Tshitupa tshibidi​—Nkenke ya butoke—​Minene ne mikese

“Ku butoke bua kuudi tudi mua kumona butoke.”​—MUSAMBU WA 36:9, NW.

1. Mmadikolela kayi a diambedi akenjibua bua kujingulula tshimanyinu tshia mu mukanda wa Buakabuluibua?

MUKANDA wa Buakabuluibua wa mu Bible mmutatshishe bena nkristo katshia ku ntuadijilu. Udi ufila tshilejilu tshilenga tshia mushindu udi dibalakana dia butoke bua bulelela dienda didiunda. Mu 1917, Tshisamba tshia Yehowa tshiakapatula diumvuija dia Buakabuluibua mu mukanda wa Le mystère accompli. Uvua wela patoke kakuyi ditshina bena malu a Nzambi ba Bukua-buena-nkristo pamue ne bamfumu ba malu a tshididi, kadi mumvuija ende mavule avua afumina mu mikanda kabukabu. Kadi, mukanda wa Le mystère accompli wakambuluisha bua kuteta lulamatu lua Balongi ba Bible ku njila udi umueneka ku mêsu uvua Yehowa utumika nende.

2. Tshiena-bualu tshia “Diledibua dia tshisamba” tshiakamuangalaja butoke kayi pa mukanda wa Buakabuluibua?

² Bukenke bua butoke budi bukoka ntema buakamuangalajibua pa mukanda wa Buakabuluibua mu tshiena-bualu tshia “Diledibua dia Tshisamba” tshiakapatuka mu Tshibumba tshia Nsentedi (anglais) tshia mu dia 1 Luabanya 1925. Bavua bela meji se: Buakabuluibua nshapita wa 12 uvua ufunkuna mvita pankatshi pa bena Roma bampangano ne Ekleziya Katolike wa ku Roma, ne muana wa balume yeye uvua wangatshibua bu bu-pape. Kadi tshiena-bualu atshi tshiakaleja se: Buakabuluibua 11:15-18 uvua musuikakajibue ku diumvuija dia nshapita wa 12, pa kuleja se: udi utangila diledibua dia Bukalenge bua Nzambi.

3. Mmikanda kayi yakamuangalaja butoke buvule pa Buakabuluibua?

³ Bionso ebi biakafikisha ku dijingulula ditokesha menemene dia Buakabuluibua diakafila volime ibidi ya mukanda wa Light (Butoke) mu 1930. Kabidi, dijingulula dinenke diakapatuka mu mukanda wa “Babylone la Grande est tombée!” Le Royaume de Dieu a commencé son règne! (1963) ne “Alors sera consommé le mystère de Dieu” (1969). Kadi, kutshivua bivule bia kulonga pa mukanda wa milayi wa Buakabuluibua. Eyowa, butoke butambe kubalakana buakamuangalajibuapu mu 1988 pakapatuka mukanda wa La Révélation: Le grand dénouement est proche! Nshindamenu wa ditokeshibua edi dia ku kakese ku kakese udi ne bua kuikala muanda wa se: mulayi wa Buakabuluibua udi utangila “dituku dia Mukalenge,” diakatuadija mu 1914. (Buakabuluibua 1:10) Mukanda wa Buakabuluibua udi ne bua kutamba kujinguludibua bu mudi dituku adi dienda diya kumpala.

Diumvuija dia “makole matambe bunene” diatokeshibu

4, 5. (a) Mmuenenu kayi uvua nende Balongi ba Bible pa Lomo 13:1? (b) Ntshinyi tshiakamueneka kunyima bu mmuenenu wa Mifundu pa bidi bitangila “bamfumu badi ku mutu”?

⁴ Dibalakana dia bukenke bua butoke diakamueneka mu 1962 pa Lomo 13:1, udi wamba ne: “Anyima wonso akokele makole matambe bunene [“bamfumu badi ku mutu,” NW].” (Nkudimuinu wa King James Version) Balongi ba Bible ba ku ntuadijilu bakajingulula se: “makole matambe bunene” matela apa avua afunkuna bamfumu ba mu bulongolodi ebu. Bakamona mvese eu bu udi umvuija se: biasungudibua muena nkristo bua kuya mu mvita, uvua ne bua kuvuala bilamba bia basalayi, kuambula tshingoma pa dikaya, ne kuya mu milongo ya kumpala bua kuluangana mvita ne kubuela mu biina bia kusokomena. Bakamona se: bu mutu muena nkristo kayi mua kushipa muntu nende, uvua ne bua kukuma tshingoma tshiende muulu biamupatukila njiwu.a

⁵ Tshibumba tshia Nsentedi tshia mu dia 15 Kasuabanga ne tshia mu dia 1 Tshisua-munene 1962, biakamuangalaja butoke butokesha mu tshiena-bualu tshivua tshikonkonona mêyi a Yezu adi mu Matayi 22:21 (NW): “Pingajayi . . . bintu bia Kezare kudi Kezare, bintu bia Nzambi kudi Nzambi.” Mêyi a bapostolo adi mu Bienzedi 5:29 (NW) mmakanyine: “Tudi ne bua kutumikila Nzambi bu mukokeshi pamutu pa bantu.” Bena nkristo badi bakokela Kezare​—“makole matambe bunene”—​anu mu nsombelu utu kayi ulomba bena nkristo bua kutupa ku mikenji ya Nzambi. Dikokela Kezare divua ditshintshika, dikena dia mu malu wonso. Bena nkristo badi bapingajila Kezare anu bidi kabiyi bibengangana ne malu adi Nzambi ulomba. Mmunyipu muvuabi disankishibua bua kupeta ngumvuilu mutokesha pa tshiena-bualu etshi!

Nkenke ya butoke pa malu a ndongoluelu

6. (a) Bua kuepuka dilondangana dia mianzu didi diase miji mu ndongoluelu udi mu Bukua-buena-nkristo, ndîyi-diludiki kayi diakangatshibua? (b) Ndekelu wa bionso, ntshinyi tshiakajinguludibua bu mushindu muakane uvua aba badi ne bua kutangila tshisumbu ne bua kusungudibua?

⁶ Kuvua bualu buvua butangila bantu bavua ne bua kusadila bu bakulu ne ba-diakre (balami) mu bisumbu. Bua kuepuka ndongoluelu wa dilondangana dia mianzu udi mumuangalake mu Bukua-buena-nkristo, bakakomesha se: bantu abu bavua ne bua kubelela tukanda kudi muena mu tshisumbu yonso. Kadi ku butoke budi buenda buvula, Tshibumba tshia Nsentedi (angl.) tshia mu dia 1 Kabitende ne tshia mu dia 15 Kasuamansense 1932, biakaleja se: Mifundu kayena ifila nshindamenu nansha umue bua kuelela bakulu tukanda. Nenku, komité wa mudimu wakapingana pa muaba wa masungulangana, ne direktere (muludiki) wa mudimu uvua usungudibua kudi Société.

7. Nkenke ya butoke yakafikisha ku makajilula kayi pa mushindu uvua basadidi ba mu tshisumbu batekibua pa midimu?

⁷ Tshibumba tshia Nsentedi tshia mu dia 1 Kabalashipu ne tshia mu dia 15 Kabalashipu 1938 bivua ne nkenke ya butoke idi ileja se: basadidi mu tshisumbu bavua ne bua kutekibua pa mudimu, mbuena-kuamba ne: kutekibua pa mudimu mu diumvuangana ne teokrasi, kadi ki nkusungudibua pa kubelela tukanda nansha. Mu 1971, bukenke bukuabo bua butoke buakaleja se: tshisumbu tshionso katshivua ne bua kuludikibua kudi musadidi wa tshisumbu umuepele to. Bishilangane, tshisumbu tshionso tshidi ne bua kuikala ne kasumbu ka bakulu anyi batangidi, batekibua kudi Kasumbu Kaludiki ka Bantemu ba Yehowa. Nenku ku butoke budi buenda buvula, munkatshi mua bidimu bipite pa 40, biakamueneka patoke se: bakulu ne ba-diakre, badi bamanyike lelu’eu bu basadidi ba mudimu, bavua ne bua kutekibua pa midimu kudi “mupika wa lulamatu ne wa budimu,” ku butuangaji bua Kasumbu Kaludiki kende. (Matayi 24:45-47, NW) Malu aa avua mu diumvuangana ne mianda yakenzeka mu bikondo bia bapostolo. Balume bu mudi Timote ne Tito bakatekibua bu batangidi kudi kasumbu kaludiki ka mu siekele wa kumpala. (1 Timote 3:1-7; 5:22; Tito 1:5-9) Bionso ebi bidi dikumbana dia mpatshi dia Yeshaya 60:17: “Nendue ne or mu muaba muakadi tshiamu tshia mitaku, nendue ne argent mu muaba muakadi tshiamu tshifike, nendue ne tshiamu tshia mitaku mu muaba muakadi mabaya, ne tshiamu tshifike mu muaba muakadi mabue. Nenvuishe Ditalala bukokeshi buebe, nenvuishe Buakane mfumu webe.”

8. (a) Divula dia bulelela diakatuala makajilula kayi pa dilombodibua dia Société? (b) Tela komité ya Kasumbu Kaludiki, ne mmidimu misunguluka kayi idiyi ikumbaja anyi itabalela?

⁸ Kuvua kabidi malu avua atangila dilombodibua dia Société Watch Tower. Munkatshi mua bidimu bivule, Kasumbu Kaludiki ka Bantemu ba Yehowa kavua komité wa ba-direktere ba Watch Tower Bible and Tract Society of Pennsylvania, ne malu mavule avua mu bianza bia muludiki wa Société. Bu mudibi bilejibue mu Annuaire des Témoins de Jéhovah 1977 (mabeji a 258-260), mu 1976, Kasumbu Kaludiki kakatuadija kutumika ne komité isambombo, komité wonso uvua muomekela mudimu wa kutabalela amue malu adi atangila mudimu wa pa buloba bujima. Komité wa bena mudimu udi utangila malu a bena mudimu, kabidi utabalela mianda ya yonso udi usadila mu dîku dia Betele pa buloba bujima. Komité wa Dipatula udi utabalela malu wonso a ku mubidi ne a mêyi ne mikenji, bu mudi nzubu ne biamu bia dipatula nabi mikanda. Komité wa Mudimu udi yeye utabalela malu adi atangila mudimu wa buambi ne malu a batangidi bena ngendu, bampanda-njila, ne midimu ya bamanyishi ba mu tshisumbu. Komité wa Dilongesha udi ne bujitu bua bisangilu bia tshisumbu, mpuilu ya pa buayi, mpuilu ya tshijengu, ya distrike ne mpuilu ya bukua-matunga ne tulasa kabukabu bua dishidimuna tshisamba tshia Nzambi mu nyuma. Komité wa Difunda udi utangila dilongolola ne dikudimuna mikanda minene ne mikese, pa kushindika bintu bionso né bidi mu diumvuangana ne Mifundu. Komité wa Mulombodi udi utabalela malu akena kunengesha ne makuabo malu atu akengela kukumbajibua lukasa lukasa. Kabidi mu bidimu bia 1970, biro bia filiale ya Société Watch Tower biakatuadija kulombodibua kudi komité pamutu pa mutangidi umuepele.b

Butoke pa bikadilu bia bena nkristo

9. Mmunyi muvua butoke bua bulelela ne buenzeji pa malanda a bena nkristo ne mbulamatadi ya mu bulongolodi ebu?

⁹ Nkenke mivule ya butoke ivua pa bikadilu bia bena nkristo. Tshilejilu, tuangate muanda wa ndubidila. Dibalakana dia pa buadi dia bukenke bua butoke diakafidibua mu mutu wa bualu uvua ne tshiena-bualu tshia “Ndubidila” tshipatula mu Tshibumba tshia Nsentedi (angl.) tshia mu dia 1 Kasuabanga 1939. Mmushindu kayipu uvuatshi tshiakanyine tshikondo atshi, bualu tshivua tshifila matuku makese kunyima kua ntuadijilu wa Mvita Mibidi ya Buloba Bujima! Tshiena-bualu etshi tshiakumvuija ndubidila ne tshiakaleja se: bena nkristo kabena ne bua kudibueja mu mianda ya tshididi anyi mu mvita pankatshi pa matunga. (Mika 4:3, 5; Yone 17:14, 16) Muanda eu ke wakakebesha dikinyibua diabo kudi matunga wonso. (Matayo 24:9) Mvita ya Izalele wa kale ki mmishiye tshilejilu bua bena nkristo to, anu bu mudi Yezu muleje patoke mu Matayo 26:52. Kabidi, ditunga nansha dimue lelu’eu kaditu dilonda teokrasi mu malu a tshididi, dilombodibua kudi Nzambi bu muvua Izalele wa kale.

10. Ntshinyi tshiakasokolola nkenke ya butoke pa mushindu udi bena nkristo ne bua kuangata mashi?

¹⁰ Butoke buakamuangalajibua kabidi pa bunsantu bua mashi. Balongi ba Bible bavua bela meji se: dikandika kudia mashi dileja mu Bienzedi 15:28, 29, divua ditangila anu bena nkristo bena Yuda. Kadi, Bienzedi 21:25 udi uleja se: mu bikondo bia bapostolo dîyi-dituma edi divua kabidi ditangila bena matunga menyi bavua balua bena kuitabuja. Nenku, bunsantu bua mashi mbutangile bena nkristo buonso, anu mudibi bilejibue mu Tshibumba tshia Nsentedi (angl.) tshia mu dia 1 Kashipu 1945. Abi bidi biumvuija ki ng’anu kubenga kudia mashi a nyama, bu atu mu boudin mienza ne mashi, apo kabidi kudikanda ku mashi a muntu, bu mudi diela mashi mu mubidi.

11. Ntshinyi tshiakajinguludibua pa mushindu udi bena nkristo ne bua kuangata dinua dia makanya?

¹¹ Bu tshipeta tshia butoke abu buakavula, bibidilu bivua diambedi kabiyi bitambe kuanyishibua, biakalua kuangatshibua pashishe bu bubi bunene. Tshilejilu tshia ku malu aa tshivua tshia dinua dia makanya. Mu tshibejibeji tshia Zion’s Watch Tower tshia mu dia 1 Tshimungu 1895, Muanetu Russell wakakoka ntema pa 1 Kolinto 10:31 ne 2 Kolinto 7:1 ne wakafunda ne: “Tshiena mmona mudibi mua kuikala bua butumbi bua Nzambi, peshi bua disanka diende yeye muine, bianua muena nkristo kampanda makanya a mushindu kayi wonso.” Kumbukila mu 1973, biakajinguludibua patoke se: munu wa makanya nansha umue kêna ne bua kuikala umue wa ku Bantemu ba Yehowa. Mu 1976, biakatokeshibua se: Ntemu nansha umue kêna ne bua kuenza mudimu mu nzubu ya manaya a mfranga ne kushala ne malanda mimpe mu tshisumbu.

Matokesha makuabo

12. (a) Ntshinyi tshiakasokolola nkenke ya butoke pa bidi bitangila bungi bua nsapi yakapeteshabu Petelo? (b) Mmu nsombelu kayi muakatumika Petelo ne wonso wa ku nsapi eyi?

¹² Butoke bukole buvuaku kabidi pa bungi bua nsapi ya tshimfuanyi yakapa Yezu Petelo. Balongi ba Bible bakajingulula se: Petelo wakapeta nsapi ibidi ivua yunzuluila bantu njila bua kulua bapianyi ba Bukalenge​—umue bua bena Yuda bakatumika nende mu dia Pantekoste wa 33 B.B. ne mukuabo bua Bampangano, mutumika nende diambedi mu 36 B.B. pakafila Petelo bumanyishi kudi Corneille. (Bienzedi 2:14-41; 10:34-48) Kunyima, biakamueneka se: kuvua tshisumbu tshisatu tshivua muanda eu utangila​—bena Samariya. Petelo wakatumika ne nsapi muibidi pakabunzuluilaye njila wa Bukalenge. (Bienzedi 8:14-17) Nenku, nsapi muisatu bakatumika nende pakafila Petelo bumanyishi kudi Corneille.​—Tshibumba tshia Nsentedi tshia mu dia 1 Tshiongo 1980, mabeji a 16-22, 26 (fransé).

13. Ntshinyi tshiakasokolola nkenke ya butoke pa bidi bitangila bikumbi bitedibua mu Yone nshapita wa 10?

¹³ Ku mikuabo nsese ya butoke, biakamueneka se: Yezu uvua ufunkuna ki ng’anu bikumbi bibidi bia mikoko, apo uvua ufunkuna bisatu. (Yone, nshapita wa 10) Ke biobi ebi: (1) tshikumbi tshia bena Yuda tshivua Yone Mubatiji muikale mulami wa tshiibi, (2) tshikumbi tshia bela manyi bapianyi ba Bukalenge, ne (3) tshikumbi tshia “mikoko mikuabo,” badi ne ditekemena dia kuikala pa buloba.​—Yone 10:2, 3, 15, 16; Tshibumba tshia Nsentedi tshia mu dia 15 Lumungulu 1984, mabeji a 8-12, 13-18 (fransé).

14. Mmunyi muakatokesha butoke buvule mianda ivua itangila tshikondo tshivua Jibilé ukena wa tshimfuanyi ne bua kutuadija?

¹⁴ Dijingulula diumvuija dia [difesto dia] Jibilé (Ditshionkomoka) ukena wa tshimfuanyi diakatokeshibua padi. Muinshi mua Mikenji, tshidimu tshionso tshia 50 tshivua Jibilé munene, muvuabo bapingaja bintu kudi benabi. (Lewitiki 25:10) Biakangatshibua bua musangu mule se: tshikondo atshi tshivua mundidimbi wa Bukokeshi bua Bidimu Tshinunu bua Kristo. Kadi mu bikondo bidi panshi ebi, biakamueneka se: Jibilé ukena wa tshimfuanyi wakatuadija mu Pantekoste wa 33 B.B., pakasuludibua aba bakamuangalajilabu spiritu munsantu ku muonji wa tshiovo tshia Mikenji ya Mozese.​—Tshibumba tshia Nsentedi tshia mu dia 1 Tshiongo 1987, mabeji a 18-22, 23-28 (fransé).

Butoke buvule pa miaku

15. Mbutoke kayi buakamuangalajibua pa ditumika ne muaku “dipangadika”?

¹⁵ “Mukungiji wakenza muende muonso bua kupeta miaku idi isankisha ne mfundilu wa miaku mijalame ya bulelela.” (Muambi 12:10, NW) Mêyi aa mmakanyine menemene tshiena-bualu tshietu etshi, bualu butoke buakamuangalajibua ki ng’anu patupu pa malu manene bu mudi mitabuja ne bikadilu, apo kabidi ne pa miaku ya bena nkristo ne mumvuija ayi majalame. Tshilejilu, munkatshi mua Balongi ba Bible, umue wa ku mikanda mitambe kunangibua uvua volime wa kumpala wa Studies in the Scriptures (Malonga a Mifundu), uvua ne tshiena-bualu tshia The Divine Plan of the Ages. Kadi, kunyima, biakajinguludibua se: Dîyi dia Nzambi didi diakula anu bua bantu bu bangatshi ba mapangadika. (Nsumuinu 19:21) Mifundu kayitu yakula bua Yehowa bu muangatshi wa mapangadika to. Katu ukengela kuangata mapangadika nansha. Bushuwa, bionso bidiye ulongolola bidi bikumbana bua meji ne bukole biende bikena ndekelu, anu bu mutudi tubala mu Bena Efeze 1:9, 10 (MMM): “Buine bualu busokome abu, ke [dilongolola, NW] diende dia luse divuaye mumane [kulongolola, NW] se: nendikumbaje pakumbana tshikondo.” Nanku, biakamueneka ku kakese ku kakese se: muaku “dilongolola” mmukumbanyine menemene patudi tuakula bua Yehowa.

16. Ntshinyi tshiakajinguludibua ku kakese ku kakese bua kujalamija lumvu lua Luka 2:14?

¹⁶ Pashishe, bivua bikengela kupeta lumvu lutokesha lua Luka 2:14. Bilondeshile nkudimuinu wa King James Version, tudi tubala se: “Butumbi kudi Nzambi muulu, ne pa buloba ditalala, bulenga kudi bantu.” Biakamueneka se: ebi kabivua bileja lungenyi lujalame to, bualu bulenga bua Nzambi kabuena bulejibua kudi bena bubi to. Bantemu bakadianjila kuangata bualu ebu bu muanda wa ditalala kudi bantu bena bulenga kudi Nzambi. Nenku, bakatungunuka ne kufunkuna aba badi basankidila Bible bu bantu bena bulenga. Kadi, pashishe biakajinguludibua se: tshivua tshiumvuijibuamu tshivua bulenga, ki mbua bantu, kadi bua Nzambi. Nenku, note udi kuinshi kua dibeji dia nkudimuinu wa New World Translation mu Luka 2:14 udi wakula bua “bantu badiye [Nzambi] wanyisha.” Bena nkristo buonso badi ne nsombelu udi mu diumvuangana ne diditshipa diabo badi bababidila bulenga bua Nzambi.

17, 18. Yehowa neabingishe tshinyi ne ntshinyi tshiasantuishaye?

¹⁷ Bia muomumue, bua mutantshi mule, Bantemu bakakula bua dibingisha dîna dia Yehowa. Kadi Satana wakela dîna dia Yehowa mpata anyi? Bua muanda eu, bena mudimu ba Satana bakela dîna dia Yehowa mpata, bamuangata anu bu udi kayi mukumbanyina dîna adi anyi? Tòo. Kadivua dîna dia Yehowa divua diedibua mpata ne dikengedibua kubingishibua. Ke bua tshinyi mikanda idi Société Watch Tower upatula matuku adi panshi aa kayena yakula bua dîna dia Yehowa bu didi dienda dibingishibua. Idi yakula bua bumfumu bua Yehowa bu budi buenda bubingishibua ne bua dîna diende bu didi dienda disantuishibua. Ebi mbiumvuangane ne mêyi avua Yezu mutuambile mu disambila: “Dîna diebe disantuishibue.” (Matayi 6:9, NW) Misangu ne misangu, Yehowa wakamba ne: nealue kusantuisha dîna diende, divua bena Izalele kabayi bela mpata, kadi bapetule.​—Yehezekele 20:9, 14, 22; 36:23.

¹⁸ Mu mushindu wa dikema, mu 1971, mukanda wa “Les nations sauront que je suis Jéhovah”​—Comment? wakenza ditapulula edi: “Yezu Kristo udi uluangana . . . bua dibingishibua dia Bumfumu bua Yehowa ku mutu kua bionso ne disantuishibua dia dîna dia Yehowa.” (Mabeji a 364-365) Mu 1973, mukanda wa Le Royaume millénaire de Dieu s’est approché wakamanyisha se: “‘Dikenga dinene’ dialua ntshikondo bua Yehowa Nzambi Wa-Bukole-Buonso abingishe bumfumu buende ku mutu kua bionso ne asantuishe dîna diende dia mushinga mukole.” (Dibeji dia 409) Pashishe, mu 1975, mukanda wa Fin prochaine de la détresse mondiale! wakamba ne: “Pashishe, muanda mutambe yonso mu mianda ya bantu newukumbajibue, dibingisha bumfumu bua Yehowa ku mutu kua bionso ne disantuisha dîna diende dia tshijila.”​—Dibeji dia 281.

19, 20. Mmunyi mutudi mua kuleja dianyisha dietu bua nkenke ya mu nyuma ya butoke?

¹⁹ Mmushindu kayipu udi tshisamba tshia Yehowa tshibeneshibue ne butoke buonso ebu bua mu nyuma! Bishilangane menemene, mêyi adi alonda aa a mfumu kampanda wa ekleziya adi aleja mudi balombodi ba Bukua-buena-nkristo mu mîdima ya mu nyuma: “Bua tshinyi mpekatu? Bua tshinyi makenga? Bua tshinyi diabolo? Eyi nnkonko ingela Mukalenge pangaya mu diulu.” Pabi Bantemu ba Yehowa badi mua kumuambila kabingila ka tshilumbu tshia buakane bua bumfumu bua Yehowa ne ka kumanya bantu né badi mua kulama muoyo mutoke kudi Nzambi nansha mu buluishi bujula kudi Diabolo.

²⁰ Mu kupita kua bidimu, nkenke ya butoke minene ne mikese mmimunyike njila wa basadidi ba Yehowa baditshipe. Ebi bidi bikumbaja mvese bu mudi Musambu wa 97:11 ne Nsumuinu 4:18. Kadi katupu muoyo se: kuenda mu butoke kudi kumvuija kuleja dianyisha bua butoke buvule ne kuikala ne nsombelu udi mu diumvuangana nabu. Anu bu mutuajinguludi, butoke ebu buvule budi butangila bikadilu bietu ne mudimu wetu wa buambi mutuomekela.

[Mêyi adi kuinshi]

Udi uvuluka anyi?

◻ Mbutoke kayi buakamuangalajibua pa bidi bitangila dikokela “bamfumu badi ku mutu”?

◻ Nnkenke ya butoke yakafikisha ku tshinyi mu mianda idi itangila dilombodibua dia bulongolodi?

◻ Mmunyi mudi butoke buvule ne buenzeji pa bibidilu bia bena nkristo?

◻ Butoke bua mu nyuma mbutuale ditokeshibua kayi mu ngumvuilu wa amue malu a mu Mifundu?

[Mêyi a dianyisha bua tshimfuanyi mu dibeji 25]

Keys on page 24: Drawing based on photo taken in Cooper-Hewitt, National Design Museum, Smithsonian Institution