Kanulekedi dinyema lubilu bua kupeta muoyo!

“Tunyemayi ne ditantamana lubilu ludi lututekela kumpala.”​—EBELU 12:1, NW.

1, 2. Mmalu kayi malenga adi masankishe bikole basadidi ba Yehowa mu matuku aa a ku nshikidilu?

TUDI mu bikondo bia disanka dikole ne bidi bisumpakaja kabidi. Kukadi bidimu bipite pa 80, mu 1914, Yezu wakatekibua bu Mukalenge wa Bukalenge bua Nzambi bua mu diulu. “Dituku dia Muk[a]lenge” diakatuadija pamue ne ‘tshikondo tshia ku nshikidilu’ wa ndongoluelu eu wa malu. (Buakabuluibua 1:10; Danyele 12:9) Kutuadijila tshikondo atshi, lubilu lua bena nkristo bua kupeta muoyo ndulue kuangata mitalu ya bungi. Basadidi ba Nzambi mbadienzeje ne makanda onso bua kuenda pamue ne ditempu dia mu diulu dia Yehowa, bulongolodi buende bua mu diulu, didi dienda kadiyi kuimanyika bua kukumbaja malongolola a Yehowa.​—Yehezekele 1:4-28; 1 Kolinto 9:24.

² Bantu ba Nzambi mbapeteku disanka mu ‘dinyema diabu dia lubilu’ batangile ku muoyo wa kashidi anyi? Eyowa! Mbasanke bikole bua kumona disangisha dia bashadile ba ku bana babu ne Yezu, ne badi basanka pa kumanya se: ditua tshitampi dia ndekelu pa bashadile ba ku bantu 144 000 dikadi pa kujika. (Buakabuluibua 7:3, 4) Kabidi, badi basanka bikole bua kumanya se: Mukalenge muteka kudi Yehowa mmuele muele wende bua kunowa “bintu bia [p]a buloba bia kunowa.” (Buakabuluibua 14:15, 16) Ne ndinowa kayipu! (Matayo 9:37) Kubangila ku tshikondo atshi, mbasangishe bantu bapite pa miliyo itanu​—“musumba munene uvua muntu nansha umue kayi mua kubala, wa mu matunga onso ne bisa bionso ne bisamba bionso ne miakulu yonso.” (Buakabuluibua 7:9, NW) Muntu nansha umue kêna mua kuamba bunene bua ndekelu buikala musumba au, bualu kakuena muntu udi mua kuubala.

3. Nkumpala kua bipumbishi kayi kutudi ne bua kuteta misangu yonso bua kudima lungenyi lua disanka?

³ Bulelela, Satana udi uteta bua kutulenduisha anyi kututekeshisha lubilu patudi tukolesha mu lubilu elu. (Buakabuluibua 12:17) Ne ki mbipepele bua tuetu kutungunuka ne dinyema munkatshi mua mvita, biyole bia nzala, bipupu bia masama, ne ntatu mikuabu yonso idi ileja tshikondo tshia ku nshikidilu. (Matayo 24:3-9; Luka 21:11; 2 Timote 3:1-5) Nansha nanku, mitshima yetu idi itupika ne disanka bualu ndekelu wa lubilu elu wasemenyi pabuipi. Tudi tudienzeja bua kuleja lungenyi luvua Paulo mubele bena nkristo nende ba mu tshikondo tshiende bua kuikalabu nalu: “Nusanke mu Muk[a]lenge misangu yonso, nengambe tshiakabidi ne, Nusanke.”​—Filipoi 4:4.

4. Ndungenyi lua mushindu kayi luakaleja bena nkristo ba ku Filipoi?

⁴ Kakuena mpata bua se: bena nkristo bavua Paulo muambile mêyi au bavua ne disanka bua ditabuja diabu, bualu Paulo wakabambila ne: “Tungunukayi ne kusanka mu Mukalenge.” (Filipoi 3:1, NW) Bena Filipoi bavua tshisumbu tshia kalolo ne tshia dinanga, bàvuà bakuata mudimu ne lukunukunu ne musangelu. (Filipoi 1:3-5; 4:10, 14-20) Kadi ki mbena nkristo bonso ba mu siekele wa kumpala bavua ne lungenyi alu. Tshilejilu, bamue bena nkristo bena Yuda bavua Paulo mufundile mukanda wa Ebelu bavua bikale kabingila ka disumpakena.

“Tuteye ntema mipite ya pa tshibidilu”

5. (a) Ndungenyi kayi luvua nalu bena nkristo bena Ebelu pakenzabu tshisumbu tshia kumpala tshia bena nkristo? (b) Umvuija lungenyi lua bamue bena nkristo bena Ebelu pabuipi ne mu 60 B.B.

⁵ Bilondeshile malu a kale, tshisumbu tshia kumpala tshia bena nkristo tshivua tshienza ne bena Yuda ba ku tshilelelu ne ba-prozelite, ne tshivua tshiashila ku Yeruzaleme mu 33 B.B. Tshivua ne lungenyi lua mushindu kayi? Bidi bikengela kubala anu nshapita ya ku ntuadijilu ya mukanda wa Bienzedi bua kumona muvuatshi ne musangelu ne disanka, nansha mu dikengeshibua. (Bienzedi 2:44-47; 4:32-34; 5:41; 6:7) Kadi, pakapita makumi a bidimu, malu e kuandamuka, ne kakuyi mpata, bena nkristo bena Yuda bakatekesha mu lubilu luabu bua kupeta muoyo. Mukanda kampanda udi wamba nunku bua muvua nsombelu wabu bu mu 60 B.B.: “Nsombelu wa bukata ne dipungi, wa malu mindila kaayi makumbaja, matekemena maladikija, dipangila dia ku bukole ne dipanga ditabuja mu malu onso. Bavua bena nkristo kadi bikale ne dianyisha anu dikese dia butumbi bua dibikidibua diabu.” Mmunyi muvua bena nkristo bela manyi mua kufika ku nsombelu wa nunku? Dikonkonona dia bimue bitupa bia mukanda uvua Paulo mutumine bena Ebelu (mufunda bu mu 61 B.B.) didi dituambuluisha bua kuandamuna lukonko alu. Dikonkonona dia nunku nedituambuluishe tuetu bonso lelu’eu bua kuepuka didina mu nsombelu wa mu nyuma wa muomumue wa butekete.

6. Ng’amue mashilangana kayi adiku pankatshi pa ntendelelu muashila pa Mikenji ya Mozese ne ntendelelu muashila pa ditabuja mu Yezu Kristo?

⁶ Bena nkristo bena Ebelu bavua bafumine mu Buena-Yuda, ndongoluelu uvua wamba muvuaye utumikila Mikenji ivua Yehowa mufile ku butuangaji bua Mozese. Mikenji ayi idi imueneka mitungunuke ne kuikala ilengelela bena nkristo ba bungi bena Yuda, pamu’apa bualu munkatshi mua siekele mivule, amu yoyi eyi ke ivua mushindu umuepele wa kusemena kudi Yehowa, ne ivua ndongoluelu wa ntendelelu uvua ukemesha, muikale ne buakuidi, milambu ya pa tshibidilu, ne ntempelo wa mu Yeruzaleme muende lumu pa buloba bujima. Buena-nkristo mbushilangane. Budi bulomba lumonu lua mu nyuma, bu lua Mozese, ‘wakatangila [“ku difutshibua,” NW] dia difutu [ditshivua kumpala]’ ne ‘wakatantamana bu [uvua] utangila yeye udi kayi umueneka ku mêsu.’ (Ebelu 11:26, 27) Mbimueneke se: bena nkristo bavule bena Yuda bavua bapangile lumonu lua mu nyuma lua nunku. Bavua bikale bazobela pamutu pa kunyema lubilu mu mushindu udi ne tshipatshila.

7. Mmunyi mudi ndongoluelu eu mutudi bafumine mua kuikala ne buenzeji pa mushindu utudi tunyema lubilu bua kupeta muoyo?

⁷ Kudiku nsombelu wa muomumue lelu’eu anyi? Bushuwa, malu kaena menemene a muomumue. Nansha nanku, bena nkristo badi bafumina mu ndongoluelu wa malu udi uditumbisha bikole. Bulongolodi ebu budi bufila mpunga ya kupetela masanka, kadi anu pine apu, budi buambika bantu majitu manene. Kusakidila apu, bavule ba kutudi badi mu matunga mudi mmuenenu wa diela mpata mutangalake ne mudi bantu bikale ne mmuenenu wa budisui, wa meme-diambedi. Bituadilekelela ku buenzeji bua ndongoluelu wa nunku, ‘mêsu a mu mitshima yetu’ adi mua kuteketa bipepele. (Efeso 1:18) Mmunyi mutuanyema bimpe lubilu bua kupeta muoyo bituikala katutshiyi kabidi tusunguluja bimpe kutudi tuya?

8. Ng’imue mishindu kayi idi Buena-nkristo buikale bupite ntendelelu muashila pa Mikenji?

⁸ Bua kumona mua kusonsola bena nkristo bena Yuda, Paulo wakabavuluija mudi ndongoluelu wa Buena-nkristo mupite Mikenji ya Mozese. Bushuwa, pavua Izalele wa ku mubidi muikale tshisamba tshia Yehowa muinshi mua Mikenji, Yehowa uvua wakula natshi ku butuangaji bua baprofete benzeja ku spiritu. Kadi, anu bu mudi Paulo wamba, lelu’eu udi wakula “ku diambuluisha dia Muana, udiye muteke mupianyi wa bintu bionso, ne ku butuangaji buende wakenza ndongoluelu ya malu.” (Ebelu 1:2, NW) Kabidi, Yezu mmunene kupita bakalenge ‘bakuende’ bonso ba mu mulongo wa Davidi. Mmutambe nansha banjelu bine.​—Ebelu 1:5, 6, 9.

9. Anu bu bena nkristo bena Yuda ba mu matuku a Paulo, bua tshinyi tudi ne bua kuteya “ntema mipite ya pa tshibidilu” ku bidi Yehowa wamba?

⁹ Pa nanku, Paulo wakabela bena nkristo bena Yuda ne: “Bidi bikengela bua tuetu tuteye ntema mipite ya pa tshibidilu ku malu atudi bumvue, bua katupambuki nansha.” (Ebelu 2:1, NW) Nansha muvua dilonga malu adi atangila Kristo dikale dibenesha dilenga, bivua bilomba malu a bungi. Bavua ne bua kuteya ntema mikole ku Dîyi dia Nzambi bua kujikila buenzeji bua nsangilu wa bena Yuda uvua mubanyunguluke. Tuetu petu tudi ne bua kuteya “ntema mipite ya pa tshibidilu” ku bidi Yehowa wamba pa kumona dimuangalaka dia malu a bulongolodi ebu adi kumpala kuetu dîba dionso. Ebi bidi biumvuija dikolesha bibidilu bimpe bia dilonga ne dilama programe muimpe wa dibala dia Bible. Anu mudi Paulo wamba pashishe mu mukanda wende mufundila bena Ebelu, bidi kabidi biumvuija dikala pa tshibidilu mu bisangilu ne mu dimanyisha ditabuja dietu kudi bakuabu. (Ebelu 10:23-25) Mudimu wa nunku neutuambuluishe bua kushala batabale mu nyuma bua katujimiji ditekemena dietu dia butumbi. Bituuja bieledi bietu bia lungenyi ne ngenyi ya Yehowa, tshintu nansha tshimue tshidi bulongolodi ebu mua kutuenzela katshiakutupita bukole anyi kutuponesha.​—Musambu 1:1-3; Nsumuinu 3:1-6.

“Ikalayi nukoleshangana ku muoyo”

10. (a) Ntshinyi tshidi mua kuenzekela muntu udi kayi uteya ntema mipite ya pa tshibidilu ku Dîyi dia Yehowa? (b) Mmunyi mutudi mua ‘kuikala tukoleshangana ku muoyo’?

¹⁰ Bituapanga kuteya ntema mikole ku malu a mu nyuma, malaya a Nzambi adi bushuwa mua kufika ku dimueneka bu a patupu. Ebi biakenzeka nansha mu siekele wa kumpala pavua bisumbu bikale bienza mu ka-bujima ne bena nkristo bela manyi ne bamue ba ku bapostolo batshikale ne muoyo. Paulo wakadimuija bena Ebelu ne: “Bana betu nuadimuka; munkatshi muenu kamuikadi muena muoyo mubi, mubule ditaba, mufuane mua kulamuka kudi [“Nzambi,” NW] wa muoyo. Kadi ikalayi nukoleshangana ku muoyo dituku dionso bu mutshidi lelu ewu ulunguluka, bua muntu wa kunudi nansha umue kapapishi muoyo wende, kabamudingi kudi bubi.” (Bena Hebreyi 3:12, 13, MMM) Tshiambilu tshia Paulo tshia se: “nuadimuka” tshidi tshizangika mudibi bikengela kuikala batabale. Njiwu idiku! Dibula ditabuja​—“bubi”—​didi mua kukola mu mitshima yetu, ne tudi mua kulua kulamuka kudi Nzambi pamutu pa kusemena kudiye. (Yakobo 4:8) Paulo udi utuvuluija bua ‘tuikale tukoleshangana ku muoyo.’ Tudi tukengela luya lua nsangilu wa buena-muntu. ‘Udi udipandulula kudi banga bantu udi ukeba anu bualu budiye musue, ne udi . . . upidia meji makane.’ (Nsumuinu 18:1) Dikengela dia nsangilu wa nunku didi disaka bena nkristo lelu’eu bua bikale babuela pa tshibidilu mu bisangilu bia tshisumbu, mu mpuilu mikese ne minene.

11, 12. Bua tshinyi katuena ne bua kusanka bua dikala patupu ne dimanya dia malongesha a Buena-nkristo a nshindamenu?

¹¹ Pashishe mu mukanda wende, Paulo udi ufila mubelu mukuabu eu wa mushinga mukole: “Matuku bungi nenku, nuenu se mbavua mua kuikala balongeshi banene, kadi nutshidi nukengela bua banulongeshe tshiakabidi malu a ntuadijilu a diyi dia [“Nzambi,” NW]; nutshidi nukengela kabidi bua kunua mabele pa mutu pa kudia biakudia bikole. . . . Tshiakudia tshikole tshidi bua bakulumpe; bobo ke bakadi ne lungenyi lushindame lua bumuntu, bibidile mua kusunguluja malu mempe ne mabi.” (Bena Hebreyi 5:12-14, MMM) Mbimueneke se: bamue bena nkristo bena Yuda bakapangila bua kuya kumpala mu lumvu. Bavua ne lujoko bua kuitaba butoke bukolesha buvua butangila Mikenji ne ditengula. (Bienzedi 15:27-29; Galatia 2:11-14; 6:12, 13) Bamue batshivua mua kuikala banyisha bilele bia kale bu mudi Nsabatu wa ku lumingu ne Dituku dia Dibuikidila dia mukukuku dia ku tshidimu.​—Kolosai 2:16, 17; Ebelu 9:1-14.

¹² Bua nanku, Paulo udi wamba ne: “Mpindieu utukadi bashiye malongesha a ntuadijilu adi atangila Kristo, tuyayi anu kumpala batangile ku dikola.” (Ebelu 6:1, NW) Munyemi wa lubilu ku makasa udi uteya ntema mikole ku ndilu wende mmutambe kukumbana bua kutantamana mu dinyema lubilu lua mutantshi mule ne lua dipungi divule. Bia muomumue, muena nkristo udi uteya ntema mikole ku didia dia mu nyuma​—kayi ushikila anu ku ‘malongesha a ntuadijilu’ a nshindamenu—​neikale mutambe kukumbana bua kushala mu lubilu elu ne kulujikija. (Fuanyikija ne 2 Timote 4:7.) Ebi bidi biumvuija kukolesha dijinga mu ‘butshiame ne bule ne butumbuke ne buondoke’ bua bulelela, ne kuya nenku kumpala batangile ku dikola.​—Bena Efeze 3:18, MMM.

“Nudi nukengela ditantamana”

13. Mmunyi muvua bena nkristo bena Ebelu baleje ditabuja diabu mu bikondo bia kale?

¹³ Mu tshikondo tshiakalonda diakamue panyima pa Pentekoste wa 33 B.B., bena nkristo bena Yuda bakashala bashindame nansha muvuaku buluishi bukole. (Bienzedi 8:1) Pamu’apa Paulo uvua ne bualu ebu mu lungenyi pakafundaye ne: ‘Nuvuluke matuku a diambedi munkatshi muawu munuakatantamana mu diluangana dikole dia mu makenga, panuakamana kutokeshibua mu munya.’ (Ebelu 10:32) Ditantamana dia nunku dia lulamatu diakaleja dinanga diabu bua Nzambi ne diakabapesha budikadidi bua diakula kumpala kuende. (1 Yone 4:17) Paulo udi ubabela bua kababuimanshi bua dibula ditabuja. Udi ubambila ne: “Nudi nukengela ditantamana, bua se: kunyima kua nuenu bamane kuenza disua dia Nzambi, numone mua kupeta dikumbana dia dilaya. Bualu anu ‘mutantshi muipi menemene,’ ne ‘yeye udi ulua neafike ne kakujingakana.’”​—Ebelu 10:35-37, NW.

14. Mmalu kayi adi ne bua kutuambuluisha bua kutantamana nansha panyima pa bidimu bivule mu disadila Yehowa?

¹⁴ Bidi munyi buetu tuetu lelu’eu? Bavule ba kutudi tuvua ne lukunukunu patuakamanya bua musangu wa kumpala bulelela bua Buena-nkristo. Tutshidi ne lukunukunu alu anyi? Peshi tudi ‘balekele dinanga dietu dia kumudilu’? (Buakabuluibua 2:4) Tudi batekeshe, pamu’apa batekete kakese mu maboko anyi bapungile bua kuindila Armagedone anyi? Anji kuimana ne utangile bimpe. Bulelela mbulenga anu bu muvuabu kumpala. Yezu utshidi Mukalenge wetu wa mu diulu. Tutshidi batekemene muoyo wa kashidi mu buloba bua mparadizu, ne tutshidi mu malanda etu ne Yehowa. Ne kupu muoyo ne: “Yeye udi ulua neafike ne kakujingakana.”

15. Anu bu Yezu, mmunyi mudi bamue bena nkristo batantamene dikengeshibua dikole?

¹⁵ Pa nanku, mêyi a Paulo mafunda mu Ebelu 12:1, 2 (NW) mmakanyine menemene: “Tumbushayi petu bujitu buonso ne mpekatu [dibula ditabuja] udi utujingakaja bipepele, ne tunyemayi ne ditantamana lubilu ludi lututekela kumpala, eku bajoje Yezu, Musadidi Ntunga-mulongo ne Mupuangaji wa ditabuja dietu. Bua disanka divua dimutekela kumpala wakatantamena mutshi wa tshinyongopelu, kupetula bundu, e kusomba ku dia balume dia nkuasa wa bumfumu wa Nzambi.” Kudi malu a bungi adi basadidi ba Nzambi batantamene mu matuku aa a ku nshikidilu. Anu bu Yezu, uvua ne lulamatu too ne ku lufu lua tshinyangu, ne lulamatu luonso bamue ba ku bana betu balume ne bakaji mbatantamene dikengeshibua ditambe bukole​—tumponya tua maloko, kanyawu, dinyanga bakaji, nansha lufu. (1 Petelo 2:21) Mutshima wetu kawenaku uzabalala ne dinanga bua bualu buabu patudi tutangila muoyo-mutoke wabu anyi?

16, 17. (a) Nntatu kayi idi bena nkristo bavule ne bua kuluangana nayi bua ditabuja diabu? (b) Ndivuluka dia bualu kayi diatuambuluisha bua kutungunuka ne kunyema lubilu bua kupeta muoyo?

¹⁶ Kadi bua bavule, mêyi makuabu a Paulo adi ne dikuatshisha: “Mu mvita yenu ne bubi, kanuena banji kuluangana too ne padi mashi apueka.” (Bena Hebreyi 12:4, MMM) Nansha nanku, mu ndongoluelu eu, njila wa bulelela ki mmupepele bua yonso wa kutudi. Bamue badi bateketa mu mikolo bua “ditontolola . . . dia bantu babi” ku mudimu anyi mu tulasa, batantamena dibaseka anyi bakandamena dibasaka ku dienza mpekatu. (Ebelu 12:3) Ditetshibua dikole ndivingutule ku kakese ku kakese dipangadija dia bamue dia kulama mêyi-makulu matumbuke a Nzambi. (Ebelu 13:4, 5) Batontolodi mbanyange nkatshinkatshi wa mu nyuma wa bakuabu badi bateleja dimuangalaja diabu dia malu dia mulùngu. (Ebelu 13:9) Ntatu mifumine ku dishilangana dia bumuntu mmipangishe bakuabu disanka. Dinekesha mu dijikija lutetuku ne didiolola nditekeshe bamue bena nkristo. Ne bavule badi badiumvua bafinakaja kudi ntatu ya mu nsombelu wa mu ndongoluelu eu wa malu.

¹⁷ Bulelela, nsombelu yonso eyi ki mmienze “kuluangana too ne padi mashi apueka.” Ne imue nsombelu idi mua kuikala ifumina ku mapangadika mabi atudi tuetu bine tuangata. Kadi buonso buayi idi ikebela ditabuja dietu lutatu lunene. Ke bualu kayi tudi ne bua kutuishila dîsu dietu pa tshilejilu tshitumbuke tshia Yezu tshia ditantamana. Katupu muoyo nansha kakese mudi ditekemena dietu dikale ditambe bulenga. Katujimiji nansha kakese dituishibua dietu dia se: Yehowa “udi mufutshi wa badi bamukeba.” (Ebelu 11:6) Apu, netuikale ne makanda a mu nyuma bua kutungunuka ne kunyema lubilu bua kupeta muoyo.

Tudi mua kutantamana

18, 19. Mmalu kayi menzeke kale adi afila lungenyi lua se: bena nkristo bena Ebelu ba mu Yeruzaleme bakalonda mibelu ya Paulo mienzeja ku spiritu?

¹⁸ Mmunyi muakandamuna bena nkristo bena Yuda ku mukanda wa Paulo? Bidimu bu bisambombo bamane kufunda mukanda mutumina bena Ebelu, mvita yakabudika mu Yudeya. Mu 66 B.B., tshiluilu tshia bena Roma tshiakajingila Yeruzaleme, bua kukumbaja mêyi a Yezu a ne: “Panuamona tshimenga tshia Yeruzaleme tshijingila kudi biluilu bia mvita, numanye ne: kabutu katshio kadi pabuipi.” (Lukase 21:20, MMM) Kadi, bua diakalenga dia bena nkristo bàvuà mua kuikala mu Yeruzaleme tshikondo atshi, Yezu wakamba ne: “Diba adio, bantu bikala mu Yudeya banyeme, baye ku mikuna; bikala munda mua tshimenga bumuke, bikala mu mpata kabapinganyi mu tshimenga.” (Lukase 21:21, MMM) Nenku, mvita ne Roma yakatuala diteta: Bena nkristo abu bena Yuda bavua mua kulekela Yeruzaleme, nsangilu wa ntendelelu wa bena Yuda ne muaba uvua ntempelo wa butumbi anyi?

¹⁹ Mu tshimpitshimpi, ne kakuyi kabingila kamanyike, bena Roma bakumbuka. Pamu’apa bena Yuda bavua basue malu a Nzambi bakamona bualu ebu bu tshijadiki tshia se: Nzambi uvua ukuba tshimenga tshiabu tshinsantu. Kadi bivua munyi bua bena nkristo? Miyuki ya kale idi ituleja ne: bakanyema. Pashishe, mu 70 B.B., bena Roma bakapingana ne bakabutula Yeruzaleme butubutu ne dishipa bantu dikuate ne buôwa. “Dituku dia Yehowa” didianjila kumanyisha kudi Yoele diakafikila Yeruzaleme. Kadi bena nkristo ba lulamatu kabatshivuamu kabidi. ‘Bakasungidibua.’​—Yoele 2:30-32; Bienzedi 2:16-21.

20. Kumanya ne: “dituku dia Yehowa” dinene dikadi pabuipi kudi ne bua kutusaka mu njila kayi?

²⁰ Lelu’eu, tudi bamanye ne: “dituku [dikuabu] dia Yehowa” dinene dikadi pa kukuata ndongoluelu eu wa malu mujima. (Yoele 3:12-14) Katuena bamanye dîba dialua dituku adi. Kadi Dîyi dia Nzambi didi ditujadikila ne: nedilue bushuwa! Yehowa udi wamba ne: kadiakupanga kulua. (Habakuka 2:3; 2 Petelo 3:9, 10) Nenku, “tuteye ntema mipite ya pa tshibidilu ku malu atudi bumvue.” Tuepuke dibula ditabuja, “mpekatu udi utujingakaja bipepele.” Tupangadije bua kutantamana mudibi bilomba. Tuvuluke ne: bulongolodi bua mu diulu bua Yehowa bufuane ditempu dinene budi anu mu lubilu. Nebukumbaje tshipatshila tshiabu. Nenku tutungunukayi tuetu bonso ne katulekedi dinyema lubilu bua kupeta muoyo!

Udi muvuluke anyi?

◻ Ndilonda mubelu kayi uvua Paulo mupeshe bena Filipoi diatuambuluisha bua kutantamana mu dinyema lubilu bua kupeta muoyo?

◻ Ntshinyi tshiatuambuluisha bua kujikila nginyikilu wa bulongolodi ebu wa kutubueja mu ditanaja?

◻ Mmunyi mutudi mua kuambuluishangana bua kutantamana mu dinyema lubilu?

◻ Ng’amue malu kayi adi mua kutekesha lubilu lua muena nkristo?

◻ Mmunyi mudi tshilejilu tshia Yezu mua kutuambuluisha bua kutantamana?

[Tshimfuanyi mu mabeji 8, 9]

Anu bu banyemi, bena nkristo kabena ne bua kulekela bualu nansha bumue bubabueja mu ditanaja

[Tshimfuanyi mu dibeji 10]

Kakuena tshintu tshidi mua kupangisha ditempu dinene dia Yehowa dia mu diulu bua kadikumbaji dilongolola dia Nzambi