Utu wenza mudimu ne broshire wa Utulomba bua kutuadija dilonga Bible ne bantu anyi?

¹ Utu mumanye ne: paudi pa tshibidilu ne mu mushindu mulongolola uyukila ne muntu pa Bible (nansha mu minite mikese patupu), ne muntu au wanyisha bulelela ne nukonkonone umue wa ku mikanda ya dilonga nayi ne bantu mu buambi, udi ulombola dilonga dia Bible anyi? Eyowa, ndilonga dia Bible nansha diodi dikala dienzekela ku nzubu anyi ku telefone. Bua tshinyi kubengaku kudienzeja mu ngondo muitanu ne muisambombo bua kutuadija dilonga dia nunku ne broshire wa Utulomba?

² Dilongolola bua kufika ku bipeta bilenga: Paudi upesha muntu broshire wa Utulomba, wikale mumanye bimpe bualu bunuayikidilapu. Biwikala upinganyina muntu, ela meji ku muyiki unuvua bayukile musangu mushale. Udikonke ne: ‘Mbikoso kayi bia mu broshire bindi mua kutamba kuakuila bua kukolesha diyuki ne kufika ne ku dilonga dia Bible?’ Paudi uyisha ku nzubu ne ku nzubu, sungula biena-bualu bikala mua kusankisha nsonga, muntu mukulakaje, muntu mulume anyi mukaji. Bulula mu dibeji didi ne tshikebelu tshia broshire usungule tshiena-bualu tshidi tshikoka ntema ya muntu. Wewe mumane kusungula tshidi tshiakanyine, utshiambulule misangu ne misangu. Eu ng’umue mushindu udi mua kukuambuluisha bua kufika ku bipeta bilenga.

³ Tshisakidila tshia Mudimu wetu wa Bukalenge wa Tshiongo 2002 tshiakatupesha “Ngenyi [muanda-mukulu] ya kuenza nayi mudimu bua kufila broshire wa Utulomba.” Mu kazubu ka “Mua kuya ne malu buludiludi” mudi mushindu wa kuenza mudimu ne broshire bua kutuadija dilonga. Udi mua kuakaja lungenyi lua kumpala ludimu mu mushindu udi ulonda eu:

▪ “Udiku mumanye ne: mu minite mikese patupu udi mua kupeta diandamuna dia lukonko lua mushinga mukole lua mu Bible anyi? Tshilejilu, bua tshinyi kudi bitendelelu bia bungi lelu bidi bidiamba mudibi bia bena Kristo? Ukadiku mudiele lukonko elu anyi?” Padi muntu wandamuna, bulula mu dilonga dia 13 ne nuyukile pa tshikoso tshia kumpala ne tshibidi. Pikalaku dîba, bala mvese umue anyi ibidi ne nuyukidilapu. Pashishe ubale lukonko lua ndekelu kulu kua dibeji ne wambe ne: “Tshitupa tshidi tshishale tshia dilonga tshidi tshiumvuija bimanyinu bitanu bia ntendelelu mulelela. Nengikale ne disanka bua kupingana kabidi ne kuyukila nebe pa tshitupa etshi.”

⁴ Usuminyine: Udiakaje bua tshikondo tshionso tshidi tshimueneka wikala mua kuleja muntu mushindu wa kulonga Bible ne broshire wa Utulomba. Lomba Yehowa akubeneshe. (Mat. 21:22) Paudi usuminyina ne didienzeja, udi mua kupeta disanka dia kuambuluisha muntu kampanda bua kuitabaye lumu luimpe!