Ndongamu wa Bisangilu bia Mudimu
Lumingu lua dia 14 Luishi
Musambu 113
Min. 10: Mamanyisha. Mamanyisha makumbanyine a mu Mudimu wetu wa Bukalenge.
Min. 15: “‘Ambila bantu dîyi ne dinanukila.’” Mbuelelu webe kafiki ku munite mujima to, pashishe utungunuke ne nkonko ne mandamuna. Buejamu nseka miangata mu mukanda wa Mudimu wetu, dibeji dia 170. Fila imue ngenyi idi yambuluisha pa mushindu wa kuvudija mudimu wa diyisha.
Min. 20: “Mushindu wa kumanya mua kuelangana meji.” Muyuki ne dinaya dia tshilejilu. Umvuija bua tshinyi bidi bikengela kumanya kuelangana meji mu buambi ne mushindu wa kupeta dimanya edi. Bamanyishi babidi bakumbane bayikile bua mushindu wa kudilongolola bua mudimu wa buambi pa kulonda malu asatu maleja mu tshikoso 3 tshia tshiena-bualu etshi ne pashishe benze dinaya dia tshilejilu bua kuleja bidibu balongolole.
Musambu 182 ne disambila dia nkomenu.
Lumingu lua dia 21 Luishi
Musambu 17
Min. 10: Mamanyisha. Luapolo lua konte.
Min. 15: “‘Bakaji badi benza mudimu wa Mukalenge.’” Mbuelelu webe kafiki ku munite mujima to, ne utungunuke ne nkonko ne mandamuna. Buejamu ngenyi ya mu Tshibumba tshia Nsentedi tshia dia 15 Kabitende 1996, mabeji 14-15, bikoso 18-19. Ela bana betu ba bakaji kalumbandi ne musangelu bua mudibu bakuatshisha tshisumbu ne muoyo mulenga, bua midimu milenga idibu bakuatshila bakuabu, ne bua mudibu bayisha ne lukunukunu.
Min. 20: “Ntshinyi tshidi mua kutuambuluisha bua tuikale ne ditabuja dishindame?” Muyuki kudi mukulu. Tudi mu bikondo bikole ne muntu yonso udi ujinga bua bamuambuluishe mu mushindu kampanda peshi kansanga. Konkonona tshidi bakulu ne basadidi ba mudimu mua kuenza bua kukolesha aba badi malu mabatekeshe mu maboko. (Tangila ka-tshiena-bualu: “Balami ba mikoko biibaki,” mu Tshibumba tshia Nsentedi tshia dia 15 Kabitende 1993, mabeji 21-23.) Umvuija mushindu utudi mua kukankamijangana bua kushala bashindame mu nyuma.—Lomo 1:11, 12.
Musambu 82 ne disambila dia nkomenu.
Lumingu lua dia 28 Luishi
Musambu 46
Min. 8: Mamanyisha. Vuluija bamanyishi bonso bua kufila luapolo lua mudimu wa buambi bua Luishi. Ambulula mu tshikoso “Malu mapepele anayi” maleja mu dibeji 4 dia Mudimu wetu wa Bukalenge wa ngondo mushale adi aleja mushindu wa kuenza mudimu ne trakte bua kuasa diyiki ne muntu. Enzayi dinaya dia tshilejilu pa mushindu wa kuenza mudimu ne trakte wa Nsombelu wa ditalala mu bulongolodi bupiabupia bua kuleja muntu mukanda wa Dimanya. Pawikale mumane kuela nkonko ya mu tshikoso tshia mbangilu tshia mu trakte, ubale tshikoso tshia kumpala mu dibeji 3 ne Misambu 37:29. Bikala muntu muleje dijinga dia kumanya bia bungi, ubulule mukanda wa Dimanya mu dibeji 5, ne ubale malu adibu bafunda mu kazubu ne umuambile bua nutuadije kulonga nende Bible. Ngondo eu, muntu yonso udi ne bua kuenza madikolela a pa buawu bua kutuadija dilonga Bible ne bantu.
Min. 5: Mandamuna ku nkonko yenu. Muyuki kudi mukulu.
Min. 17: Mudimu wetu wa luibaku lua Nzubu ya Bukalenge udi wenda uya kumpala. Mutangidi-muludiki ke wenza tshitupa etshi. Udi ukonkonona mukanda wa mu dia 1 Tshisua-munene 1999 udi utangila malu a luibaku lua Nzubu ya Bukalenge. Kudi bia bungi bia kuenza. Umvuija ne: Betele ke watangila malu onso a midimu ya luibaku ayi. Manyisha ne: netuikale dijinga ne bana betu badi bikale bashindame mu nyuma ne bateka malu a Bukalenge pa muaba wa kumpala. Badi ne bua kuikala bena bikadilu bimpe badi badiakaje bua kunemeka mikenji ya malu a luibaku ne a bukubi. Kankamija bana betu badi bakumbaje malu malomba aa bua kudifilabu ku budisuile bua mudimu eu.
Min. 15: “Tuikalayi batuishibue patudi tuyisha lumu luimpe.” Enza mbuelelu udi ulenga ku muoyo wa minite ibidi anyi isatu muashila pa malu adi mu tshiena-bualu etshi ne pa mvese mitela ne mifunda idi mu tshikoso tshia 1 ne 2. Pashishe nukonkonone tshikoso 3 too ne ku tshia 12 mu nkonko ne mandamuna.
Musambu 61 ne disambila dia nkomenu.
Lumingu lua dia 6 Luabanya
Musambu 116
Min. 5: Mamanyisha.
Min. 15: “Tuikalayi ne nkatshinkatshi mu dilomba biuma.” (w98 15/9 24-27) Muyuki kudi mukulu. Mukulu eu nealeje patoke mikenji ya kulonda ne mudibi bikengela kuangata bualu ebu ne mushinga. Neavuluije bateleji bua kumanyabu ne: ‘Muena Kristo udi ulomba biuma bipite bungi, badi mene mua kumuipata mu tshisumbu biabengaye kushintuluka.’ Nealeje ne: mu matunga mavule Mbulamatadi mmufile bungi bujadika bua biuma bia kulomba. Tshilejilu, mu Congo-Brazzaville, “bilondeshile tshidi muntu usungula, badi mua kufila bintu anyi mubidi mfranga bu biuma ne bungi buabi kabuena ne bua kupita pa mfranga ya CFA 50 000 to [mmuomumue ne: dolare 85]. Mbakandike bua kulomba anyi kufila biuma bungi bupite pa ebu.” Matunga a bungi mmele pawu mikenji ya muomumue. Bena Kristo badi banemeka mapangadika aa bualu tshipatshila tshiawu ntshia kuluisha lukuka anyi mutshima wa biuma udi nawu bamue baledi. Nansha bikala mbulamatadi kayi ukuata bantu badi batupa ku mukenji eu, muena Kristo mulelela yeye udi ne bua kuutumikila. Nenku nealame kuondo ka muoyo kimpe kumpala kua Nzambi ne kakuikala tshilenduishi kudi bakuabu nansha. Bialekela muanetu udi uselesha muanende balela bende bamusaka bua kulonda bimue bilele anyi kulomba bintu bipitepite bungi, peshi yeye mulekele ba-mansebende wa muana anyi bena mu dîku bakuabu, bua mutshima wa biuma, bangata mapangadika pa muaba wende, udi mua kujimija midimu kampanda idiye nayi ne kulua muntu udibu kabayi mua kupesha majitu mu tshisumbu to. Muanetu wenza tshitupa etshi neikale mua kubuejamu malu malelela avua menzeke adi bantu ba muaba unudi bamanye.
Min. 10: “Nuamanyayi mua kuteleja.” Muanetu wa balume udi uyukila ne muena kuende ne bana bende pa malu adibu mua kuenza bua bisangilu, mpuilu ne mpungilu kutambabi kubakuatshisha. Mmumone ne: muntu yonso wa mu dîku udi mua kushindamija lungenyi luende kaba kamue. Badi bakonkonona ngenyi mifila ne bela meji bua mushindu wa kuyitumikila, ne kabidi badi baleja mudibi bilenga bua kuyikila bua malu avuabu balongamu. Badi bambilangana mushindu wa kulonda dipangadika didibu bangate dia kubenga kupumbisha mu tshisangilu nansha tshimue peshi tshitupa nansha tshimue tshia mpungilu anyi mpuilu padiku kakuyi bualu.
Min. 15: “Tuikalayi batuishibue patudi tuyisha lumu luimpe.” Mumane kuambulula mu mêyi makese diyukidilangana dia lumingu lushale dia bikoso 12 bia mu tshisakidila, ulombole diyukidilangana dia mu nkonko ne mandamuna dia tshikoso tshia 13 too ne ku tshia 24. Ukuate mudimu bimpe ne mvese mitela ne mifunda.
Musambu 186 ne disambila dia nkomenu.