Mpungilu ya distrike ne ya bantu bafumine mu matunga a bungi idi itusaka bua kutumbisha Nzambi!
Mpungilu ya Distrike ne ya bantu bafumine mu matunga a bungi ya “Tutumbishayi Nzambi” ikadi mienzeke too ne patudi tuakula apa mmikemeshe bantu bikole. Bibilu bia Nzambi bia mushinga mukole mbienze mudimu wa kutumbisha dîna dia Yehowa ne mbitupeteshe mushindu wa ‘kuambika Yehowa butumbi budi buakanyine dîna diende.’ (Mus. 96:8) Bulelela, Yehowa mmuakanyine butumbi bua midimu yende ya dikema ya bufuki, idi ileja patoke ngikadilu yende milenga.—Yobo 37:14; Buak. 4:11.
Angata nkonko idi ilonda eyi ne note yebe iuvua muangate, bua udilongolole bua kufila mandamuna mu diambulula dia malu a mu mpungilu dienzeka mu lumingu luatuadija mu dia matuku 20 ngondo wa dikumi.
1. Mmunyi mudi bifukibua bidi kabiyi ne muoyo bitumbisha Nzambi, ne mmunyi mudibi bishilangane ne mushindu udi bantu buobu bamutumbisha? (Mus. 19:1-3; “Bifukibua bidi bimanyisha butumbi bua Nzambi”)
2. Dishintuluka dia mpala wa Yezu didi mundidimbi wa tshinyi, ne mmunyi mudi bualu bulelela ebu buambuluisha bena Kristo lelu? (Muyuki wa nshindamenu wa: “Bikena-kumona bia butumbi bia buprofete bidi bitukolesha!”)
3. Mmunyi mutudi mua kupeta budipuekeshi bua buena buvua nabu muprofete Danyele, ne mmunyi mudibi mua kutuambuluisha tuetu bikale tuenza nanku? (Dan. 9:2, 5; 10:11, 12; “Yehowa udi uleja butumbi buende kudi bena budipuekeshi”)
4. (a) Mmalu kayi asatu adi atangila dilumbuluisha dia Nzambi adi mulayi wa Amosa mua kutulongesha? (Amo. 1:3, 11, 13; 9:2-4, 8, 14) (b) Ndilongesha kayi dimpe didi Bantemu ba Yehowa mua kulongela lelu ku bilejilu bidi bitudimuija bidi mu Amosa 2:12? (“Mulayi wa Amosa: Tshidiwu utumanyisha lelu”)
5. (a) Nnjiwu kayi idi imueneka bua dinua dia maluvu makole a bungi, nansha muntu yeye kayi unua ukuatshika? (b) Muntu udi mua kufika ku dilekela dinua dia maluvu dipitshisha munyi? (Mâko 9:43; Ef. 5:18; “Tuepukayi buteyi bua dikuatshika dia maluvu”)
6. Mukanda mupiamupia wa “Voyez le bon pays!” mukuambuluishe mushindu kayi? (“‘Buloba buimpe, nka-diosha ka muikala Mparadizu”)
7. Mmu mishindu kayi isatu mutudi ‘tutangila bu mu lumuenu butumbi bua [Yehowa]’? (2 Kol. 3:18; “Tudi tukenkesha butumbi bua Yehowa bu lumuenu”)
8. Lukinu ludibu batukine katuyi ne tshitudi benze ludi lufumina kudi nganyi, ne ntshinyi tshidi mua kutuambuluisha bua kushala ne muoyo-mutoke nansha buobu batukine? (Mus. 109:1-3; “Mbabakine kakuyi bualu”)
9. Mmuenenu kayi uvua nende Kristo pa bidi bitangila dikala bantu banene, ne mmunyi mudi muntu mua kumanya ne: udi ukengela kuikala ne mmuenene eu menemene? (Mat. 20:20-26; “Tuikalayi ne meji a buena a Kristo pa bidi bitangila dikala bantu banene”)
10. Ntshinyi tshidi mua kutuambuluisha bua kushala bakole mu nyuma nansha tuetu bikale ne makanda a mubidi makese? (“Nansha buobu batshioke, ki mbazengele nansha”)
11. Mbimue bintu kayi bidi Satana wenza nabi mudimu bua kutangalaja mashimi, ne ntshinyi menemene tshidi Bible wamba bua kuenza padi ditabuja disua kuteketa? (Yone 10:5; “Dimukilayi ‘dîyi dia benyi’”)
12. (a) Mmunyi mudi baledi mua kulonda tshilejilu tshia Yezu tshidi mu Mâko 10:14, 16? (b) Ntshinyi tshidi tshikusankishe mu mukanda wetu mupiamupia wa Longela kudi Mulongeshi Munene? (“Bana mbumpianyi bua mushinga mukole”)
13. Bana badi batumbisha Yehowa munyi? (1 Tim. 4:12; “Mushindu udi bansonga batumbisha Yehowa”)
14. Ntshitupa kayi tshia mu drama wa: “Tuyishayi ne dikima nansha padibu batuluisha” tshidi tshishale mu mutu muebe?
15. Mmunyi mutudi mua kuidikija tshilejilu tshishiya kudi (a) Petelo ne Yone? (Bienz. 4:10) (b) Stefano? (Bienz. 7:2, 52, 53) (c) tshisumbu tshia bena Kristo tshia mu bidimu lukama bia kumpala? (Bienz. 9:31; drama ne muyuki wa: “Manyishayi lumu luimpe ‘kanuyi nulekela’”)
16. (a) Mmu mishindu kayi mutudi bapangadije bua kutumbisha Nzambi? (b) Ntshinyi tshitudi ne bua kuikala bajadike tuetu bikale tutumikila malu atuvua balonge mu Mpungilu yetu ya: “Tutumbishayi Nzambi?” (Yone 15:9, 10, 16; “‘Tungunukayi ne kukuama mamuma a bungi’ bua butumbi bua Yehowa”)
Tuetu tuelangana meji a malongesha mimpe avuabu batulongeshe mu mpungilu, nebitusake bua kutumikila malu aa. (Filip. 4:8, 9) Kuenza nunku nekukoleshe dipangadika dietu dia “kuenza malu onso bua butumbi bua Nzambi.”—1 Kol. 10:31.