Jula dijinga dia kumanya bivule ne mianda idi yenzeka

¹ Udi musue bua wikale dîba dionso ne ngenyi mimpe yakuambuluisha mu buambi bua kuikala ne malu mapiamapia adi ajula dijinga dia bantu dia kumanya mukenji wa mu Bible anyi? Nanku angata anu malu adi enzeka pa buloba ne aa a muaba uudi musombele bua kutuadija mayuki ebe. Udi mua kuangatshila ngenyi mu mianda idi yenzeka muaba uudi musombele ne mu ditunga, anyi mene idi yenzeka mu matunga makuabu. Malu aa atu ashintuluka anu kushintuluka. (1 Kol. 7:31) Tangila bilejilu bidi bilonda ebi.

² Ntatu mu malu a mfranga ne nsombelu udi mulue kukola, mmalu adi atatshisha bantu. Nunku udi mua kuamba ne:

▪ “Uvua muteleje muvuabu bambe mu ngumu ne: mishinga ya [tela tshintu] idi ibanda kabidi anyi?” Peshi udi mua kuakula bua bulofua bikala kumpanyi munene kampanda mukepeshe bikole bungi bua bena mudimu bende. Bilondeshile mushindu uudi musue bua kutungunuka ne diyuki, udi mua kulua kuebeja nansha ne: “Ukadiku mudikonke ne: bua tshinyi nsombelu mmukole mushindu eu anyi?” peshi ne: “Udi wela meji ne: nebikale misangu yonso bikole bua kukumbaja majinga etu anyi?”

³ Ngumu ya malu a tshikisu, bu mudi mu mêku anyi mu tulasa, idi kabidi nshindamenu wa diyuki. Udi mua kukonka muntu ne:

▪ “Uvuaku mubale mu tshikandakanda mudibu bambe ne: [tela bualu bua tshikisu budi buenzeke muaba unudi]?” Pashishe tungunuka ne: “Ntshinyi tshiudi mumone tshidi tshikebesha malu a tshikisu onso aa?” anyi ne: “Udiku wela meji ne: tshikondo netshilue tshituikala mua kudiumvua bakubibue anyi?”

⁴ Ngumu ya mvula idi iloka ya bungi, bikumina peshi bimvundu mu matunga mashilashilangane pa buloba bidi kabidi bifila mushindu wa kujula dijinga dia kumanya bivule. Tshilejilu, udi mua kuela muntu lukonko elu:

▪ “Nzambi ke udi utumina bantu [tela tshipupu tshia ku bintu bifuka] anyi?” Anyi udi mua kutela tshimvundu tshidi tshienzeke matuku adi panshi aa ne kuamba ne: “Bikalabi ne: bantu bonso mbanange kusomba mu ditalala, bua tshinyi mbikole bua kufika ku nsombelu eu?”

⁵ Ikala uteleja mianda idi yenzeka bua kumona mua kutuadija nayi mayuki ebe. Kudi ngenyi idi yambuluisha idibu bafile mu kakanda ka Mua kutuadija ne kutungunuka ne mayuki pa Bible pa tshiena-bualu tshidi tshiamba ne: “Mianda idi yenzeka,” mu dibeji 5 ne 6 (rs-F dib. 10). Kadi wamanya, kuleji ne: udi ku luseke kampanda mu malu a tshididi peshi a mu malu makuabu adi enzeka mu bantu to. Kadi ukoke ntema ya bantu ku Bible ne ku Bukalenge bua Nzambi budi buikale mushindu umuepele wajikija ntatu ya bantu.