Mushindu wa kuikala amu ne tshisumi
1 Tshisumi tshidi natshi bena Kristo ba lelu mu mudimu wa buambi, tshidi tshituvuluija tshisumi tshivua natshi Apolo. (Bien. 18:24-28) Kadi badi batuambila tuetu bonso ne: ‘Mu disuminyina kanuikadi bajanguluki; nuikale ne lukunukunu mu mitshima yenu.’ (Lomo 12:11) Kadi ntshinyi tshidi mua kutuambuluisha bua kupeta tshisumi mu mudimu wa buambi ne kuikala amu natshi?
2 Dimanya didi divudija tshisumi: Panyima pa Yezu mumane kumuenekela bayidi bende babidi ne ‘mubajinguluile malu akafundabu mu Mukanda wa Nzambi onso bualu buende,’ bakebejangana ne: ‘Mitshima yetu kayakadi itema munda muetu, pakadiye utuambila malu mu njila anyi?’ (Luka 24:27, 32) Katutuku petu tumvua disanka dia bungi patutu tumanya bualu bupiabupia bua mu Dîyi dia Nzambi anyi? Kakuyi mpata, dimanya didi dikolesha ditabuja dietu. Lomo 10:17 udi wamba ne: ‘Ditabuja didi difuma ku diumvua bualu.’ Patudi tutuishibua ne: bionso bidi Yehowa mulaye nebikumbane, katuakulekela bua kuakula bua malu atudi bumvue to.—Mus. 145:7; Bien. 4:20.
3 Kadi katuedi meji ne: dimanya ditudi bapete mu dilonga dietu dia Bible nkayadi ke diatuambuluisha bua kushala anu banange Nzambi ne kuikala ne tshisumi mu mudimu wende to. Tudi ne bua kutungunuka ne kuvudija dimanya dietu dia bulelela ne kunanga Yehowa bikole. Tshianana, tshisumi tshietu mu mudimu wa buambi netshituadije kukepa ku kakese ku kakese too ne muatutondawu. (Buak. 2:4) Dîyi dia Nzambi didi ditulomba bua tutungunuka ne ‘kudiundadiunda mu kumanya kuetu kua Nzambi.’—Kolos. 1:9, 10.
4 Mushindu ututu tudilongela: Mbimpe tuetu kukonkonona bimpe mushindu ututu tudilongela. Tshilejilu, tudi mua kuela tushonyi ku mandamuna a dilonga dia Tshibumba tshia Nsentedi ne kuandamuna bimpe patudi tutshilonga mu tshisumbu. Kadi tutuku tukeba mvese idibu bafile, tuyibala mu Bible ne tukeba mushindu utudi mua kuyitumikila anyi? Patutu tubala Bible lumingu luonso, tutuku tudienzeja bua kukeba malu makuabu mu mikanda yetu patudi ne mushindu, ne tuela meji pa malongesha atudi mua kupeta anyi? (Mus. 77:11, 12; Nsu. 2:1-5) Mbimpe tuetu kuela meji bikole ne kudifila ne muoyo mujima mu dilonga Dîyi dia Nzambi. (1 Tim. 4:15, 16) Kulonga mushindu’eu kudi kutuambuluisha ne kutupetesha bukole bua kuikala ne “lukunukunu lua kuenza midimu mimpe.”—Tito 2:14.