua ‘kubila’ Nzambi bua kupeta diambuluisha anyi? (Matayo 6:10) Pakafika “muadi” bua bubi bua bimenga bia kale, tshia Sodome ne tshia Gomore, mu matshi ende, Yehowa wakatuma batuadi bende ba mukenji bua ‘kumona ne bavua benza bu muakadi muadi wabu’ ne bua kujikija bualu abu. (Genese 18:20, 21) Bua kusulakaja aba bonso bavua bamuabakena, Yehowa wakalongolola nsombelu au pashishe mu dibutula bimenga abi bibidi ne benamu bena buenzavi.

Tshisumbu tshia bena nkristo

Bidi ne bua kuikala bishilangane munkatshi mua bana betu badi mu tshisumbu tshia bena nkristo anyi? Nansha mudibu balume ne bakaji bapange bupuangane, bena nkristo badi badienzeja ne muoyo mujima bua kusadila Nzambi mu ditalala ne mu buobumue. Nansha nanku, nsombelu neyijuke munkatshi muabu idi ikebesha midiabakenu kampanda ne idi ilomba dilongolola. Mu siekele wa kumpala, nsombelu kampanda wakajuka mu tshisumbu tshia bela manyi katupa kakese kunyima kua Pentekoste. Bena nkristo bapiabapia ba bungi bakashala mu Yeruzaleme bua kupeta dilongesha ne dikankamija bia pa mutu. Bavua babanya biakudia bivuaku. Kadi, “bena Yuda bavua bakula muakulu wa bena Ngreka bavua bajana bena Hebreyi. Bavua babamba ne: matuku onso padibo babanya biakudia, badi balengulula betu bakaji bakamba.” Pamutu pa kupisha badiabakenyi aba bu bajudi ba tshimvundu, bapostolo bakakeba mua kulongolola muanda au. Eyowa, midiabakenu ya meji mienza ne kanemu kakanyine ne mu lungenyi luimpe nebayiteleje ne bupuekele buonso, ne nebenze bualu kampanda bua bualu buayi kudi aba badi ne mudimu wa butangidi mu tshisumbu.​—Malu Menza 6:1-6, MMM; 1 Petelo 5:3.

Kuabakena mukokeshi muakanyine

Udi mumone mu bilejilu bidi kuulu eku bua se: midiabakenu idi ne bua kuikala mienza mu lungenyi luakanyine ne kumpala kua mukokeshi muakanyine anyi? Tshilejilu, kabiakuikala bia meji bua kuabakena bampulushi bua bujitu bua bitadi bia mushinga mukole anyi kuabakena nzuji kampanda bua masama ebe a ku mubidi. Nenku kabidi, kabiakuikala biakanyine bua kudiabakena bua nsombelu kansanga wa munda anyi pambelu pa tshisumbu kumpala kua muntu udi kayi ne bukokeshi peshi bukenji bua kufila diambuluisha.

Mu matunga a bungi lelu’eu mudi tubadi ne bakokeshi bakuabu bakumbanyine badi bantu mua kuya kudibu ne ditekemena dia kupeta ndambu wa disulakana. Pavua mulongi mutela ku mbangilu kua tshiena-bualu etshi muye ne mudiabakenu wende ku tubadi, ba-nzuji bakamubingisha, ne bakamupingaja mu kalasa, ne tshilongelu atshi tshiakamulomba luse. Bia muomumue, muena mudimu mukaji wakatatshishabu bua masandi wakapeta disulakana ku butuangaji bua kasumbu ka bakuidi ba bakaji bena mudimu. Bakamulomba luse kudi balombodi ba tshilongelu. Bamfumu bende ba mudimu bakenza bivua bikengela kuenza bua kuimanyika ditatshishangana bua masandi.

Nansha nanku, katuena ne bua kutekemena se: midiabakenu yonso neyikale ne tshipeta tshia muomumue. Mukalenge wa meji Solomo wakaleja ne dishindika dionso ne: “Tshidi tshikonyangala, kabena mua kutshiludika kabidi.” (Muambi 1:15) Tudi ne bua kujingulula ne: amue malu neikale ne bua kuindila anu Nzambi bua kualongololaye mu tshikondo tshiende tshijadika.

[Tshimfuanyi mu dibeji 31]

Bakulu badi bateleja ne benza tshintu kampanda bua midiabakenu ya meji