Tufilayi Lumu Luimpe Ne Mmuenenu Muimpe
1 Yonso wa kutudi mmusue kupeta disanka ne dianyisha mu bidiye wenza, nangananga mu mudimu wa kuenza bayidi. Dijinga edi dia dianyisha didi difumina penyi? Tshia kumpala ku dilama mmuenenu muimpe mu dienza mudimu bikole—ne ebi mbimpe—bua kuambuluisha bakuabu. (Nsum. 11:25) Ngambilu wetu wa lumu luimpe udi ne bua kuleja ne: tudi bushuwa tuitabuja bitudi tuamba. Bituakula ne mutshima wetu mujima, apo muoyo muimpe wetu ne dituishibua dietu nebimueneke patoke. (Luka 6:45) Pa kulongolola bituikale mua kuamba, netudiumvue ne dieyemena patudi tuyukila ne bantu ba mu teritware wetu. Nebikale bilelela nangananga mu Kasuamansense, patuafila mukanda wa La vie : comment est- elle apparue ? Évolution ou création ? Mibelu idi ilonda eyi idi ne bua kutuambuluisha bua kuamba lumu luimpe ne mmuenenu muimpe.
2 Patudi tufila mukanda wa “Création”, tudi mua kuamba mu dipita dietu dia kumpala ne:
◼ “Mu diyukila ne bena mutumba nebe, tuvua bamone se: bamue mbeyemene Nzambi, eku bikolele bakuabu bua kumuitabuja. Udi wela meji kayi? [Teleja diandamuna.] Bambisha mmuenenu mufila mu Bible pa bualu ebu. [Bala Lomo 1:20.] Tudi mua kumona bijadiki bia ‘bukole bua tshiendelele ne Bunzambi’ bua Nzambi pa kutangila bintu bidiye mufuke.” Bala mu mukanda wa Création tshikoso tshia ndekelu mu dibeji dia 48 ne koka ntema pa mushindu udi dikala dia selile dituelesha meji. Peshi utumike ne tshikoso tshia 18 mu dibeji dia 147 bua kuleja mudi mutshi, uleja mudimu wa Mufuki ku diambuluisha dia dieyela diawu didi dikemesha. Ulombe muntu bua kumushila mukanda pikalaye muitabe bua kuubala. Biawangataye, leja dipa dia pa tshibidilu ne bua tshinyi tudi tudilomba.
3 Patudi tupinganyina aba batuvua bayukile nabu bua dikalaku dia Mufuki, tudi mua kujinga bua kuamba ne:
◼ “Mu dikumbula dianyi dia musangu mushale, tuvua bakule bua tshidi tshileja dikalaku dia Nzambi, bufuki buende bua dikema. Mbikukolele bua kuitaba ne: Eu udi mufuke bukua-mabulunge neatabalele nsombelu wetu wa matuku atshilualua anyi? [Lekela muntu andamune.] Eyowa, nsombelu wa muntu wa matuku atshilualua mmumanyike kudi Mufuki.” Bala Yeshaya 46:9, 10. Bilondeshile dijinga didi muteleji wetu uleja, utumike ne bimfuanyi ne miaku idi yumvuija bimfuanyi ya mu nshapita wa 19, mu mukanda wa Création, bua kuela kashonyi pa nsombelu milenga milaya kudi Nzambi. Pashishe ubale tshikoso tshia 1 mu nshapita wa 20 ne ulombe dilonga dia Bible. Padi muntu witaba, utuadije dilonga pa mukanda wa Dimanya.
4 Udi mua kuteta mbuelelu mukuabu eu paudi ufila mukanda wa “Création”:
◼ “Mu diakula ne bena mutumba, ndi mumone se: bantu bavule badi bajinga bikole kuikala ne nsombelu wa bupole mu bulongolodi bua ditalala. Bua diebe dimona, bua tshinyi bantu ki mbafike ku diakaja nsombelu wa nunku? [Teleja diandamuna.] Bamue bamfumu ba tshididi badi imue misangu bamba bulelela ne benza malu mimpe, kadi bambisha mubelu eu wa meji wa mu Bible.” Bala Musambu wa 146:3, 4, pashishe ukonke ne: “Kudiku muntu udi mua kukumbaja majinga a bantu anyi?” Bala mvese 5 ne 6. Leja tshimfuanyi mu dibeji dia 251 dia mukanda wa Création, ne koka ntema pa masanka a bukokeshi bua Nzambi. Fila mukanda ne leja dipa dia pa tshibidilu dia kufila.
5 Bituikala bayukile musangu wa kumpala pa bukokeshi bua Nzambi, tudi mua kuteta dileja edi mu dikumbulula dietu didi dilonda:
◼ “Pamvua mupite kukadi matuku, tuvua bayukile bua dipangila dia muntu bua kujadika ditalala dia bushuwa pa buloba. Imue misangu udi uvuluka ne: tuvua bajadike kabingila kadi Bible ufila bua dipangila edi. [Bala kabidi Musambu wa 146:3.] Udiku mubambishe bua tshinyi Nzambi udi utulomba bua kubenga kueyemena baminyampala anyi? [Lekela muntu andamune.] Pamu’apa newitabe ne: ditekemena dionso bua diakaja dia malu didi ne bua kufumina anu kudi Nzambi. Musambu wa 146:10 udi utumvuija bua tshinyi tudi mua kuikala ne dieyemena. [Bala mvese.] Biwasua kuikala muena mu Bukalenge bua Nzambi, tshiudi ne bua kuenza ntshinyi?” Bulula mukanda wa Création mu dibeji dia 250, bala tshikoso tshia 13 ne zangika Yone 17:3. Lomba muteleji webe bua kumuleja, ku dilonga dia Bible, mushindu udi miliyo ya bantu bapete dimanya didi difikisha ku muoyo wa kashidi. Pikalaye mua kuitaba, ufile mukanda wa Dimanya ne ubange dilonga.
6 Mu diyisha dia ku magazin ne ku magazin, udi mua kufila mukanda wa “Création” ku diambuluisha dia mbuelelu eu mukese:
◼ “Tudi tuenza lelu mudimu wa pa buawu munkatshi mua bangenda-mushinga. Didiunda dia kutupa ku mikenji ne tshinyangu mbitutonde bonso. Udiku wela meji ne: kudi muntu udi mua kujikija bualu ebu anyi? [Teleja diandamuna.] Nzambi udi ne diandamuna.” Bulula mukanda wa Création mu dibeji dia 196, pashishe ubale ne wele nseka pa Nsumuinu 2:21, 22 mutele mu tshikoso tshia 19. Leja tshiena-bualu tshia nshapita wa 16 ne fila mukanda.
7 Paudi upinganyina ngenda-mushinga uuvua mushile mukanda wa “Création”, udi mua kuamba ne:
◼ “Mu dipita dianyi dia musangu mushale, mvua mushindike ne: Nzambi ke udi ne bukokeshi bua kujikija dibunda dia bibawu ne tshinyangu. Bilondeshile dilaya diende, tudi mua kutekemena ne dieyemena se: ditalala pa buloba nedilue bualu bulelela. Bambisha disungula didi kumpala kuetu ditudi ne bua kuenza.” Bala mu dibeji dia 250 dia mukanda wa Création tshikoso tshia 11, tshidi tshitela Musambu wa 37:37, 38. Ela nseka pa tshimfuanyi tshia 251 ne bala tshiambilu tshia kumpala tshia tshikoso tshia 14. Lomba dilonga dia Bible dikena kufidila mfranga kudi muteleji webe, pa muaba wende wa mudimu peshi ku nzubu kuende, bilondeshile disua diende.
8 Bu “benzejanganyi ba mudimu ne Nzambi,” tudi ne tubingila tuonso bua kuikala ne mmuenenu muimpe patudi tuamba lumu luimpe. (1 Kol. 3:9, NW) Kulama mmuenenu eu muimpe nekutupeteshe mabenesha mavule a Yehowa.