Ndi mua kulomba diambuluisha mu ditunga dikuabu anyi?
Imue misangu, bamanyishi bakuabu batu bafundila biro bia filiale bia Bantemu ba Yehowa bia mu matunga menyi bua kulomba bintu bishilashilangane. Tshilejilu, bamue batu bafunda bua kukeba bantu ba kuikala kufundilangana nabu mikanda, ba kuselangana nabu, bande ya diteleja anyi ya video, ne kulomba nansha makuta a disomba. Tudi basue bua bantu bonso bamanye ne: biro bia filiale kabiena mua kuandamuna malu a nanku to.
Société Watch Tower mbulongolodi budi buambuluisha bantu, kadi ki mbua bantu balua kuenza abu malu mu dîna diabu bua kupeta makasa nansha. Bulongolodi ebu budi buenda ku diambuluisha dia mapa a budisuile adi bantu ba pa buloba bujima bafila, bonso bikale ne tshipatshila tshimu’epele tshia kumanyisha mukenji wa Bukalenge bua Nzambi miaba yonso idi bantu. (Mat. 24:14) Bu mudibi nanku, mapa onso tudi tuenza nawu mudimu bua diyisha lumu luimpe, nunku kabena mua kuasombesha bantu to.
Imue misangu bantu batu bafundila balunda babu peshi mene bafundila bantu badibu kabayi bamanye mu matunga a ku Mputu bua kulomba bintu anyi makuta. Bakuabu kabayi ne mushindu batu benza luendu baya mu matunga menyi peshi mu bimenga binene, batekemene ne: bana betu badi muaba watudilabu au nebabambuluishe. Tudi mua kuamba ne: ‘bikondo bia njiwu bikole mua kupita nabi’ bidi bitufikila amu tuetu, kabiyi bifikila bakuabu bu mudi nansha bana betu bena Kristo badi miaba mikuabu pa buloba apa anyi?—2 Tim. 3:1.
Tshisumbu tshia bena Kristo tshidi ne mishindu iditshi tshilongolole bua kuambuluisha binetu badi mu ntatu ne badi bajimije bintu mu bipupu kampanda. Mbumvuije malu aa mu mukanda wa Badilongolole bua kuenza mudimu wetu bimpe, mu dibeji dia 122-123. Nunku kabiena biakanyine bua kufundila bisumbu ne biro bia filiale bia mu matunga menyi bua kulomba diambuluisha nansha.
Numanye kabidi ne: adrese ya bisumbu ne ya badi ne abonema ku biro bia filiale mmalu atudi katuyi mua kuambila bantu badi bakeba mua kupeta ba kufundilangana nabu mikanda yabu nkayabu anyi ba kuselangana nabu. Biwikala uya kuendakana mu ditunga dikuabu, udi mua kufundila filiale wa mu ditunga adi bua kuebeja adrese wa Nzubu wa Bukalenge udi pabuipi ne muaba uwatudila ne mêba a bisangilu.
Tuetu benze mudibu batuleje emu, kabiakutukebela mudimu wa bungi ne kutujimijila dîba to.—1 Kol. 14:20.