‘Dijinga dia kumanya mu mutshima ne mu meji’

“Miaku kayena mua kumvuija disanka ne musangelu bidi bienda bivula pandi mbala ne muoyo mujima mukanda wa Y a-t-il un Créateur qui se soucie de vous? Mukanda eu udi ujula dijinga​—tòo, dijinga dikole—​dia kumanya bia bungi. Tuasakidilayi bua munudi bajule dijinga dia kumanya mu mutshima ne mu meji anyi.”

KE MUVUA Ntemu wa Yehowa kampanda wa ku Nord kua Californie, mu États-Unis, mumvue bua mukanda mupatula kudi Société Watch Tower mu Mpungilu ya Distrike ya “Njila wa muoyo wa Nzambi” mu 1998/99. Nansha wewe kuyi muanji kupeta webe mukanda, tangila malu akamba bantu bakuabu.

Matuku ndambu kunyima kua yeye mumane kupeta mukanda eu mu mpungilu wa mu tshimenga tshia San Diego, ku Californie, mu États-Unis, muntu kampanda wakafunda ne: “Ndi mmona ne: mukanda eu udi ukolesha ditabuja bikole. Udi uuja mutshima wanyi ne dianyisha dikole bua bintu bidi Yehowa mufuke. Nkadi mu dibeji dia 98, ne tshiena musue bua ujike nansha! Udi unsankisha be.”

Muntu mukaji mukuabu wa ku Asia wakafunda ne: “Ngamba-malu wa mu mpungilu wakaubikila ne: ‘mukanda wa pa buawu,’ ne tshiambilu atshi ntshiakanyine malu adimu. Tshimanyinu tshia pa buatshi tshidi se: mukanda eu kawena wenzeja mubadi bua kuitaba dikalaku dia Nzambi nansha, kadi udi uleja malu malelela.”

Mudi malu mimpe masokolola kudi bena meji pa bidi bitangila bukua-bintu, muoyo ne tuetu bine. Malu aa akakemesha bantu ba bungi. Munga muntu mukaji wa mu Californie wakafunda ne: “Ndi mupangile miaku ya kumvuija nayi mudi mukanda eu mukese mulenge mutshima wanyi. Tshivua mua kuimanyika diubala, bualu dibeji dionso divua diumvuija malu masokolola a bungi adi atangila bukua-bintu ne muoyo muine. Ndi mulongemu malu a bungi be! Nendame bimpe mukanda eu mukese ne nemmanyishe bantu ba bungi malu adimu.”

Tshiakasankisha bantu ba bungi mmushindu udi mukanda eu ufila tshikepeshilu tshia Bible, uleja bumuntu bua Mufuki. Tshilejilu, tangila mêyi aa: “Malu manene a mu Bible mujima, maleja mu tshikoso pabuipi ne ku ndekelu kua mukanda eu, ng’umue wa ku nshapita mitambe buimpe indi mubale.” Diakamue kunyima kua mpungilu wa kumpala mu New York, ku États-Unis, muntu mukaji mukuabu wakafunda ne: “Ku mikanda inukadi bapatule, mukanda mupiamupia eu udi utamba kukoka ntema bikole. Mvua musankisha kudi bijadiki bifila kudi bena meji bua kujadika ne: Mufuki udiku. Tshikepeshilu tshijalame tshia Bible ntshikumbane bua kumvuija malu adibu bamba ne bua kujula dijinga dia kubala malu makuabu a bungi.”

Malu a bena meji adi umvuika

Malu a bena meji adibu baleje mu nshapita ya ntuadijilu adi mua kumueneka makole menemene bua kuumvua, kadi tangila tshilejilu tshia mudi bantu bele meji.

Muntu mukuabu wa mu ditunga dia Canada wakafunda ne: “Ndishilangana kayipu ne mikanda ya mamanya masunguluke. Bayifundi badi bakeba bua kutukemesha ne miaku mikole. Dimanya dia pa buadi dinudi nadi bua kufika ku ditutekeshila biena-bualu bia malu a fizike, shimi, ADN, kromozome ne bikuabu. Nuvua nansha mua kuikala bafunde mikanda idibu balonga nayi mu iniversite imvua mulonge kukadi bidimu bia bungi!”

Mulongeshi wa fizike wa mu iniversite kampanda wakafunda ne: “[Mukanda eu udi] uleja malu patoke kauyi umata mu buteyi bua kumvuija kalu ne kalu kuonso nansha. Udi welesha mubadi meji ne udi utela mêyi a bena meji ba bungi bende lumu. Eu ‘mmukanda wa kubala’ bua muntu yonso udi musue kumanya ntuadijilu wa bukua-bintu ne muoyo, nansha yeye muikale muena meji anyi muntu wa tshianana.”

Nsongakaji mukuabu uvua ulonga tulasa tua manga wakamba ne: “Pangakabulula mukanda eu mu nshapita muinayi, ngakakema bikole pamvua mumone se: bimvua mbala abi bivua biangatshila mu mukanda utudi tulonga mu kalasa! Ngakapesha mulongeshi wetu mukanda eu ne ngakamuambila mumvua mumanye ne: uvua ne bua kusanganamu malu avua asankisha. Ngakamuleja mu dibeji dia 54 mudibu bakula bua buongo. Wakabala malu avuamu ne kuambaye ne: ‘Mukanda eu udi usankisha be! Nenye kuubadila kumbelu.’”

Tshipuita-munua-mfuanka wa mu ditunga dia Belgique wakafunda ne: “Bualu buakakoka ntema yanyi buvua diumvuija dia se: malu a bena meji ba lelu kaena abengangana ne tshidi Bible wamba bua Nzambi umuepele nansha, kadi adi itaba tshidi Bible wamba bua bualu buende. Eu mmuenenu wa kuangata ne mushinga.”

Manya Mufuki bimpe menemene

Mukanda eu wakambuluisha bantu ba mu matunga a bungi bua kumanya Nzambi bimpe menemene ne bua kudiumvua batambe kuikala pabuipi nende. Mubadi kampanda wa mu Tshimenga tshia Fukuoka, mu ditunga dia Japon, wakamba ne: “Bidi anu bu se: lumuenu ludi ludiundisha bintu luvua lutangija anu kudi Yehowa bua musangu wa kumpala. Mukanda eu udi utuishangana mu mushindu wa dikema. Ngakafika ku dimanya Yehowa mu mushindu umvua tshiyi muelele meji too ne mpindieu.” Muntu mulume mukuabu wa mu ditunga dia El Salvador wakafunda ne: “Nudi numvuija bimpe bitambe mudi Nzambi muikale muena luse, muena bulenga, kayi ukuata tshiji lukasa ne mûle tente ne bulenga-bunangi. Bushuwa, etshi ke tshitudi natshi dijinga menemene bua kutamba kuikala pabuipi nende, yeye ne Muanende. Mmukanda wa kumpala udi umvuija mmuenenu ya Yehowa ne mushindu uvua Muanende Yezu umvua pavuaye muntu.” Ne mubadi kampanda wa mu ditunga dia Zambie wakamba ne: “Mpindieu ndi mmona Yehowa mu mushindu mupiamupia.”

Kakuyi mpata, Bantemu ba Yehowa badi ne disanka dia kumanyisha bantu bakuabu malu adi mu mukanda wa Y a-t-il un Créateur qui se soucie de vous? Muntu mukaji mukuabu wakamba ne: “Pangakajikija dibala nshapita wa 10 [“Si le Créateur se soucie des hommes, pourquoi tant de souffrances?”], ngakamba ne: ‘Eu ke mukanda utudi nawu dijinga mu Japon!’ Ndi musue kuvuluka bimpe malu adi mu nshapita eu ne kuenza nawu mudimu mu buambi misangu ne misangu.” Munga muntu mukaji udi ulonga Bible ne nsongakaji uvua mukolele mu ntempelo wa bena Buddha muvua tatuende muikale muakuidi. “Bivua bimukolele bua kuitaba lungenyi lua se: Mufuki udiku. Mumvuija adi mu mukanda eu kaena asuisha bantu ku bukole to, kadi mudi malu malelela, nenku ndi ngela meji ne: nansha bena Buddha badi mua kuubala kakuyi dielakana nansha. Udi kabidi utuambuluisha bua kutamba kumvua dinanga dia Yehowa.”

Mêyi aa akafumina mu ditunga dia Angleterre: “Ndi mfuma ku dijikija mukanda wa Créateur ne nkadi pakutuadija diubala tshiakabidi. Mmukanda mulenga wa dikema! Muntu udi mua kunanga Yehowa mu diubala tshianana. Ndi mupeshe muena mutumba nanyi mukanda umue, kunyima kua yeye mumane kubala nshapita ibidi patupu, wakamba ne: ‘Tshiena mua kuimanyika diubala nansha, udi usankisha be.’ Ndi mushindike ne: mukanda eu newambuluishe bantu bua bafike ku dimanya ne ku dinanga Mufuki Munene.”

Munga muntu mulume wa mu provense wa Maryland, ku États-Unis, wakamba ne: “Bulelela mukanda eu mmulenge too ne buongo bua mu mifuba yanyi ya mu nyuma! Ndi mulongolole bua kuupesha bantu bonso batudi tuenza nabu mudimu. Imue misangu ntu mmona bikole bua kutuadija kuyisha bantu aba badi balonge bikole ne badi ne midimu ya bungi. Ku diambuluisha dia mukanda eu, mpindieu nempete mbuelelu muimpe udi ukoka ntema.”

Kakuyi mpata, mukanda wa Y a-t-il un Créateur qui se soucie de vous? newambuluishe bantu pa buloba bujima.

[Mêyi a dianyisha bua tshimfuanyi mu dibeji 25]

Foto udi pa tshizubu kuulu, Nébuleuse de l’Aigle: J. Hester ne P. Scowen (AZ State Univ.), NASA