‘Ntshinganyi tshindi mua kuenza?’
1 ‘Ntshinganyi tshindi mua kuenza?’ Lukonko elu, kakuyi mpata, luvua mua kuikala mu mitu ya bena mu kasumbu kakese ka Balongi ba Bible kalongolola kudi Charles Taze Russell mu bidimu bia 1870. Bu muvuabu benda bajingulula tshivua disua dia Nzambi, balongi ba Bible abu bavua ne bua kuikala badikonke tshivuabu mua kuenza bua kuambuluisha bakuabu bua balonge malu adi Nzambi mulongolole. Kutuadila bantu ba pa buloba bujima dimanya dia mu Bible divuabu benda bapeta kuvua kuikale mudimu munene menemene.
2 Diakalenga buetu tuetu, bakakumbaja mudimu eu bimpe menemene. Mushindu kayi? Muntu yonso wakambuluisha mu wende mushindu uvua ku mêsu umueneka bu uvua mukese, ne lelu’eu Bantemu ba Yehowa mbalue kumanyika pa buloba bujima bu bulongolodi bua bamanyishi ba Bukalenge badi bungi mpindieu buamba kufika ku miliyo isambombo bikale bakuatshila mudimu mu bisumbu bitue ku 90 000 mu matunga (ne bidiila) 234.—Yesh. 60:22.
3 Ambuluishe pebe ne muoyo mujima: Bidi ne mushinga bua yonso wa kutudi kudituaye mu mudimu munene eu wakamanyisha Yezu ne: uvua ne bua kuenzeka mu matuku aa a ku nshikidilu. (Mâko 13:10) Bushuwa, mudimu eu ki ng’wa kushila anu bakulu nkayabu to (badi bikale bungi bukese); peshi kawena utangila anu bampanda-njila to. Bua kuamba bulelela, muena Kristo wetu yonso eu udi mudilambule kudi Nzambi udi ne bujitu bunene bua kuambula. Buonso buetu tudi mua kudifila mu tshitupa kampanda tshia mudimu wa diyisha. (1 Tim. 1:12) Mudimu onso utudi tuenza, ni mmukese anyi wa bungi udi utuambuluisha tuetu bine ne wambuluisha kabidi bakuabu.—1 Tim. 4:16.
4 Kudi mikuabu mishindu mimpe idi muntu yonso mua kukuatshisha pende nayi ne muoyo mujima bana betu bena Kristo. Tuikalayi ne tshibidilu tshia kubuela mu bisangilu bia tshisumbu ne kuenzamu midimu ne musangelu. (Mus. 122:1, 8, 9) Tudi mua kuenza bua tshisumbu katshikadi ne bibidilu bibi to. Tudi mua kufila makuta bua kukuatshisha mudimu udi wenzeka pa buloba bujima bilondeshile ketu katudi naku. Tudi mua kukomba Nzubu wa Bukalenge. Muntu yonso udi mua kuenza bua mu tshisumbu muikale dinanga, disanka ne buobumue. Muntu yonso ambuluishe bapiabapia, bansonga ne bakulumpe.—Kolos. 3:12, 14.
5 Nunku udi mua kudikonka ne: ‘Ntshinganyi tshindi mua kuenza?’ Nansha bikala madikolela ebe amueneka bu adi kaayi ne bua nsongo, paudi ukuatshisha bilondeshile muebe muudi namu, mbimpe umanye se: udi wambuluisha bua tshisumbu kushindamatshi, kuikalatshi tshia benji ba mudimu ne kushalatshi tshikole mu nyuma. Kakuyi mpata, tuetu bonso tudi tuenza mudimu wa mushinga bua kutumbisha dîna dia Yehowa.