Filemona ne Onesimo​—Badisange mu buena-muntu bua bena nkristo

UMUE wa ku mikanda ya mupostolo Paulo mienzeja ku spiritu wa Nzambi udi wakula bua tshilumbu tshikole tshivua tshitangila balume babidi. Umue uvua Filemona, ne mukuabu uvua Onesimo. Bantu aba bavua banganyi? Ntshinyi tshiakenza bua Paulo kutabalelaye nsombelu wabu?

Filemona, mupetshi wa mukanda, uvua musombele mu Kolosai mu Azi Minere. Bishilangane ne bena nkristo bakuabu ba bungi ba mu tshine tshitupa atshi, Filemona uvua mumanyangane ne Paulo, bu muvuaye muitabe lumu luimpe bua mudimu wa diyisha wa mupostolo. (Kolosai 1:1; 2:1) Paulo uvua mumumanye bu ‘munangibue ne muena mudimu nende.’ Filemona uvua tshilejilu tshia ditabuja ne dinanga. Uvua muakididianganyi ne uvua mpokolo wa dikankamija kudi bena nkristo nende. Bushuwa Filemona uvua kabidi muntu wa kantu ku bianza, bualu nzubu wende uvua munene muakanyine bua kuenzelamu bisangilu bia tshisumbu tshia muaba au. Bakela meji ne: Apia ne Âkipo, bantu bakuabu babidi batela mu mukanda wa Paulo, bavua mua kuikala mukajende ne muanende wa balume. Filemona uvua kabidi ne mupika umuepele, Onesimo.​—Filemona 1, 2, 5, 7, 19b, 22.

Munyemi mu Roma

Mifundu kayena ituambila bua tshinyi Onesimo uvua mutantshi wa kilometre mipite pa 1 400 ne ku nzubu, muikale ne Paulo mu Roma, muaba uvuaye mufundile mukanda mutumina Filemona bu mu 61 B.B. Kadi Paulo wakambila Filemona se: “Bikaleye [Onesimo] mukuenzele bibi, anyi muikale n’ebe dibanza, udibale bu dianyi.” (Filemona 18) Mêyi aa adi atokesha bua se: Onesimo uvua mu nsombelu wa makeyikeyi ne mfumuende Filemona. Mukanda wa Paulo uvua mufunda ne tshipatshila tshia kudiisha bantu babidi aba tshibalu.

Batu bela meji ne: Onesimo wakalua munyemi panyima pa mumane kuiba Filemona bua kupeta mfranga ya kunyema nayi mutangile ku Roma. Kuine aku wakajinga bua kusomba mu musokoko mu tshimenga tshivua ne bantu ba bungi.a Mu nsangilu wa bena Greke ne bena Roma, banyemi bavua bafila lutatu lunene ki ng’anu kudi bantu bavua ne bapika kadi ne ku midimu ya mbulamatadi. Badi bamba bua Roma nkayende ne: uvua “bu tshisokomenu tshia pa tshibidilu tshiende lumu” tshia bapika bavua banyema.

Mmunyi muvua Paulo mupetangane ne Onesimo? Bible kêna utuambila. Kadi, pakakepela dizukila budikadidi bupiabupia, pamu’apa Onesimo wakajingulula ne: uvua muditeke mu nsombelu wa njiwu mikole. Mu tshimenga tshia Roma, kasumbu ka bampulushi kavua kenda kakeba bapika badi banyeme, tshilema tshiabu tshia dinyema tshivua tshikale tshimue tshia ku bibawu bitambe bunene mu mikenji ya kale. Bilondeshile Gerhard Friedrich, “bapika banyeme bavuabu bakuata bavua babenza tshimanyinu pa mpala yabu ne mulonda muela mu mudilu. Misangu mivule bavua babakengesha . . . , babelela nyama mu tshipalu tshia manaya, anyi babashipela pa nkuruse bua se: bapika bakuabu kabidikiji tshilejilu tshiabu.” Friedrich udi wamba ne: pamu’apa panyima pa Onesimo mumane kubutula mfranga ivuaye muibe ne mukebe muaba wa kusokomena anyi mudimu mupangile, wakalomba bukubi ne dimuakuila kudi Paulo, uvuaye mumvue bakula bualu buende mu nzubu mua Filemona.

Bakuabu badi bela meji ne: ne dimanya dionso Onesimo wakaya kudi umue wa ku balunda ba mfumuende, mutekemene se: ku diambuluisha dia buenzeji buende, uvua mua kupingana mu malanda mimpe ne mfumu uvua mu buakane buonso mumufiikile munda bua kabingila kakuabu. Mikanda ya malu a kale idi ileja ne: eu uvua “mushindu mutangalake wa bukubi bua bapika bavua mu nsombelu wa makeyikeyi.” Pikalabi bilelela, nenku buivi bua Onesimo buvua “pamu’apa bua kumona mua kufika kudi mutuangaji Paulo, ne kavua muibe mfranga eyi ne meji a kunyema,” ke mudi mushikuluji Brian Rapske wamba.

Paulo udi wambuluisha

Nansha kabingila ka dinyema kikale ka mushindu kayi, kakuena mpata bua se: Onesimo wakakeba diambuluisha dia Paulo bua kupunga ne mfumuende uvua ne tshiji. Ebi biakapesha Paulo lutatu. Eu uvua mupika wa kale uvua kayi muena kuitabuja ne uvua muena tshibawu munyeme. Mupostolo uvua ne bua kutetaku bua kumuambuluisha pa kuitabijija mulunda wende muena nkristo bua kubenga kutumika ne bukenji buende bumvuangane ne mikenji bua kufila dinyoka dikole anyi? Ntshinyi tshivua Paulo ne bua kuenza?

Mu tshikondo tshivua Paulo ufundila Filemona, kakuena mpata bua se: munyemi eu ukavua musombe ne mupostolo mutantshi. Kuvua kupite tshikondo tshile bua Paulo kuambaye ne: Onesimo uvua mulue ‘muanetu munanga.’ (Kolosai 4:9) Paulo wakamba bua malanda ende a mu nyuma ne Onesimo ne: ‘Ndi nkusengelela bua muananyi ungakalela mu lukanu luanyi.’ Ku mêyi onso a Paulo, aa ke adi ne bua kuikala mêyi avua Filemona kayi mutambe kutekemena. Mupostolo wakamba ne: mupika uvua diambedi bu “muntu wa patupu” (NW) uvua upingana bu muanetu muena nkristo. Onesimo uvua ne bua kuikala mpindieu “mukuatshishi” (NW), anyi muntu “wa mushinga” (NW), nenku muikale ne nsombelu mumvuangane ne diumvuija dia dîna diende.​—Filemona 1, 10-12.

Onesimo uvua mulue ne mushinga wa bungi kudi mupostolo muena buloko. Bushuwa, Paulo uvua mua kuikala mumulame kuine aku, kadi pa kumbusha ditupa ku mikenji, bualu ebu buvua mua kuikala dinyanga manême a Filemona. (Filemona 13, 14) Mu mukanda mukuabu, mufunda bu mu tshikondo tshimuetshimue atshi ne mutumina tshisumbu tshivua tshidisangisha mu nzubu mua Filemona, Paulo wakatela Onesimo bu ‘muanetu wa lulamatu ne munanga, udi muena kuenu.’ Ebi bidi bileja ne: Onesimo ukavua mufile tshijadiki tshiende tshia dikala wa kueyemena.​—Kolosai 4:7-9.b

Paulo wakakankamija Filemona bua kuakidila Onesimo bilenga kadi kakatumika ne bukenji bua bupostolo bua kumutumina dîyi bua enze nanku anyi bua kupesha mupika wende budikadidi. Bua bulunda buabu ne dinanga dia umue ne mukuabu, Paulo uvua mushindike ne: Filemona uvua mua ‘kuenza malu matambe’ avuabu bamuambile. (Filemona 21) Tshidi “malu matambe” aa umvuija ki ntshisunguluke bualu anu Filemona ke uvua mua kupangadija mu mushindu muakane bua tshia kuenzela Onesimo. Bamue bantu mbamone mu mêyi a Paulo dilomba dibubika bua munyemi eu ‘alukile bua kumona mua kutungunuka ne kuambuluisha Paulo bu mukavuaye mutuadije kuenza.’

Filemona wakitaba dilomba dia Paulo bua Onesimo anyi? Kudi kumueneka dielakana dikese bua se: wakenza nanku, nansha muvua muanda eu mua kuikala mubungamije bamfumu bakuabu ba bapika ba mu Kolosai bavua mua kuikala bajinge bua kumona Onesimo upeta dinyoka dia tshilejilu, bua se: bapika babu kabidikiji tshilejilu tshiende.

Onesimo​—Muntu mushintuluke

Mu mishindu yonso, Onesimo wakalukila ku Kolosai ne bumuntu bupiabupia. Ngelelu wende wa meji mukudimuna kudi bukole bua lumu luimpe, wakalua kakuyi mpata muena lulamatu wa mu tshisumbu tshia bena nkristo mu tshimenga atshi. Bikala ndekelu wa bionso Filemona uvua mupeshe Onesimo budikadidi, muanda eu ki mmuleja mu Mifundu nansha. Kadi, bilondeshile mmuenenu wa mu nyuma, munyemi eu wa kale uvua mulue muntu mudikadile. (Fuanyikija ne 1 Kolinto 7:22.) Mashintuluka a muomumue adi enzeka lelu’eu. Padi bantu batumikila mêyi-maludiki a mu Bible mu nsombelu wabu, malu ne bumuntu bidi bishintuluka. Mbambuluishe aba bavuabu bangata kale bu bantu ba patupu mu nsangilu wa bantu bua kuluabu bena muabu ba tshitembu.c

Ndishilangana kayipu dienza kudi dikudimuna mutshima bua ditabuja dilelela! Nansha muvua Onesimo wa kale mua kuikala bu “muntu wa patupu” bua Filemona, kakuyi mpata Onesimo mupiamupia uvua ne nsombelu mumvuangane ne dîna diende bu muntu “mukuatshishi” udi ne mushinga. Ne bushuwa tshivua dibenesha bua muvua Filemona ne Onesimo balue kudisanga mu buena-muntu bua bena nkristo.

[Mêyi adi kuinshi]

[Kazubu mu dibeji 30]

Bapika mu mikenji ya bena Roma

MU ndongoluelu wa mikenji miela kudi bena Roma uvuaku mu siekele wa kumpala B.B., mupika uvua yeye mujima ku bukokeshi bua mfumuende. Bilondeshile muedi wa nseka Gerhard Friedrich, “mu mushindu wa nshindamenu ne udi ulonda mikenji, mupika kavua muntu nansha, kadi uvua bu tshintu tshivua mfumuende mua kutumika natshi bu mudiye musue. . . . [Uvua] muteka mu mulongo umue ne nyama mimuna ne bia-mudimu, ne mikenji ya mbulamatadi kayivua imupesha kanemu nansha kakese.” Mupika kavua mua kukeba dilongolola dia malu mabi mamuenzela mu diumvuangana ne mikenji. Mu mushindu mushindame, buende buvuaye nabu mbua kukumbaja mêyi-matuma a mfumuende. Kakuvua mikalu ku manyoka avua mfumu kampanda udi ne tshiji mua kufila. Nansha bua kalema kakese, uvua ne bukokeshi bua muoyo ne lufu.d

Pavua eku mubanji mua kuikala ne nkama ya bapika, nansha dîku divua amu ne bintu bikese divua mua kuikala ne bapika babidi anyi basatu. Mushikuluji John Barclay udi wamba ne: “Midimu ivua bapika ba kumbelu benza ivua mishilangane bikole. Bapika bavua basadila bu balami ba nzubu, balambi, bafidi ba biakudia ku mêsa, basukudi ba bintu, batuadi ba mikenji, bandeji ba bana, badiishi ba bana ne benji ba midimu yonso ya muntu, kusakidila ku midimu kabukabu idi muntu mua kupeta mu nzubu minene ya babanji. . . . Mu ngakuilu mulelela, ngikadilu wa nsombelu wa mupika wa kumbelu uvua musuikakaja bikole menemene ku mmuenenu wa mfumuende ne abi bivua mua kuikala ne bipeta bimpe peshi bibi: dikala ne mfumu wa tshikisu divua mua kufikisha ku mulongolongo wa makenga ne ku malu mabi adi kaayi mikalu, kadi mfumu mulenga ne wa kalolo uvua mua kuvuija nsombelu mupepele ne ufila ditekemena. Kudi bilejilu biende lumu bia ngenzelu ya tshikisu bifunda mu mikanda ya malu a kale, kadi kudi kabidi mifundu idi ijadika musangelu ne nyanji ivua pankatshi pa bamue bamfumu ne bapika babu.”

[Mêyi adi kuinshi]