Programe wa dîku bua kuyisha pamue ne bena mu dîku

¹ Yehowa utu usanka padiye umona bana batumbisha dîna diende. (Mus. 148:12, 13) Mu matuku a Yezu nansha ‘bana bakese ne bakadi bamua mabele’ bakatumbisha Nzambi. (Mat. 21:15, 16) Bualu bua muomumue budi buenzeka kabidi lelu. Mmunyi mudi baledi mua kuambuluisha bana babu bua kuikalabu ne tshisumi tshia kutumbisha Yehowa mu mudimu wetu wa buena Kristo? Kudi anu ku diambuluisha dia tshilejilu tshiabu tshimpe anu bu mudibi bileja mu tshiena-bualu tshidi tshiakula bua bisangilu bia tshisumbu tshidi kulu eku. Tatu mukuabu wakakula mu dîna dia baledi ba bungi wamba ne: “Bana kabatu benza bitudi tuamba mukana to, badi benza bitubu batumona tuenza!”

² Muanetu kampanda wa bakaji uvuabu bakoleshe kudi baledi batshinyi ba Nzambi udi uvuluka ne: “Katuvuaku banji kubika mu dinda dia Disambombo tudiebeja ni tuvua ne bua kuya mu buambi anyi kubenga kuyamu. Tuvua anu bamanye ne: tuvua ne bua kuya mu buambi.” Bia muomumue, nudi mua kulongesha bana benu mushinga wa kuyisha pa kuenza programe muimpe wa ku lumingu luonso bua dîku kuikaladi dipatuka mu buambi. Ne programe eu kêna anu bua kuleja bana benu mushindu unudi nuyisha, kadi udi unuambuluisha kabidi bua nuenu kumona meji adibu nawu, bikadilu biabu ne mudibu baya kumpala mu mudimu eu.

³ Balongeshayi ku kakese ku kakese: Bua bana kunangabu mudimu wa buambi, badi dijinga ne dibalongesha bua kumonabu mua kuyisha bimpe. Muanetu wa bakaji utuvua batele kuulu eku wakamba kabidi ne: “Katuvua bana bavua baya anu kufila baledi betu patupu mu mudimu wabu bobu wa buambi to. Tuvua bamanye ne: tuvua petu ne bua kuenza mudimu, bu mudi kukokola ku tshiibi ne kushila bantu trakte. Mutuvua tudilongolola bimpe kumpala kua midimu yonso ya ku ndekelu kua lumingu, tuvua bamanye bituvua mua kuamba.” Nudi mua kulongesha bana benu mushindu eu pa kuangata minite mikese lumingu luonso bua kulongolola nabu mudimu wa buambi dîba dia dilonga dia mu dîku anyi dîba dikuabu.

⁴ Kuyisha pamue ne bena mu dîku kudi kunupetesha mushindu wa kubueja bulelela munda mua bana benu. Tatu kampanda muena Kristo uvua uya pa tshibidilu ne muanende wa bakaji mutantshi wa kilometre 10 bua kuabanya trakte kudi bena musoko uvua mu tshibanda tshivua pabuipi nabu. Muana wa bakaji eu udi uvuluka wamba ne: “Patuvua tuenza ngendu ayi ne Tatu ke pavuaye ubueja bulelela mu mutshima wanyi.” (Dut. 6:7) Bia muomumue, nudi penu mua kupeta mabenesha pa kubueja mudimu wa buambi mu programe wenu wa ku lumingu luonso wa dîku.