Utu udia biakane mu nyuma anyi?
1 Batu bamba ne: ‘wewe mungambile tshiutu udia, meme nenkuambile tshiudi.’ Bushuwa, ndilu wetu ke udi utupetesha bukole ne makanda etu. Bu muvua Yezu muambe ne: ‘Muntu udi ne bua kuikala ne muoyo, ki mbua diampa nkayadi, kadi mbua dîyi dionso didi dipatuka mukana mua Yehowa,’ nunku ndilu wetu udi mua kutuenzela bilenga anyi bibi. (Mat. 4:4, NW) Utu udia biakane mu nyuma anyi? Utu anu uzokola tuntu bu nzolo anyi? Utu udia lubilu lubilu bu udi unyema anyi? Anyi utu usanka bua kuangata dîba bule kampanda bua kudia pa tshibidilu biakudia bia mu nyuma biakaja bilenga?
2 Konkonona mudi ndilu webe: Yehowa udi utupesha “biakudia mu tshikondo tshiakanyine,” ‘biakudia bia disanka bia manyi’ ku butuangaji bua “mupika wa lulamatu ne wa budimu.” (Mat. 24:45, NW; Yesh. 25:6) Bua biakudia bilongolola ne dinanga ebi kutuambuluishabi, tudi ne bua kudienzeja ne makanda etu onso bua kudia biakane mu nyuma.
3 Udi mua kudikonka wewe nkayebe ne: ‘Ntuku mbala mvese wa dituku ne nseke yende dituku dionso anyi? Ntuku mbala Bible ne ngelelapu meji dituku dionso anyi? Ntuku ndongolola bisangilu pa kulonga kumpala kua dîba bintu bionso bikalabu mua kulongeshamu anyi? Nkadiku mubale mujikije mukanda mupiamupia wonso bu mudi mikanda yonso ibidi ya La prophétie d’Isaïe, lumière pour tous les humains anyi?’
4 Yezu wakalaya ne: ‘Ba disanka mbadi bamanye majinga abu a mu nyuma. Ba diakalenga mbadi ne nzala ne nyota ya buakane, bualu nebuukute.’ (Mat. 5:3, 6, NW) Nunku udie bimpe mu nyuma pa kuuja lungenyi luebe ne mutshima webe ne dimanya dia Nzambi.