Tuikalayi ba ku badi ne ditabuja

“Tudi . . . ba ku badi ne ditabuja too ne ku dilama dia anyima ne muoyo.”​—EBELU 10:39, NW.

1. Bua tshinyi tudi mua kuamba ne: ditabuja dia muntu yonso udi usadila Yehowa ne lulamatu ndia mushinga mukole?

MUSANGU udi ulonda pawikala mu Nzubu wa Bukalenge mûle tente ne batendeledi ba Yehowa, wanji kutangilabi bantu badi ku luseke luebe. Wele meji bua mishindu mivule idibu baleja ditabuja. Udi mua kumona bakulakaje badi basadile Yehowa kukadi bidimu bia bungi, bansonga badi bakandamena buenzeji bua balunda dituku dionso, ne baledi badi benza mudimu mukole bua kukolesha bana badi batshina Nzambi. Kudi bakulu ne basadidi ba mudimu ba tshisumbu badi bambule majitu mavule. Bulelela, udi mua kumona bana betu ba mu nyuma ba bidimu bishilangane badi batantamena ntatu ya mishindu yonso bua kusadila Yehowa. Ditabuja diabu ndia mushinga mukole bushuwa!​—1 Petelo 1:7.

2. Bua tshinyi mibelu ya Paulo idi mu Ebelu nshapita wa 10 ne wa 11 idi ituambuluisha lelu?

² Kakuena bantu bapange bupuangane ba bungi badi bajingulule bimpe mushinga wa kuikala ne ditabuja kupita mupostolo Paulo nansha. Wakaleja ne: ditabuja dia bushuwa didi difikisha ku “dilama dia anyima ne muoyo.” (Ebelu 10:39, NW) Kadi Paulo uvua mumanye ne: mu bukua-panu ebu bubule lulamatu badi baluisha ne bakeba bua kunyanga ditabuja. Uvua uditatshisha bikole bua bena Kristo bena Ebelu ba mu Yelushalema ne mu Yudeya bavua baluangana bua kukuba ditabuja diabu. Mpindieu tukonkononayi bitupa bia Ebelu nshapita wa 10 ne wa 11, ne tushindamenayi pa mishindu ivua Paulo mukoleshe nayi ditabuja diabu. Patuayikonkonona, netumone mutudi mua kutamba kukolesha ditabuja dietu ne dia badi ku luseke luetu.

Tueyemenanganayi

3. Mmunyi mudi mêyi a Paulo mafunda mu Ebelu 10:39 aleja ne: uvua weyemena bana babu ba mu ditabuja?

³ Bualu bua kumpala butudi tumona mbua se: Paulo uvua ne mmuenenu muimpe kudi bantu bavuaye ufundila mukanda. Wakafunda ne: “Mpindieu katuena ba ku badi bapingana tshianyima too ne ku kabutu, kadi ba ku badi ne ditabuja too ne ku dilama dia anyima ne muoyo.” (Ebelu 10:39, NW) Paulo kavua welela bena Kristo nende ba lulamatu meji mabi to. Mona kabidi muaku wakenzaye nawu mudimu: “katuena.” Paulo uvua muntu muakane. Kadi kavua upuekesha bantu bavuaye ufundila, bienze bu se: yeye uvua ne buakane butambe buabu. (Tangila Muambi 7:16.) Kadi wakaditeka mu mulongo umue nabu. Wakaleja muvuaye ne dishindika dikole dia se: bipumbishi bivua mua kutekesha mu mikolo bivua bilua kumpala kuabu bonso. Yeye ne bena Kristo ba lulamatu bakafundilaye, ne dikima bavua ne bua kubenga bua kupingana tshianyima too ne ku kabutu, ne bavua ne bua kuleja muvuabu ba ku bantu badi ne ditabuja.

4. Mmalu kayi akasaka Paulo bua kueyemena bena kuitabuja nende?

⁴ Mmunyi muvua Paulo mupete dishindika dia mushindu’eu? Kavuaku umona bilema bia bena Kristo bena Ebelu anyi? Kabiena nanku to, wakabambuluisha ne mibelu misunguluke bua kutshimunabu mapanga abu a mu nyuma. (Ebelu 3:12; 5:12-14; 6:4-6; 10:26, 27; 12:5) Kabidi, Paulo uvua ne bijadiki bitue ku bibidi biakamufikisha ku dieyemena bana babu. (1) Bu muvuaye widikija Yehowa, Paulo uvua udienzeja bua kumona bantu ba Nzambi anu mudi Yehowa muine ubamona. Kabivua anu bua bilema bivuabu benza to, kadi bua ngikadilu yabu mimpe ne bua muvuabu ne bukole bua kusungula bua kuenza malu mimpe mu matuku atshivua alua. (Musambu 130:3; Efeso 5:1) (2) Paulo uvua witabuja ne muoyo mujima bukole bua spiritu munsantu. Uvua mumanye ne: bipumbishi peshi matekete a buntu kabivua mua kupangisha Yehowa bua kufila “bukole budi bupite bua pa tshibidilu” kudi muena Kristo yonso uvua udienzeja bua kumusadila ne lulamatu. (2 Kolinto 4:7, NW; Filipoi 4:13) Nanku katuena mua kuamba ne: dieyemena divua nadi Paulo kudi bana babu kadivua diakanyine ne dilelela, peshi divua dinekesha nansha. Divua ne kabingila ne divua dishindamene pa Mifundu.

5. Mmunyi mutudi mua kuidikija dieyemena divua nadi Paulo, ne mbipeta kayi bidi mua kumueneka?

⁵ Bushuwa, bantu bakuabu bakalonda tshilejilu tshia Paulo tshia kueyemenangana. Bivua ne bua kuikala biambuluishe bikole tshisumbu tshia mu Yelushalema ne tshia mu Yudeya bua kumvua Paulo ubiambila malu avua abakankamija. Bu muvuabu babaseka bikole ne bababuidia ne diambu kudi baluishi babu bena Yuda, mêyi aa akambuluisha bena Kristo bena Ebelu bua bapangadije mu mitshima yabu bua kuikala ba ku badi ne ditabuja. Tudiku mua kuenzelangana bia muomumue lelu anyi? Bitu bitekete menemene bua kumona mulongolongo wa bilema ne ngikadilu ya mukodikodi ya bantu bakuabu. (Matayo 7:1-5) Kadi, tudi mua kuambuluishangana bimpe bu tuetu mua kujingulula ne kuanyisha ditabuja dia pa buadi didi nadi yonso wa kutudi. Kuoku kuikale dikankamijangana dia mushindu’eu, ditabuja didi pamu’apa mua kukola menemene.​—Lomo 1:11, 12.

Tuenze mudimu bimpe ne Dîyi dia Nzambi

6. Mmuaba kayi uvua Paulo muangatshile mêyi adiye mufunde mu Ebelu 10:38?

⁶ Paulo wakakolesha kabidi ditabuja dia bena Kristo nende mu dienza mudimu bimpe ne Mifundu. Tshilejilu, wakafunda ne: ‘Kadi muakane wanyi neikale ne muoyo bua ditabuja; ne bialukaye tshianyima, muoyo wanyi kawena usanka [bua] bualu buende.’ (Ebelu 10:38) Muaba eu Paulo uvua utela mêyi a muprofete Habakuka.a Pamu’apa bantu bavua Paulo mufundile bavua bamanye mêyi aa, bualu bavua bena Kristo bena Ebelu bakavua bamanye bimpe mikanda ya baprofete. Patudi tutangila tshipatshila tshivuaye natshi, tshia kukolesha ditabuja dia bena Kristo bavua munda ne bavua pabuipi ne Yelushalema bu mu tshidimu tshia 61 B.B., tshilejilu tshia Habakuka tshivua tshikumbanyine bimpe menemene. Bua tshinyi?

7. Ndîba kayi diakafunda Habakuka mulayi wende, ne mmalu kayi avua mu Yuda tshikondo atshi?

⁷ Kakuyi mpata, Habakuka wakafunda mukanda wende bidimu bipite pa 20 kumpala kua kabutu ka Yelushalema mu 607 K.B.B. Mu tshikena-kumona, muprofete eu wakamona bena Kasada (anyi bena Babulona), “tshisamba atshi tshia bantu badi ne luonji,” bajukila Yuda ne babutula Yelushalema, bamina bisamba ne matunga mu dipita diabu. (Habakuka 1:5-11) Kadi bakavua bamanyishe tshipupu etshi katshia ku tshikondo tshia Yeshaya, bidimu bipite pa lukama kumpala. Mu tshikondo tshia Habakuka, Yehoyakima wakapingana pa muaba wa Yoshiya Mukalenge muimpe, ne bubi buakatangalaka kabidi mu Yuda. Yehoyakima wakakengesha ne kushipa too ne bantu bavua bakula mu dîna dia Yehowa. (2 Kulondolola 36:5; Yelemiya 22:17; 26:20-24) Kabiena bikemesha muakela Habakuka dîyi ne kanyinganyinga ne: “Mutantshi bule kayi, O Yehowa?”​—Habakuka 1:2, NW.

8. Bua tshinyi tshilejilu tshia Habakuka tshivua diambuluisha kudi bena Kristo ba mu bidimu lukama bia kumpala ne ba lelu’eu?

⁸ Habakuka kavua mumanye ne: kabutu ka Yelushalema kavua pabuipi to. Bia muomumue, bena Kristo ba mu bidimu lukama bia kumpala kabavua bamanye dîba divua ndekelu wa ndongoluelu wa malu wa bena Yuda ne bua kulua to. Nansha tuetu lelu katuena bamanye ‘dituku ne dîba’ dikala Yehowa mua kubutula ndongoluelu eu mubi nansha. (Matayo 24:36) Mpindieu tutangilayi diandamuna dia bitupa bibidi divua Yehowa mupeshe Habakuka. Tshia kumpala, wakajadikila muprofete eu ne: nshikidilu uvua ne bua kulua anu pa dîba diende. Nzambi wakamba ne: ‘Kakujingakana,’ nansha bantu buobu mua kumona bu udi ujingakana. (Habakuka 2:3, NW) Tshibidi, Yehowa wakavuluija Habakuka ne: ‘Kadi muntu muakane neikale ne muoyo bua lulamatu luende.’ (Habakuka 2:4) Aa mmalu malelela mapepele ne adi asankisha! Tshidi ne mushinga menemene ki ntshia kumanya dîba dialua nshikidilu to, kadi ntshia kutungunuka ne kuikala ne ditabuja.

9. Mmunyi muvua basadidi ba Yehowa bena butumike bashale ne muoyo bua lulamatu luabu (a) mu 607 K.B.B.? (b) kunyima kua 66 B.B.? (c) Bua tshinyi mbia mushinga bua tuetu kukolesha ditabuja dietu?

⁹ Pakabutulabu Yelushalema mu 607 K.B.B., Yelemiya, Baluka mumufundidi wa mikanda, Ebede-meleke, ne bena Lekaba ba lulamatu bakamona muvua mulayi uvua Yehowa mumanyishe Habakuka muikale wa kueyemena. ‘Bakikala ne muoyo’ pa kupanduka ku kabutu kakuate buôwa ka Yelushalema. Bua tshinyi? Yehowa wakabafuta bua lulamatu luabu. (Yelemiya 35:1-19; 39:15-18; 43:4-7; 45:1-5) Bia muomumue, bena Kristo bena Ebelu ba mu bidimu lukama bia kumpala bavua ne bua kuikala bitabe mibelu ya Paulo, bualu pakalua bena Lomo kuluisha Yelushalema mu 66 B.B. ne pashishe kumbukabu bantu kabayi bamanye tshivuabu bumbukile, bena Kristo abu bakatumikila ne lulamatu didimuija dia Yezu dia kunyema mu tshimenga. (Luka 21:20, 21) Bakashala ne muoyo bua lulamatu luabu. Tuetu petu netushale ne muoyo biatusangana nshikidilu ne lulamatu. Etshi ntshijadiki tshinene tshidi tshikolesha ditabuja dietu!

Bilejilu bia ditabuja

10. Ntshinyi tshiakamba Paulo bua ditabuja dia Mose, ne mmunyi mutudi mua kuidikija Mose mu muanda eu?

¹⁰ Paulo wakakolesha kabidi ditabuja ku diambuluisha dia bilejilu. Paudi ubala Ebelu nshapita wa 11, utangile mushindu udiye uleja bilejilu bia bantu badi Bible utela. Tshilejilu, udi wamba ne: Mose “wakatungunuka mushindame bu mumone Eu udi kayi umueneka ne mêsu.” (Ebelu 11:27, NW) Mu mêyi makuabu, Yehowa uvua muntu mulelela menemene ku mêsu kua Mose, bienze anu bu se: uvua mua kumona Nzambi utu kayi umueneka. Badiku mua kuamba bia muomumue buetu tuetu anyi? Mbitekete bua kuakula bua malanda etu ne Yehowa, kadi kudia ne kukolesha malanda au kudi kulomba mudimu. Mudimu au ke utudi ne bua kuenza! Yehowa udiku muntu mulelela menemene ku mêsu kuetu, bitufikisha ku dimuvuluka patudi tuangata mapangadika, nansha adi atangila tu-malu tudi tumueneka bu tukese anyi? Ditabuja dia mushindu’au nedituambuluishe bua kutantamena nansha buluishi butambe bukole.

11, 12. (a) Mmu nsombelu kayi muvua ditabuja dia Hanoka mua kuikala ditetshibue? (b) Ndifutu kayi didi dikolesha ku muoyo diakapeta Hanoka?

¹¹ Tangila kabidi ditabuja dia Hanoka. Buluishi buakapetaye budi butunyunguluja mutu patudi tutumaku meji. Hanoka uvua ne bua kumanyisha mukenji uvua ubungamija wa kabutu ka bantu babi ba tshikondo atshi. (Yuda 14, 15) Bua dikenga dia tshikisu ne tshinyangu tshikole diakakuata muena lulamatu eu, Yehowa ‘wakamutentemuna,’ kukosolojaye matuku a muoyo wende bangabanga ne baluishi bende kumukuatabu. Nenku Hanoka kakapeta mushindu wa kumona dikumbana dia mulayi wakamanyishaye nansha. Kadi wakapeta dipa divua mene ditambe buimpe mu imue mishindu.​—Ebelu 11:5; Genese 5:22-24.

¹² Paulo udi umvuija ne: “Kumpala kua kumutentemunabu [Hanoka] uvua ne lumu lua se: uvua musankishe Nzambi.” (Ebelu 11:5, NW) Muanda eu uvua umvuija tshinyi? Kumpala kua kufuaye, Hanoka uvua mua kuikala mupete tshikena-kumona kampanda, pamu’apa tshivua tshileja malu a mu mparadizu wa pa buloba, muamubishabu dimue dituku kumpala eku. Mu mishindu yonso, Yehowa wakaleja Hanoka ne: Uvua wanyisha bikole lulamatu luvuaye nalu. Hanoka wakasankisha mutshima wa Yehowa. (Tangila Nsumuinu 27:11.) Bidi bitulenga ku muoyo patudi tuela meji bua ngikadilu wa Hanoka, ki mmuomu anyi? Udi musue kuikala ne nsombelu wa ditabuja bu eu anyi? Nanku elangana meji pa bilejilu bia bantu aba; ubamone bu bantu balelela. Upangadije bua kuikala ne ditabuja mu nsombelu webe ku dituku ne ku dituku. Vuluka kabidi ne: bantu badi ne ditabuja kabena basadila Yehowa bua dituku anyi dîba kampanda dijadika didi Nzambi ne bua kukumbaja malu adiye mulaye. Kadi tudi bapangadije bua kusadila Yehowa bua kashidi! Kuenza nenku ke nsombelu mutambe buimpe mu ndongoluelu eu wa malu ne mu eu utshidi ulua kumpala.

Mushindu wa kukolesha ditabuja

13, 14. (a) Mmunyi mudi mêyi a Paulo adi mu Ebelu 10:24, 25 mua kutuambuluisha bua kuvuija bisangilu bikondo bia disanka? (b) Ntshipatshila kayi tshinene tshitudi tuyila mu bisangilu?

¹³ Paulo wakaleja bena Kristo bena Ebelu mishindu mimpe ya bungi ya kukolesha ditabuja diabu. Tukonkononayi ibidi tshianana. Pamu’apa tudi bamanye mubelu udi mu Ebelu 10:24, 25, udi utulomba bua kubuela pa tshibidilu mu bisangilu bia bena Kristo. Kadi vuluka ne: mêyi a Paulo au mafunda ku nyuma kaena umvuija ne: tudi ne bua kusomba patupu mu bisangilu ebi nansha. Paulo udi umvuija mudi bisangilu bikale bikondo bia kumanyangana, kusakangana ku disadila Nzambi tshishiki ne kukankamijangana. Tudi tuyamu bua kufila, ki ng’anu bua kuangata to. Abi bidi bituambuluisha bua kuvuija bisangilu bikondo bia disanka.​—Bienzedi 20:35.

¹⁴ Tshia kumpala tudi tubuela mu bisangilu bua kutendelela Yehowa Nzambi. Tudi tumutendelela patudi tuimba misambu ne tulonda disambila, tuteleja bimpe, ne tufila “mamuma a mishiku,” mmumue ne: mêyi a kusamuna nawu Yehowa mu mandamuna ne miyuki itudi tuenza mu bisangilu. (Ebelu 13:15) Bitualama malu aa mu lungenyi ne bituaakumbaja mu tshisangilu tshionso, kakuyi mpata ditabuja dietu nedikale dikole dîba dionso.

15. Bua tshinyi Paulo wakabela bena Kristo bena Ebelu bua kulamata bikole ku mudimu wabu, ne bua tshinyi mubelu wa muomumue mmuakanyine matuku etu aa?

¹⁵ Mudimu wa buambi ke mushindu mukuabu wa kukolesha ditabuja. Tangila muakamba Paulo: “Tulamatayi bikole dijikula dia patoke dia ditekemena kakuyi ditenkakana, bualu udi mulaye mmuena lulamatu.” (Ebelu 10:23, NW) Batu babela muntu bua kulamata bikole ku tshintu kampanda padibi bimueneka ne: yeye mutshilekele neikale mu njiwu. Kadi Satana uvua usaka bena Kristo bena Ebelu bua balekele mudimu wabu, ne udi usaka bantu ba Nzambi lelu bua baulekele pabu. Ntshinyi tshitudi ne bua kuenza padiye utusaka mushindu’eu? Tangila tshiakenza Paulo.

16, 17. (a) Mmunyi muvua Paulo mupete dikima bua kuenza mudimu wa buambi? (b) Mmapangadika kayi atudi ne bua kuangata bituamona ne: tshitupa kampanda tshia mudimu wa buambi tshidi tshitutshingisha?

¹⁶ Paulo wakafundila bena Kristo ba mu Tesalonika ne: ‘Kadi patuakadianjila kukenga, ne pakatuenzelabu bibi ku Filipoi, bu munudi bamanye, [tuakapeta dikima bua, NW] Nzambi wetu bua kunuambila lumu luimpe lua Nzambi mu kuluangana kua bungi.’ (1 Tesalonike 2:2) Mmunyi muvuabu ‘benzele [Paulo ne binende] bibi’ mu Filipoi? Bilondeshile bamue bamanyi ba malu a mu Bible, muaku wa mu tshiena-Greke udi Paulo mutele muaba eu udi umvuija kupenda, kufuisha bundu anyi kukengesha ne tshikisu. Bakokeshi ba mu Filipoi bakabakuma ne milangala, kubela mu buloko ne kubelabu makasa mu bikunyi. (Bienzedi 16:16-24) Malu au a dibungama avuaku menzele Paulo tshintu anyi? Bena mu tshimenga tshia Tesalonike muvuaye ne bua kupitshila mu luendu luende lua bu-misionere bakamumona upingana tshianyima bua buôwa anyi? Tòo, ‘wakapeta dikima.’ Wakatshimuna buôwa ne kutungunukaye ne kuyisha ne dikima.

¹⁷ Dikima dia Paulo divua difumine kuepi? Divua difumine kudiye anyi? Tòo, wakamba ne: wakapeta dikima “bua Nzambi wetu.” Mukanda kampanda mufunda bua bakudimunyi ba Bible udi wamba ne: tudi mua kukudimuna tshiambilu etshi ne: “Nzambi wakumbusha buôwa mu mitshima yetu.” Nenku wewe kuyi udiumvua ne dikima nangananga bua mudimu webe wa buambi, peshi bikala tshitupa kampanda tshia mudimu eu tshikutshingisha, bua tshinyi kubenga kulomba Yehowa bua akuenzele pebe bia muomumue? Umulombe bua kumbushaye buôwa mu mutshima webe. Umulombe bua akuambuluishe bua kupeta dikima dia kuenza mudimu eu. Wangate kabidi amue mapangadika makanyine. Tshilejilu, udilongolole bua kuyisha ne muntu udi ne dimanya dia bungi mu tshitupa tshia buambi muudi dijinga ne diambuluisha. Bidi mua kuikala bua diyisha mu tshitupa tshia bangenda-mushinga, mu njila, diyisha dia mu mpukapuka anyi dia ku nshinga. Pamu’apa unudi nende neanji kutuadija kumpala. Yeye mutuadije nanku, ushale mutangile ne lubatshi ne ulonge. Pashishe upete dikima dia kuteta pebe.

18. Mmabenesha kayi atudi mua kupeta bituikala ne dikima mu buambi?

¹⁸ Ela meji ku bipeta bimpe bidi mua kupatuka wewe mupete dikima. Paudi usuminyina ne kuyi uteketa mu mikolo, udi mua kupeta malu malenga mu dimanyisha bakuabu bulelela, malu auvua mua kuikala mupangile. (Tangila dibeji dia 25.) Newikale ne disanka dia kumanya ne: udi musankishe Yehowa bualu udi muenze muanda udi mukukolele. Neupete dibenesha ne diambuluisha diende bua kutshimuna buôwa buudi nabu. Ditabuja diebe nedikale dikole menemene. Mene paudi ukolesha ditabuja dia bakuabu udi wenda ukolesha diebe wewe muine.​—Yuda 20, 21.

19. Ndifutu kayi dia mushinga mukole didi dindile “badi ne ditabuja”?

¹⁹ Utungunuke ne kukolesha ditabuja diebe ne dia bantu badi ku luseke luebe. Udi mua kudikolesha ne kukolesha bakuabu paudi ukuata mudimu bimpe ne Dîyi dia Nzambi, paudi ulonga bilejilu bia ditabuja bia bantu badi Bible utela ne ubamona bu bantu balelela, paudi ulongolola bisangilu bia bena Kristo ne ufilamu mandamuna, ne paudi ulamata bikole ku mudimu wa buambi wa mushinga mukole. Wewe muenze malu aa, umanye ne: udi umue wa “ku badi ne ditabuja.” Vuluka kabidi ne: bantu ba mushindu’eu badi ne difutu dia mushinga mukole. Badi munkatshi mua “badi ne ditabuja too ne ku dilama dia anyima ne muoyo.”b Ditabuja diebe ditungunuke ne kukola, ne Yehowa Nzambi akulame ne muoyo bua kashidi!

[Mêyi adi kuinshi]

Newandamune munyi?

◻ Mmunyi muvua Paulo muleje ne: uvua weyemena bena Kristo bena Ebelu, ne muanda eu udi utulongesha tshinyi?

◻ Bua tshinyi bivua bikumbane menemene muvua Paulo mutele mêyi a muprofete Habakuka?

◻ Mbilejilu kayi bia bena ditabuja bidi mu Mifundu biakatela Paulo?

◻ Mmishindu mimpe kayi yakafila Paulo bua kukolesha ditabuja?

[Tshimfuanyi mu dibeji 23]

Kunyima kua lutatu luakamukuata mu Filipoi, Paulo wakapeta dikima bua kutungunuka ne kuyisha

[Bimfuanyi mu dibeji 24]

Udiku mua kupeta dikima dia kuteta mishindu mishilangane ya buambi anyi?