Utu utshina bantu anyi?
1 Kabitu bitukemesha patudi tumona muana mutekete ututangila musokomene panyima pa mamuende anyi pa tatuende to. Bualu muana mutekete utu utshina bantu. Nansha bamue bantu bakulumpe ba bungi batu anu ne tshibidilu tshia kutshina bantu. Ntshinyi tshiudi mua kuenza padi ditshina bantu dikupangisha bua kuenza mudimu webe wa buambi bimpe?
2 Mushindu wa kupeta dikima: Bidi bikengela kuanji kutangila bimpe “muntu musokoma wa mu mutshima.” (1 Pet. 3:4) Unange Yehowa ne muntu nebe bikole. Ikala mutuishibue menemene se: kuyisha ng’umue wa ku mishindu mitambe buimpe ya kuleja dinanga dilelela. Ikala udilongela pa nkayebe ne ubuela mu bisangilu. Ikala usambila pa tshibidilu, ulomba nangananga diambuluisha kudi Yehowa. Ditabuja dikole ne dimueyemena nebikoleshe mutshima webe ne nebikupeshe ‘dikima ditambe dia kuamba dîyi dia Nzambi kuyi utshina.’—Filip. 1:14.
3 Umbusha mu mutu muebe ngenyi idi ikufikisha ku didiangata bu muntu udi kayi mukumbanyine to. Mbimueneke ne: Timote uvua ne bua kuikala mulonde mubelu eu. Paulo wakakankamija Timote bua ‘muntu kamulenguludi bua bunsongalume buende’ to; wakamuvuluija ne: ‘Nzambi kakatupa nyuma wa buôwa; kadi wakatupa nyuma wa bukole.’ (1 Tim. 4:12; 2 Tim. 1:7) Yehowa uvua muenze mudimu bikole ne Timote, neenze nebe pebe mudimu biwadikolesha bua kuya kumpala mu nyuma ne biwamueyemena ne muoyo webe mujima.—Mus. 56:11.
4 Kuelangana meji bua mvese wa mu Bible bu mudi Matayo 10:37 kuakambuluisha muanetu wa bakaji kampanda uvua ne bumama ne uvua utshina bayende bualu kavua musue bulelela to. Mudimu wa buambi kawakamukolela to bua dinanukila diende, kufikishabi bayende, mamuende ne bana babu ku ditaba bonso buabu bulelela!
5 Kudilongolola kudi ne mushinga: Didilongolola bimpe bua mudimu wa buambi nedikoleshe dikima diebe. Sungula dileja dipepele mu kakanda ka Mua kutuadija ne kutungunuka ne mayuki pa Bible (peshi Comment raisonner) anyi mu nimero ya kale ya Mudimu wetu wa Bukalenge, udikuate ku muoyo ne udiambulule bimpe. Pamutu pa kudisamisha muoyo tshianana, ikala ne meji mimpe. Ikala upatuka ne bakuabu mu buambi bua umone mua kupeta dikima. Uvuluke ne: bantu ba bungi bawapetangana nabu ku nzubu yabu badi pabu ne bumama ne badi pabu batshina bakuabu, anu bu wewe. Muntu yonso udi dijinga ne mukenji wa Bukalenge.
6 Biwikala utshina bantu, kuteketshi mu maboko to. Bu muudi wenza muebe muonso, Yehowa pende neakuambuluishe bua ulue mumanyishi mupiluke wa lumu luimpe. Nunku neupete disanka mu mudimu webe wa buambi.—Nsu. 10:22.