Tumanyishayi dîna dia Yehowa miaba yonso pa buloba
1 Yezu ukavua mumane kushiila bayidi bende tshilejilu tshivuabu ne bua kulonda pakabapeshaye mudimu wa kuikalabu bantemu ‘too ne ku mfudilu kua buloba.’ (Bien. 1:8) Dîba dionso ne muaba wonso uvuaye upeta bantu, uvua ubambila malu avua Nzambi mulongoluele bukua-bantu. Kasumbu ka mupika wa lulamatu kadi kenza mudimu mu mishindu kabukabu bua dîna dia Yehowa ‘dimanyibue mu miaba yonso ya pa buloba,’ anu bu muakenza Yezu.—Yesh. 12:4, 5.
2 Tshivuabu benza kale: Mu bidimu bia kale, bavua bapatula miyuki mu bikandakanda; bakapatula “Foto-Drama wa Bufuki” ne kumuleja bantu miliyo mivule; bavua benda ne mashinyi avua ne bikolokolo; ne bakenza mudimu bikole ne bisanji bia fono, ne mu tshikondo kampanda, bakenza mudimu ne tudiomba—bionso ebi anu bua kuyisha lumu luimpe. Kadi pa tshibidilu, bavua bipatshila anu bua kuyikila mpala ne mpala ne bantu, bua kumona mua kudiundisha dijinga divua bantu baleja. Nunku, mudimu wa ku nzubu ne ku nzubu wakalua kumueneka mushindu mutambe buimpe wa kumanyisha dîna dia Yehowa miaba yonso.—Bien. 5:42.
3 Tshidibu benza matuku etu aa: Bu mudi bikondo bienda bishintuluka, bantu badi benza malu anu lukasalukasa ne mu miaba ya bungi, mbikole bua kupeta bantu kumbelu. Bakese mbadi bapeta dîba dia kubala ne kuelangana meji pa malu a mu nyuma. Ke bua tshinyi tudi ne bua kuakaja mudimu wetu bilondeshile nsombelu eu. Pa kumbusha buambi bua ku nzubu ne ku nzubu mu teritware wetu mujima, bavua batukankamije bua kuya miaba yonso idi bantu ne kabidi bua kuikala ‘badilongolole misangu yonso’ bua kuambila bantu ditekemena ditudi nadi. (1 Pet. 3:15) Muanda eu udi utulomba bua kuenza madikolela bua kumona mua kuyisha bena mudimu netu, balongi netu, bapitshi ba njila anyi aba badi bimane muaba udi mashinyi atudila, ku makazen peshi muaba kayi wonso mukuabu utudi mua kupeta bantu. Bu mudi Yehowa muikale utukuatshisha, mudimu wetu mukole utudi tuenza udi upatula bipeta bimpe bitambe. Udiku udifila bua kupeta bantu miaba yonso idibu anyi?
4 Muntu ne muntu, katushiyi muaba nansha umue ne tumanyishayi dîna dia Yehowa mu teritware wetu mujima. Eku batangile kudi Yehowa bua akoke bantu badi ne mitshima miakane, netupete disanka dia bungi bu tuetu mua kuenza mudimu wetu bimpe menemene.—Yone 6:44.