Kuakula bu udi uyikila

PATU bantu bakula ne balunda, batu badiumvua basulakane, badiumvua bimpe. Malu atu adipatukila mukana. Bamue batu ne ludimi lupepele; bakuabu ne ludimi bujitu. Nansha nanku, diakula dia muntu ne muntu bilondeshile muende mudiye ditu dibasaka ku diditua pabu mu muyuki.

Kadi patudi tuakula ne muntu utudi katuyi bamanye, ki mbimpe kuakula bu mututu ne balunda anyi bamanyangana nabu to. Mu makuabu matunga mene, kutu malu a bukalanga a kulonda paudi utuadija kuyikila ne muntu uudi kuyi mumanye. Kunyima kua mêyi a bukalanga aa, udi mua kukeba ne busunguluji bua kumanya bikalabi biakanyine bua kuakula muutu wenza ne bakuabu bantu.

Mbimpe kabidi kuikala ne busunguluji paudi ku tshiakuidi. Ngakuilu wa bu udi wakula ne balunda udi ukepesha mushinga wa bisangilu bietu ne wa malu atudi tuamba. Mu imue miakulu, kutu ngakuilu utudi ne bua kuikala nende patudi tuyikila ne muntu mukole, ne mulongeshi, ne munene wa mbulamatadi, anyi muledi. (Tangila miaku idi mu Bienzedi 7:2 ne 13:16.) Kudi miaku ya kuamba bua muena dibaka netu peshi mulunda wetu wa pa muoyo. Tshidibi, nansha mudi ngakuila wa patudi ku tshiakuidi kayi ne bua kuikala menemene bu wa mu mikanda, udi ne bua kuikala wa kanemu.

Kadi kudi malu adi mua kuenza ne: ngakuilu wetu ikale mumakane anyi bu wa mu mikanda. Tshintu tshimue ke ngashilu wa biambilu. Bitu nangananga padi muntu ukeba kuakula ne miaku ya mu bidi bifunda. Miaku ya mu difunda itu mishilangane bikole ne ya mu diakula. Kakuyi mpata, tutu tubala mikanda bua kulongolola miyuki yetu. Bidi mua kuikala ne: muyuki webe mmuashila pa plan (bintu bimana kufunda). Kadi wewe wamba malu anu mudiwu mafunda peshi uabala buludi mu muaba kampanda, kabiakumvuika bu udi uyikila to. Bua kuenzabi bu udi uyukila, wambe malu mu ebe mêyi ne biambilu bikale bipepele.

Tshinga tshintu tshia kuangata ne mushinga ndishintulula lubilu lua diakula nalu. Malu atu umvuika mumakane padi miaku ipatuka anu kunyima kua mutantshi bule kampanda, ne lubilu lua diakula kaluyi lushintuluka. Patutu tuyikila matuku onso, tutu tushintulula lubilu lua diakula nalu ne tuikisha mitantshi kayiyi bule bumue yonso to.

Tshidibi, patudi tuakula kumpala kua bantu ba bungi, bidi bikengela kuakula bu mututu tuyukila kadi kubandishaku dîyi, kuakula ne makanda ne musangelu bua bantu kushala batuteleja.

Wewe musue kuyisha bu udi uyukila, ikala wakula biakane matuku onso. Kabiena biumvuija kuikala mulonge kalasa ka bungi to. Bidi bikengela kuikala ne tshibidilu tshia kuakula bintu bidi bakuabu mua kuteleja ne kanemu. Mpindieu tangilabi ni udi mua kulongolola ngakuilu webe wa matuku onso ne mibelu idi ilonda eyi.

1. Lekela ngakuilu udi kayi ulonda mikenji ya diakula nayi muakulu (anyi gramere), peshi ngakuilu wa bantu badi kabayi batumikila mikenji ya Nzambi. Anu mudibu bamba mu Kolosai 3:8, lekela ngakuilu wa mêyi mashile ne mabi. Kadi kuakula bu mutu bantu bakula matuku onso ki nkubi to. Nansha mudiku kakuyi mumue ne kua mu mikanda, kutu kuanyishibue.

2. Lekela kuakula ne miaku imue imue bua lungenyi ne lungenyi luebe luonso. Longa mua kuakula ne miaku idi yumvuija bimpe tshiudi usua kuamba.

3. Pamutu pa kuikala kuamba kuambulula malu, ikala wanji kumanya bimpe tshiudi usua kuamba; ulua kuakula pashishe.

4. Lekela kuakula ne miaku mipitepite bungi, bualu idi ijibakaja malu malenga audi wamba. Ikala wamba malu adi akengela kuvuluka mu biambilu bîpi.

5. Ikala ne ngakuilu udi uleja bakuabu kanemu.