Tshitupa 6: Tulombolayi malonga a Bible mimpe
Tshia kuenza padi mulongi wela lukonko
1 Pakadi dilonga dimane kubotakana, mbimpe bua kulonga malongesha a mu Bible mu mushindu udiwu malondangane pamutu pa kuenda kutumpika kutua eku kutua kuaka. Kuenza nunku kudi kuambuluisha mulongi bua kuikala ne tshishimikidi tshia dimanya dilelela ne bua kukola mu nyuma. (Kolos. 1:9, 10) Nansha bikale nanku, misangu mivule balongi batu bela nkonko pa biena-bualu bishilashilangane mu dilonga. Mmunyi mutudi mua kuyandamuna?
2 Tuikale ne busunguluji: Padi nkonko ijuka pa tshiena-bualu tshinudi nulonga udi nangananga mua kuyandamuna diakamue. Bikala mukanda unudi nulonga muikale ne diandamuna dia lukonko alu mu tshiena-bualu kampanda tshitshidi kumpala, mbimpe kumulejatshi. Kadi, bikala lukonko luikale kua tshianana anyi lulomba makebulula bua kuluandamuna bimpe menemene, mbimpe bua kuluandamuna kunyima kua dilonga anyi dituku dikuabu. Bamue bamanyishi badi bamona mudibi bimpe bua kufunda lukonko bua kushindikila mulongi ne: tudi bangate lukonko luende ne mushinga, kabidi bidi biambuluisha bua kubenga kupatuka mu tshiena-bualu tshia dilonga.
3 Malongesha a nshindamenu a bungi a mu Bible adi mu mikanda itudi tulonga nayi Bible ne bantu mmafunda mu tshikoso. Nunku netuenze tshinyi bikala mulongi ne lutatu lua kumvua bimpe dilongesha kampanda anyi mulamate anu bikole ku dilongesha kansanga dia dishima? Bidi mua kumuambuluisha binuakonkonona mu mikanda mikuabu kabidi idi yumvuija tshidi Bible wamba bua bualu abu mu bule ne mu butshiama. Bikala mulongi mutshikale anu ne dielakana, lekela bualu abu bulale bufuke bua ulua kuyukila nende musangu mukuabu, kadi tungunukayi anu ne dilonga dienu bu pa tshibidilu. (Yone 16:12) Padi dimanya diende dia Bible dienda divula yeye pende wenda ukola mu nyuma, udi mua kulua kumvua dilongesha dia mu Bible adi bimpe.
4 Wikale ne bupuekele: Wewe kuyi ne diandamuna dilelela dia lukonko, kuenji tshilema tshia kufila diandamuna dia dishima anyi kuleja webe mmuenenu nansha. (2 Tim. 2:15; 1 Pet. 4:11) Ambila mulongi ne: neuye kuenza makebulula pa lukonko luende bua kulua kumuandamuna musangu udi ulonda. Anyi udi mua kuangata lukonko luende bu mushindu muimpe wa kumuleja mua kuenzaye pende makebulula mu mikanda yetu. Ku kakese ku kakese udi mua kumuleja mushindu wa kudikebuluila malu mu mikanda mishilashilangane mipatula kudi bulongolodi bua Yehowa. Mushindu au ke udiye mua kufika ku didipetela yeye nkayende mandamuna a nkonko yende.—Bien. 17:11.