Tutabalelayi bakuabu: Pa kuyisha bilondeshile malu atudi tupeta
1 Mupostolo Paulo wakatushila tshilejilu tshimpe mu muanda eu, bualu misangu yonso uvua uyisha lumu luimpe bilondeshile malu a bantu ne ngelelu wabu wa meji. (1 Kol. 9:19-23) Tudi ne bua kuditatshisha bua kuenza bia muomumue. Tudi mua kudianjila kulongolola mishindu ya kuyisha itu ipatuka mu Mudimu wetu wa Bukalenge idi ipetangana ne malu a bantu ba mu teritware wetu. Patudi tusemena pabuipi ne nzubu kampanda, tudi mua kukeba bua kumanya malu adi asankisha muena nzubu ne kuabueja mu muyuki wetu. Kadi kudi mushindu mukuabu utudi mua kuakaja mudimu wetu.
2 Tuakaje nyishilu wetu bilondeshile bidi bakuabu bamba: Pa tshibidilu patudi tuyisha lumu luimpe, tutu tuela bantu nkonko ne tubalomba bua batuandamune. Mmunyi muutu umona diandamuna adi? Utu wanyisha diandamuna adi pa mutu pa mutu ne utungunuka anu ne biuvua mulongolole anyi? Peshi biudi wamba pashishe bituku bileja muudi wangata diandamuna dia muntu eu ne mushinga? Wewe utabalela bidi bakuabu bamba ne muoyo mujima, udi mua kupeta mushindu wa kuela nkonko mikuabu ne bukalanga bua kumanya tshidi mu meji abu. (Nsu. 20:5) Dîba adi udi mua kushindamena pa bitupa bia mukenji wa Bukalenge bidi biandamuna bimpe ku malu adi atamba kutatshisha mukuyukidishi.
3 Bidi bilomba kuikala badilongolole bua kuyukila ne bantu pa biena-bualu bikuabu, pa kumbusha bituvua balongolole bua kuyukila nabu. Tuetu batuadije ne bualu kampanda bua mu ngumu ituvua bumvue ne muntu yeye mutule buende bua muaba udiye anyi budi bumutonde, dimutabalela ne muoyo mujima neditusake bua kuyukila nende malu a mu Bible adi ne mushinga wa bungi buende yeye.—Filip. 2:4.
4 Tulongololayi mua kutuadija kuyukila: Padi muntu ujula lukonko, tudi mua kumona bimpe mua kutungunuka ne kuyukila nende pashishe, kunyima kua tuetu bamane kupeta malu makuabu pa tshiena-bualu atshi. Tudi kabidi mua kumupesha mikanda yetu idi ikonkonona bimpe tshiena-bualu atshi. Bionso ebi bidi bileja dijinga dikole ditudi nadi dia kuambuluisha bakuabu bua bamanye Yehowa.—2 Kol. 2:17.