“Nuikale badilongolole”
1 Mu mulayi wende wa tshikuma udi utangila nshikidilu wa ndongoluelu wa malu eu, Yezu wakadimuija bantu bua kubenga kudina ne kasuki mu malu a mu nsombelu. (Mat. 24:36-39; Luka 21:34, 35) Bu mudi dikenga dinene mua kulua lelu anyi malaba, nanku tudi ne bua kuteleja mubelu wa Yezu wa ne: “Nuikale badilongolole, bualu Muana wa muntu neafike diba dinudi kanuyi belele meji.” (Mat. 24:44, Mukanda wa Mvidi Mukulu [Katolike, MMM]) Tshidi mua kutuambuluisha mu bualu ebu ntshinyi?
2 Tuluishayi tunyinganyinga ne malu adi afila ditanaji: Tshimue tshia ku bintu bidi mua kutunyanga mu nyuma ntunyinganyinga anyi “ntatu ya panu.” (Luka 21:34, MMM) Mu amue matunga, bupele, bulofua ne dikola dia bintu mushinga bitu bikolesha mushindu udi bantu mua kupeta bia kudiambuluisha nabi. Kadi mu makuabu matunga, bantu ba bungi kabena ne lutatu lua kupeta bintu to. Bituikala tukadi dîba dionso tuela meji anu ku bintu bia ku mubidi, apu tumanye ne: tudi mu njiwu ya kubenga kushala bashindamene pa malu malelela atutuadila Bukalenge. (Mat. 6:19-24, 31-33) Bisangilu bia bena Kristo bidi bituambuluisha bua kushala bashindamene pa malu malelela a Bukalenge. Udiku mudifundile tshipatshila tshia kubuela mu tshisangilu ne tshisangilu tshionso anyi?—Eb. 10:24, 25.
3 Lelu pa buloba ebu kudi bintu bivule bidi bifila ditanaji bidi mua kutudia dîba dia bungi patupu. Dienza mudimu ne tshiamu tshia ordinatere didi mua kulua buteyi bikala muntu upitshisha dîba dipite bungi ku Internet, ubala ne utuma mikanda ku Internet, anyi unaya manaya a ku ordinatere. Mêba bungi tshianana adi mua kujimina patupu ku ditangila televizion, filme, bimue bintu bia dijikija nabi lutetuku, dibala dia mikanda ya bena mu bulongolodi ebu, ne malu a manaya. Mêba ne makanda makese patupu ashala bua malu a mu nyuma. Nansha mudi dijikija lutetuku mua kuanji kutupeteshaku ndambu wa disanka bua tshitupa tshîpi, kadi dilonga dia muntu pa nkayende ne dilonga dia Bible mu dîku bidi bitupetesha biobi masanka a kashidi. (1 Tim. 4:7, 8) Utuku wangata dîba bua kuela meji pa Dîyi dia Nzambi dituku dionso anyi?—Ef. 5:15-17.
4 Tudi ne bua kuikala ne dianyisha dia bungi bua mudi bulongolodi bua Yehowa bulongolole programe wa ditulongesha malu a mu nyuma bua tuetu “kuikala ne bukole bua kupanduka ku bionso bidi ne bua kuenzeka ne kupatuka ne muoyo mukole kumpala kua Muana wa muntu.” (Luka 21:36, MMM) Tuenzayi muetu muonso bua kulonda programe ya malu a mu nyuma eyi ne ‘tuikale badilongolole’ bua pamu’apa ditabuja dietu ‘ditupeteshe butumbi ne lumu dituku dia dimueneka dia Yezu Kristo.’—1 Pet. 1:7.