“Ndi mua kupeta dîba penyi?”
1 Ke mutu ba bungi ba kutudi badilakana, bualu tudi ne malu mapite bungi a kuenza. Batu bamba ne: dîba ntshintu tshidi ne mushinga wa bungi ne tshidi tshipita lukasa ku bionso bitudi nabi. Nunku nkuepi kutudi mua kupetela dîba dia kuenza malu adi ne mushinga menemene bu mudi dibala ne dilonga Dîyi dia Nzambi?—Filip. 1:10.
2 Tshidiku menemene ntshia se: katukebi bua kuikala ne dîba dia bungi to, kadi tupangadije bua tshitudi basue kuenza mu dîba ditudi nadi. Tuetu bonso tutu ne mêba 168 ku lumingu, tudi mua kuangata mêba bu 100 a kulala ne kuenza mudimu. Mpindieu mmunyi mutudi mua kuenza mudimu bimpe ne mêba adi mashale aa? Efeso 5:15-17 udi utulomba bua kuenda ‘ki mbu badi kabayi ne meji, kadi bu bena meji; tudisumbile tshikondo patshiditshiku tshia kuenzamu malu mimpe ne tujingulule mudi disua dia Yehowa.’ Bidi bileja mudibi bikengela kukeba mushindu wonso udi umueneka bua kuenza malu adi Yehowa wamba ne: adi ne mushinga.
3 Yezu wakafuanyikija matuku etu aa ne a Noa. (Luka 17:26, 27) Bantu ba tshikondo atshi bavua badine ne kasuki mu malu abu a matuku onso. Kadi, Noa wakakeba dîba dia kuibaka buâtu bunene ne dia kuyisha. (Eb. 11:7; 2 Pet. 2:5) Mushindu kayi? Pa kuteka disua dia Nzambi kumpala ne kumutumikila mu dienza malu onso menemene anu ‘muakamuambila Nzambi’ mua kuenza.—Gen. 6:22.
4 Ntshinyi tshidi ne bua kuikala pa muaba wa kumpala? Yezu wakamba ne: ‘Muntu kêna mua kushala ne muoyo anu bua biakudia nansha; kadi mbua dîyi dionso didi Nzambi wamba.’ (Mat. 4:4, Muanda Mulenga Lelu) Lumingu luonso tudi tupeta ‘biakudia bia mu nyuma pa dîba diakane.’ (Luka 12:42, Mukanda wa Mvidi Mukulu [Katolike, MMM]) Bidi bilomba didibadila ne didilongela pa tshibidilu bua kumanya malu onso bimpe bituajinga kupeta diambuluisha. Bua kuleja dianyisha bua biakudia bia mu nyuma bitudi nabi, katutu tubiangata bu midioko patupu ne tubizokola pale pale anu bu muntu udia muenze bu badi bamuipata lubilu to. Pamutu pa kuenza nanku, mbimpe dianyisha ditudi nadi ditusaka bua kulama dîba dia kulonga ne kuleja dianyisha bua biakudia bia mu nyuma ebi.
5 Kudia biakudia bia mu nyuma kudi mua kufikisha muntu ku muoyo wa kashidi. (Yone 17:3) Tudi ne bua kuteka didia edi pa muaba wa kumpala mu programe wetu wa dituku dionso. Tudiku mua kukeba dîba ne kupeta mushindu wa kubala Bible dituku dionso, kulongolola ne bisangilu bia mu tshisumbu anyi? Eyowa. Nunku, netupete “difutu dinene” didi difumina ku dimanya ne dienza disua dia Nzambi.—Mus. 19:7-11.