“Kabavua Bajingulule Bivua Bienzeka”

DILENGULULA nansha dikese dia malu adibu batumanyisha bua kutudimuija didi mua kufikisha ku njiwu.

Bena mu tshimenga tshia Darwin (mu ditunga dia Australie) bavua munkatshi mua dilongolola mafesto mu tshidimu tshia 1974 pakumvuabu mpungi ibadimuija bua disemena dia tshipepele tshia mvunde mukole. Bidimu bitue ku 30 bikavua bipite bivua mvunde mikole ya nunku kayiyi mianji kunyangakaja tshimenga tshia Darwin. Kadi bua tshinyi bivua mua kuenzeka bua eu musangu? Bena mu tshimenga ba bungi kabavua bangata njiwu ayi bu milelela to, too ne pakabanga mpepele mikole kutula misaka ya nzubu ne kupula bimanu bia nzubu ivua bantu badiunguijilamu. Dinda diakalonda, tshimenga tshikavua tshishale anu bu tshibutula kale.

Mu ditunga dia Colombie, mu ngondo wa dikumi ne umue wa tshidimu tshia 1985, mukuna kampanda wakaluka mudilu. Neje ne mabue a mashika biakenza bitotshi bia bungi biakabuikila bantu bapite pa 20 000 ba mu tshimenga tshia Armero. Kabavua badianjile kubadimuisha anyi? Mukuna awu uvua muzakale munkatshi mua ngondo ya bungi. Kadi bu muvua bena mu Armero bibidile kusomba ku mpenga kua mukuna eu utu uluka mudilu, ba bungi kabavua bamona bu bualu to. Bakamanyisha mbulamatadi ne: njiwu ivua ne bua kuenzeka mu mutantshi mukese amu, kadi mbulamatadi kakenza tshintu tshia nsongo bua kudimuija bantu to. Bakafila mamanyisha ku tudiomba bua kuleja bantu ne: kakuvua bualu bua kutshinyina to. Bakangata bikolokolo bia mu bitendelelu bua kuambila bantu bua kushalabu polaa. Mu mêba a dilolo, mukuna wakatudika misangu ibidi mu mushindu wa dikema. Wewe uvuaku mua kushiya bintu biebe ne kunyema anyi? Anu bantu bakese ke bakanyema.

Misangu ya bungi bamanyi ba malu a buloba batu bamanyisha ne bujalame bua bungi miaba idi bikumina mua kuenzeka. Kadi kabatu bamanye dîba dilelela ditu bikumina ebi ne bua kuenzeka to. Mu tshidimu tshia 1999, bikumina biakashipa bantu batue ku 20 000 pa buloba bujima. Ba bungi ba ku bantu aba bavua bela meji ne: kabivua mua kubafikila nanku to.

Mmunyi muutu wangata malu atu Nzambi nkayende wamba bua kukudimuija?

Bible wakamanyisha kumpala kua dîba mu mushindu wa dikema malu avua ne bua kuenzeka mu matuku a ku nshikidilu. Bua tuetu kumvua bimpe, udi utubela bua kukonkonona muvua ‘matuku a Noa.’ ‘Mvula mukole au kayi muanji kuloka,’ bantu bavua benza anu malu avuabu ne tshibidilu tshia kuenza, tshikisu tshivuaku katshivua tshibambila bualu nansha. Pa bidi bitangila didimuija divua Nzambi mudimuije bantu ku butuangaji bua musadidi wende Noa, bantu “kabavua bajingulule bivua bienzeka. Kupapukilabu amu pavua mvula mukole mupite ubanga kuloka, ubabutula bonsu.” (Matayo 24:37-39, MMV) Wewe uvua mua kuikala mulonde didimuija adi anyi? Ke muudi wenza mpindieu anyi?

Uvua mua kuikala muenze tshinyi bu wewe muikale usombela mu Sodoma mu matuku a Lota (muana wa muanabu ne Abalahama) pabuipi ne Mbuu Mufue? Muaba uvuaye musombele uvua anu bu mparadizu. Tshimenga tshivua ne bubanji bua bungi. Bantu bavua benza bionso bivua bibasamina muoyo. Mu matuku a Lota, “bantu bavua badia, banua, basumba, bapana, bakuna, bibaka.” Muaba uvuabu basombele uvua ne buenzavi kabuyi kuamba. Uvuaku mua kuikala muteleje Lota pavuaye ukandika malu mabi anyi? Uvuaku mua kuikala mumuteleje pavuaye mua kukuambila ne: Nzambi uvua mupangadije bua kubutula tshimenga tshia Sodoma anyi? Peshi uvua mua kuikala mubiangate anu bu bilele bia tshianana bu muvua bansongalume bavua basua kusela bana ba Lota anyi? Uvuaku pamu’apa mua kutuadija kunyema kadi kutangila panyima bu muvua mukaji wa Lota muenze anyi? Nansha muvua bakuabu bantu kabayi bangata didimuija edi ne mushinga, dituku diakapatuka Lota mu Sodoma, “[Nzambi] kutuma kapia ne mfundanga bia mu diulu, kubabutula bonso.”—Luka 17:28, 29, MMM.

Ba bungi mu matuku etu aa kabena bateya ntema to. Kadi mbalame bilejilu ebi mu Dîyi dia Nzambi bua kutudimuija, bua kutukankamija bua KUSHALA ANU BATABALE!

[Kazubu/Tshimfuanyi mu dibeji dia 22]

Mvula wa kabutu wakaloka bushuwa anyi?

Bena mpata ba bungi badi bamba ne: mvula au kakaloka to. Kadi Bible udi wamba ne: mvula au wakaloka.

Yezu Kristo nkayende wakakula bua bualu bua mvula au, ne uvua mu diulu pavua mvula au uloka.

[Kazubu/Tshimfuanyi mu dibeji dia 23]

Bakabutula Sodoma ne Amola bulelela anyi?

Bintu bikalula mu maloba bidi bijadika bualu ebu.

Malu a kale adi akula bua bualu ebu.

Yezu Kristo wakadimuena nkayende kabutu ka misoko eyi, ne mikanda 14 ya mu Bible idi yakula bua muanda eu.