Tutungunukayi ne kuteka Bukalenge pa muaba wa kumpala
1 Bu mutu malu a mpetu atukolela ne makuabu malu atukuata, kuteka Bukalenge bua Nzambi pa muaba wa kumpala mu nsombelu wetu ne kutungunuka mushindu au ki mbualu bupepele to. Mmushindu kayi utudi mua kutungunuka ne kuteka Bukalenge pa muaba wa kumpala dîba didi ntatu imueneka? Ntshinyi tshitudi mua kuenza padibu batupesha mudimu udi mua kutupangisha bua kubuela mu bisangilu anyi ukondakaja mudimu wetu wa budimi? Nenku, bua malu aa Bukalenge bua Nzambi budi ne bua kuya pa muaba muibidi mu nsombelu wetu anyi?
2 Ditabuja dietu didi ne bua kuikala dishindame: Padi malu a nunku abueja ditabuja dietu mu diteta dikole, katupu muoyo dilaya dia Yehowa ne ditujadikila dia Yezu dia se: tuetu bikale tukeba diambedi Bukalenge, bushuwa Nzambi neatukuatshishe. (Mus. 37:25; Mat. 6:31-34) Malu a panu ne ntatu mikuabu bidi mua kubuitshidija wetu mmuenenu wa malu ne kutupangisha mua kuteka Bukalenge pa muaba wa kumpala menemene. Bamue mbalekele ditekemena dia kupeta mianzu ku midimu peshi dia kupeta mfranga ya bungi dilua ne mushinga wa bungi menemene kudibu. Kadi, anu bu Paulo, tudi ne bua kukeba bua kumanya tshidi ne mushinga menemene mu nsombelu wetu.—Filip. 3:7, 8.
3 Diakajilula amue malu didi mua kuambuluisha anyi? Mumanyishi mukuabu wakamba ne: “Muoyo wanyi mujima uvua anu ku mushinga umvua ngenda, dienda dia mishinga ke anyi malu amvua mutambe kunanga. Mvua mmona ne: mvua mua kuikala anu Ntemu nansha meme muikala mpitshisha dîba dianyi dia bungi mu malu anyi a bungenda-mushinga.” Kadi muoyo wa munda uvua anu misangu ne misangu umuambila ne: bidi bikengela kuenza bivule bua kusadila Yehowa. Panyima pa matuku, muanetu wa bakaji eu wakalua kulekela mishinga ayi ivua imupangisha bua kukola kuya kumpala mu nyuma. Pakaluaye kudifila ne muende muonso mu mudimu wa Bukalenge, wakafika ku diamba ne: “Ndi mmona se: nsombelu undi nende mpindieu udi usankisha Yehowa, tshindi muenze ke tshivua tshikengedibua kuenza.”
4 Bualu bua mushinga budi buakanyine kalumbandi mbua mudi bana betu ba bungi balekele midimu yabu, bashiye bintu bivua mua kubapetesha makuta a bungi, e kuvuija nsombelu wabu mupepele pashishe kudituabu mu mudimu wa ku dîba ne ku dîba. Ke tshidi bansonga, basadidi ba mudimu ne bakulu batshidi bajike badi babuela mu Kalasa ka Dilongesha Mudimu benze, ne mbapete masanka a mudimu mavule. Bu mudibu bidikija tshilejilu tshimpe tshitambe tshia Paulo, badi basanka ne bikese bidiku.—1 Kol. 6:6-8; Eb. 13:5.
5 Nansha mudi bakuabu bantu mua kutuseka bua wetu mushindu utudi tumona malu a mu nsombelu, Yehowa yeye udi utubenesha. (1 Kol. 1:26-31) Kabienaku bitukankamija bua kumanya ne: neakuate netu mudimu muonso muasuaye ne neatuambuluishe bua kukumbaja mudimu wende anyi? Mushindu utudi nawu mpindieu wa kumanyisha Bukalenge bua Nzambi bumana kuteka mu diulu katuakuupeta kabidi to. Nunku, mpindieu ke dîba dia kutungunuka ne kuteka Bukalenge pa muaba wa kumpala mu nsombelu wetu.