“Kufunda malu amu malelela”

Tudi ba diakalenga bua mutudi ne mikanda mu miakulu minene ya mu teritware wetu. Ebi bidi mu diumvuangana ne mulayi udi umanyisha bua “bantu dikumi ba mu bisamba bidi biakula miakulu mishilangane” badisangisha ne bena Kristo bashadile bela manyi bua kusadila Yehowa. (Zek. 8:23, MMM) Biro bia filiale wetu bidi bienza mudimu mukole munkatshi mua mêba mavule, bitula makuta a bungi bua kupatula ‘biakudia bia mu nyuma ebi pa dîba diabi,’ bionso ebi ku bulombodi bua Kasumbu Kaludiki.

Nansha mudi ya bungi ya ku miakulu eyi bikale bayakula dituku dionso edi, mikese tshianana ke idi ne mikanda. Bua bualu ebu, mikenji ya miakulu ya nunku kayena misunguluke menemene to, ne nansha miaku mine idi mua kushintuluka bilondeshile muaba ne muaba. Nanku, lutatu lukole ludi lumueneka bua mushindu wa kupatula mikanda mu imue miakulu ya muetu munu. Kadi nansha bikala mushindu’au, Kasumbu Kaludiki nkafile bia-mudimu bilenga bidi mua kutuambuluisha bua kupatula mikanda mimpe.

Imue misangu, nansha mututu ne dijinga dia kukudimuna mikanda “idi isankisha bantu ne kufunda malu amu malelela,” kutu kumuenekaku bimue bilema. (Muam. 12:10, MMM) Bikala muambi wa lumu luimpe ujinga kufila lungenyi kampanda pa muaku kansanga anyi pa tshidiye umona bu tshilema, udi mua kufundila Biro bia filiale wetu. Kadi, kumpala kua muntu kufunda mukanda wa nunku, udi ne bua kuikala mushindike se: lungenyi ludiye ujinga kufila pa bualu ebu ndulelela. Mbimpe kuanji kuyikilaku ne muanetu mukuabu udi mumanye bikole muakulu au anyi kuanji kuyukilaku ne mutangidi wenu wa tshijengu paluaye kukumbula tshisumbu tshienu. Ke tshidi tshikengela kuenza pamutu pa kuyikila ne muanetu kampanda udi mu dîku dia bena Betele.

Bua kufika ku dikudimuna mikanda yetu mu miakulu kabukabu, bivua bikengela kuikala ne miaku mikuabu idi yumvuija bibikidilu bia malu atutu tuenza mu ntendelelu wetu. Batu bafika ku dipangadika bua kupatula miaku ya buena eyi mu mikanda yetu bu mudi mu Tshibumba tshia Nsentedi anyi Mudimu wetu wa Bukalenge, panyima pa bamane kuela meji ne banane lungenyi bikole. Bua kumona mua kulama buobumue munkatshi mua bantu ba Nzambi, tudi tulomba bisumbu bionso nangananga bakulu bua kuenza mudimu ne miaku anyi biambilu ebi pamutu pa kuenza mudimu ne bikuabu. Nanku, mbimpe tuikale batuishibue ne: muaku anyi tshiambilu tshionso tshitudi tuenza natshi mudimu tshidi tshikale tshipetangana ne ebi bitu mu mikanda yetu bua malu adi atangila ntendelelu wetu.