Eyemena Yehowa, Nzambi udi mulelela

Ukadiku mutangile mulu butuku padiku kakuyi mavuba ne mumonemu binunu ne binunu bia mitoto anyi? Buebe wewe, mmunyi mudiyi mifike ku dikalaku?

BUTUKU pavua panshi patalale, mitoto ya mulu ivua mienze anu bu ivua yakuisha Davidi Mukalenge wa kale wa Isalele, imusaka bua kuambaye ne: ‘Diulu didi diamba butumbi bua Nzambi; bia mu diulu bibaluluke bidi bimuenesha midimu ya bianza biende.’ (Musambu 19:1) Bulelela, Mufuki ke “udi muakane bua kuangata butumbi ne buneme ne bukole,” kadi ki mbifukibua nansha.​—Buakabuluibua 4:11; Lomo 1:25.

Bible udi wamba ne: ‘Wakibaka bintu bionso n’Nzambi.’ (Ebelu 3:4) Bushuwa, Nzambi mulelela, ‘[udi ne] dîna dia Yehowa, udi Mutambe Bunene wa pa mutu pa buloba bujima.’ (Musambu 83:18) Ne ki mmuntu wa mu tshingenyingenyi nansha, ne ki ndubungibungi patupu to. Yezu Kristo wakamba bua Tatuende wa mu diulu Yehowa ne: “Wakuntuma udi mulelela.”​—Yone 7:28.

Yehowa utu ukumbaja malu adiye mulongolole

Dîna disunguluke dia Nzambi dia Yehowa didi misangu mitue ku 7 000 mu Mikanda ya tshiena-Ebelu nkayayi. Dîna edi didi dileja ne: Nzambi eu udi mulelela. Dîna dia Nzambi edi Yehowa didi diumvuija ne: “Udi Uvuija.” Nunku Yehowa Nzambi udi udileja bu mukumbaji wa malu adiye mulongolole. Pakamuebeja Mose dîna diende, Yehowa wakamuleja diumvuija diadi mushindu’eu: “MEME NDI MUNDI.” (Ekesode 3:14) Bible wa Rotherham udi wamba bimpe ne: “Nendue tshionso tshiansankisha.” Yehowa udi anyi udi usungula bua kulua tshionso tshidi tshikengedibua bua kukumbaja malu makane adiye mulongolole bua kuenza. Ke bualu kayi udi ne bibikidilu bia dimutumbisha nabi bidi bikemesha tshilejilu bu mudi Mufuki, Tatu, Mfumu Mutambe Bunene, Mulami, Yehowa wa misumba, Muteleji wa masambila, Mulumbuluishi, Mulongeshi Munene, Mupikudi.​—Balumbuluishi 11:27; Musambu 23:1; 65:2; 73:28; 89:26; Yeshaya 8:13; 30:20; 40:28; 41:14.

Anu Nzambi umuepele mulelela eu ke udi muakanyine dîna dia Yehowa, bualu bantu buobu kabena mua kuamba kujadika ne: mapangadika abu neakumbane nansha. (Yakobo 4:13, 14) Anu Yehowa nkayende ke udi mua kuamba ne: ‘Bu mudi mvula uloka, ne bu mudi neige ifuma mu diulu, ne kayena ipinganamu kabidi kayiyi mianji kumiamina mâyi pa buloba ne kubumeneshila midioko ne kubusampishila mitshi, ivuijila mukunyi maminu, ne ipesha mudi wa biakudia biakudia biende, nunku dîyi didi dipatuka mukana muanyi nedikale muomumue; kadiena dipingana kundi patupu, kadiyi dianji kuenza muanda undi musue dienze, kadiyi dianji kushikija muanda ungakaditumina.’​—Yeshaya 55:10, 11.

Yehowa udi ukumbaja disua diende ne dishindika dionso mu mushindu wa se: nansha muanda udi umueneka bu udi kauyi mua kuenzeka ku mêsu kua bantu, udi umueneka mulelela ku mêsu kuende yeye. Bidimu bia bungi kunyima kua Abalahama, Isaka ne Yakoba bamane kufue, Yezu wakabatela ne kuambaye ne: ‘Yeye [Yehowa] kêna Nzambi wa bafue, udi Nzambi wa badi ne muoyo; bualu bua bonso badi ne muoyo bua bualu buende.’ (Luka 20:37, 38) Bankambua basatu ba lulamatu aba bakadi bafue, kadi disua dia Nzambi dia kubabisha ku lufu divua ne bua kukumbana bushuwa, ke bualu kayi buende yeye bavua benze anu bu bavua ne muoyo. Kupingaja basadidi aba ba lulamatu ba kale ne muoyo tshiakabidi ki mbualu budi bukole ku mêsu kua Yehowa kupite muvuabi mua kuikala bua kufuka mulume wa kumpala ne dimfuekenya dia buloba nansha.​—Genese 2:7.

Mupostolo Paulo udi utupesha tshilejilu tshikuabu tshidi tshijadika ne: Nzambi udi wenza bua malu adiye mulongolole akumbane. Bible udi ubikila Abalahama ne: “nkambua wa bisamba bia bungi.” (Lomo 4:16, 17) Pavua Abalama kayi muanji kupeta muana, Yehowa wakashintulula dîna diende kuluadi Abalahama, mmumue ne: “Tatu wa musumba wa bantu.” Yehowa wakenza bua diumvuija dia dîna adi dilue dilelela pakapingajilaye Abalahama ne mukajende Sala ukavua mukulakaje lulelu mu tshishima.​—Ebelu 11:11, 12.

Bu muvua Yehowa mumupeshe bukole ne bukokeshi bua bungi, Yezu Kristo uvua wakula bua malu malelela ne dishindika dipite dia bantu. Nansha muvua Lazalo mulunda wende wa pa muoyo mufue, Yezu wakambila bayidi bende ne: “Mulunda wetu Lazalo udi mulale tulu; kadi ndi nya kumubisha mu tulu.” (Yone 11:11) Bua tshinyi Yezu wakakula bua muntu mufue bu udi mulale tshianana?

Pakafika Yezu mu Betania tshimenga tshia ba Lazalo, wakaya ku lukita ne kuambaye bua bumushe dibue divua dijike ku mushiku kualu. Panyima pa mumane kusambila ne dîyi dikole, wakamba ne: ‘Lazalo, lopoka!’ Mêsu a bantu bavua muaba au kushalawu matangile mu lukita, mpindieu ‘muntu eu wakadi mufue wakalopoka, munyengela bilulu ku bianza ne ku makasa. Ku mpala kuende kuakadi kunyengela tshitambala.’ Ke Yezu kuambaye ne: ‘Numujingulule, aye biende.’ (Yone 11:43, 44) Yezu wakabisha Lazalo, kupingajilaye muntu eu uvua mufue kukavua matuku anayi muoyo! Kristo kavua mukonyangaje bulelela pakambaye ne: mulunda wende uvua mulale to. Ku mêsu kua Yehowa ne kua Yezu, mufue Lazalo uvua anu bu muntu mulale tulu patupu. Bushuwa, Yezu ne Tatuende wa mu diulu batu benza malu adi malelela.

Yehowa udi mua kuvuija malu atudi batekemene malelela

Ndishilangana kayipu didi pankatshi pa mpingu idi ishima ne Nzambi mulelela! Batendeledi ba mpingu badi batupakana padibu bapesha bintu bidibu banemekela bukole bupite bua bantu. Nansha bantu buobu bikale banemekele mpingu eyi mushindu kayi, kayena mua kupeta bukole bua kuenza bishima to. Kadi Yehowa Nzambi yeye udi mua kuakula bimpe bua basadidi bende bakadi bafue kale bienze anu bu se: badi ne muoyo, bualu udi ne bukole bua kubapesha muoyo tshiakabidi. “Yehowa udi Nzambi wa bushuwa,” kêna mua kushima bantu bende to.​—Yelemiya 10:10.

Bidi bitukolesha ku muoyo bua kumanya ne: mu tshikondo tshidi Yehowa mulongolole, bafue badi mu tshivulukidi tshiende nebabishibue, nebalue ne muoyo tshiakabidi! (Bienzedi 24:15) Bushuwa, dibika didi diumvuija dipingajilula muntu ngikadilu yende. Kuvuluka ngikadilu ivua nayi bantu bakadi bafue ne kubabisha ki mbualu bukole ku mêsu kua Mufuki nansha, bualu udi ne meji ne bukole bidi kabiyi ne ndekelu. (Yobo 12:13; Yeshaya 40:26) Bu mudi Yehowa muikale ne dinanga dia bungi, neenze mudimu ne tshivulukidi tshiende tshipuangane bua kubisha bafue pa buloba bukudimuna mparadizu bikale anu ne bumuntu buvuabu nabu kumpala kua kufuabu.​—1 Yone 4:8.

Bu mukadi ndekelu wa bukua-panu bua Satana usemena pabuipi, bushuwa kutudi tuya nkutoke bua aba badi beyemene Nzambi mulelela. (Nsumuinu 2:21, 22; Danyele 2:44; 1 Yone 5:19) Mufundi wa Misambu udi utujadikila ne: ‘Tshitupa tshîpi katshiyi tshianji kulepa, muntu mubi kêna wikalaku kabidi; e, neukebe kumona muaba wende ne disuminyina, kêna wikalaku. Kadi badi ne mitshima mipuekele nebapiane buloba, mioyo yabu neyisanke mu ditalala dikumbane.’ (Musambu 37:10, 11) Dibunda bilumbu ne tshikisu nebilue malu a kale. Nekuikale buakane miaba yonso, ntatu ya mushindu wa kupeta makuta neijike. (Musambu 37:6; 72:12, 13; Yeshaya 65:21-23) Malu onso adi akebesha disungulujangana dia makoba, dia milongo ya mu nsombelu, dia bisamba ne dia bisa neajike onso kashidi. (Bienzedi 10:34, 35) Mvita ne bingoma kabiakuikalaku kabidi to. (Musambu 46:9) Mu tshikondo atshi ‘muena musoko kêna wamba ne: Ndi ne disama.’ (Yeshaya 33:24) Muntu yonso neikale ne mubidi muimpe mupuangane. (Buakabuluibua 21:3, 4) Mu katupa kîpi emu mparadizu pa buloba apa nealue bualu bulelela. Yehowa ke udi mulongolole bua kuenza nanku!

Malu onso atudi batekemene adi Bible muambe akadi pa kukumbana. Bua tshinyi tudi mua kuitaba bua kutushimabu kudi bintu bidibu batendelela pa buloba apa petu ne mushindu wa kueyemena Yehowa ne muoyo mujima? Disua diende ndia se: “bantu bonso basungidibue, bafike ku dimanya dia malu malelela.” (1 Timote 2:3, 4) Pamutu pa tuetu kujimija dîba dietu ne bubanji buetu ku malu a bingenyingenyi anyi bibungibungi bia mu bukua-panu ebu ne nzambi yabu, tuvudijayi dimanya dia Nzambi eu udi mulelela ne tumueyemene ne muoyo wetu mujima.​—Nsumuinu 3:1-6; Yone 17:3.

[Tshimfuanyi mu dibeji 6]

Ku mêsu kua Yehowa ne Yezu, Lazalo uvua mulale patupu

[Bimfuanyi mu dibeji 7]

Mu katupa kîpi mparadizu pa buloba apa nealue bualu bulelela