Manyisha Dîyi dia Nzambi bimpe menemene
1 Pavuaye uyisha munene kampanda wa basalayi, ‘Filipo wakabanga kuakula, kutuadijaye ne dîyi edi dia mu Mukanda wa [Nzambi], kumumanyisheye Muanda Mulenga udi wamba bua Yezu.’ (Bien. 8:35, Muanda Mulenga Lelu) Filipo uvua ‘umanyisha dîyi dia bulelela menemene.’ (2 Tim. 2:15) Kadi, lelu’eu batangidi bena ngendu mbatentekele ne: bamanyishi ba bungi kabatshitu kabidi ne tshibidilu tshia kuenza mudimu ne Bible padibu bayisha to. Utu wewe wenza mudimu ne Bible paudi mu buambi anyi?
2 Mu Dîyi dia Nzambi ke mutudi tuangatshila malu onso atudi tuitabuja ne atudi tulongesha. (2 Tim. 3:16, 17) Diodi ke didi disemeja bantu kudi Yehowa ne dibalongesha bua kupetabu muoyo. Ke bua tshinyi tudi ne bua kuikala tuenza mudimu ne Bible mu buambi pamutu pa kuikala tuakuila patupu pa biena-bualu bitudi tumona bitusankisha. (Eb. 4:12) Bu mudi bantu ba bungi kabayi bamanye malu mavule a mu Bible, nunku mbimpe tuikale tubabadilaye bua kubaleja mibelu mimpe idi Bible ufila ne malu alua kuenzekela bantu matuku adi kumpala eku.
3 Bala buludiludi mu Bible: Udi mua kuteta bua kuya kuyisha kuyi muambule tshibuta tshia mikanda. Udi mua kuela mukanda anyi tshibejibeji tshiudi musue kufila mu buambi mu kabuta kebe ka ku bianza ne kuela Bible mu mpaya peshi kumukuata ku bianza. Nunku paudi utuadija kuakula ne muntu, udi mua kupatula Bible webe mu mayele bua muntu kamonyi ne: udi ujinga bua kumuyisha to. Imana pabuipi ne uudi uyukila nende mu mushindu wa kulondeshaye biudi ubala mu Bible webe. Imue misangu udi mua kumuambila bua abale mvese au ne dîyi dikole. Bidi mua kumulenga ku mutshima bikole padiye udibadila tshidi Bible wamba bishilangane ne paudi umubadila. Kadi bua kumuambuluisha bua afike ku diumvua tshidi mvese umvuija, utambe kushindamena pa miaku idi ne lungenyi lua tshidi mvese eu umvuija.
4 Mua kuyisha ne mvese umue: Kunyima kua wewe mumane kudimanyisha, udi mua kuamba ne: “Bantu batu ne miaba mivule idibu bakebela mibelu idi mua kubambuluisha mu nsombelu wabu. Ntshinyi tshiudi wewe mumone se: ke mpokolo mutambe buimpe wa kupetela mibelu ya nsongo? [Lekela muntu andamune] Udi wela meji kayi bua mêyi aa? [Bala Nsumuinu 2:6, 7, ne ulekele muntu akuandamune.] Meji a bantu kaenaku ne bua nsongo nansha, bualu adi afikisha bantu ku diteketa mu mikolo. Kadi meji a Nzambi ke a kueyemena ne adi ambuluisha misangu yonso.” Pashishe umuleje mukanda uudi ujinga kufila, ne upatulemu tshilejilu tshimue tshidi tshileja mudi meji a Nzambi ambuluisha.
5 Yezu uvua ne tshibidilu tshia kuenza mudimu ne Mukanda wa Nzambi bua kuambuluisha bantu ba muoyo muimpe. (Luka 24:32) Paulo uvua ufila bijadiki bia bivuaye wamba mu Mukanda wa Nzambi. (Bien. 17:2, 3) Dieyemena dietu ne disanka mu mudimu wetu nebivule patudi tumanya mua kumanyisha dîyi dia Nzambi mu mushindu muimpe menemene.