‘Bakaji badi benza mudimu wa Mukalenge’
1 Paulo wakamba mêyi adi kuulu aa bua Tufaina ne Tufoso, bana betu ba bakaji babidi bavua benza mudimu bikole mu tshisumbu tshia ku Lomo. Wakamba bua Pêsi (mukuabu muanetu wa bakaji) ne: ‘Wakenzela Mukalenge mudimu wa bungi.’ Wakamba kabidi mêyi mimpe bua Foibe ne: uvua “mukuatshishi wa ba bungi.” (Lomo 16:2, 12) Badi kabidi batela Dôka mu Mifundu bamba ne: “wakadi ne midimu mimpe ya bungi ne luse.” (Bien. 9:36) Bulelela, bantu bakaji bashindame mu nyuma badi bambuluisha tshisumbu.
2 Tutuku tuanyisha bana betu ba bakaji badi benza mudimu bikole mu tshisumbu tshietu anyi? Badi bayisha bikole, balonga Bible ne bantu bavule ne bambuluisha bapiabapia ba bungi. Batu kabidi bapitshisha mêba a bungi bua kuambuluisha bana badibu balela bua kukola mu nyuma. Bakaji bena Kristo badi bakuata mudimu mukole bua kukolesha dinanga, kuvudija disanka, ditalala ne lukunukunu mu tshisumbu. Badi bambuluisha mu mishindu mishilashilangane bua babayabu ne bakuabu bena mu mêku abu bamone mua kutamba kudifila mu mudimu wa Yehowa.
3 Bana betu ba bakaji badi mu mudimu wa ku dîba ne ku dîba: Ku bantu badi benza mudimu wa bungi mu Mukalenge kudi bana betu ba bakaji ba-misionere, ba bungi mbatungunuje biakane mudimu wa buambi mu matunga a ku ba bende. Bakaji ba batangidi bena ngendu badi benza mudimu wa buambi bikole mu bisumbu bidi babayabu bakumbula, bakankamija bana betu ba bakaji ba bungi. Bakuabu batudi katuyi mua kupua muoyo mbana betu ba bakaji badi ku Betele. Badi benza mudimu wa tshijila ne lukunukunu bua kukuatshisha bulongolodi bua Yehowa. Kabidi, bua lulamatu ne madikolela adibu benza bua kusamuna Nzambi, bana betu ba bakaji badi bampanda-njila ba pa tshibidilu badi ku luabu luseke bambuluisha bantu binunu ne binunu bua kumanya bulelela.
4 Bantu bakaji ba lulamatu aba badi ne disanka dia bungi bua mushindu udibu badifila mu mudimu. (1 Tim. 6:6, 8) Tubelayi kalumbandi ne tubakankamije anyi tubakuatshishayi mu mishindu yonso.
5 Bakaji bena Kristo badi bakuatshisha bulongolodi bua Yehowa, benza mudimu wa lulamatu udi wambuluisha bantu bonso. Tuanyishayi anu kuanyisha bantu bakaji aba ne tusambilayi bua Yehowa ababeneshe padibu batungunuka ne ‘kuenza mudimu mukole mu Mukalenge.’