Mmunyi mudibu mua ‘kuanji kubateta’?

¹ Bu mudi bulongolodi bua Yehowa buenda anu buya kumpala, kudi dijinga dia bana betu bapie mu nyuma badibu mua kuteka bu basadidi ba mudimu. Bana betu ba balume ba bungi badibu kabayi banji kuteka bu basadidi ba mudimu, nansha aba batshidi bansonga, batu bajinga pabu kuambuluisha mu tshisumbu. Patubu babapesha imue midimu, batu bayangata ne mushinga ne bayikumbaja bimpe. Nunku bua kukolabu mu nyuma, mbimpe ‘banji kubateta.’ (1 Tim. 3:10) Mmunyi mudibu mua kuanji kubateta?

² Tshidi bakulu ne bua kuenza: Bumue bua ku malu adi akengela kuenza bua kupima muanetu wa balume bua kumanya bikalaye mukumbaje malu malomba adi mu 1 Timote 3:8-13 bua kuambuluisha bu musadidi wa mudimu, bakulu nebanji kumuteta bua kumanya bikalaye mukumbane bua kuambula bujitu ebu. Badi mua kuanji kumupesha midimu ya diambuluisha nayi bakuabu bu mudi wa mikanda ne bibejibeji, kuakaja bikolokolo, kukomba anyi kusukula Nzubu wa Bukalenge ne bikuabu. Bakulu nebatangile mushindu udiye wenza midimu eyi. Nebakebe bua kumanya bikalaye muntu wa kueyemena, udi ufika pa dîba, muena tshisumi, mudipuekeshi, udi ne muoyo wa mudimu ne muntu udi mumanye kusomba ne bakuabu. (Filip. 2:20) Mvuadilu wende ne mushindu udiye ukosesha nsuki mbia tshitembu anyi? Mmuntu udi mukumbane bua kuambula majitu anyi? Tshidibu bakeba kudiye ‘mbienzedi biende bidiye wenza ne bupuekele ne meji.’ (Yak. 3:13, MML) Mmukumbaje malu malomba bua kuambuluisha mu tshisumbu anyi? Udiku utumikila mukenji wa Yezu wa “kuvuija bantu bayidi” pa kuikala ne tshisumi mu buambi anyi?​—Mat. 28:19; tangila Tshibumba tshia Nsentedi 1 Kabitende 1990, mab. 18-23, 23-28 (Mfual.).

³ Nansha mudibu kabayi bajadike bungi bua bidimu bidi muntu mua kuikala nabi bangabanga ne kumutekabu musadidi wa mudimu, Bible udi wakula bua bana betu aba bu “balami badi benza mudimu wabo bimpe.” (Disendamija miaku ndietu.) Kadi, kabena ne bua kuikala bansonga ba bidimu bikese menemene to, bualu bana ba bidimu bungi abu kabena mua kuikala ne bakaji ne bana to. (1 Tim. 3:12, 13, MML) Bantu ba nunku kabena ne bua kuikala batshikale ne “majinga mabi a bunsongalume” to. Badi ne bua kuikala ne bikadilu bilenga, bikale ne kuondo ka muoyo kimpe kumpala kua Nzambi ne kabidi bikale babakosela katshi kudi bantu.​—2 Tim. 2:22, MML.

⁴ Nansha mudi mamanya a muntu a ku tshifukilu mikale pawu ne mushinga, ngikadilu ne lungenyi lua muanetu ke bidi nangananga ne mushinga. Muanetu eu mmusueku kutumbisha Nzambi mu budipuekeshi ne kukuatshila bana betu mudimu anyi? Bikalabi nanku, Yehowa neabeneshe madikolela adiye wenza bua kuya kumpala mu tshisumbu.