Utu umona Nzambi bu muntu mulelela anyi?

PAUDI upetangana ne ntatu idi ibungamija, utu usemena pa lukasa kudi Nzambi mu disambila anyi? Bikalabi nanku, utu umvua ne: udi wakula ne muntu mulelela anyi?

Pavuaye wakula bua Tatuende wa mu diulu, Yezu Kristo wakamba ne: “Wakuntuma udi mulelela.” (Yone 7:28) Eyowa, Yehowa Nzambi udi muntu mulelela, ne kumulomba kudi bu kunyemena kudi mulunda wa pa muoyo bua kupeta diambuluisha anyi mibelu. Bushuwa, bua Nzambi kututeleja, masambila etu adi ne bua kumvuangana ne malu adi Mifundu ilomba bua disambila kuikaladi dianyishibue. Tshilejilu, tudi ne bua kusemena kudi “Muteleji wa masambila” ne budipuekeshi ku butuangaji bua Muanende Yezu Kristo.​—Musambu 65:2, NW; 138:6; Yone 14:6.

Bamue badi mua kuela meji ne: bu mudi Nzambi kayi umueneka, nanku ki mmuntu to. Buabu buobu, Nzambi udi mua kumueneka bu udi kayi ne bumuntu. Nansha bamue bena nkristo badi balonge ngikadilu milenga ya Nzambi, imue misangu badi mua kumona bikole bua kujingulula mudiye muntu mulelela. Bualu ebu bukadi bukufikile anyi? Bikalabi ne: eyowa, ntshinyi tshidi mua kukuambuluisha bua wewe kumona Yehowa Nzambi bu muntu mulelela?

Longa Mifundu

Utu ulonga Mifundu Minsantu pa tshibidilu anyi? Paudi utamba kuenza pa tshibidilu dilonga dia Bible misangu ne misangu, udi utamba kumona Yehowa Nzambi bu muntu mulelela. Nenku ditabuja diebe nedikole, bushuwa nedikuambuluishe bua ‘kumona Eu utu kayi umueneka.’ (Ebelu 11:6, 27, NW) Ku lunga luseke, dilonga dia Bible dia ku musangu anyi didi kadiyi dikuatakane kadiakuikala pamu’apa ne buenzeji buimpe pa ditabuja diebe.

Tshilejilu: Ela meji ne: doktere webe mmukuambile bua kulaba buanga kampanda misangu ibidi ku dituku bua kujikija tshintu tshidi tshikupatuke pambidi tshidi katshiyi tshikushila muaba. Tshintu tshidi tshikupatuke etshi netshijike biwalaba buanga ebu anu musangu umue anyi ibidi ku ngondo anyi? Tòo. Bia muomumue, mufundi wa misambu udi utuleja “bungi bua manga matufundila” bua tuetu kupeta makanda a mu nyuma. Bala Dîyi dia Nzambi “ne dîyi ditekete munya ne butuku.” (Musambu 1:1, 2, NW) Bua kupeta masanka mavule, tudi ne bua kulonda “bungi bua manga matufundila”​—kukonkonona Dîyi dia Nzambi dituku dionso ku diambuluisha dia mikanda ya bena nkristo.​—Yoshua 1:8.

Udiku musue bua bikondo biebe bia dilonga bikale bitamba kukolesha ditabuja anyi? Tangila lungenyi lumue: Wewe mumane kubala nshapita mujima mu Les Saintes Écritures​—Traduction du monde nouveau anyi mu Bible mukuabu udi ne mvese mifuanangane ya mu milongo anyi ku nseke, sungula mvese udi ukusankisha ne tangila mvese mifuanangane idibu bafile. Ebi nebisakidile amue malu mu dilonga diebe, ne kakuyi mpata neukeme bua diumvuangana didi munda mua Bible. Ku luseke lukuabu, nebikufikishe ku dimona Yehowa Nzambi, Mufundishi wa Bible bu muntu mulelela menemene.

Ditumika ne mvese mifuanangane ya mu milongo didi kabidi mua kukufikisha ku dibidilangana ne milayi ya mu Bible ne dikumbana diayi. Pamu’apa udi muibidilangane ne milayi minene ya mu Bible, bu mudi idi itangila kabutu ka Yeruzaleme kenza kudi bena Babilone. Kadi Bible udi ne mushiki wa milayi milamakanangane ne dikumbana diayi. Imue ya ku yoyi ki mmimanyike bimpe to.

Tshilejilu, bala mulayi wa dinyoka bua diibakulula dia Yeriko ne pashishe konkonona dikumbana diawu. Yeshuwa 6:26 (MMM) udi wamba ne: “Tshikondo atshi Yeshuwa uvua wela mulawu wamba ne: ‘Muntu wajinga kuibakulula tshimenga tshia Yeriko, mulawu umukuate ku mesu kua [“Yehowa,” NW]! Yeye mubange kutshiasa, ajimije muanende wa balume muanabute! Yeye mutshiele biibi, ajimije muanende wa balume wa mukala!’” Dikumbana dia mulayi eu diakenzeka panyima pa bidimu bu 500, bualu tudi tubala mu 1 Bakelenge 16:34 ne: ‘Mu matuku ende [a Mukalenge Ahaba] Hiele, muena Betele, wakasa musoko wa Yeriko; pakajadikaye makunji a musoko, muanabute wende Abirame wakafua, pakatekaye biibi bia musoko, muan’a mukala wende Seguba wakafua, bu mu dîyi dia Yehowa diakambilaye Yoshua, muana wa Nuna.’a Anu Nzambi mulelela ke uvua mua kupudija milayi bu nunku ne kutabalela dikumbana diayi.

Mu dibala Bible, udi mua kujinga kumanya bia bungi pa muanda kampanda. Tshilejilu, udi mua kudiebeja bungi bua bidimu bidi bipite pankatshi pa mulayi kampanda ne dikumbana diawu. Pamutu pa kuebeja patupu muntu mukuabu, bua tshinyi kubenga kuenza madikolela bua kudipetela diandamuna? Mu ditumika ne malu adi mu tuzubu ne mikanda idi yambuluisha bua kulonga Bible, keba mandamuna ne tshisumi anu bu muudi mua kudienzeja bua kusokolola pa karte muaba udi bubanji busanganyibua. (Nsumuinu 2:4, 5) Kupeta mandamuna nekuikale ne buenzeji bua bungi pa ditabuja diebe ne nekukufikishe ku dimona Yehowa Nzambi bu muntu mulelela menemene.

Sambila pa tshibidilu ne tshisumi

Kulenguludi mushinga wa disambila ne ditabuja to. Bayidi ba Yezu bakenza dilomba edi dia buludiludi: ‘Udiundishe ditabuja dietu.’ (Luka 17:5) Biwikala kuyi mumone Yehowa bu muntu mulelela, bua tshinyi kubenga kumulomba bua kupeta ditabuja divule diudi ukengela? Ne dieyemena dionso lomba diambuluisha dia kudi Tatuebe wa mu diulu mu dimumona bu muntu mulelela.

Bikala lutatu kampanda lukutonda, udilamine tshikondo tshidi tshikengedibua bua kukuatshila Mulunda webe wa diulu bualu buebe ne muoyo mujima. Pakavua Yezu pabuipi ne kufua, wakasambila bikole. Nansha muvuaye mubenge tshilele tshia bitendelelu tshia kuenza masambila male ne tshipatshila tshia kudileja kudi bantu, wakapitshisha butuku bujima usambila pa nkayende kumpala kua kusungulaye bapostolo bende 12. (Mâko 12:38-40; Luka 6:12-16) Tudi kabidi mua kupetela dilongesha kudi Hana, wakalua mamuende wa muprofete Samuele. Bu muvuaye utamba kujinga bua kupeta muana wa balume, ‘wakasambila mutantshi mule kumpala kua Yehowa.’​—1 Samuele 1:12, NW.

Ndilongesha kayi dia nshindamenu didi mu bionso ebi? Biwatekemena bua kupeta mandamuna ku masambila ebe, udi ne bua kusambila ne muoyo mujima, ne tshisumi, musangu ne musangu​—bushuwa biumvuangane ne disua dia Nzambi. (Luka 22:44; Lomo 12:12; 1 Tesalonike 5:17; 1 Yone 5:13-15) Kuenza nenku nekuambuluishe bua kumona Nzambi bu muntu mulelela.

Tangila bifukibua

Bumuntu bua muzodi wa bintu budi mua kumuenekela ku bintu bidiye muzola. Bia muomumue, ‘ngikadilu idi kayiyi imueneka’ ya Yehowa, Mufumbi ne Mufuki wa bukua-mabulunge idi imuenekela bimpe mu bifukibua. (Lomo 1:20, NW) Patudi tujoja ne ntema mudimu wa bianza bia Yehowa, tudi tupeta bujinguludi buimpe bua bumuntu buende, ne nenku tulua kumumona bu muntu mulelela menemene.

Wewe mutangile bimpe bintu biakafuka Nzambi, ngikadilu yende milelela idi mua kukukemesha bikole. Tshilejilu, malu adi atangila makokeshi adi nawu nyunyi bua kubuka adi mua kukolesha dianyisha diebe bua meji a Yehowa. Mu dibala pa bukua-mabulunge, udi mua kujingulula ne: Tshisumbu tshia Mitoto tshibikila ne: Njila wa Mabele, tshidi tshilomba bidimu bitue ku 100 000 bia lubilu lua bukenke bua kushisha kutshisambuka, patshi tshidi anu tshimue tshia ku miliyare ya bisumbu bia mitoto bidi mu tshibuashibuashi. Muanda au kawena ukukemesha bua meji a Mufuki adi mikale bualu bulelela anyi?

Bushuwa, meji a Yehowa mmalelela! Kadi bidi ne diumvuija kayi kuudi? Ntatu idi yonso wa kutudi umutuadila mu disambila kayena bushuwa mua kumupita mutu nansha. Eyowa, nansha dimanya dikese diudi nadi pa bifukibua didi mua kukufikisha ku dimona Yehowa bu muntu mulelela menemene.

Enda ne Yehowa

Udi mua kudimuena mudi Yehowa muikale muntu mulelela anyi? Eyowa, biwikala bu nkambua wa lulamatu Nowa. Misangu yonso uvua utumikila Yehowa, utumikila bikole mu mushindu wa se: bakafika ku diamba ne: ‘Nowa wakenda ne Nzambi.’ (Genese 6:9) Nowa uvua wenza malu bienze bu se: Yehowa uvua ku luseke luende menemene. Udi mua kumona Nzambi bu muntu mulelela mushindu’au.

Biwikala wenda ne Nzambi, udi weyemena malaya a mu Mifundu ne wenza malu mumvuangane nawu. Tshilejilu, udi witaba mêyi a Yezu aa: “Tungunukayi ne kukeba diambedi bukalenge ne buakane [bua Nzambi], ne bintu bikuabu ebi bionso [bia ku mubidi bidi bikengedibua] nebanusakidilebi.” (Matayo 6:25-33, NW) Bulelela, misangu yonso Yehowa kêna mua kukupesha tshiudi ukengela mu mushindu uudi mutekemene nansha. Kadi paudi usambila ne pashishe upeta diambuluisha dia Nzambi, neumumone bu muntu mulelela anu bu muudi umona muntu yonso udi ku luseke luebe.

Malanda mashême a nunku ne Yehowa atu adiunda padi muntu utungunuka ne kuenda ne Nzambi. Tangila Manuela, Ntemu udi wakula tshiena-Espagne, wakatantamena mateta kabukabu. Udi wamba ne: “Dîba dionso ditu bualu buntonda anyi dindi mu dikenga, ntu ntumikila dîyi-diludiki dia mu Nsumuinu 18:10. Ntu nyemena kudi Yehowa bua kupeta diambuluisha. Misangu yonso utu ‘tshibumba tshikole’ kundi.” Manuela udi wamba bualu ebu panyima pa bidimu 36 bia dieyemena Yehowa ne dipeta dikuatshisha dia kudiye.

Utshidi ubanga bua kuvuija Yehowa tshieyemenu tshiebe anyi? Kuteketshi mu mikolo bikala malanda ebe nende kaayi manji kuikala tshiudi musue to. Dituku dionso wikala wenza malu bu muntu udi wenda ne Nzambi. Mu dikala ne nsombelu wa tshitembu wa lulamatu, neufike ku dipeta malanda makole ne Yehowa.​—Musambu 25:14; Nsumuinu 3:26, 32.

Mushindu mukuabu wa kuenda ne Nzambi ng’wa kuikala mudifile mu mudimu wende. Paudi wenza mudimu wa dimanyisha Bukalenge, udi ulua muenzejanganyi wa mudimu ne Yehowa. (1 Kolinto 3:9) Kuikala mumanye bualu ebu kudi kukuambuluisha bua kumona Nzambi bu muntu mulelela menemene.

Mufundi wa misambu udi utubela ne: ‘Uteke njila webe mu bianza bia Yehowa; umueyemene yeye kabidi, ne yeye neenze malu ende.’ (Musambu 37:5) Kupangi bua kupuila Nzambi majitu onso anyi ntatu iudi nayi nansha. Misangu yonso unyemene kudiye bua kupeta diambuluisha ne buludiki. Biweyemena Yehowa Nzambi ne muoyo mujima ne misangu yonso umueyemena muebe muonso, neudimone mu bukubi bualu udi mumanye se: kakupanga bua kukuenzela malu mimpe to. Utu ne dieyemena pautu usemena kudi Yehowa ne ntatu yebe ya nsungansunga anyi? Newikale nadi​—biwamona Nzambi bu muntu mulelela.

[Mêyi adi kuinshi]

[Tshimfuanyi mu dibeji 21]

Enza bua bikondo biebe bia dilonga bikale bikolesha ditabuja

[Tshimfuanyi mu dibeji 22]

Udilamine tshikondo tshia kuenza disambila, pa tshibidilu ne tshisumi

[Tshimfuanyi mu dibeji 23]

Tangila mudi ngikadilu ya Nzambi imuenekela mu bifukibua

[Mêyi a dianyisha]

Kasoji: U.S. Fish and Wildlife Service, Washington, D.C./​Dean Biggins; mitoto: Photo: Copyright IAC/​RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands