Ndongamu wa Bisangilu bia Mudimu

Lumingu lua dia 10 Tshiongo

Musambu 107

Min. 10: Mamanyisha. Mamanyisha makumbanyine a mu Mudimu wetu wa Bukalenge.

Min. 15: “Tumanyishayi dîna dia Yehowa miaba yonso pa buloba.” Mu nkonko ne mandamuna. Elamu nseka pa malu adi atangila buambi bua mu mpukapuka, ya mu mukanda wa Mudimu wetu, mabeji 93-94.

Min. 20: Tusungulayi bualu budi bumvuangana ne mikenji bua kuondapibua kabayi batuela mashi mu mubidi. (Bien. 15:28, 29) Muyuki kudi mukulu mukumbane. Tangila mukanda wa dia 20 Tshisua-munene 1996 udi umvuija mushindu wa kuenza mudimu ne mukanda wa “Attestation prévisionnelle.” Panyima pa tshisangilu etshi, nebapeshe Bantemu batambule karte kapiakapia ka “Instructions médicales/​Pas de sang,” ne aba badi ne bana bashadile badi kabayi banji kutambula nebapete Karte ka bumuntu bua muana yonso. Kanuuji tuarte etu dilolo edi to. Nenuujile bimpebimpe kumbelu, kadi KANUTUPU biala nansha. Muena karte neatuapu tshiala, kufunda mêna a bajadiki ne dituku ku ndekelu kua Dilonga dia Mukanda dia Tshisumbu dialonda, ku buludiki bua mulombodi wa dilonga dia mukanda. Kumpala kua kutua tshiala, wikale mujadike ne: karte nkuuja konso bimpe. Bajadiki kabena ne bua kutua biala pa karte aka bangabanga ne muenaku kayi muanji kutuapu tshiende tshiala nansha. Bu mudiku mushindu wa buobu kuakaja mêyi mafunda pa karte bilondeshile nsombelu wabu ne mitabuja abu, bamanyishi badi kabayi batambule badi mua kudifundila wabu mukanda wa mêyi buabu ne bua bana babu. Balombodi ba dilonga dia mukanda nebafunde mêna bua kujadika bikalabu baleje bantu bonso ba mu tusumbu tuabu mushindu wa kuuja karte aka.

Musambu 155 ne disambila dia nkomenu.

Lumingu lua dia 17 Tshiongo

Musambu 12

Min. 10: Mamanyisha. Luapolo lua konte.

Min. 15: Sekretere udi ubala mukanda wa dia 15 Kabitende 1999 mutumina bisumbu bionso. Tudi ne bua kutungunuka ne kulonda mêyi aa bualu katutshiena tulomba bantu batudi tupesha mikanda yetu mfranga bungi kampanda to. Bintu bia dilomba dia pa buadi mbia kupetela anu ku butuangaji bua tshisumbu. Leja bimpe ne: muntu yonso udi mua kupeta dimanya dijalame. Kabena badipeta bilondeshile lupetu ludi nalu muntu to. Bua bantu bapiabapia kuikalabu ne malanda mimpe ne Nzambi, kabiena bikengela kubapesha bintu binutu nupeta amu ku dilomba dia pa buadi to.

Min. 20: “Tuenze mudimu ne trakte bua kutuadija kuyikila.” Angata trakte inayi ku inutu nutamba kuenza nayi mudimu mu teritware wenu. Ela lukonko ludi lupeta diandamuna mu trakte yonso. Lomba bateleji bua bafile ngenyi pa mushindu wa kuela lukonko bua kuasa diyuki ne pamu’apa kufika ku dilonga dia Bible. Enza manaya a tshilejilu adi aleja mua kutuadija diyuki ne ibidi ya ku trakte eyi. Muanetu udi wenza tshitupa etshi udi ne bua kuamba kushindika ne: bamanyishi bonso badi ne bua kulonga mua kutuadija diyuki ku diambuluisha dia trakte. Ngenzelu mupiamupia mupepeja pa bidi bitangila mapa udi ulomba bua tuikale tuyikila ne bantu bangabanga ne kubaleja mukanda kayi wonso bua kujingulula bikala muntu wanyisha lumu luimpe. Nunku, trakte mbintu bidi biakanyine kukuata nabi mudimu.

Musambu 57 ne disambila dia nkomenu.

Lumingu lua dia 24 Tshiongo

Musambu 110

Min.  5: Mamanyisha.

Min. 15: “Konkonona Dîyi dia Yehowa dituku dionso” Muyuki ne diyukidilangana ne bateleji. Kankamija muntu yonso bua enze mudimu bimpe ne broshire wa Tukonkononayi Mifundu dituku dionso​—2000. Elamu malu awangatshila mu mêyi a mbangilu adi mu dibeji 3 ne 4. Lomba bamanyishi bua balonde mutubu benza madikolela a pa buawu bua kukonkonona mvese ne mumvuija ende dituku dionso, muntu pa nkayende anyi mu dîku kabayi batupisha.

Min. 25: “Tuikalayi ne meji mu dienza mudimu ne mikanda yetu.” Diyukidilangana mu nkonko ne mandamuna kudi mutangidi wa mudimu. Kunyima kua dikonkonona tshikoso tshia 7, nuenze manaya mîpi a tshilejilu abidi anyi asatu malongolola bimpe adi aleja mushindu wa kutumikila imue ngenyi mifila mu tshikoso 4 too ne tshia 7. Badi balomba balombodi ba bisangilu bia mudimu wa budimi bua kuambulula malu aa mu bisangilu bia mudimu.

Musambu 157 ne disambila dia nkomenu.

Lumingu lua dia 31 Tshiongo

Musambu 16

Min. 12: Mamanyisha. Vuluija bamanyishi bonso bua kufilabu luapolo lua mudimu bua Tshiongo. Akula bua mikanda ya kufila mu Luishi: mukanda wa Disanka mu dîku. Enza dinaya dia tshilejilu bua kuleja mushindu wa kuenza mudimu ne nkonko isatu idi mu kazubu mu dibeji dia 12 mu mukanda eu bua kufikisha muntu ku diakula.

Min. 15: Diandamuna ku lukonko ludi lutangila ‘Kutua tshimanyinu.’ Muyuki kudi mukulu, muashila pa Tshibumba tshia Nsentedi tshia dia 15 Kashipu 1999, mabeji 29-31.

Min. 18: Mushindu wa kuambuluisha bakuabu bua kumanya tshitendelelu tshilelela. Musadidi wa mudimu mukumbane ne bamanyishi bapiluke babidi anyi basatu badi bayukila pa mushindu udi bantu mua kuikala bakema bua Bantemu ba Yehowa kadi kabayi bajingulula bimpe dishilangana didi pankatshi pabu ne bitendelelu bikuabu to. Nuambulule malu dikumi adi mu dibeji dia 20 mu Réveillez-vous! wa dia 8 Lumungulu 1995. Umvuijayi mudi kumanya malu aa mua kuambuluisha muntu wa muoyo muimpe bua kumona dishilangana didi pankatshi pa ntendelelu mulelela ne wa dishima, ne mushinga wa kulonga malu adi atangila bantu ba Yehowa ne kudisangisha nabu.

Musambu 60 ne disambila dia nkomenu.

Lumingu lua dia 7 Luishi

Musambu 113

Min.  8: Mamanyisha.

Min. 17: Mukanda wa Prophétie de Daniel. Muyuki ne diyukidilangana ne bateleji. Konkonona malu manene a mu mukanda eu mupiamupia: mitu ya bualu ya nshapita idi ikoka ntema, bimfuanyi bilengele, tuzubu tudi ne nkonko idi yambuluisha bua kuteta meji ku ndekelu kua tshitupa tshionso, tuarte ne tablo idi itokesha malu a bungi. Tangila diumvuija didi dikankamija dia mushindu wa pa buawu ‘wajuka’ Mikaele. (Mabeji 288-290) Konkonona mudibi bikengela bua kunanukila bu balongeshi ba Dîyi dia Nzambi. (Mabeji 311-312) Tuetu bonso tudi ne bua kubala mukanda eu ne ntema yonso ne kulomba bantu badi banyisha bulelela bua baubale pabu.

Min. 20: Bakasungula ne meji. Muyuki muashila pa Tshibumba tshia Nsentedi tshia dia 15 Kasuamansense 1997, mabeji 19-21, bikoso 3-16. Londa malu a musangelu akamba bampanda-njila, adi aleja bua tshinyi badi bumvua ne: mbapitshishe matuku abu a muoyo mu mushindu mutambe bulenga udi ubatuadila disanka divule. Lomba bateleji bonso bua bele meji pa malu mamona aa ne batshinke né badi pabu mua kuenza bumpanda-njila.

Musambu 182 ne disambila dia nkomenu.