Udi utantamana anyi?
1 ‘Tshiena ne disanka didi dipite edi bunene, bua ne: bana banyi badi benda mu bushuwa.’ (3 Yone 4) Mushindu uvua bana ba Yone ba mu nyuma batantamana wakamuenza disanka dia bungi. Kakuyi mpata, bidi bisankisha Tatu wetu wa mu diulu padiye umona bantu miliyo ne miliyo badi mua kulua bana bende, ‘benda mu bushuwa’!—Nsu. 23:15, 16; 27:11.
2 Nansha mudi bantu ba Nzambi mu kabujima kabu basuminyina ne dienza mudimu wa bena Kristo ne lukunukunu, bamue ba kudibu kabatshiena bawenza ne tshisumi to. Nansha muvuabu basankidila bikole mudimu eu pakatuadijabu kulonga bulelela, pavua bidimu bienda bipita, bakalua kulekela didifila bikole mu mudimu wa dienza bayidi eu peshi mene kabatshiyi bawenza pa tshibidilu.
3 Bidi biumvuika mudi bakuabu kabatshiyi pamu’apa bawenza bikole bua masama kampanda peshi bua bukulakaje. Nansha nanku, tudi mua kubela kalumbandi bua ditantamana diabu. Badi bawenza bilondeshile makanda a mubidi adibu nawu. Kadi muntu yonso udi mudilambule kudi Nzambi udi ne bua kudikonka ne: ‘Ndi mutambe kudifila mu malu anyi nkayanyi ne kushila malu a Bukalenge anu kaba kakese anyi? Ndi mulue bu muntu wa “tshiuyuya” anyi peshi ntshidi ndienzeja “ne makanda [anyi] onso”?’ (Buak. 3:15, 16; Luka 13:24, NW) Muntu yonso wa kutudi ele meji ne muoyo umue pa bidiye wenza ne adiakaje bimpe; avuluke mudi Yehowa mulaye ne: “butumbi ne buneme ne ditalala nebikale kudi muntu yonso udi wenza malu mimpe.”—Lomo 2:10.
4 Tshitudi mua kuenza bua kutantamana: Ntshinyi tshiakambuluisha Yezu bua kutantamanaye? Paulo udi wandamuna ne: ‘Bua disanka diakatekibua kumpala kuende, wakakankamana pakakengaye ku [mutshi wa tshinyongopelu], wakalengulula bundu, ne wakushikama ku tshianza tshikole tshia nkuasa wa butumbi wa Nzambi.’ (Eb. 12:1-3) Disanka divuabu batekele Yezu kumpala divua dipite kule ne kule mateta a tshikondo tshîpi avuaye ne bua kutuilangana nawu. Kuvuluka disanka didibu batutekele kumpala kudi mua kutuambuluisha petu bua kutantamena mateta. (Buak. 21:4, 7; 22:12) Tuetu beyemene anu Yehowa bua kutupeshaye bukole budi muntu mua kupeta padiye udilongela, ubuela pa tshibidilu mu bisangilu ne usuminyina mu masambila, netupete mushindu wa kunanukila mu mudimu udiye mutupeshe bua kuenza.
5 Yehowa udi usanka padiye umona bantu bende badi bamulamate batantamana. Nunku tutungunukayi ne ‘kuenda mu bushuwa’ bua disanka dia Nzambi kuvuladi.