Mudimu wa dimanyisha Bukalenge udi wambuluisha bua kupandisha mioyo ya bantu!

¹ Mmudimu wa mushinga mukole menemene udi wenda wenzeka pa buloba mu tshikondo etshi. Yehowa Nzambi, Yezu Kristo ne misumba ya banjelu, ntema yabu bonso idi anu ku mudimu eu. Mmudimu kayi au ne bua tshinyi udi ne mushinga? Mmudimu wa kuyisha Bukalenge bua Nzambi udi wambuluisha bua kupandisha mioyo ya bantu!​—Lomo 1:16; 10:13, 14.

² Bamue bantu badi mua kumona ne: mushindu mulenga wa kuambuluisha bantu netu mpa kudifila mu dilengeja dia nsombelu wa muaba utudi basombele. Ba bungi lelu badi benza muabu muonso bua kukeba ditalala, kuondopa babedi anyi kuakaja malu a mpetu. Kadi ntshinyi tshidi mua kuambuluisha bantu bimpe bia menemene?

³ Mudimu wa mushinga mukole: Mukenji wa Bukalenge nkayawu udi ufila diumvuija dia tshipatshila tshia muoyo, tshikebeshi tshia makenga a bantu ne kabidi umvuija ditekemena dimuepele dia kueyemena bua matuku adi kumpala. Lumu luimpe ludi luambuluisha bantu bua kuluabu balunda ba Yehowa ne nanku kupeta “ditalala dia Nzambi didi ditamba dijingulula dionso dia bantu.” (Filip. 4:7) Anu mukenji wa Bukalenge ke udi ufila mibelu miakanyine bua kuambuluisha bantu bua kutshimuna ntatu ya mu nsombelu mpindieu ne kuleja tshia kuenza bua kukubibua ku kabutu ka bantu babi mu matuku adi kumpala eku. (1 Yone 2:17) Kabienaku biakanyine bua tuetu kudifila muetu muonso mu mudimu wa diyisha Bukalenge anyi?

⁴ Tshilejilu: Mmushindu kayi mutambe bulenga udi ukengela kuenza bua kuambuluisha bena musoko kampanda badi balale butuku padi eku nkila anyi dibula diela bua kulama musoko bua mâyi kaabuedimu diamba kupuka ne mâyi akeba kusapalala? Mbimpe kutuadija kutuwa mâyi aa bua kuapingaja dia muamua mua dibula edi anyi? Kutuadija kulengeja musoko ukadi pa kupuka anyi? Tòo! Mbimpe kubisha bena musoko, kubamanyisha bua njiwu ikadi pa kuenzeka ne kubambuluisha bua kunyema! Bantu badi balale mu nyuma lelu badi pabu mu njiwu mikole mitambe. (Luka 21:34-36) Bu mukadi bulongolodi ebu ne bua kubutudibua mu katupa kîpi emu, nunku tuenzayi muetu muonso bua kuyisha ne tshisumi bantu bonso batudi mua kupeta!​—2 Tim. 4:2; 2 Pet. 3:11, 12.

⁵ Tungunuka ne mudimu: Tukebayi mishindu itudi mua kupetangana ne bantu ba bungi ba muoyo mulenga bua kubambila lumu luimpe miaba yonso itudi mua kubapetela, kumabu, mu njila, ku telefone ta mu mpukapuka. Mudimu udi Yehowa mutupeshe eu udi ne mushinga mutambe yonso itudi mua kuenza. Bituawenza ne tshisumi, apu ‘netudisungile tuetu bine ne buobu kabidi badi bumvua mêyi etu.’​—1 Tim. 4:16.