Ndongamu wa Bisangilu bia Mudimu

Lumingu lua dia 12 Kasuabanga

Musambu 170

Min.  8: Mamanyisha a mu tshisumbu ne makuabu makanyine a mu Mudimu wetu wa Bukalenge.

Min. 15: “Eyemena Yehowa bua kupeta bukole.”a Buejamu mumvuija makese mangatshila mu Tshibumba tshia Nsentedi tshia dia 1 Kasuamansense 1999, dibeji dia 18-19, tshikoso 6-8.

Min. 22: “Tudi tupola mamuma bilondeshile mudimu utudi tuenza.” Muyuki ne diyukidilangana ne bateleji bishindamene pa tshiena-bualu tshidi mu tshisakidila. Mukulu ki wenza mudimu eu. Uleje mua kutumikila malu mu tshienu tshisumbu. Bikoso ne imue mvese idibu baleje nudi mua kuyibala pikalaku dîba.

Musambu 191 ne disambila dia nkomenu.

Lumingu lua dia 19 Kasuabanga

Musambu 172

Min.  8: Mamanyisha a mu tshisumbu. Luapolo lua konte.

Min. 15: “Nutu nuenza dilonga dia mu dîku anyi?”b Pikalaku dîba, nubadishe bimue bikoso bidi biakanyine ne imue mvese idibu baleje patupu. Nudi mua kulomba batatu ba mêku anyi bana betu bakuabu badi mu tshisangilu bua bumvuije mushindu udibu batumikile mibelu ya nunku anyi bumvuije muvua bakuabu bayitumikile. Bua kujikija, kankamija mêku onso bua ananukile ne bikale balonga pa tshibidilu mu mu dîku.

Min. 22: “Koleshayi biumvuilu bienu”c Mukulu umue udi ulombola dikonkonona dia ndongamu wa mpuilu wa pa buende wa dituku dimue uvuabu benze mu tshidimu tshia mudimu tshishale.

Musambu 195 ne disambila dia nkomenu.

Lumingu lua dia 26 Kasuabanga

Musambu 177

Min. 15: Mamanyisha a mu tshisumbu. Vuluija bamanyishi bua bafile luapolo lua mudimu wa buambi lua ngondo wa Kasuabanga. Ku diambuluisha dia ngenyi idi mu tshiena-bualu tshia: “Mushindu wa kufila bibejibeji,” enzayi manaya a tshilejilu abidi malongolola bimpe; dimue pa Tshibumba tshia Nsentedi tshia dia 1 Tshisua-munene ne dikuabu pa Réveillez-vous! wa dia 8 Tshisua-munene. Pashishe umvuije mushindu wa kumanya tshia kuamba bua kufila mukanda wa Muntu Mutambe Bunene peshi mukanda mukuabu ku idibu baleje bua ngondo wa Tshisua-munene. Tangila mu Index des publications de la Société Watch Tower pa tshiena-bualu: “Présentations” muinshi mua ka-tshiena-bualu: “Liste par publication.” Angatayi tshilejilu tshimue anyi bibidi.

Min. 15: “Ndi mua kupeta dîba penyi?” Muyuki ne diyukidilangana ne bateleji. Buejamu ngenyi minene ya mu Tshibumba tshia Nsentedi tshia dia 1 Kasuamansense 2000, dibeji dia 20-21, tshikoso tshia 9-10, pa ka-tshiena-bualu: “Mushindu udi bamue bapeta dîba dia kulonga.” Lomba bateleji bua bumvuije mishindu miakanyine idibu benze bua kupeta dîba dia kuenza malu a mushinga mukole pa kulekela malu adi kaayi ne mushinga menemene. Uleja ne: bidi ne mushinga bua kuikala ne programe musunguluke bua kuikala kudilongela ne kulonga mu dîku, kuikala ne tshibidilu tshia kubuela mu bisangilu, kupatuka mu buambi ne kuikala kubala Bible dituku dionso.

Min. 15: Bansonga badi batumbisha Yehowa. Diyukidilangana ne bateleji. Bisumbu bia bungi bidi ne bansonga bavule badi benza mudimu wa buambi. Mbiakanyine mudibu benza nanku, nansha mudibi bibalomba bua kutamba kuyisha nangananga bantu bakulumpe. (Mus. 148:12, 13; Mat. 21:15, 16) Padi baledi ne bamanyishi bakuabu baleja dianyisha bua mudimu udi bansonga benza, babaleja mua kuwenza ne kabidi babakankamija, bansonga badi bumvua disanka dia bungi dia kuenza mudimu wa buambi. Lomba bateleji bua bafile ngenyi idi ileja tshidi tshikengela kuenza bua kuikala kupatuka ne bansonga mu buambi bua ku nzubu ne ku nzubu ne mu dipinganyina bantu. Lomba baledi bua balonde tshidibu benze bua kuambuluisha bana babu bua bamanye mua kufila bibejibeji, mua kuenza mudimu ne Bible padibu bayikila ne bantu ne mua kuakula ne dieyemena dionso padibu ku nzubu ya bantu. Leja bua tshinyi bidi bikengela kuela bana kalumbandi. Ela bansonga bamanyishi babidi peshi umue nkonko, ubambile balonde tshitu tshibasankisha mu mudimu wa buambi ne bua tshinyi badi bamba nanku.

Musambu 198 ne disambila dia nkomenu.

Lumingu lua dia 3 Tshisua-munene

Musambu 179

Min.  8: Mamanyisha a mu tshisumbu.

Min. 17: Tuibidilanganayi ne malu adi mu mukanda wa Comment raisonner. Diyukidilangana ne bateleji. Tangilayi bilejilu bidi bilonda ebi bia mushindu udi malu mashilashilangane adi mu mukanda eu ambuluisha bikole bua kumvuija malongesha a mu Bible: Diumvuija dia miaku bu mudi “Bukalenge” (dib. 335) peshi “nyuma” (dib. 135-136); nkudimuinu mishilashilangane ya Bible, idi ileja muaba ne mushindu udibu bafunde dîna dia Nzambi mu Bible (dib. 195-196) anyi bulelela pa bidi bitangila dilongesha didibu bamba dia inferno (dib. 123-125); malu adi atusunguluja ne bitendelelu bikuabu (dib. 393-395) peshi kuleja mudi muntu mua kumanya tshitendelelu tshidi tshilelela (dib. 316-318); malu a kale adi amanyisha kuakafumina difesto dia Nowele (dib. 162-164) ta muvua bena Kristo ba kumpala kabayi babuelakana mu malu a tshididi (dib. 267-279); malu majadika a bena meji adi aleja ne: bintu bionso mbifukibue (dib. 73-74) anyi kuleja bubi bua dinua diamba ne makanya (dib. 114-116). Kankamija bamanyishi bua benze mudimu ne tshiamu tshimpe tshia dilongesha natshi etshi dîba dionso didi mushindu umueneka mu buambi.

Min. 20: “Mabenesha adi muntu upeta padiye uleja dianyisha bua dinanga dia Yehowa​—Tshitupa 1.”d Panuafika ku tshikoso 3-6, ulombe bena mu tshisumbu bua balonde malu adi akankamija adibu bamone mu buambi bua ku nzubu ne ku nzubu, bua mu misesu, mu dipinganyina bantu ne mu mudimu wa dilonga Bible ne bantu.

Musambu 200 ne disambila dia nkomenu.

[Mêyi adi kuinshi]