TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • wt nshap. 20 dib. 175-183
  • Kupu muoyo bua dituku dia Yehowa to

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Kupu muoyo bua dituku dia Yehowa to
  • Tutendelelayi Nzambi umuepele mulelela
  • Tumitu tua bualu
  • Bintu bia muomumue
  • Tuma lungenyi luebe luonso ku tshimanyinu
  • Ditapulula dia bantu
  • Ntshinyi tshienzeka mu matuku adi kumpala?
  • Tudi mu ‘matuku a ku nshikidilu’ anyi?
    Bible utu ulongesha tshinyi menemene?
  • Bapostolo badi balomba tshimanyinu
    Yezu udi njila ne bulelela ne muoyo
  • ‘Ikalayi badimuke’
    Tshibumba tshia Nsentedi tshidi tshimanyisha Bukalenge bua Yehowa—2009
Tutendelelayi Nzambi umuepele mulelela
wt nshap. 20 dib. 175-183

Nshapita Wa Makumi Abidi

Kupu muoyo bua dituku dia Yehowa to

1. Pawakamanya bua musangu wa kumpala ne: disungidibua ku tunyinganyinga tua mu ndongoluelu wa malu dikavua pabuipi, wakumvua munyi?

BUMUE bua ku malu a kumpala awakamanyina mu Bible buvua bua se: dijinga dia Yehowa ndia buloba bujima bulue mparadizu. Mu buloba bupiabupia abu kamuakuikala kabidi mvita, buenzavi, bupele, masama, makenga ne lufu nansha. Too ne bafue nebabike ku lufu. Aa mmalu malenga a dikema atudi batekemene! Dikalaku didi kadiyi dimueneka dia Kristo bu Mukalenge ukadi mutuadije kukokesha kubangila mu tshidimu tshia 1914 ke didi dijadika ne: malu onso aa akadi masemene pabuipi, ne bituadijile mu tshikondo atshi, tukadi babuele mu matuku a nshikidilu wa tshikondo tshibi etshi. Ku ndekelu kua matuku a ku nshikidilu aa, Yehowa neabutule ndongoluelu wa malu eu ne neapingaje nsombelu mupiamupia udiye mulaye!

2. “Dituku dia [Yehowa]” ntshinyi?

2 Bible udi ubikila tshikondo tshia kabutu tshilualua atshi ne: “dituku dia [Yehowa].” (2 Petelo 3:10) “Ndituku dia tshiji tshia Yehowa” tshiakuata bulongolodi bujima bua Satana. (Sefanya 2:3) Nedifike ku tshibungubungu tshiadi mu ‘mvita ya dituku dinene dia Nzambi Wa-Bukole-Buonso, idibu babikila mu muakulu wa buena-Ebelu ne: Ha-Magido [Armagedone],’ muikalabu ne bua kushipa ‘bakalenge ba pa buloba buonso.’ (Buakabuluibua 16:14, 16) Nsombelu webe udiku uleja ne: udi mujadike se: “dituku dia Yehowa” edi didi pabuipi anyi?—Sefanya 1:14-18; Yelemiya 25:33.

3. (a) Dituku dia Yehowa nedilue tshikondo kayi? (b) Bua tshinyi bidi bimpe bua mudi Yehowa kayi mutumanyishe ‘dituku adi ne dîba adi’?

3 Bible kêna utumanyisha dituku menemene dialua Yezu Kristo bu Mubutudi udi Yehowa utuma bua kubutula ndongoluelu wa malu a panu wa Satana to. Yezu wakamba ne: ‘Kadi bua dituku adi ne pa dîba adi kakuena muntu udi mumanye, banjelo menemene ba mu diulu kabena bamanye, Muana kêna mumanye, anu Tatu ngudi mumanye.’ (Mâko 13:32) Bantu badi kabayi banange Yehowa bulelela, meji abu neikale a kuanji kusemeja dituku diende kule mu lungenyi luabu ne kufuila anu mu dienza malu abu a panu. Kadi badi banange Yehowa bushuwa nebamukuatshile mudimu ne muoyo wabu mujima, nansha nshikidilu wa malu mabi a panu aa mua kulua tshikondo kayi.—Musambu 37:4; 1 Yone 5:3.

4. Ndidimuija kayi diakafila Yezu?

4 Yezu wakadimuija bantu bavua banange Yehowa ne: “Dimukayi, nushale batabale, bualu bua kanuena bamanye pakumbana tshikondo.” (Mâko 13:33-37, MML) Udi utubela petu bua katulekedi didia ne dinua peshi “tunyinganyinga tua mu nsombelu” bikoka ntema yetu yonso, tufika too ne ku dipanga bua kutuishila mêsu pa tshidi malu adi enzeka tshikondo etshi umvuija.—Luka 21:34-36; Matayo 24:37-42.

5. Petelo wakumvuija ne: dituku dia Yehowa nedituale tshinyi?

5 Petelo udi utubela kabidi bua katupu muoyo bua ‘dilua dia dituku dia Nzambi; bua bualu buadi diulu diakukuata kapia nedijimine ne bintu bidimu nebienguluke ne kapia kakole.’ Makalenge a bantu onso anyi “diulu,” nebaabutule anu bu muabutulabu bantu babi bonso peshi “buloba” ne “bintu bidimu,” mmumue ne: ngenyi ne malu mabi a mu ndongoluelu wa malu mubi eu, bu mudi ngikadilu wabu wa dikeba budishikaminyi ne diela Nzambi nyima ne nsombelu wabu wa tshiendenda ne dikeba dia bubanji. ‘Diulu dipiadipia [anyi Bukalenge bua Nzambi bua mu diulu] ne buloba bupiabupia [anyi nsangilu wa bantu mupiamupia pa buloba]’ muikala “buakane buikalemu” nebipingane pa muaba wa bintu ebi. (2 Petelo 3:10-13) Malu anyukula buloba bujima aa neatuadije mu tshimpitshimpi pa dîba didi bantu kabayi belele nansha meji.—Matayo 24:44.

Tuma lungenyi luebe luonso ku tshimanyinu

6. (a) Mmushindu kayi uvua diandamuna dia Yezu dia lukonko lua bayidi bende dikumbanyine nshikidilu wa malu a bena Yuda? (b) Mbitupa kayi bia diandamuna dia Yezu bidi bikoka ntema ku malu adi amueneka kubangila mu 1914 too ne lelu?

6 Pa kumona mushindu udi bikondo bitudi ebi, mbimpe tuetu kukeba mua kujingulula malu kabukabu a tshimanyinu tshia matuku a ku nshikidilu aa: ‘nshikidilu wa tshikondo etshi.’ Ikala mumanye ne: pavua Yezu muandamune lukonko lua bayidi bende ludi mu Matayo 24:3, amue a ku malu akumvuijaye mu mvese 4 too ne wa 22 akakumbanyina kakese bena Yuda pankatshi pa tshidimu tshia 33 ne tshia 70 B.B. Kadi mulayi eu wakakumbana mu bunene buawu mu tshikondo tshiakatuadija mu 1914, tshikondo tshia ‘[dikalaku] dia Kristo ne tshia nshikidilu wa tshikondo etshi.’ Matayo 24:23-28 udi uleja tshivua ne bua kuenzeka biangatshile mu 70 B.B. too ne ku tshikondo tshia dikalaku dia Kristo. Malu makuabu adibu bumvuije mu Matayo 24:29–25:46 adi enda akumbana mu tshikondo tshia ku nshikidilu etshi.

7. (a) Bua tshinyi tuetu mene tudi ne bua kuikala bajingulule mushindu udi malu adi enzeka lelu’eu akumbaja tshimanyinu? (b) Andamuna nkonko idi ilonda tshikoso etshi bua kuleja mudi tshimanyinu tshituadije kukumbana katshia mu 1914.

7 Tuetu mene tudi ne bua kuikala batabale bua kumona mua kujingulula mianda ne bienzedi bia bantu bidi bikumbaja tshimanyinu etshi. Dilamakaja malu aa ku milayi ya mu Bible nedituambuluishe bua katuyi kupua muoyo bua dituku dia Yehowa. Nedituambuluishe kabidi bua kuakula ne dishindika dionso patudi tumanyisha bakuabu ne: dituku adi dikadi disemene pabuipi menemene. (Yeshaya 61:1, 2) Ne bipatshila ebi mu lungenyi, mpindieu tuandamunayi nkonko idi ilonda eyi idi itangila bimue bitupa bia tshimanyinu bidibu baleje mu Matayo 24:7 ne mu Luka 21:10, 11.

Mmu mushindu kayi munene uvua bualu buvuabu bamanyishe ne: ‘tshisamba tshikuabu netshiluangane ne tshinga, bukalenge bukuabu nebuluangane ne bunga’ bukumbane kubangila mu 1914? Pa bidi bitangila mvita, mmalu kayi adi menzeke katshia ku tshikondo atshi?

Mu 1918, ndisama kayi diakashipa bantu ba bungi kupita bavua bafue mu Mvita ya Kumpala ya Buloba bujima? Nansha mudi bantu ne mamanya a bungi mu malu a diondapangana, mmasama kayi atshidi amu ashipa miliyo ne miliyo ya bantu?

Mmushindu kayi udi biyole bia nzala bikengeshe bantu pa buloba nansha mudibu bavudije mamanya mu bidimu bia 1900?

Ntshinyi tshidi tshikutuisha ne: 2 Timote 3:1-5, 13 kêna umvuija nsombelu mushindu utuye muikale pa tshibidilu to, kadi udi umvuija mudi malu mabi malue kuvula mu bantu patudi tuenda tusemena ku tshibungubungu tshia matuku a ku nshikidilu apa?

Ditapulula dia bantu

8. (a) Mbualu kayi bukuabu budibu bumvuije mu Matayo 13:24-30, 36-43 buvua Yezu mulamakaje ne nshikidilu wa tshikondo etshi? (b) Lusumuinu lua Yezu ludi lumvuija tshinyi?

8 Kudi kabidi malu makuabu manene avua Yezu mulamakaje ne nshikidilu wa tshikondo etshi. Bumue bua ku malu au nditapulula dia ‘bana ba mu bukalenge’ ne “bana ba mubi.” Yezu wakalonda bualu ebu mu mufuanu wende wa budimi bua mponda muvua muena lukuna mulue kukuna lupela. Mu lusumuinu luende elu, “mponda” idi ileja bena Kristo bela manyi. ‘Lupela’ ludi bantu badi badiamba mudibu bena Kristo kadi bamueneka bikale “bana ba mubi,” bualu mbalamate malu a bena panu badi Diabolo ukokesha. Mbabatapulule ne “bana ba bukalenge [bua Nzambi]” ne mbabafunde tshimanyinu bua kubabutulabu. (Matayo 13:24-30, 36-43) Ditapulula edi dikadi dienzeke anyi?

9. (a) Kunyima kua Mvita ya Kumpala ya Buloba bujima, nditapulula dinene kayi dia bonso bavua badiamba muvuabu bena Kristo diakenzeka? (b) Mmunyi muvua bena Kristo bela manyi baleje se: bavua basadidi balelela ba Bukalenge?

9 Kunyima kua Mvita ya Kumpala ya Buloba bujima, kuvua ditapulula mu bitupa bibidi dia bantu bonso bavua badiamba muvuabu bena Kristo: (1) Balombodi ba Bukua-Buena-Kristo ne bayidi babu, bavua baleje patoke ne: bavua mu nyima mua Nsangilu wa Bisamba (udi mpindieu Bulongolodi bua Matunga Masanga) eku bashale banange bikole matunga abu ne (2) bena Kristo balelela ba mu tshikondo tshia panyima pa mvita atshi, bavua batue muabu muonso Bukalenge bua Masiya wa Nzambi nyama ku mikolo, babenge kutua bisamba bia panu nyama ku mikolo. (Yone 17:16) Buobu aba bakaleja ne: badi basadidi balelela ba Bukalenge bua Nzambi mu dienza diabu dia mudimu wa diyisha “lumu luimpe elu lua bukelenge” pa buloba bujima. (Matayo 24:14) Bakafika ku bipeta kayi?

10. Tshipeta tshia kumpala tshia mudimu wa diyisha Bukalenge tshivua tshinyi?

10 Tshia kumpala, kuakenzeka disangisha dia bashadile ba ku bela manyi a nyuma wa Nzambi, badi ne ditekemena dia kuikala pamue ne Kristo mu Bukalenge bua mu diulu. Nansha muvuabu batangalake mu bisamba, bakabasangisha mu buobumue mu bulongolodi bumue. Dituibua tshimanyinu dia bela manyi aba dikadi pa kujika.—Buakabuluibua 7:3, 4.

11. (a) Mmudimu kayi wa disangisha utshidi mutungunuke, ne udi upetangana ne mulayi kayi? (b) Dikumbana dia mulayi eu didi diumvuija tshinyi?

11 Pashishe, ku bulombodi bua Kristo, bakatuadija kusangisha ‘[musumba munene anyi] tshisumbu tshinene tshia bantu, munkatshi mua ditunga dionso, ne munkatshi mua bisamba bionso, ne bantu bonso, ne miakulu yonso.’ Buobu aba ke badi bikale “mikoko mikuabo” yalua kupanduka ku “dikenga dinene” bua kubuela mu buloba bupiabupia bua Nzambi. (Buakabuluibua 7:9, 14; Yone 10:16) Mudimu eu wa diyisha Bukalenge bua Nzambi bangabanga ne nshikidilu kuluaye mmutungunuke too ne mu tshikondo tshietu etshi. Musumba munene wa mikoko mikuabu idi mpindieu mifike ku miliyo mivule udi wambuluisha ne lulamatu luonso bashadile bela manyi bua kumanyisha mukenji wa muoyo udi utangila Bukalenge. Mukenji eu badi benda baumvua mu bisamba bionso.

Ntshinyi tshienzeka mu matuku adi kumpala?

12. Ntshitupa bunene kayi tshia mmudimu wa diyisha tshidi tshishale bua kuenza bangabanga ne dituku dia Yehowa kuluadi?

12 Malu onso atudi batele aa adi aleja ne: tukadi pabuipi ne ku tshibungubungu tshia matuku a ku nshikidilu, ne dituku dia Yehowa dikadi pabuipi. Kadi kudiku milayi idi ne bua kuanji kukumbana bangabanga ne dituku didi dikuatshisha buôwa adi kutuadija anyi? Eyowa, idiku. Tshilejilu, ditapulula dia bantu pa tshilumbu tshia Bukalenge ki ndianji kujika to. Mu imue miaba muvuabu baluishe mudimu wetu bikole munkatshi mua bidimu bia bungi, mukadi mpindieu bayidi bapiabapia bavule. Too ne miaba ivua bantu babenga kuteleja lumu luimpe, luse lua Yehowa ludi lumuenekela mu diyisha dietu. Nunku, tutungunukayi ne dienza mudimu eu! Yezu udi utujadikila ne: pajika mudimu eu, nshikidilu nealue.

13. Bilondeshile bidibu bafunde mu 1 Tesalonike 5:2, 3, mbualu kayi bunene butshidi ne bua kuenzeka, ne nebumvuije tshinyi kutudi?

13 Mulayi mukuabu wa mu Bible wa mushinga mukole udi wamba ne: ‘Patshidibu bamba ne: tudi ne ditalala, katuyi ne bualu; apu dibutuka dia tshintuluntulu dilualua kudibu, bu mudi kanyinganyinga kalua kudi mukaji udi ne difu; ne buobu kabena bapanduka nansha kakese.’ (1 Tesalonike 5:2, 3) Tudi bindile bua kumona mushindu wamanyishabu ne: ‘tudi ne ditalala, katuyi ne bualu.’ Kadi kabiakusua kumvuija ne: bamfumu ba panu nebikale bajikije bushuwa ntatu ya bantu to. Bantu badi kabayi bapua muoyo bua dituku dia Yehowa, dimanyisha edi kadiakubasesuisha to. Mbamanye bimpe ne: dibutuka dia tshimpitshimpi nedilonde diakamue.

14. Mmalu kayi enzeka mu tshikondo tshia dikenga dinene, ne mmunyi mualondanganawu?

14 Ku mbangilu kua dikenga dinene, bamfumu ba panu nebakudimukile Babulona Munene (nsangilu wa bitendelelu bionso bia dishima bidi pa buloba bujima), nebamubutule. (Matayo 24:21; Buakabuluibua 17:15, 16) Pashishe, bisamba nebikudimukile bantu badi batumbisha bumfumu bua Yehowa, ne bualu ebu nebujule tshiji tshia Yehowa tshiakuata makalenge a tshididi ne badi baatua nyama ku mikolo, ke tshiafikisha ku dibutuka diawu dijima. Atshi netshikale Armagedone, mpuila mambu wa dikenga dinene. Pashishe, Satana ne ba-demon bende nebedibue mu dijimba, kabakuikala kabidi ne bukole pambidi pa bantu to. Nunku dituku dia Yehowa nedifike ku tshibungubungu, pikala dîna diende ne bua kutumbishibua.—Yehezekele 38:18, 22, 23; Buakabuluibua 19:11–20:3.

15. Bua tshinyi kabiena bimpe bua kuela meji ne: dituku dia Yehowa ditshidi kule?

15 Nshikidilu wa tshikondo etshi nealue anu pa dîba diakanyine menemene, bilondeshile mudi Nzambi mulongolole. Kakulua kunyima kua dîba to. (Habakuka 2:3) Vuluka ne: dibutula dia Yelushalema mu tshidimu tshia 70 B.B. diakalua lukasa, dîba divua bena Yuda kabayiku badielele meji, dîba divuabu bela meji ne: njiwu ikavua mimane kupita. Kadi tudi mua kuamba tshinyi bua Babulona wa kale? Tshimenga etshi tshivua ne bukole bupite, tshivua tshidieyemene, tshivua tshikolesha ne bibumba anyi bimanu binene biasa bimpe. Kadi tshiakabutuka anu mu butuku bumue. Nunku, bia muomumue kabidi, dibutuka dia tshimpitshimpi nedikuate ndongoluelu mubi wa malu eu. Paluadi, ditusangane mu buobumue mu tshitendelelu tshilelela, katuyi bapue muoyo bua dituku dia Yehowa to.

Diambulula

• Bua tshinyi bidi ne mushinga bua kubenga kupua muoyo bua dituku dia Yehowa? Mmunyi mutudi mua kubenga kudipua muoyo?

• Mmunyi mudi ditapulula dia bantu didi dienzeka mpindieu ditutangila petu?

• Mmalu kayi atshidi ne bua kuenzeka kumpala eku bangabanga ne dituku dia Yehowa kutuadijadi? Nunku, tshitudi ne bua kuikala tuenza ntshinyi?

[Bimfuanyi mu dibeji 180, 181]

Mu katupa kîpi emu, matuku a ku nshikidilu aa neafike ku tshibungubungu pabutulabu ndongoluelu wa malu wa Satana eu

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu