Nzambi utu wenza malu mu mishindu “mikonyangale” anyi?

“DEUS ESCREVE CERTO POR LINHAS TORTAS” (“NZAMBI UTU UFUNDA bimpe pa kuenza mudimu ne milongo mikonyangale”) ke mutubu bamba mu ditunga dia Brésil. Mêyi au adi umvuija ne: misangu yonso Nzambi utu wenza malu mimpe, kadi imue misangu mu mushindu udi muntu umona se: mmubi. Tshilejilu, padi muntu utshidi ne bukole bua mubidi ufua, ba bungi batu bamba ne: ‘Nzambi mmumubikile mu diulu.’ Muntu yeye ne bulema anyi mupete bualu bubi, bamue batu bamba ne: ‘Ndisua dia Nzambi.’ Bu mudibu badingila Nzambi bua lufu, bulema ne malu makuabu adi abungamija, mêyi aa adi umvuija ne: Nzambi ‘udi ufunda bintu mu mushindu mukonyangale,’ ne se: udi wenza malu mu mushindu udi muntu kayi mua kumvua.

Bua tshinyi bena nzambi ba bungi badi bitabuja ne: Nzambi ke mukebeshi wa lufu ne ntatu? Misangu mivule mitabuja aa atu mashindamene pa ngumvuilu mubi wa imue mvese miangata apa ne papa mu Bible. Tutangile mu tshikoso imue ya kudiyi.

• “Udi mufuke muntu ne mukana mua kuakula namu nganyi? Udi wenza muntu ushala kamama, nansha muena mapapa, nansha tshimona bitoke, nansha mpofu nganyi? Ki mmeme [“Yehowa,” NW] anyi?”​—Tshimuangi 4:11, MMM.

Ebi bidi biumvuija ne: tudi ne bua kudiwula Nzambi bua bantu bonso badi ne malema kabukabu anyi? Tòo. Kabiakumvuangana ne bumuntu bua Nzambi nansha. Bible udi utuambila ne: “Bifukibua bionso bia Nzambi bidi bimpe.” (1 Timote 4:4) Katuena mua kumudiwula bikala muntu kampanda muledibue mpofo, kamama anyi muena mapapa nansha. Utu ujingila bifukibua biende anu malu adi mimpe, bualu yeye ke Mpokolo wa ‘kupa kuonso kuimpe ne dipa dionso diakane tshishiki.’​—Yakobo 1:17.

Baledi betu ba kumpala, Adama ne Eva, ke bavua batombokele Nzambi ku budisuile ne kujimijabu bupuangane buabu ne bukokeshi bua kulela bana bapuangane. (Genese 3:1-6, 16, 19; Yobo 14:4) Pakaselangana ndelanganyi yabu ne pakalelayi bana, dipanga bupuangane dia bungi, pamue ne malema, biakatuadija kumueneka mu bantu. Nansha muvua Yehowa Nzambi kayi mukebeshe bintu ebi, mmubilekele bienzeka. Ke bua tshinyi uvua mua kuamba mudiye ‘muenze’ kamama, muena mapapa ne mpofu.

• “Tshidi tshikonyangala, kabena mua kutshiludika kabidi.”​—Muambi 1:15.

Nzambi ke uvua muenze bintu bikonyangale anyi? Kabiena nanku nansha. Muambi 7:29 udi wamba ne: “Nzambi wakafuka bantu ne mitshima mijalame, kadi bobo bakadikebela malu a ngenyi yabo.” Nkudimuinu kampanda udi wamba munga mushindu mu mvese eu ne: “Tuvua balulame bimpe menemene pakatufuka Nzambi, kadi mpindieu tudi ne ngenyi mikonyangale.” (Contemporary English Version) Pamutu pa kulonda mêyi-makulu makane a Nzambi, balume ne bakaji ba bungi mbadisunguile bua kulonda malu anyi njila yabu nkayabu​—bintu bidi bibafikisha ku dikenga.​—1 Timote 2:14.

Kabidi, bu muakamba mupostolo Paulo, bua mpekatu wa bantu, ‘bifukibua biakatekibua kunyima kua malu a patupu.’ (Lomo 8:20) Nsombelu eu kabena mua ‘kumuludika’ ku madikolela a bantu nansha. Dikonyangala dionso ne malu a patupu nebiumbuke anu pikala Nzambi mua kukosa malu a pa buloba.

• “Tangila bintu bidi [“Nzambi mulelela,” NW] mufuke: nganyi udi mua kuludika tshidiye mukonyangaje?”​—Ntoyi 7:13, MMM.

Mu mêyi makuabu, Mukalenge Solomo udi webeja ne: ‘Nnganyi wa munkatshi mua bantu udi mua kulongolola malema ne dipanga bupuangane bidi Nzambi mulekele?’ Nansha umue, bualu kudi kabingila kadi Yehowa Nzambi mulekele malu aa enzeka.

Pa nanku, Solomo udi utubela ne: “Dituku diudi ne disanka, usanke, kadi dituku dia dikenga, wele meji ne: [“Nzambi,” NW] mmufuke disanka ne dikenga bua muntu kajinguludi tshidi mua kumuenzekela kunyima.” (Ntoyi 7:14, MMM) Muntu udi ne bua kuanyisha dituku didi malu enda bimpe ne kuleja dianyisha diende pa kuenza malu adi aleja buimpe. Udi ne bua kumona dituku dilenga bu dipa dia kudi Nzambi. Kadi netuambe tshinyi bikala dituku dilua ne dikenga? Muntu udi ne bua ‘kuela meji,’ mmumue ne: kujingulula ne: Nzambi mmulekele dikenga edi dimukuata. Bua tshinyi mmuenze nunku? Solomo udi wamba ne: “Bua muntu kajinguludi tshidi mua kumuenzekela kunyima.” Bidi biumvuija tshinyi?

Padi Nzambi utulekela tupeta masanka ne makenga, bidi bituvuluija ne: katuena mua kuamba tshiatufikila mu matuku atshilualua to. Dikenga didi mua kukuata bakane ne babi. Kakuena disunguluja nansha dikese. Ebi bidi ne bua kutuleja mushinga wa kubenga kudieyemena, kadi kueyemena anu Nzambi, bavuluke ne: “Nzambi udi dinanga.” (1 Yone 4:8) Nansha mutudi katuyi mua kumvua amue malu mpindieu, tujadike ne: kunyima kua malu onso mamane kuenzeka, malu adi Nzambi mulekele neikale menze mudimu muimpe bua bantu bonso badiwu mafikile.

Bualu buonso budiye ulekela kabuakufikisha ku dikenga dia kashidi dia bantu ba muoyo muakane to. Mupostolo Petelo wakatokesha muanda eu pavuaye wakula bua makenga avua afikila bena kuitabuja nende ba mu tshikondo tshiende ne: ‘Nzambi wa [“bulenga bukena butuakanyine,” NW], wakanubikila mu butumbi buende bua tshiendelele bua mu Kristo, panuamana kukenga musangu muipi, yeye muine neanuakaje tshishiki, neanujadike, neanukoleshe.’​—1 Petelo 5:10.

Tshikondo tshia kulongolola malu

Yehowa udi utupesha bukole bua kutantamena mateta atudi nawu mpindieu. Udi kabidi ulaya bua kuvuija ‘bintu bionso bipiabipia.’ (Buakabuluibua 21:5) Bushuwa, dilongolola diende ndia se: mu katupa kîpi emu, Bukalenge buende bua mu diulu bupingajile balema bukole bua mubidi ne bulombole dibiishibua dia bafue. Mbulamatadi au neabutule kabidi Satana Diabolo, muena njila idi mikonyangale. (Yone 5:28, 29; Lomo 16:20; 1 Kolinto 15:26; 2 Petelo 3:13) Ndibenesha kayipu bua bantu badi batshina Nzambi pa buloba bujima pafika tshikondo tshialongololaye malu!

[Mêyi a dianyisha bua tshimfuanyi mu dibeji 28]

Badi bambila Yobo bua dijimina dia bintu/​The Doré Bible Illustrations/​Dover Publications