Kampanye ka pa buaku bua kuabanya broshire mupiamupia
1 Bantu ba bungi lelu mbapangile tshia kuenza bua nsombelu udiku pa buloba, kadi kudi anu bakese badi bumvue bua tshinyi nsombelu udi mushindu eu ne bamanye muikala matuku atshilualua ne tshidibu ne bua kuenza bua kushala ne muoyo mu tshikondo tshia dilumbuluisha didi kumpala eku. (Yeh. 9:4) Bua kumona mua kubatabuluja bua kumanyabu diumvuija dia tshikondo tshitudi etshi, nekuikale kampanye ka pa buaku bua kuabanya broshire wa Nushale anu batabale! kubangila ku Dimue dia 18 Kasuamansense too ne ku Dia lumingu dia 14 Kasuabanga.
2 Netufile broshire eu patudi tuyisha ku nzubu ne ku nzubu, mu makumbula mapiamapia, dîba ditudi tuyisha padi mpunga umueneka ne patudi miaba idi bantu ba bungi bunguile. Kadi broshire wa Nushale anu batabale! katuakumufila tshifilafila nansha. Pamutu pa kuenza nanku, netumufile anu kudi bantu badi baleja dijinga dia kumanya bia bungi pa tshidi Bible wamba bua tshidi mianda idi yenzeka matuku etu aa yumvuija. Aba badi baleja dijinga dikese dia kumanya makuabu malu, nudi mua kubashila trakte kampanda.
3 Muntu udi mua kukuteleja wewe muambe ne:
▪ “Ntatu minene ne malu makole adi enzeka lelu eu adi atonda bantu ba bungi. [Tela tshilejilu tshia bualu budi bumanyike muaba unudi.] Utuku mumanye ne: Bible ukavua madianjile kumanyisha malu aa anyi? [Lekela muntu andamune. Pashishe bala mvese udi ukumbanangana ne bualu buudi mutele, bu mudi wa Matayo 24:3, 7, 8; Luka 21:7, 10, 11; anyi 2 Timote 3:1-5.] Bible udi ufila diumvuija dia tshikondo tshitudi etshi ne uleja tshidi tshindile bantu kumpala kutuyaya eku. Udi musue kumanyaku makuabu malu anyi? [Lekela muntu andamune. Udi mua kufila broshire kudi muntu bikalaye muleje dijinga dilelela dia kumanya bia bungi.] Katuena tusumbisha broshire eu to. Kadi biwikale musue kufilaku diebe diambuluisha bua mudimu wa diyisha udi wenzeka pa buloba bujima, nendiangate ne disanka.”
4 Anyi ngakuilu eu udi mua kuikala muimpe:
▪ “Bantu ba bungi batu bumvua bibi menemene bua malu makole adi abakuata anyi malu makuate buôwa adi enzeka lelu pa buloba. Bamue badi badikonka bua tshinyi Nzambi kêna welaku dîyi mu malu a mushindu eu bua kaenzeki. Bible udi utushindikila ne: mu katupa kîpi emu Nzambi neajikije ntatu ya bantu bonso. Tangila masanka ikala Nzambi mua kubapesha. [Bala Musambu 37:10, 11.] Udi musue kumanyaku malu makuabu a bungi bua tshilumbu etshi anyi?” Ujikije ne mêyi a buena adi ku ndekelu kua dileja didi kulu edi.
5 Ukebe mua kuangata dîna ne adrese wa muntu yonso udi wanyisha broshire ne udilongolole bua kumupinganyina bua kukolesha dijinga didiye nadi. Mudimu wetu wa Bukalenge wa Kasuabanga 2004 neuleje ngenyi ya mushindu wa kuenza nunku. Muntu yeye muleje dijinga dikole dia kumanya bia bungi, udi mua kutuadija diakamue dilonga nende Bible ku diambuluisha dia broshire wa Nushale anu batabale! anyi mukanda mukuabu tshilejilu, broshire wa Utulomba.
6 Broshire eyi neikaleku ku ndekelu kua Tshisangilu tshia Mudimu tshiakonkonona tshiena-bualu etshi. Tudi bamone se: mbimpe bua bamanyishi ne bampanda-njila kuanji kuangata anu bungi budibu nabu dijinga bua matuku a ntuadijilu a kampanye aka ka pa buaku. Yehowa abeneshe mudimu eu wa pa buawu bua butumbi buende ne bua diakalenga dia bantu ba muoyo mutoke ba miaba yonso.—Mus. 90:17.