Udi mua kutantamana too ne ku ndekelu

“Tunyemayi ne ditantamana lubilu ludi lututekela kumpala.”​—EBELU 12:1, NW.

1, 2. Kutantamana kudi kumvuija tshinyi?

“NUDI nukengela ditantamana.” Aa mmêyi avua Paulo mufundile bena Kristo bena Ebelu ba mu bidimu lukama bia kumpala. (Ebelu 10:36, NW) Bua kuleja mushinga udi nawu ngikadilu eu, mupostolo Petelo wakabela pende bena Kristo ne: “Nusakidile ku ditabuja dienu . . . ditantamana.” (2 Petelo 1:5, 6, NW) Kadi ditantamana ntshinyi menemene?

² Nkonga-miaku kampanda wa tshiena-Greke ne Anglais udi umvuija muaku wa pa muanda wa tshiena-Greke mukudimuna ne: “kutantamana” bu “kushala pamutu pa kunyema . . . kutua nkanana, kukandamana.” Mukanda mukuabu udi umvuija muaku wa mu tshiena-Greke mukudimuna ne: “ditantamana” bu “Mmuenenu udi wambuluisha bua kuitaba malu, kabiyi anu pa kualekela patupu, kadi ne ditekemena dikole . . . Nngikadilu udi wambuluisha muntu bua kushala mutue makasa panshi, mpala mutangija kudi lupepele lufumina. Mbuimpe budi mua kuandamuna diteta dipite bukole kudivuija tshikondo tshia butumbi, bualu budi bumona tshipatshila tshidi kunyima kua makenga.” Nenku ditantamana didi diambuluisha muntu bua kushala mushindame kumpala kua bipumbishi ne ntatu ne bua kubenga kujimija ditekemena. Nnganyi udi nangananga ukengela ngikadilu eu?

3, 4. (a) Nnganyi udi ukengela ditantamana? (b) Bua tshinyi tudi ne bua kutantamana too ne ku ndekelu?

³ Mu ngakuilu wa tshimfuanyi, bena Kristo bonso badi banyema lubilu ludi lulomba ditantamana. Bu mu tshidimu tshia 65 B.B., mupostolo Paulo wakafundila Timote muenzejanganyi nende wa mudimu uvuabu benze nende ngendu mêyi aa adi akolesha ku muoyo: ‘Ngakaluangana mvita mimpe, ngakujikija lubilu luanyi, ngakalama ditabuja.’ (2 Timote 4:7, MML) Ku mêyi aa: ‘kujikija lubilu,’ Paulo uvua ufuanyikija nsombelu wende wa muena Kristo ne dinyema dia lubilu, dikale ne ntuadijilu ne ndekelu wadi. Mu tshikondo atshi, Paulo uvua mutangile bimpe ku ndekelu kua lubilu luende, ne uvua mutekemene ne dishindika bua kupeta difutu. Wakatungunuka wamba ne: ‘Tshidi kumpala mpindieu ntshifulu tshia butumbi tshia buakane bua Nzambi tshintekela, tshialua Mukalenge mulumbuludi muakane kumpa dituku diadia.’ (2 Timote 4:8) Paulo uvua mushindike ne: uvua ne bua kupeta difutu bualu uvua mutantamane too ne ku ndekelu. Netuambe tshinyi buetu tuetu?

⁴ Bua kukankamija bantu badi batuadije lubilu elu, Paulo wakafunda ne: “Tunyemayi ne ditantamana lubilu ludi lututekela kumpala.” (Ebelu 12:1, NW) Mutudi bena Kristo, tudi tubanga kunyema lubilu elu ludi lulomba ditantamana patudi tudilambula kudi Yehowa Nzambi ku butuangaji bua Yezu Kristo. Kutuadija bimpe lubilu lua bayidi kudi ne mushinga, kadi tshidi nangananga ne mushinga nkulujikija. Yezu wakamba ne: “Watantamana too ne ku ndekelu ke wapanda.” (Matayo 24:13, NW) Muoyo wa tshiendelele ke difutu didi dindile bantu badi bajikija lubilu luabu bimpe! Nanku mutudi ne tshipatshila kampanda, tudi ne bua kutantamana too ne ku ndekelu. Ntshinyi tshiatuambuluisha bua kukumbaja tshipatshila atshi?

Udi ne bua kuikala udia bimpe

5, 6. (a) Bua kutantamana mu lubilu lutudi tunyema bua kupeta muoyo, ntshinyi tshitudi ne bua kutabalela? (b) Mbintu kayi bia mu nyuma bitudi ne bua kudiambuluisha nabi, ne bua tshinyi?

⁵ Pabuipi ne tshimenga tshia Kolinto mu Grèce, kuvua muaba muende lumu uvuabu benzela Manaya a Isthme mu bikondo bia kale. Kakuyi mpata, Paulo uvua mumanye ne: bana betu ba mu Kolinto bavua bibidilangane ne manaya a dibidija mubidi ne makuabu manaya a ditembangana avuabu benzela muaba eu. Bu mukavuabu ne dimanya edi, wakabavuluija bua lubilu lukavuabu batuadije bua kupeta muoyo ne: “Kanuena bamanye ne: mu tshipalu tshia manaya, bonso badi banyema, kadi amu umue ngudi upeta kalumbandi anyi? Nyemayi penu bikole bua nuamona mua kukapeta.” Paulo wakabaleja mushinga wa kutungunuka ne kunyema lubilu ne kukolesha too ne ku ndekelu. Kadi ntshinyi tshivua mua kubambuluisha bua kunyema nenku? Wakasakidila ne: “Bonso badi mu tshialu tshia manaya badi badilama bikole.” Bulelela, bantu bavua batembangana mu manaya a kale bavua badibidija bikole, bikale badienzeja bikole bua kuikala ne biakudia ne bia kunua bimpe, ne bavua ne dîsu dikole ku bualu buonso buvuabu benza bua kumona mua kupeta difutu.​—1 Kolinto 9:24, 25, MMM.

⁶ Bidi munyi bua lubilu ludi bena Kristo banyema? Mukulu wa mu tshisumbu kampanda tshia Bantemu ba Yehowa udi wamba ne: “Udi ne bua kutabalela ndilu webe wa mu nyuma biwikala musue kutantamana mu dinyema dia lubilu bua kupeta muoyo.” Ikala udia biakudia bia mu nyuma bidi Yehowa, “Nzambi [udi ufila, NW] ditantamana” mutupeshe. (Lomo 15:5) Mpokolo wetu munene wa biakudia bia mu nyuma m’Bible, Dîyi diende. Tudi ne bua kuikala ne ndongamu muimpe wa dibala dia Bible. Ku butuangaji bua “mupika wa lulamatu ne wa budimu,” Yehowa utu kabidi ufila bibejibeji bia Tshibumba tshia Nsentedi ne Réveillez-vous! ne mikanda mikuabu mishindamene pa Bible itudi tupeta pa dîba diayi. (Matayo 24:45, NW) Kulonga mikanda eyi ne tshisumi nekutukoleshe mu nyuma. Bushuwa, tudi ne bua kukeba dîba, ‘kudisumbila tshikondo tshiakanyine’ bua kudilongela.​—Efeso 5:16.

7. (a) Bua tshinyi katuena ne bua kusanka bua kumanya patupu malongesha a nshindamenu a bena Kristo? (b) Mmunyi mutudi mua ‘kulua bantu bashindame’?

⁷ Bua kutungunuka ne lubilu lua bayidi bena Kristo, katuena ne bua kuimanyina anu pa “malongesha a ntuadijilu,” tudi ne bua ‘kutungunuka [bua kulua] bantu bashindame.’ (Ebelu 6:1, MML) Nenku tudi ne bua kukeba bua kumanya ‘butshiama ne bule, butumbuke ne buondoke’ bua bulelela ne kudia “tshiakudia tshikole tshidi [tshikale] bua bakulumpe.” (Efeso 3:18; Ebelu 5:12-14, MMM) Tshilejilu, udi mua kuangata miyuki inayi ya kueyemena ya muoyo wa Yezu pa buloba: Evanjeliyo wa Matayo, wa Mâko, wa Luka ne wa Yone. Mu dilonga ne lubatshi miyuki eyi ya mu Evanjeliyo, tudi mua kumanya ki ng’anu malu akenza Yezu ne bumuntu buende, kadi tudi kabidi mua kujingulula meji avua amusaka bua kuenza malu au. Pa nanku tudi mua kufika ku dipeta ‘meji a Kristo.’​—1 Kolinto 2:16.

8. Mmunyi mudi bisangilu bia bena Kristo bituambuluisha bua kutantamana mu dinyema lubilu bua kupeta muoyo?

⁸ Paulo wakabela bena kuitabuja nende ne: “Tukenketanganayi bua kusakangana ku dinanga ne ku midimu milenga, katuyi tulekela disangila dietu pamue, bu mudi tshilele tshia bamue, kadi tukankamijanganayi, ne tutambe kuenza nunku munudi numona dituku dienda disemena pabuipi.” (Ebelu 10:24, 25, NW) Bisangilu bia bena Kristo mmpokolo wa dikankamija. Ne tudi tupeta bukole patudi ne bana betu badi batunange ne basue bua kutuambuluisha bua tutantamane too ne ku ndekelu. Katutetshi kulengulula bisangilu ebi bidi Yehowa mutulongoluele ne dinanga nansha. Ku diambuluisha dia didilongela ne tshisumi ne dibuela mu bisangilu pa tshibidilu, tuluayi ‘bantu bakole ku ngelelu wetu wa meji.’​—1 Kolinto 14:20, MML.

Babandidi bua kukukankamija

9, 10. (a) Mmu mushindu kayi mudi babandidi mua kukankamija bantu mu dinyema dia lubilu ludi lulomba ditantamana? (b) ‘Divuba dinene dia bantemu didi ditunyunguluke’ didibu batele mu Ebelu 12:1 ntshinyi?

⁹ Kadi nansha munyemi wa lubilu yeye mudilongolole bimpe mushindu kayi, kudi malu adi mua kuenzeka mu njila adi mua kumutekesha mu mikolo. Paulo wakebeja ne: “Nuvua batuadije [lubilu, NW] bimpe; kadi udi munupangishe mua kulonda bulelela awu nganyi?” (Galatia 5:7, MMM) Bidi bimueneka ne: bamue bena Kristo bena Galatia bakabanga kusomba ne balunda babi, kupetabu ditanaji mu dinyema diabu dia lubilu bua kupeta muoyo. Ku lukuabu luseke, dikuatshisha ne dikankamija dia kudi bakuabu didi mua kuvuija lubilu luetu lupepele bua kulutantamena. Mbifuanangane bikole ne buenzeji butu nabu babandidi kudi bantu badi mu tshialu. Musangelu wa misumba ya bantu utu utamba kupesha badi balumbila bukole bua kutungunuka too ne ku ndekelu. Makumbu adi babandidi babatua, misangu mivule masambakaja ne misambu mimba ne mêyi makole ne bikashi, bidi mua kupesha badi mu tshialu dikanda divule didibu nadi dijinga bua kufika ku ndekelu. Bushuwa, babandidi badi batuangana nyama ku mikolo badi mua kuikala ne buenzeji buimpe kudi bantu badi banyema lubilu.

¹⁰ Kadi mbanganyi badi babandidi mu lubilu ludi bena Kristo banyema bua kupeta muoyo? Anu mudi Ebelu nshapita wa 11 uleja, kunyima kua yeye mumane kutela bantemu ba Yehowa ba lulamatu ba kumpala kua Buena-Kristo, Paulo wakafunda ne: “Nenku, bu mutudi ne divuba dipite bunene dia bantemu didi ditunyunguluke, . . . tunyemayi ne ditantamana lubilu ludi lututekela kumpala.” (Ebelu 12:1, NW) Mu diangata tshimfuanyi tshia divuba, Paulo kakatela muaku wa mu tshiena-Greke udi umvuija divuba dikale ne mikalu mimueneke bimpe ne dia bunene busunguluke nansha. Kadi bilondeshile William E. Vine mufundi wa nkonga-miaku, Paulo wakatela muaku udi “umvuija mushiki muenze bu divuba, kauyi ne tshimfuanyi tshisunguluke ne mubuikile diulu.” Bushuwa, Paulo uvua mutume meji ku musumba munene wa bantemu​—ba bungi menemene benze bu divuba dinene.

11, 12. (a) Mmunyi mudi bantemu ba lulamatu ba kumpala kua Buena-Kristo mua kutukankamija bua kunyema lubilu ne ditantamana? (b) Mmunyi mudi ‘divuba dinene dia bantemu’ mua kutuambuluisha bikole?

¹¹ Bantemu ba kumpala kua Buena-Kristo badiku mua kuikala bushuwa babandidi ba mu tshikondo tshietu etshi anyi? Tòo. Bonso bakadi bafue ne mbindile dibishibua. Nansha nanku, bavua banyemi bimpe ba lubilu patshivuabu ne muoyo, ne bilejilu biabu mbishale mu Bible. Patudi tulonga Mifundu, bena lulamatu aba badi anu bu badi balua ne muoyo mu ngenyi yetu ne badi mua kutukankamija bua kunyema lubilu too ne ku ndekelu.​—Lomo 15:4.a

¹² Tshilejilu, padi malu a panu atutuma ku bubi, dikonkonona mushindu uvua Mose mubenge butumbi bua mu Ejipitu kadienaku mua kutusaka bua kutungunuka ne lubilu luetu anyi? Bikala diteta didi ditufikile dimueneka dikole, kuvuluka diteta dikole diakapeta Abalahama pavuabu bamulombe bua kulambula muanende Isaka nekutukankamije bua katulekedi kuluangena ditabuja dietu mvita. Dikankamija didi ‘divuba dinene’ dia bantemu aba ditupesha mu njila eu ndisuikila ku mushindu utudi tubamona ne mêsu etu a mu mutshima.

13. Mmu mushindu kayi mudi Bantemu ba Yehowa ba tshikondo tshietu etshi batukankamija mu lubilu lutudi tunyema bua kupeta muoyo?

¹³ Tudi kabidi banyunguluka kudi Bantemu ba Yehowa ba bungi ba mu bikondo bietu ebi. Bena Kristo bela manyi mbashiye bilejilu bimpe bia ditabuja, nansha kabidi bantu balume ne bakaji ba mu “musumba munene.” (Buakabuluibua 7:9, NW) Tudi mua kubala malu adi akula bua nsombelu wabu ku musangu ne ku musangu mu tshibejibeji etshi ne mu mikanda mikuabu ya Société Watch Tower.b Patudi tuelangana meji pa ditabuja diabu, tudi tupeta dikankamija bua kutantamana too ne ku ndekelu. Ne mbitambe buimpe mudi balunda ne balela ba pa muoyo batukuatshisha, buobu pabu bikale basadila Yehowa ne lulamatu. Bushuwa, tudi ne bantu ba bungi badi mua kutukankamija mu lubilu lutudi tunyema bua kupeta muoyo.

Ela bidia ne meji

14, 15. (a) Bua tshinyi bidi ne mushinga bua tuetu kuela bidia ne meji? (b) Bua tshinyi tudi ne bua kuikala ne butshintshikidi patudi tudifundila bipatshila?

¹⁴ Padiye unyema lubilu mutantshi mule, bu mudi lubilu lua makasa, munyemi udi ne bua kuela bidia ne meji. Tshikandakanda kampanda tshidi tshiamba ne: “Kubanga lubilu lukole musangu umue kudi mua kukutshiokesha. Bidi mua kukulomba bua kuluangana mutantshi mule bua kumona mua kujikija kilometre mivule idi mishale peshi kubilekela.” (New York Runner) Munyemi mukuabu wa lubilu lua makasa udi wamba ne: “Muntu wakenza muyuki mu tshisangilu tshingakabuela bua kulongolola dinyema dia lubilu wakatudimuija patoke ne: ‘Kukebi bua kunyema diatshimue ne bantu badi banyema bikole nansha. Nyema bilondeshile bule bua bidia biebe. Tshianana neupungile ne udi mufuane kubilekela.’ Ngakafika ku ndekelu kua lubilu luanyi bua diteleja mubelu eu.”

¹⁵ Mu lubilu ludibu banyema bua kupeta muoyo, basadidi ba Nzambi badi ne bua kudienzeja ne makanda onso. (Luka 13:24) Muyidi Yakobo wakafunda ne: ‘Meji adi afuma mu diulu adi [a butshintshikidi, NW].’ (Yakobo 3:17) Nansha mudi tshilejilu tshimpe tshia bakuabu mua kutukankamija bua kuenza bivule, kuikala ne butshintshikidi nekutuambuluishe bua kudifundila bipatshila biakanyine biumvuangane ne makole ne nsombelu yetu. Mifundu idi ituvuluija ne: ‘Muntu ne muntu adijadikile mudimu wende, nunku neamanye mua kuditumbisha bua bualu buende, ki mbualu bua mukuabu. Bualu bua muntu ne muntu neadiambuile bujitu buende.’​—Galatia 6:4, 5.

16. Mmunyi mudi bupuekele butuambuluisha mu diela dietu dia bidia?

¹⁶ Mu Mika 6:8, badi batuela lukonko elu ludi lutuelesha meji: ‘Yehowa udi utekemena malu kayi kuudi? Anu bua wewe kuenda ne Nzambi webe ne mutshima mupuekele.’ Bupuekele budi bumvuija dimanya mikalu yetu. Masama nansha bukulakaje bidi bitupangisha bua kuenza mudimu wa Nzambi mutudi basue anyi? Katuteketshi mu mikolo to. Yehowa udi witaba madikolela etu ‘bilondeshile tshitudi natshi, ki mbilondeshile tshitudi katuyi natshi nansha.’​—2 Kolinto 8:12, NW; tangila Luka 21:1-4.

Utuishile mêsu ku difutu

17, 18. Yezu wakatantamena mutshi wa tshinyongopelu pa kushala mutuishile mêsu ku tshinyi?

¹⁷ Pavuaye uleja bena Kristo ba mu Kolinto mushinga wa kutantamana mu lubilu bua kupeta muoyo, Paulo wakatela bualu bukuabu bua mu Manaya a Isthme buvua buakanyine ntema yabu. Paulo wakafunda bua bantu bavua balumbila mu manaya au ne: “Badi [banyema] bua kupetabo tshifulu tshia butumbi tshidi tshinyanguka. Kadi tuetu tudi tuenza nanku bua kupeta tshifulu tshidi katshiyi tshinyanguka. Ke mundi nyema panyi tshiyi ngela bilele; nansha mu yanyi mvita tshiena ngela mbata panshi nansha.” (1 Kolinto 9:25, 26, MMM) Difutu divuabu bapeta kudi mutshimunyi mu manaya au a kale divua tshifulu tshia butumbi anyi nkata muasa bilongo, muenza ne mabeji a mutshi wa pin anyi mitshi mikuabu, peshi mene ne seleri mûme wa muitu​—tshivua bushuwa “tshifulu tshia butumbi tshidi tshinyanguka.” Kadi ntshinyi tshidi tshindile bena Kristo badi batantamana too ne ku ndekelu?

¹⁸ Pavuaye wakula bua Yezu Kristo udi muikale Tshilejilu tshietu, mupostolo Paulo wakafunda ne: “Bua disanka divua dimutekela kumpala wakatantamena mutshi wa tshinyongopelu, kulengulula bundu, e kusomba ku dia balume dia nkuasa wa bumfumu wa Nzambi.” (Ebelu 12:2, NW) Yezu wakatantamana too ne ku ndekelu kua muoyo wende wa pa buloba pa kushala mutangile ku difutu diende divua kunyima kua mutshi wa tshinyongopelu, difutu didi diumvuija disanka didiye nadi mu divuija dîna dia Yehowa dinsantu, mu dipikula dîku dia bantu ku lufu ne mu dikokesha bu Mukalenge ne Muakuidi Munene bua kupesha bantu bena butumike muoyo wa kashidi mu mparadizu pa buloba.​—Matayo 6:9, 10; 20:28; Ebelu 7:23-26.

19. Nku tshinyi kutudi ne bua kushala batuishile mêsu mu lubilu luetu lua bayidi bena Kristo?

¹⁹ Tutangile disanka didi ditutekela kumpala patudi tutungunuka ne lubilu lua bayidi bena Kristo. Yehowa mmutupeshe mudimu udi usankisha bikole wa kuyisha lumu luimpe lua Bukalenge bua Nzambi ne kupesha bantu bakuabu dimanya dia mu Bible didi dipandisha muoyo. (Matayo 28:19, 20) Tutu ne disanka patudi tupeta muntu udi ujinga kumanya malu a bungi adi atangila Nzambi mulelela ne patudi tuambuluisha muntu au bua kutuadija dinyema lubilu bua kupeta muoyo. Nansha bantu batudi tuyisha buobu bitabe anyi babenge, kuenza mudimu udi utangila divuija dîna dia Yehowa dinsantu mbualu bua lumu. Patudi tutantamana mu mudimu eu nansha bantu ba muaba utudi tuyisha buobu babuidia anyi batuluisha, tudi ne disanka bua mutudi tusankisha mutshima wa Yehowa. (Nsumuinu 27:11) Ne muoyo wa kashidi ke difutu dinene didiye mutulaye. Netshikale disanka dinene be! Tudi ne bua kushala batuishile mêsu etu ku masanka aa ne kutungunuka ne dinyema lubilu.

Nshikidilu ukadi pabuipi menemene

20. Mmunyi mudi dinyema lubilu bua kupeta muoyo mua kutamba kulua dia lutatu padi ndekelu wadi wenda usemena pabuipi menemene?

²⁰ Mu lubilu lutudi tunyema bua kupeta muoyo, tudi tuluangana ne muluishi wetu munene Satana Diabolo. Bu mutudi tusemena ku nshikidilu, udi wenza muende muonso bua kutulenduisha anyi kutufikisha ku ditekesha lubilu. (Buakabuluibua 12:12, 17) Ne ki mbipepele bua kutungunuka ne lulamatu mu dikala bamanyishi ba Bukalenge pa kumona mudiku mvita, biyole bia nzala, bipupu bia masama ne ntatu mikuabu yonso idi ileja ‘tshikondo tshia ku nshikidilu.’ (Danyele 12:4; Matayo 24:3-14; Luka 21:11; 2 Timote 3:1-5) Kabidi, pamu’apa nshikidilu udi mua kumueneka bu utshidi kule kupita mutuvua batekemene, nangananga bituikala batuadije kunyema lubilu kukadi makumi a bidimu. Nansha nanku, Dîyi dia Nzambi didi ditujadikila ne: nshikidilu nealue. Yehowa udi wamba ne: nshikidilu kakunenga bua kulua to. Ukadi pabuipi menemene.​—Habakuka 2:3; 2 Petelo 3:9, 10.

21. (a) Ntshinyi tshiatukolesha bua tuetu kutungunuka ne kunyema lubilu bua kupeta muoyo? (b) Ntshinyi tshidi ne bua kuikala dipangadika dietu pa kumona mudi nshikidilu usemena pabuipi menemene?

²¹ Nenku bua kunyema bimpe lubilu ne kupeta muoyo, tudi ne bua kupetela bukole ku biakudia bia mu nyuma bidi Yehowa mutupeshe ne dinanga. Tudi kabidi dijinga ne dikankamija dionso ditudi mua kupeta pa kuikala kudisangisha pa tshibidilu ne bena kuitabuja netu, badi bikale pabu baditue mu dinyema lubilu elu. Nansha bikala dikengeshangana dikole ne malu kaayi malongolola mua kutamba kuvuija dinyema dietu dia lubilu muanda wa lutatu, tudi mua kutantamana too ne ku ndekelu bualu Yehowa udi utupesha “bukole budi bupite bua pa tshibidilu.” (2 Kolinto 4:7, NW) Bidi bitukolesha ku muoyo pa kumanya se: Yehowa mmusue bua tujikije bimpe lubilu elu! “Tunyemayi ne ditantamana lubilu ludi lututekela kumpala” bikale ne dipangadika dikole ne bashindike ne: “bituikala katuyi tuteketa mu maboko, netupole pakumbana tshikondo.”​—Ebelu 12:1, NW; Galatia 6:9, MML.

[Mêyi adi kuinshi]

Udi muvuluke anyi?

◻ Bua tshinyi tudi ne bua kutantamana too ne ku ndekelu?

◻ Mbintu kayi bidi Yehowa mulongolole bitudi katuyi ne bua kulengulula?

◻ Bua tshinyi mbia mushinga bua tuetu kuela bidia ne meji?

◻ Ndisanka kayi didi ditutekela kumpala patudi tutungunuka ne kunyema lubilu?

[Tshimfuanyi mu dibeji 18]

Bisangilu bia bena Kristo bikukankamije