Tutendelele Nzambi ne bulelela

Bua ntendelelu kuanyishibuaye kudi Nzambi, udi ne bua kuikala mushindamene pa bulelela. (Yone 4:23) Bible udi usunguluja batendeledi balelela bu bena mu “tshisumbu tshia Nzambi wa muoyo, dikunji ne nshindamenu wa bulelela.” (1 Timote 3:15, NW) Aba badi benza tshisumbu tshia Nzambi kabena anu bitaba bulelela bua mu Dîyi dia Nzambi kadi badi kabidi ne nsombelu mumvuangane nabu ne badi babuashisha, babumanyisha pa buloba bujima.​—Matayo 24:14; Lomo 10:9-15.

BANTEMU BA YEHOWA mbamanyike bimpe bua mudimu wabu wa dilongesha Bible, udi wenzeka mpindieu mu matunga mapite pa 200. Badi balonga Bible ne bamulongesha bu bulelela, kakuyi dibuejamu buenzeji butekeshi bua nkindi ya bantu nansha. Utu mumanye malongesha abu mashindamene pa Bible anyi? Bantu ba bungi batu belakana bua kuteleja Bantemu ba Yehowa bua ngumu mibi itubu babendeshila. Kadi bantu ba mitshima milulame mbalombibue bua kudiangatshila dipangadika bikala bidi Bantemu bayisha bikale bulelela anyi kabiyi bulelela. Dipangadika dia mushinga mukole bu edi kadiena ne bua kuikala dishindamene pa biambamba to. Bavule badi badienzele dikebulula pa malongesha a Bantemu ba Yehowa mbapete masanka a bungi.

Dimanya dia bulelela didi diumbusha buôwa

Tangila tshilejilu tshia Eugenia. Uvua mukolele mu dîku dia bena Katolike ba dîsu dikole. Tatuende uvua umue wa ku bantu bavua balongolole dikumbula dia pape mu ditunga dia Mexique mu 1979. Pavuaye muye kumona balunda bende, Eugenia wakapetangana ne Bantemu ba Yehowa. Ku diambuluisha diabu wakatuadija kukonkonona bimpe menemene tshidi Bible wamba. Udi uvuluka ne: “Kumpala, buôwa buakatuadija kunkuata. Mvua mupete bulelela! Kadi ebi bivua biumvuija ne: mavule a ku mitabuja anyi a kumpala avua a dishima. Mitabuja a dîku dianyi, a balunda banyi ne a bantu bamvua munange​—onso avua a dishima. Mvua ndubakana. Ngakatungunuka ne kudikonka tshivua dîku dianyi mua kuenza bua tshimvua mfuma ku disokolola. Pakapita matuku ne bua diambuluisha dia Yehowa, ngakatuadija kudiakaja biumvuangane ne muanda eu munenanenayi. Dimue edi ngakapangadija bua kukuatshila mulongeshi kampanda wa teoloji uvua mulunda wa mu dîku dietu bualu abu. Ngakamuambila malu onso pa dijinga dianyi dia kupeta bulelela. Pashishe wakamba ne: ‘Biwikala musue kumanya bulelela, keba Bantemu ba Yehowa.’”

Anu tshivua Eugenia utshina, dîku diende diakamuipata kumbelu. Nansha nanku, Bantemu bakatungunuka ne kumupesha diambuluisha dia mu nyuma. Udi umvuija ne: “Bavua bankoleshe bua kulamata ku luseke lua bulelela. Ngakajingulula ne: buvua bualu bua diluila mvita. Mushindu uvua Bantemu ba Yehowa bangakidile uvua wa mushinga mukole. Ngakadiumvua ne: bavua bannange mu tshisumbu tshia bena nkristo. Kulamata bulongolodi bua Yehowa kuakangambuluisha bua kutshimuna buôwa bua kushala mulamate ku luseke lua bulelela kakuyi dikuatshisha dia dîku dianyi.”

Tangila tshilejilu tshikuabu. Sabrina wakakola muikale ne tshibidilu tshia kuenza mayuki a mu dîku pa malu a mu Bible. Bushuwa bavua benze tshintu tshienze bu ‘tshitendelelu tshia dîku.’ Wakabangisha tshibidilu tshia kudisangisha ne bena bitendelelu bishilangane bua kubaleja bilema biabu. Pakamulomba Ntemu wa Yehowa kampanda bua kulonga nende Bible, wakitaba pa lukasa muikale ne meji a kuleja bubi bua mitabuja abu. Udi uvuluka ne: “Panyima pa mumane kupitshisha tshidimu tshijima mu dilonga, ngakumvua buôwa bua kujimija ‘bulelela buanyi.’ Bivua bitekete bua kutandula mashimi a bitendelelu bia bungi mumvua mubuele, kadi bua musangu eu kabivua bitekete nansha.”

Buôwa bua Sabrina buakamufikisha ku dimanyika dilonga diende dia Bible ne Bantemu ba Yehowa. Kadi pashishe wakadiumvua bu tshintu tshia munda mutupu mu nyuma. Wakapangadija bua kutuadijilula dilonga ne ndekelu wa bionso kufikaye ku ditaba bulelela ebu buvuaye ufuma ku dipeta. Sabrina wakadiunda too ne ku dijinga dia kumanyisha bakuabu bivuaye ulonga. Wakalomba mene bua kuya ne Bantemu mu mudimu wabu wa ku nzubu ne ku nzubu. Sabrina udi umvuija ne: “Kumpala kua meme kupeta dianyisha bua kuyisha ne Bantemu ba Yehowa, bakangebeja ne: ‘Udi musue bushuwa bua kuikala Ntemu wa Yehowa anyi?’ Ngakandamuna ne: ‘Tòo!’ Buôwa buakankuata kabidi.” Ndekelu wa bionso, panyima pa ditungunuka ne kubuela mu bisangilu bionso ne ditangila bantu ba Nzambi ne mudibu batumikila mêyi-maludiki a mu Bible, Sabrina wakafika ku nkomenu wa se: bushuwa tshivua bulelela. Wakatambula ne udi mpindieu mumuangalaji wa evanjeliyo wa ku dîba ne ku dîba.

Bua tshinyi mmashilangane bikole?

Muntu udi mua kudikonka ne: ‘Bua tshinyi malongesha a Bantemu ba Yehowa mmashilangane bikole ne a bitendelelu bikuabu?’ Dikonkonona mu tshikoso dia malu adi Bantemu bitabuja nedikuambuluishe bua kumona se: mbena nkristo ba muoyo umue, balongi ba Bible bena bululame. Tudi tukukankamija bua kudikebela mu Bible webe mvese ya mitabuja abu a nshindamenu mileja mu tshikepeshilu tshidi kuulu eku.

Mu dikonkonona bimpe menemene malu adi Bantemu ba Yehowa bitabuja ne mudibu balamate ku bidi Bible ulongesha, udi mua kubeneshibua ne budikadidi budi bulelela bufila. (Yone 17:17) Kakuena kabingila ka kutshinyina bulelela nansha. Vuluka dilaya dia Yezu dia se: “Nenumanye bulelela ne bulelela nebunupe budikadidi.”​—Yone 8:32, MML.

[Kazubu mu dibeji 6]

AMUE MITABUJA A NSHINDAMENU A BANTEMU BA YEHOWA

◯ Yehowa n’Nzambi Wa-Bukole-Buonso. Dîna diende dia nsungasunga didi dimueneka misangu mipite pa 7 000 mu maniskri a kumpala a Bible.​—Musambu 83:18.

◯ Yezu Kristo m’Muana wa Nzambi, wakalua pa buloba bua kufila muoyo wende bua bukua-bantu. (Yone 3:16, 17) Bantemu ba Yehowa badi balonda malongesha a Yezu Kristo anu mudiwu asanganyibua mu Evanjeliyo.

◯ Dîna Bantemu ba Yehowa ndishindamene pa Yeshaya 43:10 (NW), udi wamba ne: “‘Nudi bantemu banyi,’ edi ndijikula dia Yehowa.”

◯ Bukalenge budi bantu balomba mu disambila dia “Tatu wetu” m’mbulamatadi wa mu diulu umbusha mu katupa kîpi emu makenga ne bisama bionso mu bantu bua bishile Mparadizu udi Bible ulaya muaba.​—Yeshaya 9:6, 7; Danyele 2:44; Matayo 6:9, 10; Buakabuluibua 21:3, 4.

◯ Muntu yonso udi wenza disua dia Nzambi udi ne mushindu wa kupeta bua kashidi mabenesha a Bukalenge ebu.​—Yone 17:3; 1 Yone 2:17.

◯ Bena nkristo badi ne bua kuenza bua bikadilu biabu biumvuangane ne tshidi Bible wamba. Badi ne bua kudienzeja bua kuikala bena bululame, kuikala ne nsombelu mukezuke ne wa tshitembu, ne kuleja bantu nabu dinanga.​—Matayo 22:39; Yone 13:35; 1 Kolinto 6:9, 10.

[Tshimfuanyi mu dibeji 5]

Bantemu ba Yehowa badi bamanyisha bantu bulelela bua mu Bible mu matunga mapite pa 200