Tudisangishayi popamue bua kutumbisha Yehowa
1. Tshiena-bualu tshia mpungilu tshidi tshinyi, ne bua tshinyi Yehowa mmuakanyine bua tuetu kumutumbisha?
1 Yehowa ng’wa bukole buonso, kena kuipatshila ku meji, mmupuangane mu buakane ne udi dinanga mene. Bu mudiye Mufuki, Mufidi wa muoyo ne Mfumu mutambe bunene, yeye ke udi muakanyine bua tuetu kumutendelela. (Mus. 36:9; Buak. 4:11; 15:3, 4) Mpungilu wa Distrike wa tshidimu etshi udi ne tshiena-bualu ne: “Tutumbishayi Nzambi,” neakoleshe dipangadika dietu dia kumutumbisha yeye Nzambi umuepele mulelela.—Mus. 86:8-10.
2, 3. Mmushindu kayi wikala didilongolola dimpe mua kutuambuluisha bua kuteleja bimpe?
2 Bidi bikengela kudilongolola bimpe: Bua difesto dia mu nyuma edi dilongololola kudi Yehowa kutusankishadi menemene, kudilongolola kudi ne mushinga. (Ef. 5:15, 16) Nukadiku badilongolole bua muaba wa kulala, bua makuta a njila ne bua kulomba bua kushala ku mudimu anyi mu kalasa matuku au anyi? Kanuindidi minite ya ndekelu bua kushisha kutangila malu a mushinga aa to. Nuenu bajingakane bua kulomba ku mudimu anyi mu kalasa, nudi bafuane kupangila tshitupa tshia mpungilu eu udi tshikondo tshia disanka. Tuetu bamane kuenza muetu muonso bua kubuela mu mpungilu wa distrike, katuakulekela bualu bukuabu nansha bumue bulue kutupangisha bua kulonda mpungilu yonso mujima to. Kudi malu abidi adi mua kutufikisha ku ditanaji tuetu kupangila mua kulonda malu a mu mpungilu bimpe. Bualu bumue budi mua kuikala bua disomba pa munya katuyi ne tshia kudijika, bukuabu mbua mvula udi misangu mikuabu mua kuloka mu tshimpitshimpi katuyi bamuelele meji. Bu mutudi bamanye malu aa, tudi tulomba bua bena mêku balue ne makumbi abambuluisha bua kulondabu mpungilu nansha bipumbishi ebi mua kumueneka. Tuetu bonso tudi ne bua kuikalaku mu mpungilu mujima.
3 Nudifundile tshipatshila tshia kufika dituku dionso kumpala kua dîba muaba udi mpungilu wenzekela. Nebinupeteshe mushindu wa kuikala bamane kusomba pa miaba yenu kumpala kua dimba dia musambu wa ntuadijilu ne bua kuikala ne lungenyi lutukije bua kuteleja malu adibu balongesha. Dituku dionso nebabange dibueja bantu pa dîba 8:00. Nuenu mua kusua, kanukuatshidi bantu bakuabu miaba pa kumusha anu bena mu mêku enu ne banudi bende nabu.
4. Bua tshinyi mbilombibue bua muntu yonso kuluaye ne biakudia biende mu mpungilu?
4 Mbilombibue bua se: bantu bonso balue ne biakudia biabu pamutu pa kupatuka dîba dia dikisha bua kuya kukeba ka kudia. Nuenu balonde lungenyi elu nebiambuluishe bua kuikale ditalala, kabidi netuikale ne dîba dia bungi dia kuyikilaku ne bana betu. (Mus. 133:1-3) Nuavulukayi ne: kabiena bianyishibue bua kulua ne milangi anyi vere bidi mua kutayika, nansha kulua ne maluvu adi akuata muaba udi mpungilu wenzekela to.
5. Mmushindu kayi utudi mua kutuadija kulongolola mitshima yetu bua mpungilu?
5 Kuteleja ne kulonga: Ezela wakalongolola mutshima wende bimpe menemene bua kuteleja dîyi dia Nzambi. (Eze. 7:10) Wakateka mutshima wende ku malongesha a Yehowa. (Nsu. 2:2) Tudi mua kutuadija kulongolola mitshima yetu bua mpungilu bangabanga ne kumuka ku nzubu pa kuelela meji pa tshiena-bualu tshia mpungilu ne kutshiyikidilangana ne bena mu dîku dietu.
6. Ntshinyi tshidi mua kutuambuluisha bua kushala batume ntema yetu ku malu adibu balongesha? (Tangila mu kazubu.)
6 Patudi munkatshi mua bantu ba bungi, kudi mua kuikala bintu bia bungi bitudi tumona ne bitudi tuteleja bidi mua kuiba ntema yetu. Bintu bidi bikeba ditanaji ebi bidi mua kupambuisha ntema yetu kudi ngamba-malu bipepele. Padibi bienzeka nanku, tudi tupangila bua kuteleja malu a mushinga. Ngenyi idibu bafile mu kazubu kadi muaba eu idi mua kutuambuluisha bua kulengeja mushindu wetu wa diteleja.
7, 8. Mmushindu kayi utudi mua kuleja bakuabu kanemu?
7 Tulejayi kanemu kudi bakuabu: Nudi mua kulua ne biamu bia foto ne bia kamera bua kukuata bindidimbi, kadi bua kuepuka dikebela bakuabu ditanaji, nudi mua kubikuatshila anu miaba inudi basombele. Nudi ne bua kuakaja telefone yenu ya ku bianza bua kayitekedi bakuabu mutoyi. Muntu kena ne bua kuasa tshiamu tshiende ku nzembu ya muaba wa mpungilu ta ku nshinga ya biamu bia mêyi to.
8 Tudi bushuwa batume lungenyi ku matuku adi kumpala atuadisangisha pamue bua kutumbisha Yehowa! Tuikalayi ne dipangadika dia kumutumbisha pa kubuela mu bitupa bionso bia mpungilu, kuteleja ne ntema ne kutumikila malu atudi tulonga.—Dut. 31:12.
[Kazubu mu dibeji 3]
Tutelejayi mu mpungilu:
▪ Tuelangane meji pa biena-bualu bia miyuki
▪ Tukebe mvese, tuyibale
▪ Tufunde malu makese
▪ Tusunguluje malu a kutumikila
▪ Tuambulule malu atudi balonge