Tuleje kanemu bua muaba wa ntendelelu wa Yehowa

¹ Patudi babikila kumbelu kua muntu, tutu tuleja kanemu bua bintu biende mu diepuka bua kubinyanga. Katutu kabidi tunyangakaja bikadilu bilenga bia dîku edi. Ebi kabienaku kabidi ne bua kutamba kumueneka patudi babikila ba Yehowa anyi? Tudi ne bua kumanya mushindu wa kuikala mu nzubu muende. (Mus. 15:1; 1 Tim. 3:15) Nansha bisangilu bietu bienzekela mu Nzubu wa Bukalenge, mu dîku kampanda anyi mu nzubu kansanga wa bantu bonso, bavule ba kutudi batu baleja misangu yonso kanemu kadi kakanyine nzubu wa Yehowa bua muaba wetu wa ntendelelu, bualu ‘butumbi buende budi pa mutu pa buloba ne diulu.’​—Mus. 148:13.

² Bamue bana betu batu baleja dipanga kanemu dîba dia bisangilu; badi benza mitoyi anyi benza malu anu bu se: malongesha adibu bafila kaena ne mushinga. Bamue bantu bakulumpe batu batungunuka ne mayuki a tshianana mu tshibueledi, mu lutanda lua diakidilangana, ku nkumba anyi pambelu pa Nzubu wa Bukalenge eku bisangilu bimane kutuadija. Padibu bapesha muana bujitu bua kukuba muakunyende, bitu bienzeka ne: bonso babidi batuadije kunaya ne kabayi batamba kulonda programe. Bakamona bamue bana banaya pambelu pa Nzubu wa Bukalenge panyima pa bisangilu, benza mutoyi wa bungi ne benza nansha manaya bu a karaté munkatshi muabu. Imue misangu batu batatshisha bena mutumba ne mutoyi anyi nansha bana betu munda mua Nzubu wa Bukalenge, babanda ku tshiakuidi anyi banyemakana mbilu munkatshi mua bibasa ne basakila bana betu bakulakaje.

³ Tulekele dipanga kuikala ne kanemu: Bitualama mu lungenyi bunême ne ngikadilu wa tshijila wa ntendelelu wetu, bushuwa katuakujinga bua kukuatshisha bateleji ditanaji mu dinungana, mu didia, mu ditshiankunya bazoka, mu divungakaja mabeji, mu diya ne dialukila tshianana ku nkumba peshi mu difika misangu yonso mu bisangilu panyima pa dîba. Baledi bena kanemu ne ba dianyisha badi bakandika bana babu bua kabashiyi bukoya pa tapi wa panshi, ku bilamba biadija ku nkuasa anyi pa mesa, ku bimanu bia Nzubu wa Bukalenge ne bia nzubu ututu tuenzela dilonga dia mukanda. Ku lukuabu luseke, tudi bamanye bonso ne: ngikadilu ya bundu, biakulakula, mineku ya bundu, nansha bia mushindu kayi, kabiena ne muaba nansha kakese mu bisangilu bietu.​—Ef. 5:4.

⁴ Bitualama misangu yonso mu lungenyi tshipatshila tshia bisangilu bietu bia buena-nkristo, bana betu balela ne tuetu bine netuleje bushuwa kanemu kadi kakanyine bua ntendelelu wa Yehowa muaba utudi ‘basungule bua kuimana.’​—Mus. 84:10.