Tudi tupola mamuma bilondeshile mudimu utudi tuenza

¹ Yehowa Nzambi mmuleje bantu dinanga mu mishindu mivule. Yezu wakaleja ne: Nzambi udi ne dinanga dikole pakambilaye bantu bavua badisangishe ne: Nzambi ‘utu ubandishila bantu babi ne bantu bimpe dîba, utu utumina bantu bakane ne bantu babi mvula.’ (Mat. 5:43-48) Musangu mukuabu Yezu wakaleja tshimanyinu tshitambe bunene tshia dinanga dia Tatuende: tuamba ne: mulambu wa Muanende umu’epele mulela uvua Nzambi mufile bua lupandu luetu. (Yone 3:16) Yezu wakambila bantu bua bikale ne dianyisha bua dinanga dia Nzambi edi. Tudi petu tuenza muetu muonso bua kuleja dianyisha anyi?

² Bua tuetu kufika ku dileja dianyisha ne muoyo mujima ne kupeta mabenesha a kashidi adi dinanga dia Yehowa dituadila bantu, tudi ne bua kumumanya. (Yone 17:3) Tudi dijinga ne mibelu idi mua kutuleja mushindu muakanyine utudi ne bua kumusadila. Yehowa mmuleje ne: udi uditatshisha bua bualu buetu bualu mmutupeshe Bible, Dîyi diende difundisha ku nyuma ne mmuteke bulongolodi buende budi butupesha mibelu ne butulongesha. (Mat. 24:45-47; 2 Tim. 3:16, 17) Bu mutudi basadidi ba Yehowa badi badilambule kudiye, udi utulongesha njila yende. Kadi tudiku tuleja ku mushindu utudi tumuenzela mudimu ne: tudi ne dianyisha bua dinanga dia Yehowa anyi? Tudiku tutumikila mibelu yende bua kumusankisha ne kabidi tuyilonda bua diakalenga dietu anyi? (Yesh. 48:17; Yak. 1:22) Mupostolo Paulo wakafunda mu 1 Kolinto 3:8 ne: ‘Udi ukuna ne udi umiamina mâyi badi umue; kadi muntu ne muntu neangate difutu bu mudi mudimu wende mene.’ (Tuetu mbadi baladike maleta.)

³ Bujitu bua baledi: Bushuwa, tudi ne bua kuenza muetu muonso bua kutumikila tshionso tshidi Nzambi ujinga. Bantu bonso kabatu badiunda mu nyuma mushindu wa muomumue to. Tshidiku kudi malu a bungi adi mua kutufikisha bua kudiunda mu nyuma, ne bua nanku kabiena bia meji bua tuetu kudifuanyikija ne bakuabu to, bidi mua kututekesha patupu mu maboko. Kadi mudimu wonso utudi tuenza ke udi ne mushinga mukole. Tshia kuenza ntshinyi bua kuikala anu pabuipi ne bulongolodi buetu? Kudiku imue mianda idi muntu ne muntu ne bua kuakaja bua kufika ku dikumbaja malu adibu batulomba tuetu bena Kristo anyi? Tshia kuenza ntshinyi bua kudifila menemene mu midimu ya tshisumbu yonso? Kudiku imue mibelu idi bulongolodi buetu butupesha itudi ne bua kutumikila anyi?​—1 Tim. 4:16.

⁴ Tuidikijayi bena lulamatu: Kukadi bidimu bia bungi bidi bana betu ba bakaji ne ba balume ba lulamatu bayisha lumu luimpe lua Bukalenge. Tudi ne bua kuidikija bantu ba lulamatu aba, tshilejilu bu mudi Paulo. (1 Kol. 11:1) Mbaleje dianyisha diabu bua dinanga dia Nzambi ne bua mudimu wabu mukole eu ne mushindu udibu badienzeje bua kulonda mibelu ya mu Bible, mbapete mabenesha a bungi. Buobu aba mu tshisumbu badi tshishimikidi tshikole ne mbenji ba mudimu ne tshisumi badi kabayi batshina bua kuambula bujitu buabu. Tudi mene nansha bua kumona mamuma a mudimu udibu benza.​—Lomo 1:13; 2 Kol. 3:1-3.

⁵ Mpindieu, kudi bantu bapiabapia binunu nkama ne nkama badi benda babuela tshidimu tshionso mu bulongolodi bua Nzambi. (Yesh. 60:8) Buobu pabu badi benza mudimu mukole bua kulua bantu bakole mu nyuma, ne mbakanyine tshia bushuwa kalumbandi bua lukunukunu luabu mu mudimu wa diyisha. Bidi bibakankamija mu maboko padibu bamona mushindu udi Yehowa ubenesha bana betu badi benza mudimu wa bungi mu buambi. Tshilejilu tshia bana betu aba bakadi bapie mu nyuma tshidi tshiambuluisha bapiabapia bua kumanyabu ne: etshi ki ntshikondo tshia kushala bavunge maboko katuyi ne tshitudi tuenza ta kutekesha mudimu utudi tuenzela Nzambi to. Nansha tuetu bikale bamanyishi bapiabapia peshi tukadi benze matuku a bungi, tutshidiku tutungunuka ne kukola mu nyuma, tukumbaja malu malomba bena Kristo ne tudikuatshisha ne bionso bidi bulongolodi bua Nzambi butupesha anyi?

⁶ Tutumikilayi malu atudi tulonga: Kale pavua Yakobo kayi muanji kufunda ne: tudi ne bua kuikala ‘benji ba mudimu,’ Mose wakambila bena Yuda ne: ‘[Nutumikile] mêyi aa.’ (Yak. 1:25; Dut. 11:18) Nunku dimanya nkayadi ki ndivua ne bualu to. Bena Yuda bavua ne bua kulonda mêyi a mu Mikenji bua kutumikila Yehowa. Ebu mbualu bua nshindamenu butshidi amu ne mushinga too ne lelu’eu. Bushuwa, Yezu Muana wa Nzambi uvua mumanye mushinga wa kuikala ne butumike. (Yone 8:28) Wakamba mu Matayo 7:24 ne: ‘Muntu yonso udi mumvue mêyi anyi aa ne utu uatumikila neikale bu muena meji.’

⁷ Tutu tutumikila malu atutu tuteleja mu mpuilu ya tshijengu anyi? Tudiku bamanye ne: mu tshikondo etshi tudi ne bua kushala batabale mu nyuma ne kuikala badimuke anyi? Tudiku ne budimu mu mvita idi Diabolo utuluisha ne mateyi adiye ututeya nawu anyi? Tudiku ne dianyisha bua mibelu idibu batupesha ne mishindu idibu batudimuija misangu ne misangu kudi bulongolodi pa bidi bitangila mankenda a mu nyuma ne muanda wa kuikala ne bikadilu bimpe anyi? Mmushindu kayi udi yonso wa kutudi utumikila malu atudi tuteleja?​—Yak. 1:23-25.

⁸ Tshiena-bualu tshia mpuilu wa pa buende wa dituku dimue bua tshidimu tshia mudimu tshipiatshipia etshi ntshimanyine pa mvese eu: “Nudikokeshe kudi Nzambi; kadi nukandamene Diabolo.” (Yak. 4:7) Eu mmubelu muimpe bulelela bua tshikondo tshikole etshi! Patudi tutumikila mikenji ya Nzambi, tudi tudikebela bilumbu kudi Satana. Mpuilu eu neatulongeshe mua kukandamena mayele mabi adi Diabolo wenza bua kushipa ditabuja dietu. (Eb. 2:1) Patudi tumukandamena, tudi tupeta mabenesha bilondeshile mudimu utudi tuenza.

⁹ Tudikuatshishayi ne didilongela dia muntu pa nkayende: Didilongela didi dituambuluisha bua kuikala ne ditabuja dikole ne kukolesha dianyisha ditudi nadi bua bulelela. Didi ditupa dieyemena ne ditupaya bua kuakula katuyi tutshina anu bu bena mêyi. Didi ditupesha busunguluji ne tumanya mua kujingulula malu ne kabidi dituambuluisha bua kuvuala bumuntu bupiabupia. (Kolos. 1:9-11) Kadi bitu biangata matuku ne bilomba mudimu mukole bua dilonga edi kutuadijadi kupatula bipeta bimpe; kakutu njila wa tshikoso udi muntu mua kulonda bua kupeta dimanya dijalame pamue ne dianyisha dikole bua malu a mu nyuma to. Tshitudi tukuna mu dilonga ke tshituapolamu kabidi.​—2 Kol. 9:6, 7; Gal. 6:7.

¹⁰ Tutuku lumingu luonso ne dîba dikumbane bua kulongolola bisangilu bia tshisumbu anyi? Eu ke umue mushindu utudi mua kuleja dianyisha bua biakudia bia mu nyuma bidi Yehowa ufila ku butuangaji bua mupika wa lulamatu ne wa budimu. Didilongolola bimpe bua bisangilu didi dituambuluisha bua kutungunuka ne programe wa dibala ne dilonga Dîyi dia Nzambi. Tutuku lumingu luonso ne dîba dia kubala nshapita ya mu Bible idibu baleje mu programe wa Kalasa ka Mudimu wa Teokrasi anyi? Nshapita eyi itu ilomba minite mikese patupu dituku dionso bua kuyibala ne kuelelapu meji. Tshisangilu tshia Mudimu tshidi tshituvuluija malu adi mua kutuambuluisha bua kulengeja mudimu wetu. Tutuku tulongolola tshisangilu etshi, tukeba mushindu utudi mua kuenza mudimu ne malu atudi tulonga mu tshisangilu atshi mu buambi anyi? Ne tutuku tuenza muetu muonso bua kuatumikila diakamue anyi? Tudi kabidi ne bua kuikala tulongolola Dilonga dia Tshibumba tshia Nsentedi ne Dilonga dia Mukanda dia Tshisumbu. Ke tshitutu tuenza anyi?

¹¹ Tuikalayi tuandamuna mu bisangilu ne tuenza midimu idibu batupeshamu: Bisangilu bidi mua kutuambuluisha bituikala tuetu bine tufilamu petu mandamuna. Kulongolola bisangilu ne pashishe kudienzeja bua kuandamunamu kudi kutuambuluisha bua kushala ne ntema dîba didibi bienzeka ne kutupepejila mushindu wa kuteleja mandamuna adi bakuabu bafila. Ba bungi batshitu anu bavuluke musangu wabu wa kumpala wakadifilabu bua kuandamuna pabu mu bisangilu anyi kuenza mudimu mu Kalasa ka Mudimu wa Teokrasi. Nansha mutukadi katutshiyi kabidi tumvua buôwa bua kuandamuna mu bisangilu, tudiku tutungunuka ne kudienzeja bua didiunda dietu dia mu nyuma dimueneke kudi bonso anyi? (1 Tim. 4:15) Mandamuna atudi tufila mu bisangilu adi ambuluisha bakuabu ne abakankamija. Tuetu bikale badilongolole bimpe, balonge malu ikalabu ne bua kulongesha mu bisangilu, mandamuna etu mimpe neasake bana betu ku dinanga ne ku midimu milenga.​—Eb. 10:23-25.

¹² Mandamuna etu kaena ne bua kuikala male ne makodiakane to. A mîpi adi andamuna diakamue nkonko idibu bele peshi adi umvuija bimpe mushindu wa kutumikila mvese kampanda ke adi malenga. Tuetu bikale badilongolole bimpe, netuikale mua kufila mandamuna mu mêyi etu nkayetu. Patudi tuenza nanku, bidi bituambuluisha bikole, biambuluisha ne bakuabu kabidi. Bua tshinyi? Bualu bidi bitulomba bua kuanji kuela meji bua malu atudi tuamba ne kumvuija malu mushindu utudi tuumvua. Ngenzelu wa nunku udi mua kuambuluisha bakuabu bua kumvuabu bimpe malu adi mu tshialu. Kabidi netuvuluke malu aa musangu mukuabu ne netuatumikile.

¹³ Tukunayi ne muoyo wa kalolo mu budimi: Mudimu wetu wa bena Kristo ntshiûma tshia mushinga mukole. (2 Kol. 4:7) Ke muutu uwangata anyi? Mu mudimu wa buambi, tudi tumanyisha bakuabu ditabuja dietu. Yezu wakamba ne: mukana mudi mupatula malu adi matambe kuvulangana mu mutshima. (Luka 6:45) Mushindu udi yonso wa kutudi udienzeja bua kuenza mudimu wa buambi bikole udi utupetesha masanka a bungi. Ngumvuilu wetu wa bulelela udi ulengela, ne tudi tupiluka mu dienza mudimu ne Bible. Tudi ne disanka dia kumanyisha bantu bakuabu bulelela ne kubambuluisha bua bamanye Mufuki wabu Munene. Tudi tujadika bukenji budi nabu Nzambi bua kukokesha ne kuikala Mfumu wa bionso. Tudi ne disanka bualu tudi bamanye bimpe se: tudi tusankisha Yehowa, tudi bafukibue mu tshimfuanyi tshiende ne tudi tuenza disua diende.​—Mat. 5:48.

¹⁴ Tuetu bikale misangu yonso tukonkonona mushindu utudi tudifila mu mudimu wetu, ditendelela dietu dia Yehowa kadiakuikala dia tshidingishilu to. Mbuena kuamba tshinyi? Mmumue ne: katuakuenza disua dia Nzambi ne mioyo ibidi, tuenza anu mudimu wa pa mutu pa mutu anyi tudifilamu amu kakese, katuyi tuwenza ne muoyo wetu mujima. Tudi ne bua kuenzela Yehowa mudimu ne muoyo mujima. Bible udi utulomba bua kudifila muetu muonso mu mudimu wa Yehowa. (Kolos. 3:23, 24) Bushuwa, nsombelu ya bantu mmishilangane, ne Yehowa katu utulomba bia bungi kupita tshitudi mua kuenza to. Mmusue bua tumuenzele tshitudi bakumbane mua kuenza! (Mat. 22:37) Bu mutudi bantu bena mpekatu ne bikala amu ne meji a kudifila kakese mu mudimu, mbimpe tudikonkonone dîba dionso bua kumona miaba itudi mua kuakaja mudimu utudi tukuatshila Nzambi. Tutuku ne tshibidilu tshia kuenza nunku anyi?

¹⁵ Tudimukayi bua malu atudi tuipatshila ne atudi tujinga kaatupangishi bua kudifila muetu muonso mu mudimu wa Yehowa to. Masanka, manaya ne dijikija lutetuku bidi ne bua kuikala pa muaba wabi. Tudi kabidi ne bua kuepuka ditamba kudifila bikole mu midimu yetu mikuabu idi kayiyi ya malu a mu nyuma. Kakuyi mpata, tuetu batumikile mubelu wa Yezu udi mu Matayo 6:22, 23, netudienzeje bikole bua kukeba malu a mu nyuma ne netupete masanka.

¹⁶ Tutungunukayi amu ne kudienzeja bikole bua kuvuala bumuntu bupiabupia, ne tukumbaje malu adibu balomba bena Kristo a ditumikila mibelu idibu batupesha mu bisangilu, mu mpuilu, mu mpungilu ne mu mikanda yetu. Tuetu bonso tuikalayi tulonga ne tshisumi, tuenza muetu muonso bua kuikala tuandamuna ne tuenza midimu yonso idibu batupesha mu bisangilu, katuyi tupua muoyo bua kuenza mudimu munene eu wa dienza bayidi ne tubienza bilondeshile nsombelu wa muntu ne muntu. Tuetu tuleja dianyisha bua dinanga dia Nzambi mushindu eu, netuikale batuishibue ne: netupete masanka a bungi a mu nyuma mpindieu ne netuikale ne ditekemena dia muoyo wa tshiendelele mu bulongolodi bupiabupia bua Yehowa.