Nansha mudibu ne bulema, badi anu bakuama mamuma mimpe

¹ Nansha wewe muikale umue wa ku Bantemu ba Yehowa ba bungi badi balema, tshidibi udi anu pebe mua kuenza mudimu muimpe. Kadi mushindu uudi udi mua kukupetesha mpunga wa wewe kuyisha bakuabu ne kubakankamija.

² Mpunga ya kuyishila: Ba bungi badi batata ne bulema batu badifila bikole mu mudimu wa buambi. Tshilejilu, muanetu wa bakaji mukuabu uvua kayi kabidi ne mushindu wa kuenda ne kuakula bua muvuabu bamupande wakamona ne: uvua mua kuenza mudimu wa difila bibejibeji padi bayende wimanyika mashinyi abu lua kumpenge kua njila tshivua bantu ba bungi bapitshila. Musangu mukuabu wakafika ku difila bibejibeji 80 mu mêba abidi patupu! Mushindu uudi udi kabidi mua kukufikisha ku dimonangana ne bantu batu imue misangu bakole mua kubapeta. Bikalabi nanku, ubangate buobu abu bu teritware webe wa pa buende.

³ Mudimu webe wa buambi udi mua kupatula bipeta bimpe be! Padi bakuabu bamona dinanukila diebe ne mushindu udi bulelela bua mu Bible bukuambuluishe, mukenji wa Bukalenge udi mua kubakoka. Kabidi, paudi umonangana ne bantu badibu bakengesha, biukadi mumonemone bidi mua kukupesha mushindu wa kubakolesha ku muoyo ne Dîyi dia Nzambi.​—2 Kol. 1:4.

⁴ Udi mua kukolesha bakuebe ku muoyo: Kabivuaku bikukankamije pauvua mubale malu a mu nsombelu a Laurel Nisbet uvua mukalamine mu tshiamu tshivua tshimuambuluisha bua kupuyakana munkatshi mua bidimu 37 kadi mufike ku diambuluisha bantu 17 bua kufikabu ku dimanya dia bulelela bujalame bua mu Bible anyi? Bia muomumue, tshilejilu tshiebe tshidi mua kuambuluisha bena kuitabuja nebe bua kudifila bikole mu mudimu wa Yehowa.​—g93-F 22/1 dib. dia 18-21.

⁵ Nansha wewe kuyi ne mushindu wa kupatuka mu buambi mushindu uudi musue, udi anu mua kukankamija bakuabu. Muanetu mukuabu wakamba ne: “Ndi mulue kumona ne: nansha muntu udi ne bulema bunene udi mua kuambuluisha bakuabu bikole. Meme ne mukajanyi tudi bambuluishe bantu ba bungi mu tshisumbu. Bua mushindu utudi, tudi anu muaba eu bindile bua kuambuluisha.” Pabi bua bulema buudi nabu, bidi biumvuika ne: misangu yonso kuakuikala anu ne mushindu wa kuenza mudimu bilondeshile mudi lukunukunu luebe to. Kadi buobu bakuambuluishe udi mua kudifila bikole mu buambi. Bua nanku, wewe dijinga ne diambuluisha, kuelakanyi bua kumanyisha bakulu anyi bantu bakuabu ba mu tshisumbu badi mua kukuambuluisha.

⁶ Yehowa mmumone malu onso audi wenza bua kumusadila, udi usanka bikole bua mudimu webe uudi wenza ne muoyo mujima. (Mus. 139:1-4) Paudi umueyemena, udi mua kukupesha bukole bua wewe kuenza mudimu muimpe udi upatula bipeta.​—2 Kol. 12:7-10.